Lɔnlɔn Koɖo Ŋshishikuku Dadasɛ Nɔ Mɛ Ciwo Yí Wa Nuvɔn

1. Nyi yí atɛnŋ ajɔ nɔ mɛɖe wa nuvɔn gangan ɖeɔ?

LE NYƆTA ci yí vayi mɛɔ, mìkpɔ lé apotru Pɔlu kpɔ nuvɔn gangan nyɔ ɖeka gbɔ le Korɛnti. Nuvɔnwatɔ lɔ detrɔ ji mɛ o yí woɖo aɖiti le hamɛ lɔ mɛ. Vɔ shigbe lé mìwo nyɔta lɔ kpukpui dasɛ yi nɛɔ, Mawu atɛnŋ akpedo mɛ ciwo yí wa nuvɔn ganganwo nu nɔ woatrɔ ji mɛ. (Rɔm. 2:4) Lé hamɛmɛshinshinwo atɛnŋ akpedo wo nu do nɔ woatrɔ ji mɛɔ? Nyi yí atɛnŋ ajɔ nɔ mɛɖe wa nuvɔn gangan ɖeɔ?

2-3. Nyi mìɖo awa nɔ mìnya mɔ mìwo kpena xɔsetɔ ɖe wa nuvɔn gangan ɖeɔ, yí nyi yí taɖoɔ?

² Gbɔxwe hamɛmɛshinshinwo atɛnŋ akpedo amɛ lɔ nuɔ, woɖo anya enu ci yí jɔ lɔ nywiɖe. Eyi taɖo, nyi mìɖo awa nɔ mìwo kpena xɔsetɔ ɖe wa nuvɔn gangan ɖe ci yí atɛnŋ adɔ woaɖi ti le hamɛ lɔ mɛɔ? Mìɖo ado ŋsɛn nuvɔnwatɔ lɔ nɔ ayi hamɛmɛshinshinwo gbɔ keŋ axɔ kpekpedonu.—Ezai. 1:18; Edɔ. 20:28; 1 Piɛ 5:2.

³ Vɔ, nɔ nuvɔnwatɔ lɔ gbe mɔ yedavayi nui nɔ hamɛmɛshinshinwo ɖe? Mìɖo ayi hamɛmɛshinshin lɔwo gbɔ mìwoŋtɔwo nɔ woani kpekpedonu ci eʒan. Ecɛ nyi lɔlɔn dadasɛ nɔ mìwo nɔvi lɔ ɖo mìdeji mɔ mìatashi nɔ aso le Yehowa gbɔ o. Nɔ nuvɔnwatɔ lɔ kpɔtɔ le nuvɔn wakɔɔ, atɛnŋ adahɛn ekacaca ci yí le yi koɖo Yehowa gblamɛ doji. Átɛnŋ agbexoɖyi ŋkɔ nywi ci yí le hamɛ nu. Eyi taɖo lɔnlɔn ci mìɖo nɔ Yehowa koɖo nuvɔnwatɔ lɔ ana yí mìawa nu koɖo edɔngbegbe.—Eha. 27:14.

LÉ HAMƐMƐSHINSHINWO AKPEDO MƐ CIWO YÍ WA NUVƆN GANGANWO NU DO

4. Tajinu ci yí anɔ hamɛmɛshinshinwo shi nɔ wodo go koɖo mɛ ci yí wa nuvɔn gangan ɖeɔ?

⁴ Nɔ mɛɖe wa nuvɔn gangan ɖe le hamɛ lɔ mɛɔ, hamɛmɛshinshinwo acan amɛ amɛtɔn ciwo yí je le hamɛmɛshinshinwo-ha lɔ mɛ nɔ woaɖo hamɛmɛshinshinwo-gbɛ.a Ŋsu cɛwo ɖo ajeshi sɛnxu nɔ wowoɖekiwo yí asɔ wowoɖeki hwe. Hwenu woateteɛkpɔ mɔ yewoakpedo nuvɔnwatɔ lɔ nu nɔ atrɔ ji mɛɔ, woaɖonɔ ŋwi mɔ yewodatɛŋ aʒin ji nɔ atrɔ o. (2 Ese. 30:19) Hamɛmɛshinshinwo nya mɔ de nuvɔnwatɔwo pleŋ yí wanɔ nu nywiɖe shigbe lé Efyɔ Davidi wɛ nɛ o. (2 Sam. 12:13) Nuvɔnwatɔ ɖewo tɛnŋ gbe mɔ yewodaxɔ Yehowa nukplamuwo o. (Gɔnm. 4:6-8) Éle ahan gan, hamɛmɛshinshinwo tajinu yí nyi mɔ, woawa ci ji wokpe keŋ akpedo nuvɔnwatɔ lɔ nu nɔ atrɔ ji mɛ. Gɔnmɛɖose ciwo ji woazɔn do yí ado go koɖo mɛ ci yí wa nuvɔn lɔɔ?

5. Nukplamu ciwo yí ale susumɛ nɔ hamɛmɛshinshinwo hwenu woado go koɖo nuvɔnwatɔ ɖeɔ? (2 Timɔte 2:24-26) (Kpɔ foto lɔ hɛnnɛ.)

⁵ Hamɛmɛshinshinwo kpɔnɔ nuvɔnwatɔ lɔ mɔ yɛnyi amɛvevi, yí nyi lɛngbɔ ci yí bu. (Luiki 15:4, 6) Eyi taɖo nɔ wodo go koɖo mɛ lɔɔ, wodeɖo axo nuxu ni koɖo adan o alo awanu do nu tamɛmabutɔ o; nɛnɛke wodeɖo akpɔnɔ egododo lɔ mɔ yɛnyi ŋɖekɛŋmɛ yí yewowanɔ tɛgbɛɛ yí azɔnnɔ do emɔdasɛnamɛ ci wona yewo ji kpoŋ o. Éwaɖeɔ, woaɖo nɔnɔmɛ ciwo nu woxo nuxu so le 2 Timɔte 2:24-26 mɛ. (Hlin.) Hwecinu hamɛmɛshinshinwo ale agbla jekɔ mɔ yewoakpedo nuvɔnwatɔ lɔ nu nɔ atrɔ ji mɛɔ, woakpɔtɔ asɔ wowoɖekiwo hwe ado vivi mɛ lɔ nu yí awa xomɛvu ni.

6. Lé hamɛmɛshinshinwo adra wowoŋtɔwo ji do gbɔxwe ado go koɖo nuvɔnwatɔ ɖeɔ? (Rɔmatɔwo 2:4)

⁶ Hamɛmɛshinshinwo dranɔ wowoŋtɔwo ji do. Wojenɔ agbla yí srannɔ Yehowa le lé ewanɔ nu ɖaɖa nuvɔnwatɔ ɖe gbɔ yí ɖonɔ ŋwi Pɔlu nyɔ cɛwo: “Mawu wa xomɛvu sugbɔ nɔ mí. Yí É xɔ jigbɔnɖɛ nɔ mí. É le te kpɔ mí nɔ mí a [trɔ ji mɛ].” (Hlɛn Rɔmatɔwo 2:4.) Hamɛmɛshinshinwo ɖo aɖo ŋwi mɔ yewonyi lɛngbɔkplɔtɔwo yí le gɔnmɛ nɔ Kristo. (Ezai 11:3, 4; Mt. 18:18-20) Gbɔxwe hamɛmɛshinshinwo-gbɛ lɔ ado go koɖo nuvɔnwatɔ lɔɔ, woado gbe ɖaɖa yí abu tamɛ kpɔ so wowo tajinu ci yí nyi mɔ: woakpedo nuvɔnwatɔ lɔ nu nɔ atrɔ ji mɛ. Woaji nugɔnmɛ kpɔ le Enuŋwlɛŋwlɛ lɔwo mɛ koɖo mìwo Bibla nukplawemawo mɛ yí ado gbe ɖaɖa keŋ aɖo nugɔnmɛsese. Woabu tamɛ kpɔ so amɛ lɔ nu yí akpɔ enu ciwo yí dɔ yí ewu adɛn lɔ.—Elo. 20:5.

7-8. Lé hamɛmɛshinshinwo atɛnŋ asran jigbɔnɖɛxɔxɔ Yehowa tɔ, nɔ wodo go koɖo nuvɔnwatɔ ɖeɔ?

⁷ Hamɛmɛshinshinwo srannɔ jigbɔnɖɛ Yehowa tɔ. Lé Yehowa wanu ɖaɖa nuvɔnwatɔwo gbɔ vayi nɔnɔ susumɛ nɔ wo. Le kpɔwɛ mɛ, Yehowa xɔ jigbɔnɖɛ yí kpla nu Kayɛn, yí kanxli so alɔzu ciwo yí ato le nuvɔn ci ejijiɛ awa mɛ keŋ yí na mɔkpɔkpɔ yi mɔ yeacu shi ni, nɔ étrɔ yi susu. (Gɔnm. 4:6, 7) Yehowa toto enyɔnuɖɛtɔ Natan ji yí kpla nu Davidi. Ézan kpɔwɛ ɖeka ci yí wa dɔ do Efyɔ lɔ ji ji. (2 Sam. 12:1-7) Eyi Yehowa “kpɔtɔ dɔdɔ” yi nyɔnuɖɛtɔwo “gbɛmɛgbɛmɛ” ɖaɖa Izraɛli jukɔn ci yí gbe to lɔ gbɔ. (Ʒer. 7:24, 25, NWT) Denɔ te kpɔ yi jukɔn lɔ mɔ yɛatrɔ ji mɛ gbɔxwe yí akpedo nu o. Éwaɖeɔ, éɖe afɔ ŋkɔtɔ yí do ŋsɛn wo mɔ wo le trɔ ji mɛ.

⁸ Hamɛmɛshinshinwo wanɔ Yehowa tɔ han hwenu yí woje agbla yí kpekpeɛdo mɛ ciwo yí wa nuvɔn ganganwo nu. Wo “xɔnɔ jigbɔnɖɛ tɛgbɛɛ” shigbe lé 2 Timɔte 4:2 nui nɛ. Eyi taɖo hamɛmɛshinshinwo ɖo anɔnɔ kpuu yí axɔnɔ jigbɔnɖɛ keŋ akpedo nuvɔnwatɔ lɔ nu nɔ aji mɔ yeawa enu ci yí nyɔ. Nɔ hamɛmɛshinshin lɔwo do dɔmɛzi do mɛ lɔ alo nu nyɔ ɖe yí eve mɛ lɔ nuɔ, atɛnŋ adɔ yí amɛ lɔ daɖo to ekpla ci wonikɔ o alo étɛnŋ gbe jimɛtrɔtrɔ.

9-10. Lé hamɛmɛshinshinwo atɛnŋ akpedo nuvɔnwatɔ ɖe nu nɔ abu tamɛ kpɔ so enu ci ewa nuɔ?

⁹ Hamɛmɛshinshinwo atekpɔ anya nu ciwo yí dɔ yí amɛ lɔ va je nuvɔn mɛ. Le kpɔwɛ mɛ, Kristotɔ lɔ tɔ gbɔjɔgbɔjɔ vivivi ɖo degbewanɔ amɛɖekɛ nukplakpla alo yinɔ kunuɖegbe shigbe lé éɖo awɛni do nɛa? Degbedonɔ gbe ɖaɖa nɔ Yehowa blaŋblaŋ alo wɛni do ɖe kpoŋ a? Étashi yiɖeki ɖɛ yí edro vɔnwo ɖu jia? Éwa cancan dɔndɔnwo kuso mɛ ciwo ado ha koɖo alo enu ciwo asɔ ɖenɔ aye daɖɛ nua? Lé cancan ŋtɔ́wo tɛnŋ dahɛn nu le yi ji nu doɔ? Émɔŋje mɛ mɔ gbeta ciwo yesɔ vaan cɛwo koɖo ye nuwanawo dahɛn ekacaca ci yí le ye koɖo ye Daye Yehowa gblamɛa?

¹⁰ Hamɛmɛshinshinwo atɛnŋ abiɔ enyɔ veviwo nuvɔnwatɔ lɔ se yí woawɛ keke nɔ ŋgbe xa le yiɖeki mɛ o. Woasɔ xomɛfafa yí akpedo nuvɔnwatɔ lɔ nu nɔ akpɔ lé nuvɔn lɔ dahɛn nu do. (Elo. 20:5) Gbesɔ kpe niɔ, wotɛnŋ zan kpɔwɛwo asɔ kpedo amɛ lɔ nu nɔ abu tamɛ akpɔɛ mɔ enudɔndɔn yí yewa shigbe lé Natan wɛ nɔ Davidi nɛ. Taŋfuin le egododo ŋkɔtɔ lɔ hwenuɔ, amɛ lɔ tɛnŋ se vevi sugbɔ so nuvɔn lɔ ci ewa nu. Ŋtɔkpu can ɔ, étɛnŋ trɔ ji mɛ keŋkeŋ.

11. Lé Yesu wa nu ɖaɖa nuvɔnwatɔwo nu doɔ?

¹¹ Hamɛmɛshinshinwo je agbla yí wanɔ Yesu tɔ han. Hwenu Yesu ci yí fɔn so ku kpekpeɛdo Sɔlu ci yí so Tarsisi nuɔ, ébiɛ se mɔ: “Sɔlu, Sɔlu, nyi yí jɔ yí è ci yumɛ nɔ ŋ ahan ɔ?” Yesu kpedo nu yí ekpɔ lé enu ci ewakɔ lɔ nyi nuvɔn do. (Edɔ. 9:3-6) Le “nyɔnu ci yí wo yɔnɔ mɔ Ʒɛzebɛli” kpaxweɔ, Yesu nu mɔ: “Ŋ na gamɛ yi nɔ á trɔjimɛ.”—Enyɔ. 2:20, 21.

12-13. Lé hamɛmɛshinshinwo atɛnŋ ana gamɛ nuvɔnwatɔ lɔ nɔ atrɔ ji mɛ doɔ? (Kpɔ foto lɔ hɛnnɛ.)

¹² Nɔ hamɛmɛshinshinwo sransran Yesuɔ, wodaɖeblɛ akpɔɛ mɔ nuvɔnwatɔ lɔ davatrɔ ji mɛ kpɔ o. Ci mɛɖewo atɛnŋ atrɔ ji mɛ nɔ hamɛmɛshinshinwo-gbɛ do go koɖo wo ŋkɔtɔ can ɔ, atɛnŋ xɔ gamɛ sugbɔ gbɔxwe mɛbuwo alɔn atrɔ ji mɛ. Eyi taɖo hamɛmɛshinshinwo ɖo ado go koɖo mɛ lɔ sɔwu zeɖeka. Taŋfuin le egododo ŋkɔtɔ lɔ goduɔ, Kristotɔ ci yí wa nuvɔn lɔ atɔ tamɛ bubu kpɔ veviɖe so enyɔ ciwo enu vayi nu. Átɛnŋ asɔ yiɖeki hwe yí ado gbe ɖaɖa nɔ Yehowa. (Eha. 32:5; 38:18) Ecɛ adɔ yí, le ego ci woatrɔ ado koɖi mɛɔ, átɛnŋ trɔ yi susu ci eɖo sa hwenu yí wodo go koɖi ŋkɔtɔ.

¹³ Hamɛmɛshinshinwo ase vevi do nuvɔnwatɔ lɔ nu yí awa xomɛvu ni keŋ asɔ kpedo nu nɔ atrɔ ji mɛ. Woado gbe ɖaɖa nɔ Yehowa mɔ yɛ le cu shi do yewo gblajejewo ji keŋ yí akpɔkpɔ emɔ mɔ Kristotɔ ci yí wa nuvɔn lɔ atɛnŋ avanyɔ̀ le yiɖeki mɛ yí atrɔ ji mɛ.—2 Tim. 2:25, 26.

14. Mi woasɔ kanfukanfu lɔ na, nɔ nuvɔnwatɔ ɖe trɔ ji mɛɔ, yí nyi yí taɖoɔ?

¹⁴ Nɔ nuvɔnwatɔ ɖe trɔ ji mɛɔ, énanɔ yí wokpɔnɔ jijɔ haan! (Luiki 15:7, 10) Mi woasɔ kanfukanfu lɔ naɔ? Hamɛmɛshinshinwo yɔa? Ðo ŋwi nyɔ ciwo Pɔlu nu so nuvɔnwatɔwo nu: “Taŋfuin [Mawu] a na emɔ amɛ lɔwo, yí wo a trɔjimɛ.” (2 Tim. 2:25) Eyi taɖo Yehowa yí kpenɔdo Kristotɔ ɖe nu yí etrɔnɔ yi susu koɖo yi dɛn, denyi agbetɔ ɖe yɔ o. Pɔlu ɖe mɛ mɔ nɔ amɛ lɔ trɔ ji mɛ ɖegbɔɔ, enunywi ɖeka ajɔ. Eyi nyi mɔ amɛ lɔ atɛnŋ aɖo enujejeshi adodwitɔ kuso nyɔnɔnwi lɔ nu doji. Eyi anyɔ̀ va yiɖeki mɛ keŋ atɛnŋ aze nɔ Satana fɛncawo.—2Ti 2:26.”

15. Lé hamɛmɛshinshinwo atɛnŋ akpɔtɔ akpekpeɛdo nuvɔnwatɔ ɖe ci yí trɔ ji mɛ nu doɔ?

¹⁵ Nɔ nuvɔnwatɔ ɖe trɔ ji mɛɔ, hamɛmɛshinshinwo-gbɛ lɔ awa toto keŋ ayi jini kpɔ. Ecɛ ana yí akpɔtɔ axɔkɔ kpekpedonu ci eʒan yí awa ahwa koɖo Satana fɛncawo keŋ awa enu jɔjɔɛ (Ebre. 12:12, 13) Le nyɔnɔnwi mɛɔ, hamɛmɛshinshinwo deɖo adre enu ci yí nuvɔnwatɔ lɔ wa nɔ mɛɖekɛ o. Vɔ enyɔ ci woatɛnŋ anu nɔ hamɛ lɔɔ?

“GBE NYƆ NI LE AMƐSHAMƐ ŊMƐ”

16. Miwo yí nyi “amɛshamɛ” ci Pɔlu xokɔ nuxu so le 1 Timɔte 5:20 mɛɔ?

¹⁶ Hlɛn 1 Timɔte 5:20. Pɔlu ŋwlɛ nyɔ cɛwo nɔ yi kpena hamɛmɛshinshin Timɔte so lé akpɔ “[mɛ ciwo yí] le enuvɔn wakɔ” nyɔwo gbɔ do. Nyɔ ci ejikɔ anuɔ? Enyɔ ci ejikɔ anu yí nyi mɔ deʒan dandandan mɔ hamɛ lɔ pleŋ yí anyi “amɛshamɛ” ci yí ase nyɔ lɔ o. Ewaɖeɔ, taŋfuin éxokɔ nuxu so amɛkankin ɖewo ciwo yí tɛnŋ nya nu so nuvɔn ci amɛ lɔ wa nu. Wotɛnŋ kpɔ enu lɔ tɔxu alo wotɛnŋ nyi mɛ ciwo yí nuvɔnwatɔ lɔ nu nyɔ lɔ nɔ. Hamɛmɛshinshinwo atɛnŋ anu nɔ wo le bebemɛ mɔ yewokpɔ nuvɔnwatɔ lɔ nyɔ gbɔ yí dɔn to ni.

17. Nɔ amɛ sugbɔ nya nu so nuvɔn gangan ɖe nu le hamɛ lɔ mɛ alo taŋfuin woavanya nu so nu ɖe, nunɔwoase ci woawaɔ, yí nyi yí taɖoɔ?

¹⁷ Le nɔnɔmɛ ɖewo mɛɔ, amɛ sugbɔ le hamɛ lɔ mɛ tɛnŋ nya nyɔ lɔ alo taŋfuin wotɛnŋ vase nyɔ lɔ. Le nɔnɔmɛ cɛ mɛɔ, “amɛshamɛ” lɔ nyi hamɛ lɔ pleŋ. Eyi hamɛmɛshinshin ɖeka awa nunɔwoase nɔ hamɛ lɔ mɔ wogbe nyɔ nɔviŋsu lɔ alo nɔvinyɔnu lɔ sɛnŋsɛnŋɖe. Nyi yí taɖoɔ? Pɔlu ɖoŋci mɔ: “Nɔ amɛ kpɛtɛwo a tɔ́ vɔnvɔn” nɔ woŋgbeva je nuvɔn mɛ o.

18. Lé hamɛmɛshinshinwo akpɔ ɖevi ciwo yí wa ʒinʒindoshimɛ keŋ yí wa nuvɔn nyɔwo gbɔ doɔ? (Kpɔ foto lɔ hɛnnɛ.)

¹⁸ Nɔ ɖevi ci yí wa ʒinʒindoshimɛ yí dekpɔ ɖo exwe 18 o, wa nuvɔn gangan ɖe? hamɛmɛshinshinwo-ha lɔ awa toto keŋ nɔ hamɛmɛshinshin amɛve ado go koɖo ɖevi lɔ koɖo yi jila Kristotɔwo.b Hamɛmɛshinshinwo lɔwo akpɔ afɔ ciwo yí yi jila lɔwo ɖe vɔ keŋ asɔ kpedo wowo vi nu nɔ atrɔ ji mɛ. Nɔ ɖevi lɔ wa nu nywiɖe yí yi jilawo kpedo nu yí etrɔ ji mɛɔ, hamɛmɛshinshin amɛve lɔwo atɛnŋ asɔ gbeta mɔ degbeʒan kokoko mɔ hamɛmɛshinshinwo-gbɛ akpɔ enyɔ lɔ gbɔ o. Nɔ mìanuiɔ, jilawo ji Mawu sɔ agban do mɔ woana kpla wowo viwo koɖo lɔnlɔn. (2 Ese. 6:6, 7; Elo. 6:20; 22:6; Efe. 6:2-4) Vɔ nɔ hwenuwo vayikɔɔ, hamɛmɛshinshin lɔwo akpɔɛ mɔ jila lɔwo na kpekpedonu ci ɖevi lɔ ʒan ma. Vɔ nɔ ɖevi lɔ ci yí wa ʒinʒindoshimɛ gbe jimɛtrɔtrɔ yí kpɔtɔ le enudɔndɔn wakɔ ɖe? Le nɔnɔmɛ ŋtɔ́ mɛɔ, hamɛmɛshinshinwo-gbɛ lɔ ado go koɖi koɖo yi jila Kristotɔwo.

“[YEHOWA] ÐƆ KOÐO XOMƐVU KOÐO ŊSHISHIKUKU”

19. Lé hamɛmɛshinshinwo jenɔ agbla yí srannɔ Yehowa nɔ wowakɔ nu ɖaɖa nuvɔnwatɔwo gbɔ doɔ?

¹⁹ Agban le hamɛmɛshinshin ciwo yí nɔnɔ hamɛmɛshinshinwo-gbɛ lɔwo mɛ le ŋkɔ nɔ Yehowa mɔ woawɛ nɔ hamɛ lɔ akpɔtɔ anɔ mɛmiɖe. (1 Kor. 5:7) Wogbejijiɛ hɛnnɛ mɔ yewoawa ci ji yewo kpe keŋ nɔ nuvɔnwatɔ lɔ atrɔ ji mɛ. Ecɛ yí dɔ hamɛmɛshinshinwo kpɔtɔ ɖonɔ susu nywi yí kpɔnɔ emɔ mɔ amɛ lɔ atrɔ. Nyi yí taɖoɔ? Ðo woji mɔ yewoasran Yehowa ci yí “ɖɔ koɖo xomɛvu koɖo ŋshishikuku.” (Ʒaki 5:11) Kpɔ lé apotru Ʒan ci yí shin wa nu ahan vayi ɖa. Éŋwlɛ mɔ: “Evinyɛwo, ŋ ŋwlɛ enu cɛwo nɔ mí nɔ mí ŋgbe je agɔ o. Vɔ nɔ amɛ ɖe je agɔ ɔ, mì ɖo ŋkɔxɔnɔamɛtɔ le Eda Mawu gbɔ. Ŋkɔxɔnɔamɛtɔ lɔ nyi Yesu Kristo Amɛ Jɔjwɛ lɔ.”—1 Ʒan 2:1.

20. Nyi nu mìaxo nuxu so le nyɔta kpɛtɛkpɛtɛtɔ nɔ nyɔta eɖekplɔeɖedo cɛwo mɛɔ?

²⁰ Esadɔnu mɔ, évajɔnɔ yí Kristotɔ ɖe agbe mɔ yedatrɔ ji mɛ o. Nɔ ejɔ ahan ɔ, woɖo aɖiti le hamɛ lɔ mɛ. Lé hamɛmɛshinshinwo akpɔ enyɔ gangan ŋtɔ́wo gbɔ doɔ? Mìaxo nuxu so nu le nyɔta kpɛtɛkpɛtɛtɔ nɔ nyɔta eɖekplɔeɖedo cɛwo mɛ.