Wema ci yí so Edɔjikpɔha lɔ gbɔ

Nɔ mɛ ciwo yí lɔn Yehowa Mawu koɖo yi Nyɔ Bibla:

Yesu nu mɔ: “Mí a jeshi nyɔnɔnwi, yi nyɔnɔnwi lɔ a na vovo mí.” (Ʒan 8:32) Bu jijɔ ci èkpɔ hwenu èkpla nyɔnɔnwi lɔ ŋkɔtɔ le Bibla mɛ kpɔ ɖa! Ci èvanya mɔ mìatɛnŋ akpla nyɔnɔnwi lɔ le xexe ci yí ɖɔ koɖo ŋsukankan mɛɔ, ewa dɔ do eo ji.​—2 Timɔte 3:1.

Yehowa Mawu ji mɔ mìwo le jeshi nyɔnɔnwi lɔ. Eyi ci mìlɔn amɛwoɔ, mìjinɔ mɔ mìanu nyɔnɔnwi lɔ nɔ wo. Vɔ Mawu sɛnsɛn biɔ enu sugbɔ wu ahan. Mìɖo atekpɔ awa ci ji mìkpe keŋ anɔ agbe shigbe Kristotɔwo hannɛ, ɖo mìdonɔ bubu gangan Yehowa gɔnmɛɖosewo nu sugbɔ. Yesu dre emɔ vevi ɖeka ci ji mìatɛnŋ ato adasɛ nɔ Mawu mɔ mìluin. Énu mɔ: “Nɔ́ [mínyi anyi sewoɔ,] mí a nɔ̀ Anyi lɔnlɔn mɛ, shigbe le Ŋ nyì Eda sewo, yi nɔ̀ Yi lɔnlɔn mɛ ɛnɛ.”​—Ʒan 15:10.

Yesu lɔn Edalɔ so jimɛ yí wanɔ enushianu ci Edalɔ mɔ yi le wa. Nɔ mìsrannɔ Yesu le mìwo gbenɔnɔ mɛɔ, Yehowa alɔn mì yí mìakpɔ jijɔ adodwi. Enyɔ jɔ Yesu nu mɔ: “Nɔ́ mí nya enu cɛwo ɔ, [míakpɔ jijɔ] nɔ́ mí wɛ do ji.”​—Ʒan 13:17.

Mìkpɔkpɔ emɔ mɔ, wema cɛ akpedo eo nu nakpla lé àwɛ anɔ agbe asɔ koɖo nyɔnɔnwi ci yí le Bibla mɛ keŋ anyi Mawu xlɔ. Mìwo gbedodoɖa yí nyi mɔ, eo le shin le lɔnlɔn ci èɖo nɔ Mawu mɛ yí akpɔtɔ anɔ ‘Mawu lɔnlɔn ci yí ana agbemavɔ eo’ mɛ.​—Ʒuda 21.