ENUKPLAKPLA 14

Susu vevi lɔwo le ze petii

Ebretɔwo 8:1

SUSU VEVI LƆ: Kpedo anyinɔxu lɔ nu nɔ akplɔ eo do le nuxuxoxo lɔ mɛ, yí ana ekacaca ci yí le susu vevi ɖekaɖeka koɖo ao tajinu koɖo nyɔta lɔ gblamɛ aze petii.

LÉ ÀWƐ DO:

Ðo tajinu ɖeka. Ao nuxu lɔ tajinu yí nyi enumɛɖeɖea, kpeɖoji nana nɔ woaxɔ ŋɖe ji se yɔa alo ezo dodo lanmɛ nɔ anyinɔxu lɔ nɔ awa ŋɖe yɔ? Nɔ èdo jeshi tajinu lɔɔ, na nuxu lɔ nɔ asɔ koɖi. Te kpɔ nɔ susu vevi lɔwo pleŋ akpedo eo nu nɔ naɖo tajinu lɔ gbɔ.

Biɔ eoɖeki se mɔ: ‘Enyɔbiɔse alo enyɔsɔdonyɔnu ciwo yí anyinɔxu lɔ aɖo kudo nuxu lɔ nuɔ? Ðoɖo ci nu yí enyɔbiɔse alo enyɔsɔdonyɔnu wowo tɔ lɔwo ava leɔ?’ Le yi goduɔ, to ao susuwo le ɖoɖo ŋtɔ́ nu nɔ ao nyɔsetɔwo akplɔ eo do le nuxuxoxo lɔ mɛ yí ase susu lɔwo gɔnmɛ keŋ alɔn do ji.
Tɛ gbe do ao nuxu lɔ nyɔta ji. Hɛnnɔ susu yí nyɔta lɔ ji le ao nuxu lɔ pleŋ mɛ to yi nyɔgbe veviwo alo ciwo yí ca ka koɖi zanzan kabakaba ji.
Na nɔ susu vevi lɔwo anɔ fafɛɖe yí wo mɛ akɔ petii. Can susu vevi ciwo yí ca ka koɖo nyɔta lɔ ciwo nu àtɛnŋ axo nuxu so le miniti ci wona eo mɛ. Ŋgbemɔ yeaxo nuxu so susu vevi sugbɔ nu o, na nɔ susu vevi ɖekaɖeka mɛ akɔ; nɔ èjikɔ aso le susu ɖe ji yí ayi bu jiɔ, gbɔn domɛ yí azan nyɔgbe ci yí aca susu lɔ do ci yí akplɔɛdo nu.

Àtɛnŋ ayɔ susu vevi lɔwo le enuɖetinɔnyɔ ao tɔ mɛ keŋ akpedo anyinɔxu lɔ nu nɔ akplɔ eo do alo àtɛnŋ agbetrɔ axo nuxu so wo nu le etacunɔnyɔ ao tɔ mɛ yí akpedo anyinɔxu lɔ nu nɔ aɖo ŋwi wo.