Wema ci Woŋwlɛ aɖa Rɔmatɔwo
9 Ci ŋnyi Kristo dokplɔtɔɔ, nyɔnɔnwi nukɔ ŋle, denyi ŋsu yɔ o. Anyi yexa ɖekɔ kunu nɔŋ to gbɔngbɔn kɔkɔɛ lɔ ji mɔ, 2 ŋle ŋshishi gangan mɛ yí sekɔ gbazavi le anyi ji mɛ mamimami. 3 Ðo ji naji sa mɔ woaklan nyɛŋtɔ so Kristo lɔ nu shigbe mɛ ci wosɛn kpɛn nɔ nɛ do tamɛ nɔ nɔvinyɛwo, anyi jumɛtɔwo. 4 Wowo yí nyi Izraɛliviwo. Mawu xɔ wo yí sɔ wo wa eviwo. Édasɛ kanfukanfu yitɔ nɔ wo yí bla nu koɖo wo, ésɔ Ese lɔ koɖo sɛnsɛndɔ kɔkɔɛ sɔ na wo yí gbeɖo egbewo nɔ wo. 5 Wowo yí nyi viviwo nɔ mìwo tɔgbiwo, wowo kannu mɛ yí Kristo lɔ to so yí vanyi agbetɔ. Woakanfu Mawu ci yí le ta nɔ enuwo pleŋ sɔyi mavɔmavɔ. Amɛn.
6 Gan, enyɔ ci Mawu nu degɔnma jɔ do ji o, ɖo denyi mɛ ciwo pleŋ yí to so Izraɛli kannu mɛ yí nyi evi ŋtɔŋtɔwo nɔ “Izraɛli” o. 7 Ahanke denyi wo pleŋ yí nyi Abrahamu vi ŋtɔŋtɔwo ci wovlɛ yí to so yi kannu mɛ o. Mawu nu nɔ Abrahamu mɔ, “Mɛ ciwo yí ato so Izaki kannu mɛ yí woayɔ mɔ viviowo.” 8 Édasɛ mɔ denyi evi ciwo woji nɔ Abrahamu yí nyi Mawu vi ŋtɔŋtɔwo o, vɔ evi ciwo woji shigbe lé gbeɖu lɔ nui nɛ yí nyi Abrahamu viviɛ ŋtɔŋtɔwo. 9 Ðo enyɔ ci gbeɖu lɔ nu ke: “Nagbetrɔ va xwe mɛ hweyɛhannu yí evi ŋsuvi ɖeka ale Sara shi.” 10 Denyi yiɖekɛ yɔ o, vɔ hwenu Rebeka fɔn togbowo fu nɔ mìwo tɔgbi Izaki ɔ, Mawu ɖo gbe hɛnnɛ. 11 Hwenu wodekpɔ ji togbo lɔwo o yí wodekpɔ wa nunywi alo enudɔndɔn ɖeɔ, Mawu nu mɛ ci esɔ le wo mɛ ɖɛ doŋkɔ, ɖo mɛ ci yí dro Mawu yí esɔnɔ yí denyi edɔ ci mɛ lɔ wa nu yí ekpɔnɔ do o. 12 Eyi taɖo Mawu nu nɔ Rebeka mɔ: “Xoxutɔ anyi hwashi nɔ vihwɛtɔ.” 13 Enyɔ cɛ yí woŋwlɛ ɖɛ mɔ: “Ŋlɔn Ʒakɔbu, vɔ ŋgbe ŋwa nɔ Ezawu.”
14 Enyɔ ci mìanu yɛɔ? Yí enyi Mawu wanɔ enumajɔmajɔa? Kpɔ gbeɖe! 15 Ðo énu nɔ Moizi mɔ: “Naku ŋshishi nɔ mɛ ci ŋji mɔ naku ŋshishi nɔ yí mɛ ci nu ŋji mɔ nase vevi doɔ, nase vevi do nu.” 16 Eyi taɖo nɔ Mawu asɔ mɛɖeɔ, denyi mɛ lɔ ŋtɔ drodro alo egbla ci edokɔ* nu ekpɔnɔ do o, vɔ mɛ ci eku ŋshishi nɔ yí esɔnɔ. 17 Ðo enuŋwlɛŋwlɛ lɔ nu nɔ Faraɔn mɔ: “Susu ci yí taɖo ŋgbe eo ɖɛ do agbe ke: nadasɛ anyi ŋsɛn to eo ji yí woaxo nuxu so anyi ŋkɔ nu le nyigban lɔ pleŋ ji.” 18 Eyi taɖo Mawu kunɔ ŋshishi nɔ mɛɖekpokpui ci yí drui yí tanɔshi mɛɖekpokpui ci yí drui nɔ atri to.
19 Ètɛnŋ biɔŋ se mɔ: “Nyi yí taɖo egbekpɔnɔ afɛn nɔ amɛɔ? Ðo mi yí atɛnŋ atrɔkpe edro yitɔɔ?” 20 Oo, eo ci yí nyi agbetɔ gbali, mi ènyi yí adɔndɔn nyɔ koɖo Mawu ɔ? Eze atɛnŋ abiɔ mɛ ci yí mi se mɔ: “Nyi yí taɖo èwaŋ do ahan ji maa?” 21 Nyi mɔ? Ezemɛtɔ deɖo acɛ do esu ci enya ji keŋ asɔ akpaxwe ɖeka asɔ mɛ eze ci woazan nɔ enuveviwo yí agbesɔ akpaxwe vetɔ yí asɔ mɛ eze ci woazan nɔ enugbaliwo ba? 22 Ahanke ci Mawu ji mɔ yeadasɛ dɔmɛzi ye tɔye nɔ amɛbaɖawo yí agbena yí woajeshi ye ŋsɛn can ɔ, égbɔnkɔ ji ɖɛ sugbɔ nɔ mɛ ciwo yí eɖo adɔn to nɔ yí wole shigbe eze* ciwo yí woagu swi nɛ. 23 Éwa cɛ keŋ nɔ woajeshi kanfukanfu yitɔ ci esɔ na mɛ ciwo yí eɖo aku ŋshishi nɔ yí wole shigbe eze ciwo edra do ɖɛ nɔ kanfukanfu xɔxɔ nɛ. 24 Mìwo yí nyi eze cɛwo. Denyi Ʒuifuwo mɛ ɖekɛ yí eyɔ mì so o, vɔ éyɔ mì so jukɔn buwo mɛ hɛnnɛ. 25 Enyɔ cɛ yí enu do Oze wema mɛ hɛnnɛ mɔ: “Mɛ ciwo yí denyi anyi jukɔn saɔ, nayɔ wo mɔ ‘anyi jukɔn’ yí nyɔnu ci ŋdelɔn saɔ, nayɔɛ mɔ ‘lɔnlɔntɔ’; 26 eyi fini wonu nɔ wo le sa mɔ, ‘Mídenyi anyi jukɔn ɔ,’ woayɔ wo le nɔtɔxu mɔ, ‘Mawu agbuagbu lɔ viwo.’”
27 Gbesɔ kpe niɔ, Ezai do axwa yí nu so Izraɛli nu mɔ: “Ci Izraɛliviwo asugbɔ shigbe axukɔ nɛ can ɔ, amɛ kankin ci yí kpɔtɔ nɔ wo ɖekɛ yí woahwlɛn gan. 28 Ðo Yehowa* abiɔ kɔnŋta nyigban lɔ, áwɛ vɛ yí agbewɛ blaŋ.” 29 Shigbe lé Ezai nui ɖɛ hɛnnɛ nɛ mɔ: “Nɔ Yehowa* ahwakɔnwo tɔ degbe viviwo ɖɛ nɔ mì saɔ, mìale shigbe Sodomu koɖo Gomora nɛ.”
30 Enyɔ ci mìagbenu yɛɔ? Ci jukɔn bu mɛ tɔwo dejekɔ agbla mɔ yewoanyi amɛjɔjɔɛwo can ɔ, Mawu kpɔ wo do amɛjɔjɔɛwo ji ci woɖo xɔse. 31 Vɔ ci Izraɛliviwo teteɛkpɔ mɔ yewoanyi amɛjɔjɔɛwo shigbe lé wonui do ese lɔ mɛ nɛ can ɔ, wodesun ji yí wa do ese lɔ ji o. 32 Nyi yí taɖoɔ? Ðo wobukɔ mɔ yewo dɔwawawo ji yewoato anyi amɛjɔjɔɛwo yí denyi xɔse ji yɔ o. Woklɛn “ekpe ci yí donɔ afɔbli amɛ lɔ”; 33 shigbe lé woŋwli ɖɛ nɛ mɔ: “Kpɔ ɖa! Ŋsɔsɔ ekpe ci yí ado afɔbli amɛ koɖo ekpe ci yí ado dɔmɛzi nɔ amɛ dada do Siɔn, vɔ mɛ ci yí asɔ yi xɔse ɖo ekpe lɔ ji daɖu ŋkpɛn o.”