Mínyaa?

Hunvi ci han mɛ yí Etiopi ŋsu lɔ le hwenu yí Filipu te goguiɔ?

ENYƆGBE ci gɔnmɛ woɖe mɔ “hunvi” le Bibla mɛ tɛnŋ hɛn susu yi ehun hamɛhamɛ ji. (Edɔ. 8:​28, 29, 38) Vɔ ewa shigbe mɔ ehunvi ci mɛ yí Etiopi ŋsu lɔ le gangan wu ahwakeke alo hunvi ci wosɔ lɔnɔ ju le kanmɛtete mɛ. Mìakpɔ susu ɖewo ciwo yí taɖo mìnu ahan.

Etiopi ŋsu lɔ nyi axɔsudɔwatɔ gangan ɖeka ci yí zɔn emɔ jinjin ɖeka. “Eho ji kpɔtɔ e nyi nɔ Kandasi Etiopi fyɔ.” (Edɔ. 8:27) Fini yí Soudan le le egbɛ mɛ sɔ kpe nɔ fɔde nɔ Égypte le egbɛ mɛ yí nyi Etiopi hwenɔnu. Ci denyi ehun ɖeka mɛ ezɔn nɔ yi mɔzɔnzɔn lɔ pleŋpleŋ can ɔ, éhɛn agban ɖewo nɔ yi mɔzɔnzɔn jinjin lɔ. Le ehun ciwo wozannɔ le exwe sanŋdi ŋkɔtɔ mɛ yí sɔ lɔnɔ agbetɔwo mɛɔ, eɖewo ɖonɔ aku amɛnɛ yí wosɔ nu cɔnnɔ ta ni. Wema ɖeka ci yí xo nuxu so Edɔwawawo wema nu nu mɔ: “Ehun ŋtɔ́ hanwo hɛnnɔ agban sugbɔ, wovonɔŋ le emɔzɔnzɔn lɔ mɛ, yí gbena yí wozɔnnɔ emɔ jinjin.”

Ŋsu Etiopitɔ lɔ hlɛnkɔ nu hwenu Filipu te gogui. Exolɔlɔ lɔ nu mɔ, “Filipu lɔju yí gbosɔ ehunvi lɔ, yí ɖoto, yí Etiopitɔ lɔ hlɛnhlɛn Ezai Wema.” (Edɔ. 8:30) Wodewa ehun lɔwo nɔ woashinɔ ju sugbɔ o. Lé ehunvi lɔ zɔnkɔ ɖɔɖɔɖɔ do na yí Etiopi ŋsu lɔ tɛnŋ hlɛnkɔ nu, egbena yí Filipu tɛnŋ xotɔɛ koɖo afɔ.

Etiopi ŋsu lɔ “yɔ Filipu mɔ yi le va nɔ̀ axa nɔ eye.” (Edɔ. 8:31) Mɛ ciwo yí kunɔ ehunvi ciwo yí wosɔ lɔnɔ ju le kanmɛtete mɛ nɔnɔ te, vɔ fini woanɔ nyinɔnɔ do le emɔzɔnzɔn hun ci mɛ yí efyɔxwejikpɔtɔ lɔ koɖo Filipu le.

Sɔgbe koɖo enu ci woŋwlɛ do Edɔwawawo wema eta 8 mɛ koɖo enu ci exolɔlɔwo dasɛɔ, wovatata Etiopitɔ lɔ do mìwo wemawo mɛ yí ele ehun ci yí gangan wu ahwakeke ɖe kpoŋ alo ehunvi ciwo yí wosɔ lɔnɔ ju le kanmɛtetewo mɛ.