Ðo gbɔngbɔn mɛ tajinuwo yí awa do wo ji

1. Gbɔngbɔn mɛ tajinu ciwo han mìatɛnŋ aɖoɔ?

MÌLƆN Yehowa sugbɔ ɖo mìnyi Kristotɔ adodwiwo. Mìji mɔ mìawa ci ji mìkpe le Yehowa sɛnsɛn mɛ. Vɔ gbɔxwe mìawa ci ji mìkpe nɔ Yehowa nywiɖeɔ, ele mɔ mìaɖo gbɔngbɔn mɛ tajinuwo. Tajinu lɔ ɖewo yí nyi, mìatekpɔ aɖoɖoɔ Kristotɔwo nɔnɔmɛwo, mìakpla lé mìabi le ŋɖewo wawa mɛ do yí aji enu ciwo mìawanɔ keŋ asɔ kpedo mɛbuwo nu.b

2. Nyi yí taɖo mìɖo aɖo gbɔngbɔn mɛ tajinuwo yí aje agbla awa do wo jiɔ?

² Nyi yí taɖo mìɖo ajinɔ mɔ mìayi ŋkɔ le gbɔngbɔn mɛɔ? Susu vevitɔ lɔ yí nyi mɔ, mìji mɔ mìwo nu le jɔ ji nɔ mìwo Da amɛlɔntɔ ci yí le jeŋkwi mɛ. Eji jɔnɔ Yehowa nɔ ékpɔ mɔ mìzankɔ mìwo ŋsɛn koɖo mìwo nujikpekpewo keŋkeŋ le ye sɛnsɛn mɛ. Gbesɔ kpe niɔ, mìji mɔ mìayi ŋkɔ le gbɔngbɔn mɛ keŋ atɛnŋ akpedo mìwo nɔviŋsu koɖo nɔvinyɔnuwo nu nywiɖe sɔwu. (1 Tɛs. 4:9, 10) Mì pleŋ mìatɛnŋ awa gbɔngbɔn mɛ ŋkɔyiyiwo nɔ mìle nyɔnɔnwiɛ mɛ yí ejinjin ɖeeɖe can. Ecɛyɛɔ, mìakpɔ lé mìatɛnŋ awɛ do.

3. Nyi apotru Pɔlu do ŋsɛn Timɔte mɔ yi le wa le 1 Timɔte 4:12-16 mɛɔ?

³ Timɔte nyi jajɛ hwenu yí apotru Pɔlu ŋwlɛ yi wema ŋkɔtɔ ɖaɖɛ; hwenɔnuɔ, ényi hamɛmɛshinshin xoxoxo vɔ. Ganŋgan Pɔlu do ŋsɛn yi mɔ yi le kpɔtɔ awakɔ gbɔngbɔn mɛ ŋkɔyiyiwo. (Hlɛn 1 Timɔte 4:12-16.) Nɔ èhlɛn enyɔ ciwo Pɔlu nu nɔ Timɔteɔ, àkpɔ mɔ enu amɛve mɛ yí eji mɔ yi le wa ŋkɔyiyi le. Ŋkɔtɔ, áje agbla aɖokɔ Kristotɔwo nɔnɔmɛwo shigbe lɔnlɔn, xɔse yí anɔkɔ agbe kɔkɔɛ. Yí amɛvetɔ lɔɔ, átekpɔ abi doji le enuhlɛnhlɛn le amowo mɛ mɛ, ánya lé ado ŋsɛn wo do yí agbekplanɔ nu wo nɔ anyɔ doji. Timɔte kpɔwɛ lɔ akpedo mì nu mìakpɔ mɔ nɔ mìɖo tajinu ciwo ji mìatɛnŋ awa doɔ, akpedo mì nu mìawa gbɔngbɔn mɛ ŋkɔyiyiwo. Mìagbekpɔ lé mìawɛ yí awa sugbɔ doji le kunuɖeɖedɔ lɔ mɛ.

JE AGBLA AÐO KRISTOTƆWO NƆNƆMƐWO

4. Sɔgbe koɖo Filipitɔwo 2:19-22 ɖe, nyi yí kpedo Timɔte nu etɛnŋ nyi Yehowa sɛntɔ ci yí wa dɔ sugbɔ niɔ?

⁴ Nyi yí kpedo Timɔte nu etɛnŋ nyi Yehowa sɛntɔ ci yí wa dɔ sugbɔ niɔ? Kristotɔwo nɔnɔmɛ nywi ciwo eɖo yɔ. (Hlɛn Filipitɔwo 2:19-22.) Pɔlu nu so Timɔte nu mɔ yɛsɔ yiɖeki hwenɔ, nyi egbejinɔtɔ, denyi ɖyiɖɔnɔ o, éhwannɔ do dɔ nu yí gbenyi mɛ ci ji woatɛnŋ akando. Élɔn nɔviwo yí sɔnɔ ɖe le ji nɔ wo veviɖe. Ecɛ dɔ yí Pɔlu lɔn Timɔte yí dekpɔ godu gbɔxwe yí sɔ edɔ gbɔnnu buwo ni mɔ yi le wa o. (1 Kor. 4:17) Ahanke nɔ mìtekpɔ yí ɖo nɔnɔmɛ ciwo yí jɔnɔ ji nɔ Yehowaɔ, ana alɔn mì yí mìatɛnŋ akpedo hamɛ lɔ nu nywiɖe sɔwu.—Eha. 25:9; 138:6.

5. (a) Lé àwɛ anya Kristotɔwo nɔnɔmɛ nywi ci èɖo aje agbla aɖoɔ? (b) Lé nɔvinyɔnu jajɛ ci yí le foto lɔ mɛ, je agbla yí wakɔ do tajinu ci èɖo mɔ yease vevi do amowo nu sɔwu lɔ jiɔ?

⁵ Sɔ nɔnɔmɛ ɖeka ci àji mɔ yeaɖo. Do gbe ɖaɖa keŋ abu tamɛ kpɔ so enu ciwo èɖo atrɔ le eoɖeki nu. Sɔ nɔnɔmɛ ɖeka ci àji mɔ yeaɖo. Le kpɔwɛ mɛ, àtɛnŋ aɖui mɔ yeasenɔ vevi do amɛ nu sɔwu alo ajinɔ veviɖe mɔ yeakpenɔdo ye kpena xɔsetɔwo nu. Alo ètɛnŋ ɖui mɔ yeawanɔ fafa yí asɔnɔ nu kenɔ amowo doji. Àtɛnŋ abiɔ exlɔ ɖeka ci ji èkando nɔ anu enu ciwo yí èɖo atrɔ nɔ eo, ecɛ akpedo eo nu.—Elo. 27:6.

6. Lé àwɛ aɖo nɔnɔmɛ nywi ɖe ci èdrɔ mɔ yeaɖoɔ?

⁶ Je agbla awa do enu ci èdrɔ mɔ yeawa ji. Lé àtɛnŋ awɛ doɔ? Ŋɖeka ci àwa yí nyi mɔ àkpla nu so nɔnɔmɛ ci èji mɔ yeaɖo lɔ nu nywiɖe. Sɔɛ mɔ, èji mɔ yeasɔ enu kenɔ amowo sɔwu. Àtɛnŋ ahlɛn mɛ ciwo yí lɔn faa yí sɔ nu ke amɛ koɖo mɛ ciwo yí gbe kpɔwɛwo le Bibla mɛ, yí abu tamɛ kpɔ so wo nu. Le kpɔwɛ mɛ, àtɛnŋ abu tamɛ kpɔ so lé Yesu lɔn yí sɔ nu ke amowo nu. (Luiki 7:47, 48) Ebu yí gbenyi mɔ, desɔ susu ɖonɔ amowo fɛnwo ji o, vɔ enu ci ji woasun awa ji yí esɔ yi susu ɖonɔ. Farizitɔwo dele ahan o, wokpɔnɔ “amɛ buwo do amɛ gbali ji.” (Luiki 18:9) Nɔ èbu tamɛ kpɔ so kpɔwɛ cɛwo nu ɖegbɔɔ, biɔ eoɖeki se mɔ: ‘Lé ŋkpɔnɔ mɛbuwo doɔ? Wowo nɔnɔmɛ ciwo ji ŋjinɔ mɔ nasɔ susu ɖoɔ?’ Nɔ ègbɔnkɔnu nɔ eo mɔ nasɔ nu ke mɛɖeɔ, tekpɔ abu tamɛ kpɔ so mɛ lɔ nɔnɔmɛ nywiwo nu. Eyi nabiɔ eoɖeki se mɔ: ‘Lé Yesu kpɔnɔ mɛ cɛ doɔ? Nɔ Yesu yí mɛ lɔ je agɔ do sa ɖe, Yesu asɔ kia?’ Nɔ èwɛ ahan ɔ, atɛnŋ akpedo eo nu natrɔ ao susu. Etɛnŋ gbɔnnu nɔ eo ŋkɔtɔ mɔ nasɔ nu ke mɛɖe ci yí je agɔ do eo. Vɔ nɔ ètekpɔ yí kpla enusɔsɔkeamɛɔ, avale fafɛɖe nɔ eo mɔ nalɔn asɔ enu kenɔ amɛ blaŋ.

KPLA LÉ ÀWƐ ABI LE ŊÐEWO WAWA MƐ

7. Lé Elododo Wema 22:29 dasɛ do mɔ Yehowa zankɔ dɔwatɔ bibiwo do le egbɛ mɛɔ?

⁷ Enubu ci àtɛnŋ aɖo awa yí nyi mɔ nakpla ŋɖe yí abi le yi wawa mɛ. Woʒan nɔvi sugbɔ ciwo yí ado alɔ Betɛlixɔwo, Takpekpexɔwo koɖo Fyɔɖuxuxɔwo cucu. Sugbɔtɔ le nɔvi ciwo yí cunɔ xɔ lɔwo mɛ, kpla nu so nɔviŋsu koɖo nɔvinyɔnu ciwo yí bi le dɔ lɔ wawa mɛ gbɔ. Shigbe lé ezekɔ le foto lɔ mɛ nɛɔ, nɔviŋsu koɖo nɔvinyɔnuwo pleŋ yí kplakɔ lé woawɛ ale bu nɔ Takpekpexɔ koɖo Fyɔɖuxuxɔwo. To mɔ cɛwo koɖo buwo jiɔ, Yehowa Mawu ci yí nyi “Efyɔ” mavɔmavɔtɔ koɖo Kristo Yesu ci yí nyi “Efyɔ nɔ efyɔwo,” to nɔvi dɔwatɔ bibiwo ji yí wakɔ enujiŋwo. (1 Tim. 1:17; 6:15; hlɛn Elododo Wema 22:29.) Mìji mɔ mìawa dɔ sɛnsinɖe yí azan mìwo nujikpekpewo keŋ asɔ kanfu Yehowa yí danyi mìakanfu mìwoŋtɔwo yɔ o.—Ʒan 8:54.

8. Lé àwɛ asɔ ŋɖe ci mɛ èji mɔ yeabi doji leɔ?

⁸ Sɔ ŋɖe koŋ ci èji mɔ yeakpla. Nyi mɛ èji mɔ yeabi doji leɔ? Biɔ hamɛmɛshinshin ciwo yí le míwo hamɛ se mɔ nyi mɛ yí wokpɔ mɔ yeabi doji le ma; àtɛnŋ agbebiɔ míwo kán lɔ mɛ hamɛwo jikpɔtɔ se hɛnnɛ. Le kpɔwɛ mɛ, nɔ wonu nɔ eo mɔ, eɔ le je agbla abi doji le nuxuxoxo koɖo enukplakpla amowo mɛɔ, biɔ wo se nɔ woakpedo eo nu nanya enu ci teŋ nu yí àwa dɔ so; keŋ atekpɔ awa do ji. Lé àtɛnŋ awɛ doɔ?

9. Nɔ èdrɔ mɔ yeakpla ŋɖe wawa ɖe, lé àtɛnŋ aje agbla awa do ji doɔ?

⁹ Je agbla awa do enu ci èdrɔ mɔ yeawa ji. Sɔɛ mɔ èji mɔ yeabi doji le enukplakpla amowo mɛ. Àtɛnŋ akpla Do vevi enuhlɛnhlɛn koɖo enukplakpla amɛwo wemagbaja lɔ nywiɖe. Eyi nɔ wona dɔ eo le kwɛshila dodomɛ bɔbɔ mɛɔ, àtɛnŋ abiɔ nɔviŋsu bibi ɖe nɔ akpɔ edɔ lɔ koɖo eo doŋkɔ keŋ anu enu ciwo mɛ àwa trɔtrɔ le nɔ eo. Dranɔ edɔ ciwo wonanɔ eo do do gamɛ. Nɔ èwɛni ahan ɔ, amowo akpɔɛni mɔ èhwannɔ do dɔ nu yí ènyi mɛ ci ji woatɛnŋ akando.—Elo. 21:5; 2 Kor. 8:22.

10. Na kpɔwɛ ɖeka ci yí dasɛ lé woatɛnŋ awɛ abi doji le ŋɖe wawa mɛ.

¹⁰ Vɔ nɔ enu ci mɛ èdrɔdrɔ mɔ yeabi doji le nyi enu ɖeka ci wawa yí gbɔnnɔnu nɔ eo ɖe? Ŋgbegbɔjɔ o! Enuhlɛnhlɛn nywiɖe gbɔnnɔnu nɔ nɔviŋsu Garry. Énu mɔ ŋkpɛn wanɔ ye sugbɔ nɔ yehlɛnkɔ nu le bɔbɔwo. Vɔ éje agbla veviɖe mɔ yeabi doji le enuhlɛnhlɛn mɛ. Émɔ ekpla ci yexɔ so nɔviŋsu bibiwo koɖo mìwo wemawo mɛ kpedo ye nu yí ecɛyɛɔ, yesun ji yí xonɔ nuxu le Fyɔɖuxuxɔwo, ekán lɔ mɛ takpekpewo koɖo takpekpeganwo mɛ.

11. Shigbe Timɔte nɛ ɖe, nyi yí atɛnŋ akpedo mì nu mìawa dɔ sugbɔ nɔ Yehowaɔ?

¹¹ Timɔte vanyi nuxuxotɔ alo nukplamɛtɔ bibia? Bibla denu nyɔ ɖe so nu o. Vɔ kankandoji li mɔ ci yí Timɔte wa do enyɔ ci Pɔlu nu ni jiɔ, éva bi doji le yi dɔwo wawa mɛ. (2 Tim. 3:10) Ahanke nɔ mìjekɔ agbla mɔ mìabi doji le ŋɖewo wawa mɛɔ, mìasun ji awa dɔ sugbɔ nɔ Yehowa.

JI NU CIWO ÀWANƆ ASƆ KPENƆDO MƐBUWO NU

12. Lé mɛbuwo kpedo eo nu doɔ?

¹² Ejɔnɔ ji nɔ mì nɔ mɛbuwo kpedo mì nu. Nɔ mìle dotoxwe yí nɔvi ciwo yí le Dotoxwe Kacaca Jikpɔgbɛ mɛ alo Dɔnɔwo Jijikpɔ Jikpɔgbɛ mɛ vayɔ mì kpɔɔ, evivinɔ nɔ mì. Nɔ mìtokɔ nɔnɔmɛ gbɔnnugbɔnnu ɖe mɛ yí hamɛmɛshinshin ɖe ci yí sɔ ɖe le ji nɔ mì ɖo to mì yí fa akɔn nɔ mìɔ, ejɔnɔ ji nɔ mì sugbɔ. Nɔ mìʒan kpedonu le Bibla nukplakpla ɖe wawa mɛ, yí mɔɖetɔ bibi ɖe lɔn yí va kpedo mì nuɔ, evivinɔ nɔ mì keke. Ejɔnɔ ji nɔ nɔviŋsu koɖo nɔvinyɔnu cɛwo pleŋ mɔ yewoakpedo mì nu. Mìwo can mìakpɔ jijɔ ŋtɔ́ han nɔ mìle gbesɔsɔ yí kpenɔdo mìwo nɔviwo nu. Yesu nu mɔ: “Jijɔkpɔkpɔ le enunanamɛ sɔwu enuxɔxɔ.” (Edɔ. 20:35) Nɔ èji mɔ yeawa nu cɛwo alo yi hanwo keŋ asɔ wa dɔ sugbɔ nɔ Yehowa ɖe, nyi yí akpedo eo nuɔ?

13. Nɔ mìɖokɔ tajinu ɖe, nyi mìɖo aɖonɔ ŋwiɔ?

¹³ Tekpɔ asɔ tajinu ɖe koŋ. Le kpɔwɛ mɛ, ètɛnŋ mɔ, ‘Ŋji mɔ nawa sugbɔ le hamɛ lɔ mɛ.’ Vɔ ci denu enu ci teŋ èjikɔ awaɔ; etɛnŋ gbɔnnu nɔ eo mɔ nawa sugbɔ le hamɛ lɔ mɛ yí taŋfuin datɛnŋ avawa do ji gbeɖe o. Eyi taɖo sɔ tajinu ɖe koŋ ci ji àtɛnŋ awa do. Àtɛnŋ aŋwlɛ tajinu lɔ koɖo lé àwɛ awa do ji do ɖɛ.

14. Nyi yí taɖo mìɖo awa nu le dredrenu nɔ mìɖokɔ tajinuwoɔ?

¹⁴ Ele mɔ mìawa nu le dredrenu nɔ mìɖokɔ tajinuwo. Nyi yí taɖoɔ? Ðo mìdenya lé enuwo avayi do nɔ mì o. Le kpɔwɛ mɛ, apotru Pɔlu kpedo amowo nu yí woɖo hamɛ yoyu ɖeka do Tɛsaloniki jugan mɛ. Kankandoji li mɔ, ádrɔdrɔ mɔ yeanɔ nɔ yí akpedo Kristotɔ yoyu lɔwo nu. Vɔ amowo fɔn gu do ji yí tɛ do ji mɔ yi le so le juɔ mɛ. (Edɔ. 17:1-5, 10) Nɔ Pɔlu mɔ yeakpɔtɔ anɔ nɔ saɔ, ásɔ nɔviɛwo do fɔku mɛ. Vɔ ecɛ dena Pɔlu mi kpekpedonu nana wo o. Ewaɖeɔ, étrɔdo nɔnɔmɛ lɔ nu. Le yiyimɛɔ, édɔ Timɔte ɖaɖa mɔ yi le yi kpedo xɔsetɔ yoyu ciwo yí le Tɛsaloniki nu le gbɔngbɔn mɛ. (1 Tɛs. 3:1-3) Kankandoji li mɔ ajɔ ji nɔ Tɛsalonikitɔwo haan, ci Timɔte lɔn mɔ yeayi fiɖekpokpui ci yí eʒan le.

15. Nɔ mìɖo ŋɖe mɔ mìawa vɔ yí mìwo nɔnɔmɛwo vatrɔ ɖe, nyi mìawaɔ? Na kpɔwɛ ɖeka.

¹⁵ Mìatɛnŋ akpla nu so enu ci yí jɔ do Pɔlu ji le Tɛsaloniki mɛ. Mìtɛnŋ ɖui mɔ mìawa sɛnsɛndɔ ɖe, vɔ mìwo nɔnɔmɛwo tɛnŋ vatrɔ ci yí adɔ yí mìdatɛnŋ agbevawa do enu ci mìdrɔ lɔ ji o. (Ŋun. 9:11) Nɔ evanyi ahan nɔ eoɔ, lɔn asɔ tajinu bu ci ji àtɛnŋ awa do. Eyi asu koɖo ashi ɖeka ciwo yí tɔ mɔ Ted koɖo Hiedi wa. Ci lanmɛ degbenyɔɔ nɔ wo yí dɔ woso le Betɛli. Vɔ ci wolɔn Yehowaɔ, woji mɔ yewoawa enubu ciwo yí ana yewoawa sugbɔ le kunuɖeɖedɔ lɔ mɛ. Doŋkɔɔ, wotɔ gbeshiagbe mɔɖeɖedɔ lɔ wawa. Le yiyimɛɔ, wovasɔ wo mɔ wo le nyi emɔɖetɔ veviwo, yí Ted yɛɔ, yɛxɔ kpla yí vanyi ekán lɔ mɛ hamɛwo jikpɔtɔ kpedonutɔ. Eyi exwe ci woaɖo yí akpɔtɔ anyi ekán lɔ mɛ hamɛwo jikpɔtɔ trɔ. Ted koɖo Hiedi vakpɔɛ mɔ yewoshin ze to xwe lɔ nu, eyi taɖo yewodatɛnŋ agbewa sɛnsɛndɔ ŋtɔ́ o. Ci eve nɔ wo can ɔ, wonya mɔ yewoatɛnŋ awa nubuwo asɔ sɛn Yehowa. Ted nu mɔ: “Mìkpla mɔ mìdeɖo asɔ susu ɖo edɔ kuɖeka ji le Yehowa sɛnsɛn mɛ o, edɔ buwo li ciwo mìatɛnŋ agbewa dru.”

16. Nyi mìatɛnŋ akpla so Galatitɔwo 6:4 mɛɔ?

¹⁶ Mìdatɛnŋ anya enu ciwo pleŋ yí ajɔ do mì ji le agbe mɛ o. Eyi taɖo ele veviɖe mɔ, denyi sɛnsɛndɔ ciwo mìwakɔ nu yí mìakpɔ do yí amɔ mìnyi amɛ vevi nɔ Yehowa alo mìdenyi amɛ vevi ni o. Ahanke mìdeɖo asɔ sɛnsɛndɔ ciwo mìwanɔ asɔ sɔnɔ kpɔ koɖo ci mɛbuwo wakɔ o. Hiedi nu mɔ: “Nɔ èsɔ ao gbe sɔ sɔkɔ kpɔ koɖo mɛbuwo tɔɔ, dagbekpɔkɔ jijɔ o.” (Hlɛn Galatitɔwo 6:4.) Ele veviɖe mɔ mìaji enu ciwo mìawanɔ asɔ kpedo mɛbuwo nu, nɔ woakpɔtɔ asɛnkɔ Yehowa.c

17. Nyi àtɛnŋ awa yí aje nɔ sɛnsɛndɔ ɖe wawaɔ?

¹⁷ Nɔ ènɔnɔ agbe kleŋ yí deɖunɔ efɛn gbaliwoɔ, akpedo eo nu natɛnŋ awa dɔ sugbɔ le Yehowa sɛnsɛn mɛ. Ðo tajinu hwɛhwɛ ciwo akpedo wo nu navawa do tajinu ganganwo ji le sɔ mɛ. Le kpɔwɛ mɛ, nɔ èdrɔkɔ mɔ yeavanyi gbeshiagbe mɔɖetɔɔ, àtɛnŋ awanɔ kpedonu mɔɖeɖedɔ lɔ wlecishiawleci le kakacɛ mɛ. Nɔ èjikɔ mɔ yeavanyi sumɔsumɔdɔwatɔɔ, àtɛnŋ azannɔ gamɛ sugbɔ doji wu le kunuɖeɖedɔ lɔ mɛ yí ayi yɔnɔ nɔvi ciwo yí ble koɖo mɛshinshin ciwo yí le míwo hamɛ kpɔ. Enu ciwo yí èvanya wawa ɖɛyɛ akpedo eo nu navawa sɛnsɛndɔ buwo le ŋkɔ mɛ. Ðui mɔ yeawanɔ edɔ ɖekpokpui ci wosɔnɔ ye kakacɛ nywiɖe.—Rɔm. 12:11.

18. Shigbe lé foto lɔ dadasɛ yi nɛ ɖe, nyi èkpla so Beverley gbɔɔ?

¹⁸ Mìŋgbekpɔɛ gbeɖe mɔ mìshin keke mìdatɛnŋ aɖo gbɔngbɔn mɛ tajinuwo yí awa do wo ji o. Exwe 75 yí nɔvinyɔnu ɖeka ci yí tɔ mɔ Beverley ɖo. Edɔ̀lele sɛnŋ ɖeka le nu ci yí dɔ zɔnlinzɔnzɔn gbɔnnɔnu ni. Vɔ éji veviɖe mɔ yeaɖe kunu sugbɔ le amɛyɔyɔ nɔ Eŋwiɖoɖo lɔ hwenu. Eyi taɖo eɖo ŋɖewo koŋ mɔ yeawa. Ci Beverley wa do enu ci edrɔ mɔ yeawa le amɛyɔyɔ nɔ Eŋwiɖoɖo lɔ hwenu jiɔ, ékpɔ jijɔ haan! Egbla ciwo yí edo na mɛbuwo can ji mɔ yewoawa sugbɔ le kunuɖeɖedɔ lɔ mɛ. Edɔ ciwo mìwo nɔviŋsu koɖo nɔvinyɔnu shinshinwo wanɔ jenɔŋ nɔ Yehowa, nɔ wowo nɔnɔmɛwo na wodetɛnŋ gbewakɔ sugbɔ can.—Eha. 71:17, 18.

19. Gbɔngbɔn mɛ tajinu ciwo mìatɛnŋ aɖoɔ?

¹⁹ Ðo tajinu ciwo ji àtɛnŋ awa do. Tekpɔ aɖonɔ nɔnɔmɛ nywi ciwo yí ana ao nu ajɔnɔ ji nɔ Yehowa. Kpla ŋɖewo wawa ciwo yí ana natɛnŋ awa dɔ sugbɔ nɔ Yehowa koɖo yi habɔbɔ lɔ. Jinɔ ŋciwo àtɛnŋ awa asɔ kpedo nɔviŋsu koɖo nɔvinyɔnuwo nu.d Shigbe Timɔte nɛɔ, Yehowa acu shi nɔ eo yí “amɛwo pleŋ a kpɔ mɔ ao dɔ kpɔtɔ yìkɔ ŋkɔ.”—1 Tim. 4:15.