Kpedo Bibla Nukplaviwo Nu Nɔ Woasɔ Gbeta yí Awa Nyɔnɔnwi lɔ

1-2. (a) Nyi yí taɖo Bibla nukplavi ɖewo xonɔ nu kpɔ gbɔxwe asɔ gbeta awa nyɔnɔnwi lɔɔ? (b) Nyi mìakpɔ le nyɔta cɛ mɛɔ?

ŊÐEWO na yí exoxoɔ nu kpɔ yí ànyi Yehowa Kunuɖetɔ egloa? Taŋfuin èvɔnvɔn mɔ ao dɔmɛkpena, ao xlɔwo alo ao xomumɛtɔwo atrɔkpe eo. Alo taŋfuin èkpɔkpɔɛ mɔ yedasun ji gbeɖe yí anɔ agbe asɔ koɖo agbenywinɔnɔse Mawu tɔwo o. Nɔ ewakɔ ahan nɔ eoɔ, nya mɔ ewa ahan nɔ Bibla nukplavi ɖewo ciwo yí egbɔnnu nɔ sa mɔ woasɔ gbeta yí avanyi ɖeka le Yehowa Kunuɖetɔwo mɛ.

² Yesu nya mɔ vɔnvɔn ŋtɔ́wo tɛnŋ xe emɔ nɔ gbɔngbɔn mɛ ŋkɔyiyi wowotɔ fafɛɖe. (Mt. 13:​20-22) Vɔ Yesu demi kpekpedo mɛ ŋtɔ́ ciwo yí xoxoɔ nu kpɔ mɔ yewoakplɔɛdo nu o. Ewaɖeɔ, édasɛ nɔ yi nukplaviwo lé woakpedo mɛ ŋtɔ́wo nu do nɔ (1) woado jeshi enu ci yí axe emɔ nɔ wo yí woayi ŋkɔ aglo, (2) nɔ lɔnlɔn ci woɖo nɔ Yehowa agbesɛnŋ doji, nɔ (3) woasɔ Yehowa sɛnsɛn sɔ ɖo texwe ŋkɔtɔ le wowo gbe mɛ, yí (4) nɔ woaɖu cukaɖa wowotɔwo ji. Lé mìatɛnŋ awa do nyɔ ciwo yí Yesu nu nɔ yi nukplaviwo ji nɔ mìzankɔ Se Vivi nɔ Agbe lɔ Sɔyi Mavɔ! wema lɔ yí sɔ kpekpeɛdo wo nu nɔ woasɔ gbeta yí awa nyɔnɔnwi lɔɔ?

KPEDO AO NUKPLAVIWO NU NƆ WOADO JESHI ENU CI YÍ XEKƆ EMƆ NƆ WOWO ŊKƆYIYI

3. Nyi yí atɛnŋ axe emɔ nɔ Nikodɛmu yí anyi Yesu nukplavi sa agloɔ?

³ Nikodɛmu ci yí nyi amɛvevi ɖeka le Ʒuifu ŋkɔnɔtɔwo mɛ do go cukaɖawo gbɔxwe yí vanyi ɖeka le Yesu nukplaviwo mɛ. Ci Yesu tɔ kunuɖeɖedɔ lɔ ji yí ewa wleci amadɛn kpaŋ ɔ, Nikodɛmu do jeshi mɔ Yesu nyi Mawu dumɛnɔtɔ. (Ʒan 3:​1, 2) Vɔ, Nikodɛmu sɔ gbeta mɔ yeavayi kpɔ Yesu le bebemɛ ɖo “évɔnvɔn nɔ Ʒuifuwo.” (Ʒan 7:13; 12:​42, nwt) Taŋfuin évɔnvɔn mɔ enu sugbɔ ciwo yí yeɖo ayi te ye nɔ yevanyi Yesu nukplavi.a

4. Lé Yesu kpedo Nikodɛmu nu nɔ amɔŋje enu ci Mawu jijiɛ mɔ yi le wa mɛ doɔ?

⁴ Nikodɛmu jeshi Ese lɔwo sa, vɔ woɖo akpedo nu nɔ anya enu ci yí Yehowa jikɔ so gbɔ. Lé Yesu kpedo nu doɔ? Yesu le gbesɔsɔ yí zan yi gamɛ, ci enyi zanmɛ yí Nikodɛmu va gbɔ can. Gbesɔ kpe niɔ, Yesu dre mɛ nɔ Nikodɛmu petii enu ci awa yí avanyi yi nukplavi: atrɔ ji mɛ so yi nuvɔnwo mɛ, awa ʒinʒindoshimɛ yí aɖo xɔse do Mawu Vi lɔ nu.—Ʒan 3:​5, 14-21.

5. Lé mìatɛnŋ akpedo Bibla nukplavi ɖe nu yí ado jeshi enu ciwo yí xekɔ emɔ ni yí awa ŋkɔyiyi yí egloɔ?

⁵ Nɔ Bibla nukplavi ɖe jeshi Enuŋwlɛŋwlɛ lɔwo ɖɛ nywiɖe can ɔ, etɛnŋ ʒan mɔ woakpedo nu gbɔxwe yí ado jeshi enu ci yí xekɔ emɔ nɔ ŋkɔyiyi yitɔwo. Edɔ ci awa aɖu nu alo yumɛcici xomumɛtɔ yitɔwo tɛnŋ dɔ yi detɛnŋ ɖoɖoɔ yi gbɔngbɔn mɛ tajinuwo gbɔ o. Shigbe Yesu nɛɔ, ji gamɛ yí akpedo ao Bibla nukplavi nu. Àtɛnŋ ayɔ ao nukplavi lɔ yí avaɖu nu koɖu alo mìaɖyisa yi fiɖe. hwenu mìawakɔ enu cɛwo dojuɔ, taŋfuin áxo nuxu so enu ciwo mɛ etokɔ le yi gbe mɛ koɖo cukaɖa ciwo edodoɔ go yí ecɛ tɛnŋ na yí asun ji akpedo nu. Do ŋsɛn ao Bibla nukplavi lɔ yí awa trɔtrɔ ciwo yí ʒan yí denyi mɔ ádo bubu eo nu yɔ o, vɔ ádasɛ lɔnlɔn ci eɖo nɔ Yehowa.

6. Lé atɛnŋ akpedo Bibla nukplavi ɖe nu yí agbedɔn yí awa do nyɔnɔnwi ciwo yí ekplakpla jiɔ? (1 Korɛntitɔwo 16:13)

⁶ Nɔ Bibla nukplavi ɖe kando Yehowa ji mɔ yeakpedo ye nu yeanɔ agbe asɔ koɖo agbenywinɔnɔse Bibla mɛ tɔwoɔ, ágbedɔn yí awa do enu ciwo yí ekplakpla ji. (Hlɛn 1 Korɛntitɔwo 16:13.) Woatɛnŋ asɔ ao dɔ lɔ sɔ koɖo edɔ ci cica ɖe wanɔ. Bu tamɛ kpɔ so hwenu eyikɔ suklu nu, cica ci èlɔnnɔ sɔwuɔ? Taŋfuin cica ci yí gbɔnnɔ ji ɖɛ yí kpenɔdo eo nu yí èwanɔ enu ciwo yí èɖo awa. Ahanke, de enu ciwo Mawu ji mɔ mìawa ɖekɛ yí Bibla nukplamɛtɔ nywi ɖe kplanɔ amɛ o. Vɔ égbenanɔ kankandoji yi nukplavi mɔ Yehowa akpedo nu yí atɛnŋ awa trɔtrɔ ciwo yí ʒan le yi gbe mɛ. Lé àtɛnŋ awa ecɛ doɔ?

KPEDO AO NUKPLAVI NU NƆ LƆNLƆN CI YÍ EÐO NƆ YEHOWA ASƐNŊ DOJI

7. Lé Yesu kpedo mɛ ciwo yí ɖokɔ eto yi nu yí lɔnlɔn ci woɖo nɔ Yehowa gbesɛnŋ doji doɔ?

⁷ Yesu nya mɔ nɔ ye nukplaviwo lɔn Mawuɔ, woaji mɔ yewoawa do enu ci yewokplakpla ji. Blaŋblaŋ ɔ, ékpenɔdo yi nukplaviwo nu nɔ lɔnlɔn ci yí woɖo nɔ wowo Da ci yí le jeŋkwi mɛ asɛnŋ doji. Le kpɔwɛ mɛ, ésɔ Yehowa sɔ sɔ koɖo mɛ ci yí nanɔ enu nywi eviɛwo. (Mt. 7:​9-11) Mɛɖewo le Yesu toɖotɔwo mɛ yí wodeɖo Eda ci yí lɔnnɔ amɛ ahan o. Kpɔɛ le susu mɛ lé awa nɔ wo, hwenu Yesu gbenakɔ vida ŋshishikunamɛtɔ ci yí xɔ eviɛ ci yí wa enudɔndɔn sugbɔ vayi kpɔwɛ lɔ ɖa. Yesu kpedo amɛwo nu yí wokpɔɛ mɔ Yehowa lɔn yewo veviɖe yí gbeji mɔ yeakpedo yewo nu.—Luiki 15:​20-24.

8. Lé àtɛnŋ akpedo Bibla nukplavi ɖe nu nɔ lɔnlɔn ci éɖo nɔ Yehowa asɛnŋ dojiɔ?

⁸ Eo can àtɛnŋ akpedo Bibla nukplavi ɖe nu yí lɔnlɔn ci eɖo nɔ Yehowa asɛnŋ doji yí ado jeshi nɔnɔmɛ nywi ciwo yí le Mawu shi le enu ci yí èkplakɔ koɖi mɛ. Le enukplakpla ɖekaɖeka hwenuɔ, kpedo ao Bibla nukplavi lɔ nu lé enu ci ékplakɔ dasɛ mɔ Yehowa luin do. Hwenu míakplakɔ nu so tafɛnvɔnsa lɔ nuɔ, kpedo nu nɔ anya le ekan yɛ can do. (Rɔm. 5:8; 1 Ʒan 4:10) Kankandoji li mɔ, Bibla nukplavi ɖe atɛnŋ akando Yehowa lɔnlɔn ji nɔ ékpɔ lé Yehowa lɔn yiŋtɔ sugbɔ do.—Gal. 2:20.

9. Nyi yí kpedo ŋsu ɖeka ci yí tɔ mɔ Michael nu yí ewa trɔtrɔwo le yi gbe mɛ yí vatɔ Yehowa sɛnsɛn ɔ?

⁹ Mìakpɔ Michael, ci yí so Indonesie kpɔwɛ. Woji do nyɔnɔnwi lɔ mɛ, vɔ dewa ŋkɔyiyi yí wa ʒinʒindoshimɛ o. Ci eɖo exwe 18 ɔ, éyi edɔ jigbe le eju godu shigbe ehungankutɔ nɛ. Lé yiyimɛɔ, évaɖe nyɔnu, vɔ ékpɔtɔ gbesonɔ gbeɖe yi xomu ɖɛ yí ayi wa edɔ le eju godu. Evaje gaɖeka mɛɔ, ashiɛ koɖo eviɛ nyɔnuvi vatɔ Bibla kplakpla yí wa ŋkɔyiyi. Ci enɔlɔ ku goduɔ, Michael vasɔ gbeta mɔ yeayi axwe yí avayi le bu nɔ ye daye, eyi evalɔn yí tɔ Bibla kplakpla. Hwenu wovale “Ji Dwi Ni Kpɔ Doji” nɔ enukplakpla 27 tɔ le Se vivi nɔ agbe lɔ sɔyi mavɔ! wema mɛɔ, ewa edɔ do Michael ji sugbɔ. Ci ebu tamɛ kpɔ so lé Yehowa se vevi do, hwenu Ékpɔ Eviɛ kpekpeɛfun ɔ, edɔ yí Michael fan avin. Tafɛnvɔnsa lɔ jeŋ ni sugbɔ yí ewa trɔtrɔwo le yi gbe mɛ yí wa ʒinʒindoshimɛ.

KPEDO AO BIBLA NUKPLAVI NU NƆ ASƆ YEHOWA SƆ ÐO TEXWE ŊKƆTƆ

10. Lé Yesu kpedo yi nukplavi ŋkɔtɔwo nu nɔ woatrɔ wowo susuwo keŋ asɔ Yehowa sɛnsɛn sɔ ɖo texwe ŋkɔtɔɔ? (Luiki 5:​5-11) (Kpɔ foto lɔ hɛnnɛ.)

¹⁰ Nukplavi ŋkɔtɔwo ɖeblɛ yí do jeshi mɔ Yesu yí nyi Mɛsia ci gbe woɖo lɔ, vɔ eʒan mɔ woakpedo wo nu nɔ woasɔ kunuɖeɖedɔ lɔ do texwe ŋkɔtɔ. Piɛ koɖo Andre trɔ Yesu nukplaviwo vayi, vɔ Yesu gbetrɔvayɔ wo ke mɔ wo le va kplɔnɔ ye do gashiagamɛ. (Mt. 4:​18, 19) Sasaɔ, wolénɔ kpavi yí gbesanɔ yí ewa shigbe mɔ wovabɔ do Ʒaki koɖo Ʒan nu le ajɔdodo cɛ mɛ hannɛ. (Maki 1:​16-20) Ci Piɛ koɖo Andre “tashi wowo ɖɔ̀ lɔwo ɖɛ” can ɔ, kankandoji li mɔ wowa toto keŋ atɛnŋ akpɔ wowo xomumɛtɔwo ʒanwo gbɔ hwenu wokplɔkplɔ Yesu do. Nyi yí kpedo wo nu yí wosɔ gbeta mɔ yewoasɔ kunuɖeɖedɔ lɔ sɔ ɖo texwe vevitɔɔ? Exolɔlɔ Luiki tɔ nu nɔ mì mɔ Yesu wa enujiŋ ɖeka yí sɔ do ŋsɛn kankandoji ci woɖo do Yehowa nu mɔ yɛɖo enujikpekpe yí akpɔ yewo ʒanwo gbɔ.—Hlɛn Luiki 5:​5-11.

11. Lé àtɛnŋ azan enu ciwo mɛ èto asɔ do ŋsɛn ao Bibla nukplavi xɔseɔ?

¹¹ Mìdatɛnŋ awa enujiŋwo shigbe lé Yesu wɛ nɛ o, vɔ mìatɛnŋ axo nuxu so lé Yehowa kpedo mɛ ciwo yí Sɔɛ sɔ ɖo texwe ŋkɔtɔ le wowo gbe mɛ nu nɔ wo. Le kpɔwɛ mɛ, èɖo ŋwi lé Yehowa kpedo eo nu hwenu ètɔ bɔbɔwo yiyi ŋkɔtɔa? Taŋfuin evaʒan yí edo go koɖo ao dɔmɛga yí dre enu ci yí taɖo datɛnŋ awa edɔ do edɔ ji ni, ɖo eje do bɔbɔwo gamɛ ji nɔ eo. Nɔ ènukɔ enu ciwo mɛ èto nɔ ao Bibla nukplaviɔ, dre lé ao xɔse vasɛnŋ doji ci èkpɔ Yehowa lɔ̀ le gbeta ci èsɔ mɔ yeasɔ Yehowa sɛnsɛn sɔ ɖo texwe ŋkɔtɔ le ao gbe mɛ do.

12. (a) Nyi yí taɖo mìɖo ayɔ eŋɛnywidratɔ vovovowo nɔ mìjikɔ awa Bibla nukplakpla ɖeɔ? (b) Lé àtɛnŋ azan videowo yí asɔ kpla nu ao Bibla nukplaviwo nywiɖeɔ? Na kpɔwɛ ɖeka.

¹² Ao nukplavi agbekpɔ nyɔna nɔ ése lé Kristotɔ buwo wɛ yí trɔ wowo gbe yí vasɔ Yehowa sɛnsɛn sɔ ɖo texwe ŋkɔtɔ. Eyi taɖo yɔ ao kpena xɔsetɔ vovovo ciwo yí so texwe vovovowo nɔ woakplɔ eo yi Bibla nukplakpla lɔ wagbe. Nu nɔ wo nɔ woadre lé wovaxɔ nyɔnɔnwi lɔ do koɖo enu ciwo wowa keŋ vasɔ Yehowa sɛnsɛn sɔ ɖo texwe ŋkɔtɔ le wowo gbe mɛ. Gbesɔ kpe niɔ, ji gamɛ yí adasɛ video ciwo yí le “Ji Dwi Ni Kpɔ” alo “Kpɔ Enu cɛwo Kpɔ” le Se Vivi nɔ Agbe lɔ Sɔyi Mavɔ! wema lɔ mɛ nɔ nukplavi lɔ. Le kpɔwɛ mɛ, nɔ míkankɔ seŋ so enukplakpla 37 tɔ nuɔ, àtɛnŋ atɛ gbe do gɔnmɛɖose ciwo yí le video ci yí nyi Yehowa Ana Mì Ŋciwo Yí Wudo Mì mɛ.

KPEDO AO NUKPLAVIWO NU NƆ WOAÐU CUKAÐAWO JI

13. Lé Yesu dra yi nukplaviwo do ɖɛ nɔ yumɛcici doɔ?

¹³ Yesu nunɔ nɔ yi dokplɔtɔwo gbɛmɛgbɛmɛ mɔ amɛwo aci yumɛ nɔ wo, wowo xomumɛtɔwo ŋtɔkpu can le mɛ. (Mt. 5:11; 10:​22, 36) Ci ekpɔtɔ hwɛɖeka yí Yesu aɖegbɔ nɔ yi kunuɖeɖedɔ lɔɔ, ékanxle yi nukplaviwo mɔ wotɛnŋ wu wo ɖo wosɛnkɔ Yehowa. (Mt. 24:9; Ʒan 15:20; 16:2) Édo ŋsɛn wo mɔ wo le je aye le wowo kunuɖeɖedɔ lɔ mɛ. Ékpla nu wo mɔ wowoŋgbewa vu koɖo mɛ ciwo yí fɔnfɔn egu do wo ji o, vɔ wo le je aye keŋ nɔ woatɛnŋ akpɔtɔ aɖeɖeɛ kunu.

14. Lé mìatɛnŋ akpedo Bibla nukplavi ɖe nu nɔ adrado daɖɛ nɔ yumɛciciɔ? (2 Timɔte 3:12)

¹⁴ Mìatɛnŋ akpedo mìwo nukplavi nu nɔ adrado ɖɛ nɔ yumɛcici, nɔ mìdre enyɔ ciwo akpɔkpɔ emɔ mɔ ye dɔmɛkpenawo, ye xlɔwo koɖo ye xomumɛtɔwo atɛnŋ anu nɔ ye. (Hlɛn 2 Timɔte 3:12.) Nukplavi lɔ dɔmɛkpena ɖewo tɛnŋ vatɔ nukplavi lɔ koko nɔ éva mɔ yeanɔ agbe asɔ koɖo enu ciwo ekplakpla le Bibla mɛ. Ŋtɔkpu can ɔ, yi xomumɛtɔ veviwo tɛnŋ tɔ enu ciwo ekplakpla le Bibla mɛ gbagbali. Nɔ mìɖeblɛ yí kpedo mìwo Bibla nukplaviwo nu yí wodrado ɖɛ nɔ yumɛciciɔ, woale gbesɔsɔ nɔ évava.

15. Nyi atɛnŋ akpedo Bibla nukplavi ɖe nu yí ado ji le xomumɛtɔwo yumɛcici mɛɔ?

¹⁵ Nɔ ao Bibla nukplavi xomumɛtɔwo ciciɛ yumɛ niɔ, do ŋsɛn yi nɔ abu tamɛ kpɔ so enu ci teŋ yí dɔ yí yi xomumɛtɔwo dodoɔ domɛzi di ahan. Yi xomumɛtɔwo tɛnŋ bui mɔ Yehowa Kunuɖetɔwo kplakpla ŋsukankannyɔwo, alo wotɛnŋ bui mɔ amɛ baɖa yí wonyi. Yesu xomumɛtɔwo ŋtɔkpu bui mɔ suku jekɔ yí Yesu le. (Maki 3:21; Ʒan 7:5) Kpla ao Bibla nukplavi lɔ nɔ akpɔtɔ adonɔ ʒinxo yí awanɔ enu koɖo aye jeje ɖaɖa mɛbuwo gbɔ, yí yi xomumɛtɔwo can le mɛ.

16. Lé mìatɛnŋ akpedo mìwo Bibla nukplavi ɖe nu nɔ asɔ ayejeje yí axo nuxu so yi jixɔsewo nuɔ?

¹⁶ Nɔ Bibla nukplavi lɔ xomumɛtɔwo sɔ eɖe le enyɔ lɔ ji can ɔ, anyɔ mɔ Bibla nukplavi lɔ dadrenɔ enu ciwo pleŋ ékplakɔ mɛ nɔ wo zeɖeka o. Nɔ denyi ahan ɔ, enyɔ lɔ tɛnŋ va wugan yi xomumɛtɔ vevi lɔwo yí ecɛ adɔ yí wodagbeva ji mɔ yewoagbeva kanseŋ koɖi gabumɛ o. Eyi taɖo do ŋsɛn ao Bibla nukplavi lɔ nɔ axonɔ nuxu kleŋ hwenu edrekɔ yi jixɔsewo mɛ, nɔ emɔ agbevahun ni sɔ nɔ akanseŋ koɖo wo. (Kol. 4:6) Taŋfuin átɛnŋ anu nɔ yi xomumɛtɔwo nɔ woayi jw.org ji. Ecɛ ahun mɔ nɔ wo yí woagbekpla nu so Yehowa Kunuɖetɔwo nu doji hweɖekpokpuinu ci woji.

17. Lé atɛnŋ ana kpla ao Bibla nukplavi ɖe yí adra do keŋ ana ɖoŋci nɔ enyɔ ciwo amɛwo tɛnŋ biɔnɔ se so Yehowa Kunuɖetɔwo nuɔ? (Gbe kpɔ foto lɔ.)

¹⁷ Àtɛnŋ azan enyɔta eɖekplɔeɖedo “Enyɔ Ciwo Amɛwo Biɔnɔ Se Blaŋblaŋ” ciwo yí le jw.org ji, asɔ kpedo ao Bibla nukplavi ɖe nu nɔ adra ɖoŋci kleŋ ɖe nɔ nyɔ ciwo yí yi xomumɛtɔwo alo yi dɔmɛkpenawo atɛnŋ abiɔɛ se. (2 Tim. 2:​24, 25) Le vɔvɔnu nɔ enukplakpla ɖekaɖekaɔ, gbetrɔ ato akpaxwe ci yí nyi “Mɛɖewo Nunɔ Mɔ” nɔ Se Vivi nɔ Agbe lɔ Sɔyi Mavɔ! Wema lɔ mɛ. Do ŋsɛn ao Bibla nukplavi nɔ atrɔ anu ɖoŋci ciwo ekpɔ lɔwo do yitɔ nyɔgbewo mɛ. Nɔ eʒan ɔ, kpedo nu nɔ anya lé awɛ adre enu ciwo ji exɔse mɛ nywiɖe. Nɔ mídradra do ahan gbɛmɛgbɛmɛ nɔ anya lé atɔ seŋkankan ji doɔ, akpedo nu nɔ ahwlɛn ta nɔ yi xɔse koɖo kankandoji.

18. Lé àtɛnŋ ado ŋsɛn ao Bibla nukplavi nɔ axo nuxu so yi jixɔsewo nu le kunuɖeɖedɔ lɔ mɛɔ? (Matie 10:27)

¹⁸ Yesu do ŋsɛn yi nukplaviwo mɔ wo le dra eŋɛnywi lɔ nɔ amɛwo le jugbaja. (Hlɛn Matie 10:27.) Nɔ Bibla nukplavi ɖe ɖeblɛ yí tɔ nuxu xoxo so yi xɔse nu nɔ amɛwoɔ, ahanke agbenya lé aɖoŋ do Yehowa nu nɛ. Lé àtɛnŋ akpedo ao Bibla nukplavi nu yí atɛnŋ aɖo tajinu cɛɔ? Nɔ woxo nuxu so kunuɖeɖedɔ vevi ɖe nu le hamɛ lɔ mɛɔ, do ŋsɛn ao nukplavi lɔ keŋ nɔ abu tamɛ kpɔ so lé awɛ aje anyi eŋɛnywidratɔ nu. Dre enu ci yí taɖo amɛ sugbɔ kpɔɛni mɔ yɛle fafɛɖe mɔ woatɔ kunu ɖeɖe le kunuɖeɖedɔ vevi cɛ mɛ. Átɛnŋ akpɔ nyɔna so lé woaxo nuxu do le jugbaja nɔ éva ɖo to ékpla ciwo wonanɔ mì le kwɛshila dodomɛ bɔbɔwo mɛ. Nɔ nukplavi lɔ ɖo tajinu cɛɔ, akpedo nu anya lé axo nuxu so yi jixɔsewo nu koɖo kankandoji.

KANDO AO NUKPLAVI JI

19. Lé Yesu dasɛ mɔ yekando ye nukplaviwo ji doɔ, yí lé mìasrin doɔ?

¹⁹ Gbɔxwe Yesu ayi jeŋkwi mɛɔ, énu nɔ yi nukplaviwo mɔ yeagbevatrɔ anɔ ju koɖo wo ke. Wodemɔŋje mɛ mɔ Yesu xokɔ nuxu so jeŋkwi mɛ yiyi nu o. Yesu desɔ susu ɖo enuxoxokpɔ wowotɔwo ji o, vɔ ésɔ susu ɖo egbejinɔnɔ wowotɔ ji. (Ʒan 14:​1-5, 8) Énya mɔ woʒan gamɛ gbɔxwe yí amɔŋje ŋɖekatɔwo mɛ shigbe jeŋkwi mɛ yiyi mɔkpɔkpɔ hannɛ. (Ʒan 16:12) Mìwo can mìatɛnŋ akando mìwo Bibla nukplavi ji mɔ yɛji mɔ yeawa enu ci yí ajɔ ji nɔ Yehowa.

20. Lé nɔvinyɔnu ci yí so Malawi kando yi Bibla nukplavi ji doɔ?

²⁰ Kpɔtɔ akankando ao Bibla nukplavi ji mɔ yɛji mɔ yeawa enu ci yí nyɔ. Mìasɔ Chifundo, ci yí nyi nɔvinyɔnu ɖeka ci yí so Malawi kpɔwɛ. Étɔ Bibla kplakpla le Se Vivi nɔ Agbe lɔ Sɔyi Mavɔ! wema lɔ mɛ koɖo Alinafe nyɔnu jajɛ Katolikitɔ ɖeka. Ci wokanseŋ so enukplakpla 14 tɔ lɔ nu ɖegbɔɔ, Chifundo biɔ yi nukplavi lɔ se mɔ, lé yi kpɔnɔ enutatawo zanzan le Mawu sɛnsɛn mɛ do ma. Alinafe do dɔmɛzi sugbɔ yí ɖoŋci mɔ “Amɛ ŋtɔ gbetasɔsɔ yí nyi enyɔ cɛ yɛ!” Chifundo tɔ tamɛ bubu kpɔ mɔ yeaɖo te Bibla nukplakpla lɔ ma. Vɔ éxɔ jigbɔnɖɛ yí kpɔtɔ kplakpla Bibla lɔ koɖo Alinafe, yí kpɔkpɔ emɔ mɔ gamɛ avasun yí yiŋtɔ avamɔŋje enyɔ cɛ mɛ. Le wlɛci ɖewo goduɔ, Chifundo vabiɛ se le enukplakpla 34 tɔ mɛ mɔ: “Ci mìkpla nu keke vaɖo elɛ yɛ ɖe nyɔna ci èkpɔ ci ekpla nu so Bibla koɖo Mawu adodwi Yehowa nuɔ?” Chifundo nu lé Alinafe doŋci do yí mɔ: “Éxo nuxu so susu vevi sugbɔ nu, ɖeka yí nyi mɔ Kunuɖetɔwo dewanɔ enu ci yí Bibla gbe mɔ woŋgbewa o.” Dejinjin o, Alinafe ɖote enutatawo zanzan yí vaje yí wa ʒinʒindoshimɛ.

21. Lé mìatɛnŋ ana yí edro ci Bibla nukplavi ɖe ɖo mɔ yeakpɔtɔ awakɔ nyɔnɔnwi lɔ asɛnŋ dojiɔ?

²¹ Ci enyi Yehowa yí nanɔ yí ‘enuwo shinnɔ’ can ɔ, agban le mì ji mɔ mìakpedo Bibla nukplaviwo nu yí woawa ŋkɔyiyi. (1 Kor. 3:7) De enu ci Mawu ji mɔ wo le wa ɖekɛ yí mìakpla wo o. Mìɖo awa enu wu ahan. Mìakpedo wo nu nɔ woakpɔtɔ aɖoɖoɔ lɔnlɔn sɛnŋ nɔ Yehowa. Gbesɔ kpe niɔ, mìado ŋsɛn wo nɔ woalɔn Yehowa keŋ asɔɛ sɔ ɖo texwe ŋkɔtɔ le wowo gbe mɛ. Yí mìagbekpla wo nɔ woakando Yehowa ji nɔ wovale cukaɖawo mɛ. Nɔ mìdasɛ mɔ mìkando wo jiɔ, mìana yí kankandoji ci wowo can ɖo mɔ yewoanɔ agbe asɔ koɖo agbenywinɔnɔse Yehowa tɔwo asɛnŋ doji yí woaji veviɖe mɔ yewoakpɔtɔ awawa nyɔnɔnwi lɔ.