ENUKPLAKPLA NYƆTA 46

Kankandoji Ci Yehowa Na Mì Mɔ Paradiso Gbe Ci Yeɖo Avamɛ

“Mɛɖekpokpui ci yí ji mɔ wo le cu shi nɔ ye le nyigban jiɔ, nyɔnɔnwi Mawu lɔ acu shi ni.”—EZAI 65:16, NWT.

EHAJIJI 3 Wòe Nye Míaƒe Ŋusẽ Kple Míaƒe Mɔkpɔkpɔ

SUSU VEVI LƆa

1. Enyɔ ci yí Enyɔnuɖɛtɔ Ezai nu nɔ yi kpena Izraɛliviwoɔ?

Enyɔnuɖɛtɔ Ezai dre Yehowa mɔ yɛ nyi “nyɔnɔnwi Mawu.” Enyɔ ci gɔnmɛ woɖe mɔ “nyɔnɔnwi” gɔnmɛɖeɖe tiin yí nyi “amɛn.” (Ezai 65:16, NWT.) “Amɛn” lɔ gɔnmɛ yí nyi “avamɛ,” alo “kankandojitɔ.” Nɔ wozan nyɔgbe “amɛn” do Yehowa alo Yesu nu le Bibla mɛɔ, edasɛ mɔ kankandoji li mɔ enyɔ lɔ nyi nyɔnɔnwi. Eyi taɖo enyɔ ci Ezai nu nɔ yi kpena Izraɛliviwo mɛ kɔ petii: Nɔ Yehowa nu nyɔ ɖeɔ, ejɔnɔ doji kokoko. Le nyɔnɔnwi mɛɔ, Yehowa wɛni keke yi gbeɖuwo vanɔmɛ.

2. Nyi yí taɖo mìatɛnŋ akando egbe ciwo Yehowa ɖo kudo esɔ mɛ jiɔ, yí enyɔbiɔse ciwo mìakpɔ ɖoŋci nɔɔ?

² Mìatɛnŋ akando ji mɔ egbe ci Yehowa ɖo kuso esɔ mɛ nu ajɔ do jia? Exwe 800 han godu nɔ Ezai hwenuɔ, apotru Pɔlu dre enu ci yí taɖo mìatɛnŋ akando ji mɔ Mawu gbeɖuwo vanɔmɛ gashiagamɛ. Pɔlu nu mɔ: “Mawu da tɛnŋ kanŋsu” o. (Ebre. 6:18) Shigbe lé han eshidu ɖe datɛnŋ ana eshi vivi koɖo eshi veje dojuɔ, ahanke Yehowa ci yí nyi agu nɔ nyɔnɔnwi lɔ datɛnŋ anunɔ nyɔnɔnwi yí agbekannɔ ŋsu nɛ. Eyi taɖo mìatɛnŋ akando enyɔ ciwo pleŋ Yehowa nunɔ ji, egbe ciwo pleŋ eɖo kuso mìwo sɔ mɛ nu can le mɛ. Mìakpɔ ɖoŋci nɔ nyɔbiɔse cɛwo le nyɔta cɛ mɛ: Nyi Yehowa ɖo gbe mɔ yeana mì le esɔ mɛɔ? Yí lé eɖo kpe yi ji do mɔ ye gbeɖu lɔ avamɛɔ?

EGBE CI YEHOWA ÐOƆ?

3. (a) Gbeɖu ci yí jɔnɔ ji nɔ Mawu sɛntɔwo sugbɔɔ? (Enyɔdasɛ 21:3, 4) (b) Lé mɛɖewo wanɔ nu do nɔ mìxo nuxu so gbeɖu cɛ nu nɔ woɔ?

³ Gbeɖu ci nu mìaxo nuxu so jɔnɔ ji nɔ Mawu sɛntɔwo le xexe lɔ pleŋ mɛ. (Hlɛn Enyɔdasɛ 21:3, 4.) Yehowa ɖo gbe mɔ hweɖekanuɔ, “eku, enulolo avin fanfan alo vevisese da gbe li o.” Amɛ sugbɔ le mì mɛ hlɛnnɔ kpukpui cɛwo yí asɔ do ŋsɛn mɛ ciwo mìɖeɖeɛ kunu nɔ yí agbedasɛ lé agbe lɔ avanɔ do le Paradiso mɛ nɔ wo. Lé mɛɖewo wanɔ nu do nɔ mìxo nuxu so gbeɖu cɛ nu nɔ woɔ? Wotɛnŋ nu mɔ, “Enyɔ cɛwo nya sese sugbɔ keke wodatɛnŋ anyi nyɔnɔnwi o.”

4. (a) Nyiwo yí Yehowa nya ɖɛɔ? (b) Nubu ci Yehowa gbewa to akpo nɔ egbe lɔ ci eɖoɔ?

⁴ Hwenu yí Yehowa na yí apotru Ʒan ŋlwɛkɔ nu so Paradiso gbeɖu cɛ nuɔ, énya mɔ mìwo avanu emɔkpɔkpɔ nyɔ cɛ nɔ mɛbuwo le kunuɖeɖedɔ lɔ mɛ le egbɛ mɛ. Yehowa gbenya mɔ agbɔnnu nɔ amɛ sugbɔ mɔ woakando enu yoyu gbe cɛ ci yeɖo ji. (Ezai 42:9; 60:2; 2 Kor. 4:3, 4) Eyi taɖo lé mìawɛ akando ji mɔ gbeɖu ciwo yí le Enyɔdasɛ 21:3, 4 mɛ avamɛ nyɔnɔnwitɔɔ, yí agbekpedo mɛbuwo nu wowo can woakando jiɔ? Yehowa na mì kpeɖoji sɛnŋ ciwo yí adɔ mìatɛnŋ akando ji mɔ egbe ci eɖo lɔ avamɛ. Kpeɖoji ciwo enaɔ?

YEHOWA NA KANKANDOJI MÌ MƆ YE GBEÐU AVAMƐ

5. Kpeɖoji ciwo yí adɔ mìatɛnŋ akando Paradiso gbe ci Mawu ɖo jiɔ, yí fini mìakpɔ wo leɔ?

⁵ Mìkpɔ susu ciwo yí dɔ mìatɛnŋ akando Paradiso gbe ci Yehowa ɖo ji le kpukpui cɛwo mɛ. Wohlɛn mɔ: “Amɛ ci yí le anyinɔnɔ le efyɔ ʒinkpin lɔ ji nu mɔ: ‘Kpɔɖaa! Ŋ wawa nushanu do yoyu ji!’ Eyi E nu mɔ: ‘Ŋwlɛ enyɔ cɛ, ɖo nuxu lɔwo nyi nyɔnɔnwi yí wo a kando wo ji.’ Amɛ ci yí le anyinɔnɔ le efyɔ ʒinkpin lɔ ji nu nɔ ŋ mɔ: ‘Ŋ nyi Alufa koɖo Omɛga, Tɔxu koɖo Vɔxu.’”—Enyɔ. 21:5, 6a.

6. Nyi yí taɖo yí enyɔ ci wonu do Enyɔdasɛ 21:5, 6 na yí kankandoji ci mìɖo do Mawu gbeɖu lɔ nu sɛnŋ ɔ?

⁶ Nyi yí taɖo Bibla mɛ nyɔ cɛ atɛnŋ ado ŋsɛn kankandoji ci mìɖo do Mawu gbeɖu nuɔ? Le kpukpui cɛwo mɛɔ, ele shigbe mɔ Yehowa do alɔ wema mɛ yí sɔ nakɔ kankandoji mì mɔ egbe ci yeɖo lɔ avamɛ. Woŋwlɛ egbe ci Mawu ɖo do Enyɔdasɛ 21:3, 4 mɛ. Vɔ le kpukpui 5 koɖo 6 mɛɔ, mìkpɔ alɔdowemamɛ Yehowa tɔ. Ecɛ ɖoɖoɔ kpe yi ji mɔ yi gbeɖu lɔ avamɛ. Ecɛyɛ mìakpɔ enyɔgbe ciwo yí Yehowa zan yí sɔ na kankandoji lɔ mì.

7. Mi yí tɔ nuxu xoxo le kpukpui amatɔntɔ lɔ mɛɔ, yí nyi yí taɖo ele veviɖeɔ?

⁷ “Amɛ ci yí le anyinɔnɔ le efyɔ ʒinkpin lɔ ji nu mɔ.” (Enyɔ 21:5a) Zetɔn yí Yehowa ŋtɔ xo nuxu le Enyɔdasɛ wema lɔ mɛ yí wozan enyɔ cɛwo le nuxu lɔwo ɖeka mɛ. Denyi mawudɔla sɛnŋ ɖe alo Yesu ci yí fɔn so ku yí nu nyɔ cɛwo o, vɔ Yehowa ŋtɔ yí nui! Ecɛ dɔ yí kankandoji le enyɔ ciwo enu kplɔɛdo nu. Lé enyi ahan doɔ? Ðo Yehowa “de kannɔ ŋsu o.” (Titu 1:2) Eyi taɖo enyɔ ci mìhlɛn le Enyɔdasɛ 21:5, 6 mɛ ajɔ do ji dandandan.

“KPƆÐAA! Ŋ WAWA NUSHANU DO YOYU JI”

8. Enyɔ ci Yehowa nu yí sɔ ɖo kpe yi ji mɔ yeawa do egbe ci yeɖo lɔ jiɔ? (Ezai 46:10)

⁸ Yehowa nu kplɔɛdo mɔ “Kpɔɖaa!” (Enyɔ. 21:5) Wozan Grɛki nyɔgbe ci mɛ woɖe mɔ “kpɔɖaa!” zenɛniɖe le Enyɔdasɛ wema lɔ mɛ. Wema ɖeka nu mɔ wozan enyɔ cɛ yí “sɔ nunuɔ nɔ enuhlɛntɔ lɔ mɔ yi le lé ŋkuvi do enyɔ ci yí kplɔɛdo nu nywiɖe.” Enyɔ ci Mawu nu kplɔɛdoɔ? Énu mɔ: “Ŋ wawa nushanu do yoyu ji.” Nyɔnɔnwi enyi mɔ trɔtrɔ ciwo yí ava le esɔ mɛ nu yí Yehowa xoxoɔ nuxu so, vɔ ékando ji mɔ yeawa do egbe ci yeɖo ji keke yí xoxoɔ nuxu so nu shigbe éwa enu lɔwo vɔ hannɛ.—Hlɛn Ezai 46:10.

9. (a) Enu amɛve ciwo ji enyɔ ci Yehowa nu mɔ, “Ŋ wawa nushanu do yoyu ji” hɛn susu yiɔ? (b) Nyi yí ajɔ do “jeŋkwi” koɖo “nyigban” ciwo li kakayɛ jiɔ?

⁹ Yehowa mɔ: “Ŋ wawa nushanu do yoyu ji.” Enyɔ cɛ gɔnmɛ ɖe? Le kpukpui cɛwo mɛɔ, Yehowa xoxoɔ nuxu so enu amɛve ci awa nu. Ŋkɔtɔ, Yehowa agu xexe xoxwi lɔ. Amɛvetɔ, áwa xexe yoyu bu. Mìhlɛn le Enyɔdasɛ 21:1 mɛ mɔ: “Jeŋkwi ŋkɔtɔ koɖo nyigban ŋkɔtɔ va gu.” Politiki ŋsɛn ciwo yí Satana koɖo yi gbɔngbɔnvɔnwo kpa nɔ yí nyi “jeŋkwi ŋkɔtɔ.” (Mt. 4:8, 9; 1 Ʒan 5:19) Nɔ Bibla zan enyɔgbe “nyigban” hweɖewonuɔ, éxoxoɔ nuxu so mɛ ciwo pleŋ yí le nyigban lɔ ji nu. (Gɔnm. 11:1; Eha. 96:1) Eyi taɖo “nyigban ŋkɔtɔ” lɔ le dumɛ nɔ amɛvwin ciwo yí le nyigban lɔ ji gbɛ. Denyi mɔ Yehowa adra “jeŋkwi” koɖo “nyigban” ci yí li gbɛ do yɔ o, vɔ aɖe wo swi gbijigbiji yí asɔ bu sɔ ɖɔli wo. Ásɔ “jeŋkwi yoyu koɖo nyigban yoyu” sɔ ɖɔli ciwo yí li gbɛ. Yi gɔnmɛ yí nyi mɔ, áɖo acɛkpakpa yoyu ci yí akpa nɔ amɛjɔjɔɛwo.

10. Nyi Yehowa awa do yoyu jiɔ?

¹⁰ Le Enyɔdasɛ 21:5 mɛɔ, mìhlɛn nu so enu ciwo Yehowa mɔ yeawa do yoyu ji nu. Do jeshi mɔ Yehowa denu mɔ: “Ŋwakɔ enu yoyuwo pleŋ o.” Énu mɔ: “Ŋ wawa nushanu do yoyu ji.” Eyi Yehowa awɛ yí nyigban koɖo agbetɔwo anyi yoyu yí awɛ yí nuvɔn dagbele wo nu o. Shigbe lé Ezai nui ɖɛ ɛnɛɔ, nyigban lɔ pleŋ avatrɔ afi nyakpɔkpɔ ɖeka yí ale shigbe Edɛn kpa hannɛ. Yí agbeda edɔ̀ ciwo yí le mì nu ɖekaɖeka xloŋ. Woayɔ dɔ̀ nɔ mɛ ciwo yí kplibɔwo, ŋkuvitɔnnɔwo, koɖo tokunɔwo yí woafɔn amɛ kukuwo ŋtɔkpu can so ku.—Ezai 25:8; 35:1-7.

“NUXU LƆWO NYI NYƆNƆNWI YÍ WO A KANDO WO JI. . . É VƆ!”

11. Enyɔ ci yí Yehowa nu nɔ Ʒan ɔ, yí nyi yí taɖoɔ?

¹¹ Enyɔ bu ci yí Mawu nu keŋ nɔ mìakando jiɔ? Yehowa nu nɔ Ʒan mɔ: “Ŋwlɛ enyɔ cɛ ɖo nuxu lɔwo nyi nyɔnɔnwi yí wo a kando wo ji.” (Enyɔ 21:5) Yehowa denu kpoŋ mɔ “ŋwlɛ enyɔ cɛ” o, énu susu ci yí taɖo yí eɖo aŋwli. Énu mɔ: “Ðo nuxu lɔwo nyi nyɔnɔnwi yí wo a kando wo ji,” ci yí dasɛ mɔ woatɛnŋ aɖe ji do Mawu nyɔwo nu. Ejɔ ji nɔ mì mɔ Ʒan wa do enyɔ ci Mawu nu ni ji yí “ŋwlɛ enyɔ” lɔ ɖɛ. Ecɛ yí na mìatɛnŋ ahlɛn nu so Paradiso gbe ci Mawu ɖo nu yí agbebu tamɛ kpɔ so shicu nywi ciwo yí le ŋkɔ gbɔgbɔ nu.

12. Nyi yí taɖo Yehowa atɛnŋ nu mɔ: “É vɔ” ɔ?

¹² Enyɔ ci Mawu nu kplɔɛdoɔ? Énu mɔ: “É vɔ!” (Enyɔ. 21:6) Ecɛyɛ Yehowa nunuɔ nyɔ lɔwo shigbe mɔ egbe ciwo eɖo kudo Paradiso lɔ nu vamɛ vɔ hannɛ. Yehowa nyɔ jɔ mɔ axo nuxu ahan ɖo ŋɖekɛ datɛnŋ aɖo te yi mɔ awa do ŋci eɖo mɔ yeawa ji o. Yehowa gbenu nyɔ bu ci adɔ mìakando ji mɔ yi gbeɖu lɔ avamɛ dandandan. Nyɔ ci enuɔ?

“Ŋ NYI ALUFA KOÐO OMƐGA”

13. Nyi yí taɖo Yehowa nu mɔ: “Ŋ nyi Alufa koɖo Omɛga” ɔ?

¹³ Shigbe lé mìnui vayi nɛɔ, Yehowa ŋtɔ xo nuxu zetɔn le ŋtegan ciwo Ʒan kpɔ mɛ. (Enyɔ. 1:8; 21:5, 6; 22:13) Le zetɔn lɔwo pleŋ mɛɔ, Yehowa nu mɔ: “Ŋ nyi Alufa koɖo Omɛga.” Grɛki wemakwi ŋkɔtɔ yí nyi Alufa lɔ, yí Omɛga nyi vɔxutɔ. Ci Yehowa mɔ yenyi “Alufa koɖo Omɛga” ɔ, nu enunuɔ mɔ nɔ yetɔ ŋɖe wawaɔ, yewɛni keke yí ayi vɔvɔnu.

Foto: Yehowa dro lɔ vamɛ. 1. “Alufa.” Adamu koɖo Ɛva le Edɛn kpa lɔ mɛ. 2. Alɔzu ciwo yí to so egufɔnfɔn lɔ mɛ, Satan ci yí nyi mawudɔla vwin, Adamu koɖo Ɛva hwenu woku nyɔxo, Babɛli xɔ yiji, amɛɖ HS.1yixu, kpobishiwo, tanŋki, ahwayamɛhunwo, mashinniwo cukɔ azɔ vɔn do ayamɛ, egufɔntɔwo. Foto amɛve bu dasɛ lé Yehowa dro yikɔ ŋkɔ do: Yesu le efuntrenamɛci ji, edadasɛ tafɛn toto lɔ, koɖo Yehowa sɛntɔwo le blema koɖo egbɛ mɛ ci yí dadasɛ Adamu koɖo Ɛva jijimɛvi egbejinɔtɔwo. 3. “Omɛga.” Amɛwo wakɔ edɔ doju yí kpɔkɔ jijɔ le Paradiso mɛ. — Nɔ Yehowa tɔ ŋɖe jiɔ, ényanɔ lé avavɔ do (Kpɔ mamamɛ 4, 17)

14. (a) Hwenu Yehowa nu mɔ “Alufa” ɔ, yí hwenu anu mɔ “Omɛga” le kpɔwɛnyɔnunu mɛɔ? (b) Kankandoji ci yí ze le Gɔnmɛjeje 2:1-3 mɛɔ?

¹⁴ Hwenu yí Yehowa wa Adamu koɖo Ɛva ɔ, énu susu ci eɖo do nyigban koɖo agbetɔ nu nɔ wo. Bibla nu mɔ: “Mawu cushi nɔ wo, yí nu nɔ wo mɔ: ‘Mí a ji evi sugbɔ, mí a ɖɔ nyigban ji yí a sun ji.’” (Gɔnm. 1:28) Ele shigbe mɔ hwenɔnuɔ, Yehowa nu mɔ “Alufa” hannɛ. Énu edro yitɔ yi mɛ kɔ petii. Adamu koɖo Ɛva jijimɛvi ciwo yí nyi amɛkpekpewo aɖɔ nyigban lɔ ji yí awɛ yí atrɔ Paradiso. Nɔ evanyi ahan le esɔ mɛɔ, anyi Yehowa anu mɔ “Omɛga.” Ci Yehowa wa enushanu ci yí le “jeŋkwi mɛ koɖo nyigban ji” ɖegbɔɔ, énu nyɔ ɖeka ci yí dasɛ mɔ edro yitɔ lɔ avamɛ dandandan. Enyɔ ci enu ze le Gɔnmɛjeje 2:1-3 mɛ. (Hlin.) Yehowa nu mɔ ŋkeke amadrɛtɔ lɔ nyi ŋkeke kɔkɔɛ. Enyɔ cɛ gɔnmɛ ɖe? Yehowa ɖo kpe yi ji mɔ yeawɛ keke edro ci yeɖo do agbetɔwo koɖo nyigban lɔ nu anyi wawa. Avamɛ keŋkeŋ le vɔvɔnu nɔ ŋkeke amadrɛtɔ lɔ.

15. Nyi yí taɖo Satana atɛnŋ abui mɔ yewɛ yí edro ci Yehowa ɖo do agbetɔwo nu dagbeje jiɔ?

¹⁵ Ci Adamu koɖo Ɛva fɔn gu do Mawu jiɔ, wotrɔ nuvɔnmɛwo yí sɔ nuvɔn koɖo ku ba nɔ wowo jijimɛviwo. (Rɔm. 5:12) Ecɛ na yí eze shigbe mɔ Satana wɛ yí edro Mawu tɔ ci yí nyi mɔ agbetɔ maɖoafɛnwo aɖɔ nyigban lɔ ji datɛnŋ agbevamɛ hannɛ. Ele shigbe mɔ Satana wɛ keke yí Yehowa datɛnŋ agbenu gbeɖe mɔ “Omɛga” hannɛ. Satana tɛnŋ bui mɔ Yehowa datɛnŋ agbewa do yi gbeɖu lɔ ji o. Étɛnŋ bui mɔ Mawu awu Adamu koɖo Ɛva yí awa asu koɖo ashi bu ci nu nuvɔn dele o nɔ woana yí edro yitɔ avamɛ. Nɔ Mawu wɛ ahan ɔ, Legba hɛn ado hwɛ yi mɔ yinyi ŋsukantɔ. Nyi yí taɖoɔ? Shigbe mɔ lé woŋwli do Gɔnmɛjeje 1:28 mɛ nɛɔ, Yehowa nu nɔ Adamu koɖo Ɛva mɔ, wowo jijimɛviwo yí aɖɔ nyigban lɔ ji.

16. Nyi yí taɖo Satana atɛnŋ abui mɔ yeatɛnŋ anu nɔ Yehowa mɔ yidekpe ŋɖe jiɔ?

¹⁶ Gbeta bu ci Satana atɛnŋ akpɔkpɔ mɔ nɔ mɔ Yehowa asɔɔ? Taŋfuin Satana abui mɔ Yehowa atashi Adamu koɖo Ɛva yí woaji evi nuvɔnmɛwo yí wodavanyi amɛkpekpewo kpɔ o. (Ŋun. 7:20; Rɔm. 3:23) Nɔ evanyi ahan ɔ, Satana atɛnŋ ado hwɛ Yehowa mɔ yidekpe ŋci yiɖo te lɔ ji o. Nyi yí taɖoɔ? Ðo edro Mawu tɔ ci yí nyi mɔ Adamu koɖo Ɛva jijimɛviwo anyi amɛkpekpewo keŋ anɔ Paradiso mɛ le nyigban ji davamɛ o.

17. Ci Satana koɖo agbetɔ ŋkɔtɔwo fɔn gu ɖe, lé Yehowa kpɔ gbɔ doɔ, yí nyi yí avato so mɛɔ? (Kpɔ foto lɔ hɛnnɛ.)

¹⁷ Lé Yehowa kpɔ Satana koɖo amɛ ŋkɔtɔwo gufɔnfɔn nyɔ lɔ gbɔ do akpaca Satana haan. (Eha. 92:5) Yehowa tashi Adamu koɖo Ɛva yí woji viwo yí sɔ dasɛ mɔ ye nyɔwo nyi nyɔnɔnwi yí yedenyi ŋsukantɔ o. Eyi Yehowa dasɛ mɔ nɔ yenu mɔ yeawa ŋɖeɔ, ŋɖekɛ datɛnŋ aɖo te ye yí yedakpe ji awɛ o. Éwɛ keke nɔ edro yitɔ lɔ anyi wawa ci ewa toto, nɔ “jijimɛvi” ɖeka ahwlɛn Adamu koɖo Ɛva jijimɛvi ciwo yí se tonu gan. (Gɔnm. 3:15; 22:18) Satana denya sa mɔ Yehowa awa tafɛn toto lɔ o! Nyi yí taɖo mìatɛnŋ anu ahan ɔ? Ðo Yehowa dejinɔ yiɖekɛ tɔ o, eyi dɔ taɖo yí ewa toto lɔ. (Mt. 20:28; Ʒan 3:16) Satana yɛ deɖo nɔnɔmɛ cɛ o, yiɖekɛ tɔ yɛjinɔ. Ecɛyɛ ɖe, nyi yí ato le tafɛn toto lɔ mɛɔ? Le vɔvɔnu nɔ Exwe Kotokun ɖeka Cɛkpakpa Kristo tɔɔ, Adamu koɖo Ɛva jijimɛvi tonusetɔwo atrɔ amɛkpekpewo yí anɔ agbe le Paradiso nyigban ji shigbe lé Yehowa drɔɛ do le tɔtɔmɛ ɛnɛ. Le gahunnɔmɛɔ, Yehowa avanu mɔ “Omɛga.”

LÉ MÌAWƐ NƆ KANDOJI CI MÌÐO DO PARADISO GBE CI YEHOWA ÐO NU ASƐNŊ DOJI

18. Enyɔ amɛtɔn ciwo Yehowa nu yí sɔ na kankandoji mì mɔ yeawa do egbe ci yeɖo jiɔ? (Kpɔ dakavi ci yí nyi “Kpeɖoji Amɛtɔn Ciwo Yí Dɔ Mìkando Egbe Ci Yehowa Ðo Ji”)

¹⁸ Le nyɔta cɛ mɛɔ, mìkpɔ kpeɖoji ciwo yí dɔ mìkando ji mɔ nyigban lɔ atrɔ Paradiso. Enyɔ ci mìanu nɔ mɛbuwo asɔ kpedo wo nu nɔ woakando ji mɔ enu avanyi ahan ɔ? Ŋkɔtɔ, Yehowa ŋtɔ yí ɖo gbe lɔ. Enyɔdasɛ wema lɔ nu mɔ: “Amɛ ci yí le anyinɔnɔ le efyɔ ʒinkpin lɔ ji nu mɔ: ‘Kpɔɖaa! Ŋ wawa nushanu do yoyu ji.’” Yehowa ɖo nunya yí ɖo ŋsɛn yí gbeɖo edro mɔ yeawɛ nɔ egbe ci yeɖo lɔ avamɛ. Evetɔ, Yehowa kando ji mɔ yeawa do egbe ci yeɖo ji keke yí xo nuxu shigbe mɔ ewɛ vɔ hannɛ. Eyi taɖo enu mɔ: “Nuxu lɔwo nyi nyɔnɔnwi yí wo a kando wo ji. . . . É vɔ!” Amɛtɔntɔ, nɔ Yehowa tɔ ŋɖe jiɔ, éwɛni keke aɖegbɔ ni nywiɖe shigbe lé yiŋtɔ nui nɛ mɔ: “Ŋ nyi Alufa koɖo Omɛga.” Yehowa adasɛ nɔ Satana mɔ yɛnyi ŋsukantɔ yí dekpe ŋɖe ji o.

19. Nɔ amɛwo dekando Paradiso gbe ci Mawu ɖo ji ɖe, lé àwɛ doɔ?

¹⁹ Ðo ŋwi mɔ hweɖekpokpuinu ci èxokɔ nuxu so kpeɖoji ciwo Yehowa na mì so yi gbeɖuwo nu nɔ mɛbuwoɔ, èwɛkɔ nɔ kandoji ci èɖo do gbeɖu lɔwo nu asɛnŋ doji. Eyi taɖo nɔ ègbehlɛn gbeɖu fakɔnnamɛ ci yí le Enyɔdasɛ 21:4 mɛ ci yí xo nuxu so Paradiso ci yí avava nu nɔ mɛɖe yí mɛ lɔ mɔ, “Enyɔ cɛwo nya sese sugbɔ keke wodatɛnŋ anyi nyɔnɔnwi o” ɖe, lé àwa nu doɔ? Danyɔ mɔ àhlɛn Enyɔdasɛ eta 21 kpukpui 5 koɖo 6 yí adre mɛ ni ba? Dasɛ lé Yehowa ŋtɔ do alɔ wema mɛ yí ɖo kpe yi ji mɔ ye gbeɖu lɔ avamɛ ni.—Ezai 65:16.

Ehajiji 145 Mawu Do Paradiso Ŋugbe

a Enyɔta cɛ axo nuxu so lé Yehowa na kankandoji mì do mɔ Paradiso gbe ci yeɖo avamɛ nu. Hweɖekpokpuinu ci mìxokɔ nuxu so kankandoji nyɔ cɛwo nu nɔ mɛbuwoɔ, kandoji ci mìwoŋtɔwo mìɖo do Yehowa gbeɖu lɔwo nu asɛnsɛnŋ doji.