Ale sugbɔ le Bibla kplakpla mɛ. Ele ahan gan, yi kplakpla defanɔ gashiagamɛ o. Taŋfuin àbiɔnɔ eoɖeki se hweɖewonu mɔ, yeasun ji akpɔtɔ akplakɔ Bibla ma. Nyi yí taɖo ele veviɖe mɔ àdo gbla yí akpɔtɔ akplɛkɔɔ? Nyi yí akpedo eo nu yí nakpɔtɔ akplɛkɔ nɔ nuwo gbɔngbɔnnu nɔ eo can ɔ?

1. Nyi yí taɖo Bibla kplakpla le veviɖeɔ?

“Mawu Nyɔ le agbe yi le edɔ wakɔ.” (Ebretɔwo 4:12) Bibla nyi enuvevi ɖo edɔ yí ènyanɔ Mawu susuwo koɖo lé ao nu wanɔ ni do. De kpe ekpedo eo nu èjeshi ŋɖewo kpoŋ o, vɔ egbekpedo eo nu yí èɖo nunya koɖo emɔkpɔkpɔ ŋtɔŋtɔ lɔwo. Gbesɔwu ŋnɔɔ, Bibla atɛnŋ akpedo eo nu nanyi Yehowa xlɔ. Nɔ èkplakɔ Biblaɔ, anyi èlɔn mɔ ŋsɛn ci yí le Bibla lɔ nu le kpedo ye nu yeanɔnɔ agbe nywi.

2. Nyi yí taɖo mìɖo anya mɔ enuvevi yí Bibla mɛ nyɔnɔnwi lɔ nyiɔ?

Bibla mɛ nyɔnɔnwiwo le shigbe cinɔnu ganganwo nɛ. Enyɔ jɔ Bibla do ŋsɛn mì yí nu mɔ, ‘Nyɔnɔnwi nyi enuvevi ci yí xɔ afi. Enyi enuvevi ci wodatɛnŋ sa o.’ (Elododo Wema 23:23) Nɔ mìkpɔtɔ yí yɔnɔ Bibla mɛ nyɔnɔnwi lɔ mɔ enuvevi le mìwo susuwo mɛɔ, adɔ mìado gbla yí akpɔtɔ akplɛni nɔ ŋɖewo ɖekɔ fun nɔ mì can.—Hlɛn Elododo Wema 2:4, 5.

3. Lé Yehowa akpedo eo nu do yí nakpɔtɔ akplakɔ nuɔ?

Ci Yehowa nyi Gbɛɖotɔ ŋsɛnwopleŋtɔ koɖo ao Xlɔɔ, éji mɔ yeakpedo eo nu nɔ nakpla nu so ye nu. Ðoɔ, “Mawu yí dɔ yí enuwawa dronɔ mí yí wɛ ni do Yi totomɛ nywi ji.” (Hlɛn Filipitɔwo 2:13.) Eyi taɖo nɔ èkpɔ mɔ woɖo ado ŋsɛn eo hweɖewonu gbɔxwe natɛnŋ akpla nu yí agbewanɔ do enu ciwo èkpla jiɔ, Yehowa ado ŋsɛn eo dru. Nɔ èʒan ŋsɛn doji gbɔxwe asun ji aɖu emɔxenuwo abi yumɛciciwo jiɔ, átɛnŋ agbena eo. Biɔnɔ Yehowa le gbedodoɖa mɛ blaŋblaŋ mɔ yɛ le kpedo ye nu nɔ yeakpɔtɔ akplanɔ Bibla.—1 Tɛsalonikitɔwo 5:17.

JI DWI NI KPƆ DOJI

4. Sɔ ao Bibla kplakpla ɖo texwe ŋkɔtɔ

Hweɖewonuɔ, agbe lɔ na mìjannɔ keke ewanɔ nɔ mì shigbe mɔ mìdeɖo gamɛ ci mìasɔ kpla Bibla nɛ. Nyi yí akpedo mì nuɔ? Hlɛn Filipitɔwo 1:10, NWT; keŋ agbeje enyɔbiɔse ciwo yí gbɔgbɔ mɛ:

• Nyiwo èkpɔ mɔ wonyi “enu ciwo yí le veviɖe wu” le agbeɛ mɛɔ?

• Lé àwɛ asɔ ao Bibla kplakpla ɖo texwe ŋkɔtɔɔ?

1. Nɔ èlɔ kɔ do tɔka mɛ yí eɖɔ gbɔxwe èmɔ yeasɔ ekpewo kɔ do mɛɔ, ekpe lɔwo dasɛnŋ ɖo mɛ vɛ o

2. Nɔ èsɔ ekpe lɔwo do tɔka lɔ mɛ doŋkɔɔ, àkpɔ texwe yí aku ekɔ sugbɔ do mɛ. Ahanke nɔ èsɔ “enu ciwo yí le veviɖe wu” ɖo texwe ŋkɔtɔ le ao gbemɛɔ, àsun ji awa wo yí agbekpɔ vovo awa nubuwo can

Bibla kplakpla dɔ yí mìkpɔnɔ ŋciwo yí wudo mì le gbɔngbɔnmɛ gbɔ. Wowo yí nyi Mawu jejeshi koɖo Mawu sɛnsɛn. Hlɛn Matie 5:3, keŋ agbeje biɔse ci yí gbɔgbɔ mɛ:

• Ale ciwo mìkpɔnɔ nɔ mìsɔ mìwo Bibla kplakpla ɖo texwe ŋkɔtɔɔ?

5. Kpɔtɔ ado ji nɔ wofɔn gu do eo ji

VIDEO: Wocu shi nɔ wo ci wodo ji (5:22)

• Lé Francesco xlɔwo koɖo yi mɛwo wa nu do le video lɔ mɛ ci enu ŋci ekplakɔ nyɔ nɔ woɔ?

• Lé wocu shi ni do ci edo jiɔ?

Hlɛn 2 Timɔte 2:24, 25, yí agbeje enyɔbiɔse ciwo yí gbɔgbɔ mɛ:

• Lé ao mɛwo koɖo ao xlɔwo kpɔkɔ enu ciwo èkplakɔ doɔ?

• Sɔgbe koɖo kpukpui lɔwo ɖe, lé èɖo awa nu do nɔ Bibla ci èkplakpla dejɔkɔ ji nɔ mɛɖeɔ? Nyi yí taɖo àwa nu ahan ɔ?

6. Kando Yehowa ji mɔ yɛakpedo ye nu

VIDEO: Yehowa kpedo mì nu mìtrɔ mìwo dɛnwo (3:56)

• Le video lɔ mɛ ɖe, trɔtrɔ ciwo yí Jim wa keŋ nɔ yi nu akpe nɔ Yehowaɔ?

• Nyi yí kpaca eo le yi nyɔ lɔ mɛɔ?

Hlɛn Ebretɔwo 11:6; yi goduɔ, gbeje biɔse ciwo yí gbɔgbɔ mɛ:

• Nyi yí Yehowa awa nɔ mɛ ciwo yí jijiɛ mɔ “yewo akpɔɛ nyɔnɔnwitɔ,” alo mɛ ciwo yí dodoɔ gbla mɔ yewoajeshi ɖɛ nɔ yewo nu akpe niɔ?

• Ci èkpɔ lé ewanɔ nɔ Yehowa nɔ èdodoɔ gbla mɔ yeakpla Bibla ɖe, lé ewa nɔ eoɔ?

ENU CI ÈKPLA

Ci yí Bibla kplakpla defanɔ gashiagamɛ can ɔ, kpɔtɔ akplɛkɔ. Adɔ yí àse vivi nɔ agbe lɔ kakacɛ keke asɔyi mavɔmavɔ. Kpɔtɔ akando Yehowa ji, eyi yɛ can acu shi nɔ eo.

Enumɛtoto

• Nyi yí taɖo Bibla mɛ nyɔnɔnwiwo ve nɔ eoɔ?

• Lé àwɛ ajeshi “enu ciwo yí le veviɖe wu[ɔ]”?

• Nyi yí taɖo èɖo abiɔ Yehowa mɔ yi le kpedo ye nu yeakpɔtɔ akplakɔ Biblaɔ?

KPƆ ŊCƐWO KPƆ

Kpɔ enuvevi amɛnɛ ciwo yí kpedo amɛ sugbɔ nu yí wowa ɖaŋ zan wowo gamɛ.

“Lé àwɛ awa ɖaŋ azan ao gamɛ” (Nyɔ!, février 2014)

Kpɔ lé Yehowa do alɔ nyɔnu ɖeka ci yí dokɔ gbla mɔ ye nu le kpe ni gan yí asuɔ yɛ desekɔ mɛ ɖa.

Yehowa dokɔ ŋsɛn mì nɔ mìasɔ mìwo gban (5:05)

Kpɔ lé ŋsu ɖeka kpɔ nyɔna sugbɔ ci ashiɛ dena ta ɖa.

Ŋdo nyɔnɔnwi lɔ kpɔ (6:30)

Mɛɖewo nunɔ hweɖewonu mɔ, Yehowa Kunuɖetɔwo gbannɔ xomuwo. Nyɔnɔnwi yɔa?

“Yehowa Kunuɖetɔwo gbannɔ xomuwoa, abi wodonɔ ŋsɛn wo yɔ?” (Àkpɔɛ le siti lɔ ji)

Mì pleŋ yí sɔnɔ gbetawo. Gbeta sugbɔtɔ atɛnŋ awa nywi nɔ mì alo adahɛn nu le mì nu. Woatɛnŋ adahɛn exlɔ ci mìnyi koɖo Yehowa alo adrɛ do. Le kpɔwɛ mɛ, mìatɛnŋ asɔ gbeta so fini mìanɔ nu, lé mìawɛ akpɔ ho azannɔ, alo mɔ mìalé alɔ. Nɔ mìsɔnɔ gbeta nywiwoɔ, mìatɛnŋ akpɔnɔ jijɔ le agbe mɛ yí mìwo nu akpe nɔ Yehowa.

1. Lé Bibla atɛnŋ akpedo eo nu do yí nasɔnɔ gbeta nywiwoɔ?

Gbɔxwe àsɔ gbeta ɖeɔ, do gbe ɖaɖa nɔ Yehowa yí agbeje Bibla mɛ keŋ akpɔ susu ci Yehowa ɖo do nyɔ lɔ nu. (Hlɛn Elododo Wema 2:3-6.) Le nɔnɔmɛ ɖewo mɛɔ, Yehowa donɔ ese ɖe koŋ. Nɔ ele ahan ɔ, gbeta nywitɔ ci àtɛnŋ asɔ yí nyi mɔ, nawa do ese lɔ ji.

Vɔ nɔ Bibla dedo ese ɖe koŋ le nɔnɔmɛ ɖe mɛ ɖe, le àwɛ doɔ? Nɔ ele ahan can ɔ, Yehowa adasɛ mɔ nɔ eo “to emɔ ci ji èɖo ato.” (Ezai 48:17, NWT) Lé awɛ doɔ? Gɔnmɛɖose ɖewo tɛnŋ li ciwo yí adasɛ mɔ nɔ eo. Bibla gɔnmɛɖosewo nyi nyɔnɔnwi vevi ciwo yí danasɛ susu koɖo seselelanmɛ ciwo Mawu ɖo do ŋɖe nu. Blaŋblaŋ ɔ, mìkpɔnɔ lé ewanɔ nɔ Mawu so ŋɖe nu nɔ mìhlɛn exolɔlɔ ɖe le Bibla mɛ. Nɔ mìdo jeshi lé Yehowa se le yiɖeki mɛɔ, mìatɛnŋ asɔ gbeta ci yí akpe ni.

2. Nyiwo nu èɖo abu tamɛ kpɔ so gbɔxwe asɔ gbeta ɖeɔ?

Bibla mɔ: “Ŋununyatɔ do ʒinxo yí butamɛ so enushanu nu.” (Elododo Wema 14:15) Edasɛ mɔ gbɔxwe mìasɔ gbeta ɖeɔ, mìɖo aji gamɛ yí abu tamɛ kpɔ so mìwo cancanwo nu. Nɔ ègbejekɔ akpaxwe ɖeshiaɖe mɛ kpɔɔ, biɔ eɔɖeki se mɔ: ‘Bibla gɔnmɛɖose ci yí kuso nuɔ? Gbeta ci yí ana nakpɔ fafa le susu mɛɔ? Lé anyi gbetasɔsɔ lɔ akpɔ ŋsɛn do mɛbuwo ji doɔ? Vevitɔ lɔ ɖe, ado jijɔ nɔ Yehowaa?’—2 Ese Wema 32:29.

Yehowa yí ɖo acɛ anu enu ci yí nyɔ koɖo enu ci yí dɔn nɔ mì. Nɔ mìvajeshi yi sewo koɖo gɔnmɛɖosewo nywiɖe, yí ɖui gligaan mɔ mìawa do wo jiɔ, anyi mìnakɔ kpla ayexadohwɛnamɛnu mìwotɔ. Ayexadohwɛnamɛnu nyi enu ci yí nunɔ nɔ mì mɔ ŋɖe nyɔ alo edɔn. (Rɔmatɔwo 2:14, 15) Ayexadohwɛnamɛnu ci mìna kpla akpedo mì nu mìasɔnɔ gbeta nywiwo.

JI DWI NI KPƆ DOJI

3. Lɔn nɔ Bibla adasɛ mɔ nɔ eo

VIDEO: Gɔnmɛɖose ciwo yí le Bibla mɛ le danasɛ mɔ nɔ eo (5:54)

• Nyi yí nyi amɛɖekishinɔnɔblɔɖeɔ?

• Nyi yí taɖo Yehowa na amɛɖekishinɔnɔblɔɖe mìɔ?

• Nyi ena mì ci yí akpedo mì nu mìazan amɛɖekishinɔnɔblɔɖe lɔ nywiɖeɔ?

Nɔ àkpɔ Bibla gɔnmɛɖose kpɔwɛ ɖekaɔ, hlɛn Efezitɔwo 5:15, 16. Gbeje lé àwɛ “a nya gamɛ zanzan” keŋ . . .

• ahlɛnnɔ Bibla blaŋblaŋ.

• anyi asu alo ashi nywi, jila nywi alo evi nywi.

• ayinɔ hamɛ bɔbɔwo.

4. Na kpla ayexadohwɛnamɛnu aotɔ keŋ asɔnɔ gbeta nywiwo

VIDEO: “Ðo ayexadohwɛnamɛnu nywi” (5:13)

• Le video lɔ mɛ ɖe, afɔ ciwo nɔvinyɔnu lɔ ɖe yí sɔ na kpla ayexadohwɛnamɛnu yitɔ keŋ asɔ gbeta ci yí akpe nɔ Yehowaɔ?

Nyi yí taɖo mìdeɖo anu nɔ mɛbuwo mɔ wo le sɔ gbeta do nu nɔ mìɔ? Hlɛn Ebretɔwo 5:14, keŋ agbeje biɔse cɛwo mɛ:

• Ci atɛnŋ ale fafɛɖe mɔ mìanu nɔ mɛbuwo mɔ, wo le sɔ gbeta do nu nɔ mì can ɖe, nyiwo mìwoŋtɔwo ɖo anya vovototo nɔɔ?

• Nyi yí atɛnŋ akpedo eo nu yí nana kpla ayexadohwɛnamɛnu aotɔ keŋ asɔ gbeta nywiwoɔ?

5. Do bubu ayexadohwɛnamɛnu mɛbuwo tɔ nu

Ci mìto vovoɔ, gbeta ciwo mìsɔnɔ can tonɔ vovo. Lé mìawɛ adonɔ bubu ayexadohwɛnamɛnu mɛbuwo tɔ nuɔ? Na mìakpɔ nɔnɔmɛ amɛve ɖekawo:

Nɔnɔmɛ ŋkɔtɔ: Nɔvinyɔnu ɖeka donɔ tawi. Évayi ci hamɛ bu mɛ. Nɔ nɔvi ciwo yí le hamɛ lɔ mɛ kpɔ nyɔnuwo do tawiɔ, eɖenɔ fun nɔ wo.

Hlɛn Rɔmatɔwo 15:1 koɖo 1 Korɛntitɔwo 10:23, 24, keŋ agbeje biɔse cɛwo mɛ:

• Sɔ koɖo kpukpui cɛwo ɖe, gbeta ci nɔvinyɔnu lɔ atɛnŋ asɔɔ? Nyi àwa nɔ èle mɛɖe gbɔ yí ayexadohwɛnamɛnu yitɔ gbe ni mɔ yɛŋgbewa enu ci ayexadohwɛnamɛnu aotɔ lɔn mɔ eɔ le waɔ?

Nɔnɔmɛ amɛvetɔ: Nɔviŋsu ɖeka nya mɔ Bibla degbe mɔ woŋgbenu aha sɛnŋ le dredrenu o. Vɔ ésɔ gbeta mɔ yedanu o. Yɛ koɖo nɔviwo vale ju yí nɔviwo nukɔ aha sɛnŋ.

Hlɛn Ŋununyatɔ 7:16 koɖoRɔmatɔwo 14:1, 10, keŋ agbeje biɔse cɛwo mɛ:

• Sɔ koɖo kpukpui cɛwo ɖe, gbeta ci nɔviŋsu lɔ atɛnŋ asɔɔ? Nyi àwa nɔ èkpɔ mɛbu wakɔ enu ci ayexadohwɛnamɛnu aotɔ gbe nɔ eo mɔ eɔŋgbewaɔ?

Afɔɖeɖe ciwo yí kplɔnɔ amɛ yi gbeta nywiwo sɔsɔ gbɔɔ?

1. Biɔ Yehowa mɔ, yɛ le kpedo ye nu nɔ yeanya gbeta ci yeasɔ.—Ʒaki 1:5.

2. Ji nu gɔnmɛ kpɔ le Bibla koɖo Bibla nukplawemawo mɛ keŋ akpɔ gɔnmɛɖose ciwo yí sɔ koɖo nɔnɔmɛ lɔ. Àtɛnŋ akan seŋ koɖo Kristotɔ bibi ɖe.

3. Bu tamɛ kpɔ so enu ci gbetasɔsɔ lɔ awa nɔ ayexadohwɛnamɛnu aotɔ koɖo mɛbuwo tɔ nu.

ENU CI ÈKPLA

Nɔ mìbunɔ susu ci Yehowa ɖo do ŋɖe nu kpɔ yí gbebunɔ tamɛ kpɔ mɔ enu lɔ akpedo mɛbuwo nu alo adahɛn nu le wo nu maɔ, mìasɔnɔ gbeta nywiwo.

Enumɛtoto

• Lé àwɛ asɔnɔ gbeta ciwo yí kpenɔ nɔ Yehowaɔ?

• Lé àwɛ ana kpla ayexadohwɛnamɛnu aotɔɔ?

• Lé àwɛ ado bubu ayexadohwɛnamɛnu mɛbuwo tɔ nuɔ?

KPƆ ŊCƐWO KPƆ

Lé àwɛ asɔnɔ gbeta ciwo yí ado ŋsɛn exlɔ ci ènyi koɖo Mawuɔ?

“Sɔ gbeta ciwo yí hɛnnɔ kanfukanfu vɛ nɔ Mawu” (Jutakpɔxɔ 15 avril 2011)

Kpla nu sugbɔ so lé Yehowa nanɔ nukplamu mì nu.

Yehowa kplɔnɔ yi mɛwo (9:50)

Kpɔ enu ciwo yí kpedo ŋsu ɖeka nu yí esɔ gbeta gbɔnnu ɖeka.

Kankandoji li mɔ Yehowa yɛana nunywiwo pleŋ mì (5:46)

Kpla nu sugbɔ so lé mìawɛ nɔ mìwo nu akpe nɔ Yehowa nɔ dedo ese ɖe koŋ le nɔnɔmɛ ɖe mɛ o.

“Bibla mɛ se ɖe ele mɔ àkpɔnɔ gashiagamɛa?” (Jutakpɔxɔ 1^er décembre 2003)