Enyɔbiɔse Ciwo yí so yi Hlɛntɔwo Gbɔ

Hamɛ lɔ yí ɖo awa do jeshidoamɛ nyɔ ci wonu le 2 Tɛsalonikitɔwo 3:14 mɛa alo Kristotɔ ɖekaɖeka?

Apotru Pɔlu ŋwlɛ nu nɔ Kristotɔ ciwo yí le Tɛsaloniki yí mɔ: “Nɔ́ amɛɖe dewa do enyɔ ci yí mì ŋwlɛkɔ do wema cɛ mɛ ji o ɔ, mí do jeshi nɛnɛ mɛ nywiɖe.” (2 Tɛs. 3:​14, Ezoɖuɖu Yoyu Wema) Sasaɔ, mìnunɔ mɔ hamɛmɛshinshinwo yí awa do emɔdasɛnamɛ cɛ ji. Hwenɔnuɔ, nɔ mɛɖe kpɔtɔ yí gbegbeɛ mɔ yedawa do Bibla gɔnmɛɖosewo ji o, ci wokplakpla nu yi gbɛmɛgbɛmɛ can ɔ, hamɛmɛshinshinwo atɛnŋ ana nuxu ɖeka yí asɔ kanxle hamɛ lɔ. Le yi goduɔ, eŋɛnywidratɔwo ami eha dodo koɖo mɛ ci wodo jeshi lɔ.

Vɔ, eʒan mɔ mìawa trɔtrɔ so nyɔ cɛ nu. Mìvamɔŋje mɛ yɛ mɔ Pɔlu nukplamu lɔ yikɔ nɔ Kristotɔ ɖekaɖeka yí woɖo awa ahan le nɔnɔmɛ ɖekatɔwo mɛ. Eyi taɖo deʒan mɔ hamɛmɛshinshinwo ana amɛkanxle nuxu ɖe o. Nyi yí taɖo mìwa trɔtrɔ cɛɔ? Mìabu tamɛ kpɔ so kpukpui ciwo yí trɔdo Pɔlu nukplamu lɔ nu.

Pɔlu do jeshi mɔ mɛɖewo le hamɛ lɔ mɛ ‘zɔnzɔn hannyahannya.’ Wogbenɔ mɔ yewodawa do nukplamu ciwo yí Mawu na ji o. Le amɛjijikpɔ ŋkɔtɔ yitɔ mɛɔ, éna emɔdasɛnamɛ cɛ wo yí mɔ: “Nɔ́ amɛ ɖe de wa edɔ ɔ, dá ɖu enu o.” Vɔ mɛɖewo kpɔtɔ gbegbeɛ mɔ yewodawa edɔ keŋ akpɔ yewoɖeki ji o, ci ŋsɛn le wo nu can. Gbesɔ kpe niɔ, wogbedodoɔ nu mɛbuwo nyɔwo mɛ. Lé Kristotɔwo wa nu do mɛ ciwo yí zɔnnɔ hannyahannya ŋtɔ́wo nu doɔ?—2 Tɛs. 3:​6, 10-12.

Pɔlu nu mɔ “mí do jeshi nɛnɛ mɛ nywiɖe.” Grɛki nyɔgbe cɛ dasɛ mɔ wo le do jeshi mɛ ŋtɔ́ veviɖe. Pɔlu nakɔ emɔdasɛnamɛ cɛwo hamɛ lɔ pleŋ, denyi hamɛmɛshinshinwo ɖekɛwo yɔ o. (2 Tɛs. 1:1; 3:6) Eyi taɖo Kristotɔ ɖekaɖeka yí atɛnŋ alé ŋkuvi do yi kpena Kristotɔ ci yí zɔnzɔn yakayaka ci yí gbe mɔ yedazɔn do Mawu nukplamuwo ji o yí ‘ŋgbe gbe do eha koɖi’ o.

Ecɛ dasɛ mɔ woawa nu do mɛ ŋtɔ́ nu shigbe mɛ ci woɖe ti le hamɛ lɔ mɛ nɛa? Oo, ɖo Pɔlu nu kpi mɔ: “Kplanu yi shigbe nɔvinɔ ɛnɛ.” Eyi taɖo Kristotɔ ɖekaɖeka akpɔtɔ adodoɔ eha koɖo mɛ ci wodojeshi lɔ le bɔbɔwo koɖo le kunuɖeɖedɔ lɔ mɛ, vɔ wotɛnŋ sɔ gbeta mɔ yewodanɔ koɖi le ejunɔnɔ ɖewo mɛ o. Nyi yí taɖoɔ? Pɔlu nu mɔ: “Ðootɔ, ŋkpɛn a wɛ.” Nɔ ŋkpɛn wa Kristotɔ ci yí zɔnkɔ yakayaka yí wodo jeshi lɔɔ, ecɛ adɔ yí awa trɔtrɔwo le yi gbe mɛ.—2 Tɛs. 3:​14, 15.

Lé Kristotɔwo atɛnŋ awa do nukplamu cɛ ji le egbɛ mɛɔ? Ŋkɔtɔɔ, mìɖo akando ji mɔ amɛ lɔ dewakɔ nu nywiɖe o yí enyi ‘zɔnzɔn hannyahannya’ ci nu Pɔlu xo nuxu so zɔnkɔ yí ele. Pɔlu dexokɔ nuxu so mɛ ciwo yí ayexa wowotɔ dɔ yí gbeta ci wosɔnɔ to akpo nɔ mìwotɔ o alo lé enu ciwo yí jɔnɔ ji nɔ mìwo ɖekaɖeka to akpo do o. Yí denyi mɛ ciwo yí do dɔmɛzi nɔ mì kpoŋ can yɔ o. Ewaɖeɔ, mɛ ciwo yí ɖui koŋ yí gbe mɔ yewodawa do nukplamu Mawu tɔwo ji nu yí Pɔlu xokɔ nuxu so.

Egbɛɔ, nɔ mìdo jeshi mɔ mìwo kpena Kristotɔ ɖe gbegbeɛ mɔ yedawa do Mawu sewo jiɔ,a mìasɔ gbeta mìwoŋtɔwo mɔ mìdado eha koɖi le ejunɔnɔ ɖekatɔwo mɛ o. Amɛŋtɔ gbetasɔsɔ yɔ, mìdeɖo anui nɔ mɛbuwo le mìwo xomɛ o. Mìakpɔtɔ adodoɔ eha koɖi le mìwo bɔbɔwo koɖo kunuɖeɖedɔ lɔ mɛ. Nɔ évatrɔ adɛn ɔ, mìagbetrɔ atɔ eha dodo koɖi ke shigbe lé mìwɛni do sa nɛ.