Ŋɖo asɔ nyɛɖeki na Mawu yí awa ʒinʒindoshimɛa?

1. Ci èkpla wema cɛ keke va ɖo lɛ ɖe, nyi nu ele mɔ àbu tamɛ kpɔ soɔ?

ÈKPLA Bibla mɛ nyɔnɔnwi sugbɔ le wema cɛ mɛ. Èkpla nu so agbe mavɔ gbe ci Mawu ɖo, nɔnɔmɛ ci mɛ yí amɛ kukuwo le koɖo fɔnfɔnsoku mɔkpɔkpɔ nu. (Ŋununyatɔ 9:5; Luiki 23:43; Ʒan 5:​28, 29; Enyɔdasɛ 21:​3, 4) Taŋfuin ètɔ Yehowa Kunuɖetɔwo bɔbɔwo yiyi, yí kpɔɛ mɔ wowo sɛnsɛn yí nyi adodwi lɔ. (Ʒan 13:35) Taŋfuin èna yí eo koɖo Yehowa xlɔnyinyi sɛnkɔŋ doji, yí èɖui mɔ yeasiin. Vɔ ètɛnŋ biɔkɔ eoɖeki se mɔ, ‘Ecɛ yɛ ɖe, nyi yí ŋɖo awa yí asɛn Mawuɔ?’

2. Nyi yí taɖo ŋsu Etiopitɔ ɖeka ji mɔ yeawa ʒinʒindoshimɛɔ?

² Enyɔ ŋtɔ́ yí ŋsu Etiopitɔ ɖeka ci yí nɔ agbe le Yesu hwenu biɔ se nɛ. Azan ɖewo le fɔnfɔnsoku Yesu tɔ goduɔ, yi nukplavi Filipu ɖe kunu nɔ ŋsu cɛ. Filipu ɖo kpe yi ji ni mɔ Yesu yí nyi Mɛsia lɔ. Enu ci ŋsu Etiopitɔ lɔ kpla, wa dɔ do ji sugbɔ yí enu zeɖeka mɔ: “Kpɔ ɖa! Eshi ke; nyi yí xe mɔ nɔŋ yí ŋdawa ʒinʒindoshimɛɔ?”​—Edɔwawawo 8:​26-36, nwt.

3. (a) Nyi Yesu dɔ yi dokplɔtɔwo mɔ wo le waɔ? (b) Lé ele mɔ woawa ʒinʒindoshimɛ doɔ?

³ Bibla kpla nu yí eze petii mɔ, nɔ mɛɖe ji mɔ yeasɛn Yehowaɔ, éɖo awa ʒinʒindoshimɛ. Yesu nu nɔ yi dokplɔtɔwo mɔ: “Mí yi yí aɖo dɔkplaviwo le jukɔnwo pleŋ mɛ. Mí do wo eshimɛ.” (Matie 28:19) Yesu ŋtɔ can wa ʒinʒindoshimɛ yí sɔ ɖo kpɔwɛ ɖɛ nɔ mì. Yiŋtɔ pleŋ yí woʒin do eshi mɛ, denyi eshi wodo ta ni o. (Matie 3:16) Nɔ Kristotɔ ɖe awa ʒinʒindoshimɛ gbɛɔ, woɖo aʒin do shi mɛ pleŋpleŋ.

4. Nyi yí ʒinʒindoshimɛwawa ao tɔ adasɛ nɔ mɛbuwoɔ?

⁴ Nɔ èwa ʒinʒindoshimɛɔ, àdasɛ nɔ mɛbuwo mɔ yeji veviɖe mɔ yeanyi Mawu xlɔ yí asiin. (Ehajiji Wema 40:​7, 8) Eyi taɖo àtɛnŋ abiɔ eoɖeki se mɔ, ‘Nyi ŋɖo awa gbɔxwe awa ʒinʒindoshimɛɔ?’

ENUJEJESHI KOÐO XƆSE

5. (a) Nyi ele mɔ àwa doŋkɔ gbɔxwe awa ʒinʒindoshimɛɔ? (b) Nyi yí taɖo Kristotɔwo bɔbɔwo yiyi le veviɖeɔ?

⁵ Gbɔxwe yí àtɛnŋ awa ʒinʒindoshimɛɔ, èɖo ajeshi Yehowa koɖo Yesu ɖɛ. Ètɔ wɛwɛ to Bibla kplakpla ji vɔ. (Hlɛn Ʒan 17:3.) Vɔ ecɛ ɖekɛ desun o. Bibla nu mɔ èɖo ‘aɖɔ koɖo enujejeshi adodwitɔ’ ci yí kudo Yehowa dro nu. (Kolosetɔwo 1:​9, nwt) Yehowa Kunuɖetɔwo bɔbɔwo akpedo eo nu yí ekacaca ci yí le eo koɖo Yehowa gblamɛ asɛnŋ doji. Ecɛ nyi susu vevi ɖeka ci yí taɖo àyinɔ bɔbɔ lɔwo gashiagamɛ.​—Ebretɔwo 10:​24, 25.

6. Nyi yí ele mɔ àjeshi le Bibla mɛ gbɔxwe awa ʒinʒindoshimɛɔ?

⁶ Nyɔnɔnwi enyi mɔ Yehowa dekpɔkpɔ mɔ mɔ àjeshi enushianu le Bibla mɛ gbɔxwe awa ʒinʒindoshimɛ o. Debiɔ so ŋsu Etiopitɔ lɔ shi mɔ, yɛajeshi enushianu gbɔxwe awa ʒinʒindoshimɛ o. (Edɔwawawo 8:​30, 31) Mìakpɔtɔ akplakɔ nu so Mawu nu yi mavɔmavɔ mɛ. (Ŋununyatɔ 3:11) Vɔ gbɔxwe àwa ʒinʒindoshimɛɔ, ele mɔ àjeshi Bibla gɔnmɛjeje nukplakplawo yí agbelɔn do wo ji.​—Ebretɔwo 5:12.

7. Lé ao Bibla kplakpla kpedo eo nu doɔ?

⁷ Bibla nu mɔ: “Xɔse mali ɔ, amɛ da tɛnŋ jɔji nɔ Mawu o.” (Ebretɔwo 11:6) Eyi taɖo ele mɔ àɖo xɔse gbɔxwe awa ʒinʒindoshimɛ. Bibla nu nɔ mì mɔ le Korɛnti jugan xoxwitɔ mɛɔ, mɛɖewo ɖo to Yesu dokplɔtɔwo nukplakpla, ci yí na mɔ ‘woxɔɛ ji se, yí woʒin wo do eshi mɛ.’ (Edɔwawawo 18:​8, nwt) Ahanke ao Bibla kplakpla lɔ kpedo eo nu yí èɖo xɔse do Mawu gbeɖuwo koɖo ŋsɛn ci yí le Yesu Kristo vɔnsa lɔ, ci yí atɛnŋ ahwlɛn mì gan le nuvɔn koɖo eku shi nu nɛ.​—Ӡozue 23:14; Edɔwawawo 4:12; 2 Timɔte 3:​16, 17.

NU BIBLA MƐ NYƆNƆNWI LƆ NƆ MƐBUWO

8. Nyi yí acucu eo yí nanu enu ciwo yí èkplakɔ nɔ mɛbuwoɔ?

⁸ Zenɛni ci èkplakɔ nu le Bibla mɛ yí kpɔkɔ lé ekpekɔdo eo nu do le ao gbe mɛɔ, ahanke ao xɔse asɛnkɔŋ doji nɛ. Àvaji mɔ yeaxo nuxu so enu ciwo yí èkplakɔ nu nɔ mɛbuwo. (Ʒeremi 20:9; 2 Korɛntitɔwo 4:13) Vɔ miwo yí ànui nɔɔ?

9, 10. (a) Miwo yí ànu enu ciwo yí èkplakɔ nɔɔ? (b) Nyi yí àwa nɔ èji mɔ yeaɖe kunu koɖo hamɛ lɔɔ?

⁹ Àtɛnŋ aji mɔ yeanu enu ciwo èkplakɔ nɔ ao xomumɛtɔwo, ao xlɔwo, ao xwexatɔwo alo ao dɔmɛkpenawo. Ecɛ wawa nyɔ, vɔ sɔ xomɛfafa koɖo lɔnlɔn wɛni gashiagamɛ. Le ŋkɔ mɛɔ, àtɛnŋ avawa ɖeka koɖo hamɛ lɔ yí atɔ kunu ɖeɖe. Nɔ èkpɔ mɔ yesɔ gbe yí awɛɔ, nu nɔ Kunuɖetɔ ci yí kplakɔ Bibla koɖu. Nu ni mɔ yeji mɔ yeatɔ kunu ɖeɖe koɖo hamɛ lɔ. Nɔ ékpɔɛ mɔ èsɔ gbe awɛ dru, yí ao gbenɔnɔ sɔ koɖo Bibla nukplakplawoɔ, hamɛmɛshinshin amɛve ado go koɖo mí amɛve lɔwo.

¹⁰ Lé egododo lɔ ayi doɔ? Hamɛmɛshinshin lɔwo axo nuxu koɖo eo, yí akpɔ mɔ èjeshi Bibla gɔnmɛjeje nukplakplawo yí xɔ wo ji se ma. Woagbekpɔ mɔ èzɔnkɔ do Bibla nukplakplawo ji le ao gbenɔnɔ mɛ yí jikɔ veviɖe mɔ yeatrɔ Yehowa Kunuɖetɔ ma. Ðo ŋwi mɔ hamɛmɛshinshinwo lenɔ bu nɔ haamɛ tɔ ɖeshiaɖe yí eo can èle mɛ. Eyi taɖo xo nuxu nɔ wo faa, ŋgbevɔn o. (Edɔwawawo 20:28; 1 Piɛ 5:​2, 3) Le egododo lɔ goduɔ, nɔ èje yí atɔ kunu ɖeɖe koɖo hamɛ lɔɔ, hamɛmɛshinshin lɔwo anui nɔ eo.

11. Nyi yí taɖo ele veviɖe mɔ àwa ashitrɔtrɔwo gbɔxwe atɔ kunu ɖeɖe koɖo hamɛ lɔɔ?

¹¹ Hamɛmɛshinshin lɔwo atɛnŋ anu nɔ eo mɔ, ashitrɔtrɔ ɖewo gbeʒan yí àwa gbɔxwe atɔ kunu ɖeɖe koɖo hamɛ lɔ. Nyi yí taɖo ele veviɖe mɔ àwa ashitrɔtrɔ ŋtɔ́woɔ? Ðo nɔ mìxokɔ nuxu nɔ amɛwo kudo Yehowa Mawu nuɔ, edasɛ mɔ mìle yi dumɛ, eyi taɖo mìwo gbenɔnɔ ɖo ado bubu yi nu.​—1 Korɛntitɔwo 6:​9, 10; Galatitɔwo 5:​19-21.

TRƆ JI MƐ YÍ ATRƆ LE GODU NƆ NUVƆN

12. Nyi yí taɖo eʒan mɔ amɛshiamɛ atrɔ ji mɛɔ?

¹² Enu bu ɖewo gbeli yí èɖo awa gbɔxwe awa ʒinʒindoshimɛ. Apostolo Piɛ nu mɔ: “Eyi taɖo mítrɔ ji mɛ, yí atrɔ, nɔ woacucu míwo nuvɔnwo si.” (Edɔwawawo 3:​19, nwt) Nyi yí jimɛtrɔtrɔ nyiɔ? Édasɛ mɔ mìase vevi do enuvwin ci yí mìwa ŋci veviɖe. Le kpɔwɛ mɛ, nɔ èwanɔ hashi alo mateliɔ, eʒan mɔ àtrɔ ji mɛ. Vɔ nɔ ète kpɔ yí wanɔ nunywi le ao gbenɔnɔwo pleŋ mɛ can ɔ, egbeʒan dandandan mɔ àtrɔ ji mɛ, ɖo mìwo pleŋ yí wanɔ nuvɔn yí eʒan mɔ mìabiɔ sɔsɔke Mawu.​—Rɔmatɔwo 3:23; 5:12.

13. Enyɔgbe ci yí nyi “atrɔ” gɔnmɛ ɖe?

¹³ Vevisese do nuvɔn ciwo yí èwa nu ɖekɛ sun a? Oo. Piɛ nu mɔ, ègbeɖo “atrɔ.” Ecɛ dasɛ mɔ, èɖo agbe wana xoxui ciwo yí denyɔ o yí atɔ enunywi wawa. Le kpɔwɛ mɛ, sɔɛ mɔ ŋkɔtɔ ke yí èyikɔ texwe ɖe, vɔ èvado jeshi mɔ yebu mɔ. Nyi èɖo awaɔ? Kankandojitɔɔ, àtɔ blɛwu zɔnzɔn yí anɔ te, keŋ atrɔ, yí asɔ emɔ nywitɔ lɔ. Ahanke nɔ èkplakpla Biblaɔ, àvakpɔɛ mɔ wana alo ŋɖewo le ao gbenɔnɔ mɛ ciwo nu ele mɔ àtrɔ ashi le. Lɔn faa yí “atrɔ” alo awa trɔtrɔ ciwo yí ʒan, keŋ atɔ enunwyi wawa.

SƆ EOÐEKI NA

14. Lé àsɔ eoɖeki na Mawu doɔ?

¹⁴ Afɔɖeɖe vevi bu ci èɖo awa gbɔxwe yí awa ʒinʒindoshimɛ yí nyi eoɖekisɔsɔna Yehowa. Nɔ èsɔ eoɖeki na Yehowaɔ, edasɛ mɔ èwa gbedodoɖa ci mɛ ènu nɔ Yehowa le mɔ yiɖekɛ kpaŋ yeasɛn, yí edro yi tɔ wawa yí anyi enu vevitɔ nɔ ye le agbe mɛ.​—2 Ese Wema 6:15.

15, 16. Nyi yí acucu mɛɖe yí asɔ yiɖeki na Mawuɔ?

¹⁵ Egbeɖoɖo mɔ yeasɛn Yehowa ɖekɛ kpaŋ le shigbe egbeɖoɖo mɔ, yeanɔ mɛ ci èlɔn gbɔ keke asɔyi hannɛ. Sɔɛ mɔ ŋsu ɖe koɖo nyɔnu ɖe zɔnkɔ. Nɔ ŋsu lɔ vajekɔshi nyɔnu lɔ ɖɛ nywiɖeɔ, ávaluin yí aji mɔ yeaɖi ɖɛ. Gbetasɔsɔ vevi ɖeka yɔ, gan ŋsu lɔ lɔn faa mɔ yeawɛ, ɖo élɔn nyɔnu lɔ.

¹⁶ Ci èkplakɔ nu so Yehowa nuɔ, èvaluin yí ji mɔ yeawa nushianu keŋ asiin. Ecɛ acucu eo yí nado gbe ɖaɖa yí aɖo gbe nɔ Yehowa mɔ yeasiin. Bibla nu mɔ, mɛɖekpokpui ci yí ji mɔ yeakplɔ Yesu do “ɖo a gbe yiɖeki.” (Maki 8:34) Enyɔ cɛ gɔnmɛ ɖe? Yi gɔnmɛ yí nyi mɔ, tonusese nɔ Yehowa anyi enu vevitɔ nɔ eo le agbe mɛ. Yehowa dro yí anyi enu vevitɔ nɔ eo sɔwu ao drowo koɖo ao tajinuwo.​—Hlɛn 1 Piɛ 4:2.

ŊGBEVƆN MƆ YIDAVAKPA YE O

17. Nyi yí taɖo mɛɖewo dejinɔ mɔ yewoasɔ yewoɖekiwo na Yehowaɔ?

¹⁷ Mɛɖewo desɔ wowoɖekiwo na Yehowa o, ɖo wovɔnkɔ mɔ yewodatɛnŋ awa do egbe ci yewoɖo mɔ yewoasin ji o. Wodeji mɔ yewoado ŋkpɛn Yehowa o, alo wogbebunɔ mɔ nɔ yewodesɔ yewoɖekiwo na Yehowaɔ, yɛdabiɔ kɔnŋta yewo kudo yewo nuwanawo nu o.

18. Nyi yí akpedo eo nu yí naɖu vɔnvɔn mɔ yeavado ŋkpɛn Yehowa jiɔ?

¹⁸ Ao lɔnlɔn nɔ Yehowa akpedo eo nu yí naɖu vɔnvɔn mɔ yeado ŋkpɛn yi ji. Ci èlɔn Yehowaɔ, àwa do egbe ci èɖo ni ji. (Ŋununyatɔ 5:4; Kolosetɔwo 1:10) Àvakpɔɛ mɔ, Yehowa dro wawa degbɔnnu sugbɔ o. Apostolo Ʒan ŋwlɛn mɔ: “Lɔnlɔn Mawutɔ nyi mɔ, mì a wanɔ do Yi sewo ji. Yí, Yi sewo de gbɔnnu o.”​—1 Ʒan 5:3.

19. Nyi yí taɖo deɖo avɔn nɔ eoɖekisɔsɔna Yehowaɔ?

¹⁹ Deʒan mɔ anyi amɛkpekpe gbɔxwe asɔ eoɖeki na Yehowa o. Dekpɔkɔ emɔ mɔ mìawa enu ci yí wugan wu enujikpekpe mìwo tɔ gbeɖe o. (Ehajiji Wema 103:14) Ákpedo eo nu yí nawa nunywi. (Ezai 41:10) Ðoŋ do Yehowa nu koɖo ao ji pleŋ, eyi “ana yí ao mɔwo ajɔ.”​—Elododo Wema 3:​5, 6, nwt.

XƆSE MƐ HUNHUN LE JUGBAJA NƆ HWLƐNGAN

20. Nɔ èsɔ eoɖeki na Yehowa vɔ ɖe, afɔɖeɖe ci yí akplɔɛdoɔ?

²⁰ Èkpɔɛ mɔ yele gbesɔsɔ yí asɔ yeɖeki na Yehowaa? Nɔ èsɔ eoɖeki na Yehowa vɔɔ, èle gbesɔsɔ yí awa afɔɖeɖe ci yí kplɔɛdo. Èɖo awa ʒinʒindoshimɛ.

21, 22. Lé àhun ao xɔse mɛ “le jugbaja” doɔ?

²¹ Na nɔ hamɛmɛshinshinwo-ha ɖoɖowo jikpɔtɔ anya mɔ, èsɔ eoɖeki na Yehowa yí jikɔ mɔ yeawa ʒinʒindoshimɛ. Ána hamɛmɛshinshin ɖewo akije Bibla gɔnmɛjeje nukplakplawo mɛ koɖo eo. Nɔ wokpɔɛ mɔ èsɔ gbeɔ, woanu nɔ eo mɔ àtɛnŋ awa ʒinʒindoshimɛ le Yehowa Kunuɖetɔwo takpekpe ci yí gbɔkɔ mɛ. Le takpekpe lɔ mɛɔ, woana nuxu ɖeka ci yí aɖe gɔnmɛ nɔ ʒinʒindoshimɛ lɔ. Nuxuxotɔ lɔ abiɔ enyɔ fafɛ amɛve ʒinʒindoshimɛwatɔ lɔwo se. Nɔ èɖo enyɔbiɔse cɛwo nuɔ, èhun ao xɔse mɛ “le jugbaja” nɛ.​—Rɔmatɔwo 10:​10, nwt.

²² Le yi godu gbɔxwe yí àwa ʒinʒindoshimɛ. Woaʒin eo do eshi mɛ pleŋpleŋ. Ʒinʒindoshimɛ lɔ wawa adasɛ nɔ amɛshiamɛ mɔ èsɔ eoɖeki na Yehowa, yí nyi ɖeka le Yehowa Kunuɖetɔwo mɛ.

ENU CI YÍ ƷINƷINDOSHIMƐ AO TƆ LE DUMƐ NƆ

23. Nyi yí ʒinʒindoshimɛwawa “le Eda koɖo Evi koɖo Gbɔngbɔn kɔkwɛ ŋkɔ mɛ” dasɛɔ?

²³ Yesu nu mɔ ye doplɔtɔwo ɖo awa ʒinʒindoshimɛ “le Eda koɖo Evi koɖo Gbɔngbɔn kɔkwɛ ŋkɔ mɛ.” (Hlɛn Matie 28:19.) Nyi yí ecɛ dasɛɔ? Edasɛ mɔ èlɔn do Yehowa cɛkpakpa koɖo akpaxwe ci yí Yesu wakɔ le edro Mawu tɔ mɛ, sɔ kpe nɔ lé Mawu zankɔ yi gbɔngbɔn kɔkɔɛ do, keŋ nɔ edro yi tɔ anyi wawa ji.​—Ehajiji Wema 83:18; Matie 28:18; Galatitɔwo 5:​22, 23; 2 Piɛ 1:21.

24, 25. (a) Nyi yí ʒinʒindoshimɛ le dumɛ nɔɔ? (b) Nyi nu yí mìaxo nuxu so le eta kpɛtɛ lɔ mɛɔ?

²⁴ Enu vevi ɖeka yí ʒinʒindoshimɛ le dumɛ nɔ. Nɔ woʒin eo do eshi mɛɔ, edasɛ mɔ èku le ao gbenɔnɔ sasatɔ mɛ alo èɖe alɔ le mɛ gbijigbiji. Nɔ woɖe eo ti le eshi lɔ mɛɔ, edasɛ mɔ ètɔ agbe yoyu ji nɔ Mawu dro wawa. Egbedasɛ mɔ àsɛn Yehowa so egbɛ ji keke asɔyi. Ðo ŋwi mɔ denyi agbetɔ ɖe, habɔbɔ alo edɔ ɖe yí èsɔ eoɖeki na o. Yehowa yí èsɔ eoɖeki na.

²⁵ Eoɖekisɔsɔna lɔ akpedo eo nu yí nana nɔ ekacaca vevi ɖeka anɔ eo koɖo Mawu gblamɛ. (Ehajiji Wema 25:14) Ecɛ dedasɛ mɔ, nɔ mɛɖe vlɛ yí wa ʒinʒindoshimɛ kpoŋ yí woahwlin gan o. Apostolo Pɔlu ŋwlɛn mɔ: “Míyi ji asɔ vɔnvɔn koɖo hunhunhunhun yí awakɔ dɔ nɔ míwo ŋtɔwo hwlɛngan.” (Filipitɔwo 2:​12, nwt) Gɔnmɛjeje kpoŋ yí ʒinʒindoshimɛwawa nyi. Vɔ lé àwɛ akpɔtɔ anɔ Yehowa gbɔɔ? Eta kpɛtɛ nɔ wema cɛ ana ɖoŋci nɔ enyɔbiɔse cɛ.