Wema Amɛvetɔ ci Woŋwlɛ Ðaɖa Tɛsalonikitɔwo

3 Le vɔvɔnuɔ, nɔviwo, mídonɔ gbe ɖaɖa do ta nɔ mì keŋ nɔ Yehowa* nyɔ lɔ akakakɔ doji kabakaba yí woakanfuikɔ shigbe lé míwowɛkɔ do nɛ, 2 eyi woahwlɛn mì gan le xomɛvetɔwo koɖo nuvwinwatɔwo shi, ɖo denyi amɛwo pleŋ yí ɖonɔ xɔse o. 3 Vɔ egbejinɔtɔ yí Axwetɔ lɔ nyi, ádo ŋsɛn mí yí acɔn alɔ̀ mí ji nɔ nuvwinwatɔ lɔ ŋgbewa ŋɖe koɖo mí o. 4 Gbesɔwu hunnɔɔ, mìkando mí ji le Axwetɔ lɔ mɛ mɔ, míwakɔ do enu ciwo mìkpla mí ji yí míakpɔtɔ awakɔ do wo ji. 5 Axwetɔ lɔ le kpɔtɔ akpekɔdo mí nu nɔ míalɔnkɔ Mawu yí agbedodoɔ ji nɔ Kristo.

6 Ecɛyɛɔ, nɔviwo, mìnukɔ nɔ mí le mìwo Xwetɔ Yesu Kristo ŋkɔ mɛ mɔ míwo le gbe eha nɔ nɔvi ɖekpokpui ci yí wanɔ enuyakayaka yí dewakɔ do enu ciwo yí mìkpla mí* ji o. 7 Míwoŋtɔwo mínya lé míɖo awa mìwotɔ han do, ɖo mìdewa enuyakayaka ɖe le mí mɛ o 8 yí mìdeɖu mɛɖe nu ɖe gbali o,* vɔ mìwa edɔ sɛnsinɖe ezan koɖo kede keŋ nɔ mìŋgbevanyi agban nɔ mɛɖe le mí mɛ o. 9 Denyi mɔ mìdeɖo acɛ yí awɛ dru yɔ o, vɔ mìji mɔ mìanyi kpɔwɛ nɔ mí nɔ míawa mìwotɔ han yɔ. 10 Eyi nyɔnɔnwimɛtɔɔ, hwenu mìle mí gbɔɔ, mìnunɔ enyɔ cɛ nɔ mí mɔ: “Nɔ mɛɖe deji mɔ yeawa edɔɔ, ŋgbeɖu nu hɛnnɛ o.” 11 Ðo mìse mɔ mɛɖewo wakɔ enuyakayaka le mí mɛ yí wodele edɔ ɖekɛ wakɔ o, vɔ wododoɔ nu enyɔ ciwo yí dekan wo mɛ. 12 Mìdokɔ ese nɔ nɛnɛmɛwo yí kplakɔ nu wo le Axwetɔ Yesu Kristo mɛ mɔ, wo le wa dɔ kpuu yí aɖu enu ci wowoŋtɔwo do gbla yí kpɔ.

13 Nɔviwo, míwoɔ, míŋgbemi enunywi wawa o. 14 Vɔ mɛɖekpokpui ci yí dewakɔ do enyɔ ci mìnu do wema cɛ mɛ jiɔ, míɖi do akpo yí ami eha dodo koɖi nɔ awa ŋkpɛn ni. 15 Gan míŋgbekpɔɛ do ketɔnɔ ji o, vɔ míkpɔtɔ akplakɔ nu yi shigbe nɔvi nɛ.

16 Fafa Xwetɔ lɔ ŋtɔ le nakɔ fafa mí hweɖekpokpuinu le enuwo pleŋ mɛ. Axwetɔ lɔ le nɔ koɖo mí pleŋ.

17 Enyɛ Pɔlu, ŋdo gbe ɖaɖa mí, nyɛŋtɔ yí ŋwlɛ egbedonamɛ cɛ yɛ, ahan yí ŋdonɔ alɔ̀ wema ɖekpokpui mɛ do ke, lé ŋŋwlɛnɔ nu do ke.

18 Mìwo Xwetɔ Yesu Kristo le wa xomɛvu gangan nɔ mí pleŋ.