Susu ci Mawu ɖo do mì nuɔ?

Se vivi nɔ agbe lɔ sɔyi mavɔ!—Bibla kplakpla to seŋkankan ji
- ENUKPLAKPLA 25
  
  Susu ci Mawu ɖo do mì nuɔ?
  Bibla nu mɔ agbetɔwo gbe “kpokpo yí ɖɔ koɖo cukaɖa.” (Job 14:1) Susu ci Mawu ɖo do mì nu nɛa? Nɔ denyi ahan yɔ ɖe, susu ci eɖo do mì nuɔ? Keke susu lɔ avavamɛ kpɔa? Na mìakpɔ Bibla ɖoŋci fakɔnnamɛwo.
  
  1. Lé Yehowa ji mɔ mìwo gbe mɛ le nɔ doɔ?
  
  Yehowa ji mɔ mìwo le nɔ agbe nywitɔ. Ci ewa agbetɔ ŋkɔŋkɔtɔwo, Adamu koɖo Ɛvaɔ, ésɔ wo da do paradiso nyakpɔkpɔ ɖeka ci yí nyi Edɛn kpa mɛ. Yi godu “Mawu cushi nɔ wo, yí nu nɔ wo mɔ ‘Mí a ji evi sugbɔ. Mí a ɖɔ nyigbanji, yí a sun ji.’” (Gɔnmɛjeje 1:28) Yehowa ji mɔ woaji viwo yí asɔ nyigban lɔ pleŋ wa paradiso keŋ ale bu nɔ elanwo. Yi susu yí nyi mɔ agbetɔwo pleŋ anɔ agbe le lanmɛsɛn mɛ tɛgbɛɛ.
  
  Ci enu lɔwo devanɔ shigbe lé Mawu ji do nɛ can ɔ, susu lɔ detrɔ o.a (Ezai 46:10, 11) Egbekpɔtɔ jikɔ mɔ agbetɔ tonusetɔwo anɔ agbe tɛgbɛɛ le nɔnɔmɛ maɖoafɛnwo mɛ.—Hlɛn Enyɔdasɛ 21:3, 4.
  
  2. Lé mìawɛ anɔ agbe ci nu tamɛɖoɖo le le kakacɛ mɛɔ?
  
  Yehowa wa mì yí mìʒannɔ ‘gbɔngbɔnmɛnuwo,’ eyi taɖo mìjinɔ mɔ mìajeshi ɖɛ keŋ asin. (Hlɛn Matie 5:3-6.) Éji mɔ mìwo le nyi exlɔ veviwo koɖo ye, ‘awa enu ciwo yí yenu,’ yí asɛn ye “koɖo [mìwo] ji xloŋ.” (2 Ese Wema 10:12; Ehajiji Wema 25:14) Nɔ mìwɛ ahan ɔ, mìatɛnŋ akpɔ jijɔ nyɔnɔnwitɔ, ci mìle cukaɖawo mɛ can. Yehowa sɛnsɛn na tamɛɖoɖo adodwi nɔnɔ mìwo gbe nu, ɖo mìnɔkɔ agbe shigbe lé eji do nɛ.
  JI DWI NI KPƆ DOJI
  
  Kpɔ lɔnlɔn gangan ci Yehowa ɖo nɔ mì hwenu ewakɔ nyigban lɔ nɔ mì koɖo enu ci yi Nyɔ lɔ kpla mì so susu ci eɖo do agbe lɔ nu.
  
  3. Susu nywi ɖeka yí Yehowa ɖo do agbetɔwo nu
  
  Xo VIDEO lɔ, keŋ agbeje nyɔbiɔse ci yí gbɔgbɔ mɛ.
  
  VIDEO: Nyi yí taɖo Mawu wa nyigban lɔɔ?—Akpaxwe kleŋ (1:41)
  
  Nyi yí taɖo Mawu wa mìwo nyigban nyakpɔkpɔ cɛɔ?
  
  Hlɛn Ŋununyatɔ 3:11, keŋ agbeje nyɔbiɔse cɛ mɛ:
  
  Nyi cɛ kpla eo so Yehowa nuɔ?
  
  4. Yehowa susu detrɔ o
  
  Hlɛn Ehajiji Wema 37:11, 29 koɖo Ezai 55:11, keŋ agbeje nyɔbiɔse cɛ mɛ:
  
  Lé mìwɛ yí nya mɔ susu ci Yehowa ɖo do mì nu detrɔɔ?
  
  Nɔ wogbe ebu male nɔ exɔ ɖeɔ, woatɛnŋ adrɛ do. Ahanke ci agbetɔwo gbe ebu male nɔ nyigban lɔɔ, Mawu adrɛ do nɔ mɛ ciwo yí luin
  
  5. Yehowa sɛnsɛn na tamɛɖoɖo adodwi nɔnɔ mìwo gbe nu
  
  Nɔ mìnya susu ci yí le agbe lɔ nuɔ, atɛnŋ ahɛn jijɔkpɔkpɔ vɛ nɔ mì. Xo VIDEO lɔ, keŋ agbeje nyɔbiɔse ci yí gbɔgbɔ mɛ.
  
  VIDEO: Ŋvanya susu ci yí taɖo wowa agbe lɔ (5:03)
  
  Ci Terumi kpla nu yí vajeshi susu ci yí taɖo wowa agbe lɔ ɖe, nyɔna ci ekpɔ so mɛɔ?
  
  Hlɛn Ŋununyatɔ 12:13, keŋ agbeje nyɔbiɔse cɛ mɛ:
  
  Ci Yehowa wa nu sugbɔ nɔ mì ɖe, nyi mìɖo awa asɔ do akpe niɔ?
  
  MƐÐE TƐNŊ BIƆ SE MƆ: “Susu ci yí taɖo wowa mì do nyigban lɔ jiɔ?”
  
  Lé àɖo ŋci doɔ?
  ENU CI ÈKPLA
  
  Yehowa ji mɔ mìase vivi nɔ agbe lɔ le nɔnɔmɛ maɖoafɛnwo mɛ le nyigban lɔ ji. Nɔ mìsinni koɖo mìwo ji pleŋ ɔ, mìanya ŋci teŋ mìwawa le agbeɛ mɛ kakacɛ ŋtɔkpu.
  
  Enumɛtoto
  
  Susu ci yí Yehowa ɖo do Adamu koɖo Ɛva nu saɔ?
  
  Lé mìwɛ yí nya mɔ susu ci Yehowa ɖo do agbetɔwo nu detrɔɔ?
  
  Lé àwɛ yí ao gbe aɖo ta teŋ ɔ?
  
  Azan ci gbe èɖegbɔ nɔ nukplakpla cɛ:
  
  Ðui awa nu cɛ
  Nu susu nywi ci Yehowa ɖo do mì nu nɔ mɛɖe.
  
  Nubu ci àwa:
  Your other goal
  
  KPƆ ŊCƐWO KPƆ
  
  Kpɔ kpeɖoji ci yí dasɛ mɔ Edɛn kpa lɔ ni vayi kpɔ nyao.
  
  “Edɛn kpa lɔ ni vayi kpɔ nyaoa?” (Jutakpɔxɔ 1^er janvier 2011)
  
  Kpla enu ci yí taɖo mìatɛnŋ akando ji mɔ nyigban lɔ ani tɛgbɛɛ.
  
  “Woatrɔn nyigban lɔa?” (Àkpɔɛ le siti lɔ ji)
  
  Gbeje nyɔ ci Bibla nu so lé woawɛ akpɔ susu ci yí taɖo wowa agbe lɔ nu mɛ.
  
  “Nyi mìle agbeɛ mɛ nɔɔ?” (Àkpɔɛ le siti lɔ ji)
  
  Kpɔ lé ŋsu ɖeka ci yí buini sa mɔ yewa enuwo pleŋ ɖɛ vakpɔ ŋɖeka ci yí hwedo le yi gbe mɛ ɖa.
  
  Ecɛyɛ ŋvanya ŋci yí taɖo ŋle agbeɛ mɛ (3:55)
  a Le nukplakpla ci yí kplɔɛdo mɛɔ, mìakpla enu ci gbɔ eso yí enu lɔwo dahɛn.

Nyi Mawu Fyɔɖuxu nyiɔ?

Se vivi nɔ agbe lɔ sɔyi mavɔ!—Bibla kplakpla to seŋkankan ji
- 2. Miwo yí le acɛ kpakɔ koɖo Yesuɔ?
  
  De Yesu ɖekɛ yí le acɛ kpakɔ o. Mɛ ciwo yí ‘so akɔta ɖekaɖeka mɛ, egbe ɖekaɖeka mɛ, agbetɔ ɖekaɖeka mɛ, koɖo jukɔn ɖekaɖeka mɛ . . . le fyɔ ɖukɔ do nyigban ji’ hɛnnɛ. (Enyɔdasɛ 5:9, 10) Amɛ nɛni yí aɖu fyɔ koɖo Yesuɔ? So hwenu Yesu va nyigban jiɔ, Kristotɔ miliɔn nɛniɖe vatrɔ yi dokplɔtɔwo. Vɔ wo pleŋ yí aɖu fyɔ koɖia? Oo. Agbetɔ 144 000 le wo mɛ yí ayi jeŋkwi mɛ ayi ɖu fyɔ koɖo Yesu. (Hlɛn Enyɔdasɛ 14:1-4.) Kristotɔ kpɛtɛ ciwo pleŋ yí kpɔtɔ le nyigban ji anyi mɛ ciwo ji yí Fyɔɖuxu lɔ akpa cɛ do.—Ehajiji Wema 37:29.

Enu ciwo Fyɔɖuxu lɔ avawa

Se vivi nɔ agbe lɔ sɔyi mavɔ!—Bibla kplakpla to seŋkankan ji

Enu ciwo Fyɔɖuxu lɔ avawa

Mawu Fyɔɖuxu lɔ kpakpa cɛ vɔ. Sabaɖeɔ, adra enu sugbɔ do le nyigban ji. Na mìakpɔ nunywi ɖewo ciwo àtɛnŋ akpɔkɔ emɔ nɔ le Fyɔɖuxu lɔ cɛkpakpa gɔnmɛ.

1. Lé Mawu Fyɔɖuxu lɔ ahɛn fafa koɖo jɔjɔɛnyinyi va nyigban lɔ ji doɔ?

Yesu ci yí nyi Mawu Fyɔɖuxu lɔ Fyɔ agu amɛvwinwo koɖo acɛkpakpawo le Harmagedɔn hwa mɛ. (Enyɔdasɛ 16:14, 16) Hwenɔnuɔ, Bibla mɛ nyɔnuɖɛ cɛ avamɛ keŋkeŋ: “Le azan kpwiɖe mɛ ɔ, amɛ [vɔnwo] da gbe li o.” (Ehajiji Wema 37:10) Yesu ato Fyɔɖuxu lɔ ji ana fafa koɖo jɔjɔɛnyinyi aɖɔ nyigban lɔ ji.—Hlɛn Ezai 11:4.

2. Lé agbe lɔ ale do hwenu woawakɔ Mawu dro le nyigban lɔ jiɔ?

Le Mawu Fyɔɖuxu lɔ cɛkpakpa gɔnmɛɔ, “amɛ nywiwo a xɔ Mawu gbeɖu nyigban. Wo a nɔ̀ ji keke a sɔyì mavɔmavɔ.” (Ehajiji Wema 37:29) Kpɔ lé xexe lɔ pleŋ mɛ ale do, nɔ mɛshiamɛ nyi amɛnywi yí wo pleŋ lɔn Yehowa koɖo wowonɔnɔwo ɖa! Mɛɖekɛ dalé dɔ̀ o, yí mɛshiamɛ anɔ agbe tɛgbɛɛ.

3. Nɔ wogu amɛvwinwo ɖegbɔ ɖe, nyi Mawu Fyɔɖuxu lɔ awaɔ?

Nɔ wogu amɛvwinwo ɖegbɔɔ, Yesu aɖu fyɔ na nɔ exwe 1 000. Hwenɔnuɔ, yɛ koɖo amɛ 144 000 ciwo yí akpa cɛ koɖi akpedo agbetɔwo nu le nyigban ji yí woatrɔ amɛ maɖoafɛnwo. Le hwenu lɔ vɔvɔnuɔ, nyigban atrɔ paradiso nyakpɔkpɔ yí mɛ ciwo pleŋ anɔ ji akpɔnɔ jijɔ, ɖo wowanɔ do Yehowa sewo ji. Yi goduɔ, Yesu asɔ Fyɔɖuxu lɔ jo nɔ Dalɔ Yehowa. Eyi Yehowa ‘ŋkɔ akɔ’ sɔwu lé ele sa. (Matie 6:9, 10) Adasɛ mɔ Yehowa yí nyi Acɛkpatɔ nywi ci yí lenɔ bu nɔ yi jumɛviwo. Yi goduɔ, Yehowa agu Satana, gbɔngbɔnvɔnwo koɖo mɛbuɖekpokpui ci yí fɔn gu do Yɛ cɛkpakpa nu. (Enyɔdasɛ 20:7-10) Nɔnɔmɛ maɖoafɛn ciwo Mawu Fyɔɖuxu lɔ hɛn vɛ ani tɛgbɛɛ.

JI DWI NI KPƆ DOJI

Kpɔ enu ci yí taɖo mìatɛnŋ akando Mawu ji mɔ yɛazan Fyɔɖuxu lɔ yí asɔ wa do Bibla mɛ gbeɖu ciwo pleŋ yí kudo mìwo sɔmɛ nu.

4. Mawu aɖe agbetɔ cɛkpakpawo swi

“Agbetɔ ɖunɔ fyɔ do agbetɔ ji nɔ vevisese yi tɔ.” (Ŋununyatɔ 8:9, NWT) Yehowa ato yi Fyɔɖuxu lɔ ji adra enu ciwo enumajɔmajɔwawa dahɛn do.

Hlɛn Daniɛli 2:44 koɖo 2 Tɛsalonikitɔwo 1:6-8, keŋ agbeje nyɔbiɔse cɛwo mɛ:

Nyi Yehowa koɖo Eviɛ Yesu awa nɔ agbetɔ cɛkpakpawo koɖo mɛ ciwo yí le godu nɔ woɔ?
Lé enu ciwo èkpla so Yehowa koɖo Yesu nu na kankandoji eo mɔ wowo nuwanawo anyɔ yí asɔgbeɔ?

Yesu nyi jeŋkwi mɛ Fyɔ yí kpakɔ acɛ nɔ nyigban lɔ.

5. Yesu yí nyi Efyɔ nywitɔ

Ci Yesu nyi Mawu Fyɔɖuxu lɔ Fyɔɔ, áwa enu sugbɔ asɔ kpedo agbetɔwo nu le nyigban ji. Xo VIDEO lɔ keŋ akpɔ lé Yesu dasɛ do vayi mɔ, Mawu na ŋsɛn ye yí yeji mɔ yeakpedo amowo nu.

VIDEO: Yesu dasɛ ŋciwo yí Fyɔɖuxu lɔ avawa (1:13)

Hwenu Yesu le nyigban jiɔ, éwa ŋɖewo yí sɔ dasɛ enu ciwo Fyɔɖuxu lɔ avawa. Le shicu ciwo woŋwlɛ do lɛ mɛ ɖe, ci èkpɔkɔ mɔ nɔ veviɖeɔ? Hlɛn kpukpui ciwo yí bɔdo shicu lɔwo nu.

LE NYIGBAN JIƆ, YESU . . .	SO JEŊKWI MƐƆ, YESU . . .
kpɔ ŋsɛn do ayamɛ nɔnɔmɛwo ji.—Maki 4:36-41.	adra enu ciwo pleŋ yí dahɛn le nyigban lɔ ji do.—Ezai 35:1, 2.
wa enujiŋ yí na ŋɖuɖu amɛ kotokun nɛniɖe.—Matie 14:17-21.	agu shive le xexeɛ mɛ pleŋ.—Ehajiji Wema 72:16.
da dɔ̀ nɔ amɛ sugbɔ.—Luiki 18:35-43.	ana mɛshiamɛ anɔ lanmɛsɛn blebu mɛ.—Ezai 33:24.
fɔn amowo so ku.—Luiki 8:49-55.	agu ku yí adra enu ciwo edahɛn do.—Enyɔdasɛ 21:3, 4.

6. Mawu Fyɔɖuxu lɔ ahɛn esɔ mɛ nywi vɛ

Fyɔɖuxu lɔ ana susu ŋkɔtɔ ci Yehowa ɖo do agbetɔwo nu avamɛ. Woanɔ agbe tɛgbɛɛ le paradiso mɛ le nyigban ji. Xo VIDEO lɔ yí akpɔ lé Yehowa zankɔ Eviɛ Yesu keŋ nɔ Yi tamɛɖoɖo avamɛ.