KRISTOTƆWO GBENƆNƆ

Enu yoyu ci yí anɔ kwɛshila dodomɛ bɔbɔwo mɛ

Enumɛɖeɖe buwo koɖo enyɔtakankan ciwo yí aso Ŋɔŋlɔ Kɔkɔeawo Xexe Yeye Gɔmeɖeɖe enukplakpla tɔ (nwtsty) ci yí le Ɛntɛnɛti ji, anɔ Kwɛshila dodomɛ bɔbɔ ci yí atɔ so Janvier 2018 mɛ. Woawɛ nɔ Bibla enukplakpla tɔ lɔ dele ao gbe mɛ hɔɖo can. Kankandojitɔɔ, ana yí bɔbɔ lɔ dradrado ao tɔ agbevivi doji. Eyi vevitɔ lɔ yí nyi mɔ, átɛnŋ ana yí nate gogo mìwo Da lɔn-amɛ, Yehowa wu!

ENUMƐÐEÐE BUWO

Enumɛɖeɖe buwo axo nuxu so kɔnuwo, nyigban lɔ nɔnɔmɛwo koɖo egbe ciwo yí wodonɔ nu. Enumɛɖeɖe lɔwo ana yí mìase gɔnmɛ nɔ Bibla kpukpui sugbɔ wu.

Matie 12:20

Ðovu bibi ci yí cikɔ: Kaɖigban ci yí wozannɔ le axwewo mɛ sa, nyi ezevi kogui ɖeka ci mɛ yí wokunɔ olivumi do. Linlɔnka yí wosɔ donɔ ami lɔ mɛ. Eka lɔ yí dɔnnɔ ami lɔ, yí na ezo lɔ jenɔ. Grɛki nyɔgbe ci yí nyi “ɖovu bibi ci yí cikɔ” atɛnŋ ahɛn susu yi ɖovuka ci yí cukɔ azɔ ji, ɖoɔ, ezo fɛnfin yí kpɔtɔ le mɛ, yí ezo lɔ degbejekɔ o. Ezai 42:3 nu ɖɛ kudo vevisedoamɛnu Yesu tɔ nu mɔ, yi daci mɔkpɔkpɔ zo fɛnfin ci yí kpɔtɔ nɔ amɛ klekliwo koɖo mɛ ciwo yí wotrekɔ fun nɔ o.

Matie 26:13

Nyɔnɔnwi: Grɛki nyɔgbe a·menʹ nyi Ebre nyɔgbe ʼa·menʹ ŋwlɛnŋwlɛn tiin. Enyɔgbe lɔ gɔnmɛ yí nyi “le vamɛ,” alo “le nyi ahan.” Yesu zannɔ nyɔgbe ŋtɔ́ kabakaba nɔ éjikɔ atɔ nuxu xoxo, nɔ éjikɔ awa gbeɖu alo anu enyɔ ɖe ɖɛ. Énuini yí sɔ danasɛ mɔ kankandoji le enyɔ lɔ nu, yí gbesɔ ɖonɔ kpe yi ji mɔ enyɔ lɔ avamɛ dandandan. Lé Yesu zan enyɔgbe “nyɔnɔnwi,” alo amen do le Ŋwlɛnŋwlɛn kɔkɔɛwo mɛ, to akpo xesexese nɔ lé amɛwo zinni do. Nɔ Yesu nu enyɔgbe lɔ zeve (a·menʹ a·menʹ), shigbe lé ele le Ʒan wema mɛ hannɛɔ, woɖini mɛ mɔ “nyɔnɔnwi, nyɔnɔnwi.”—Ʒan 1:51.

ENYƆTAKANKANWO

Fotowo, enutatawo, video ciwo mɛ wodexo nuxu le o, koɖo enutata ciwo yí ahwankɔ, ana numɛɖeɖe vovovowo kudo Bibla mɛ nyɔwo nu.

Bɛtfaʒe, eto Olivuciwo tɔ, koɖo Ʒeruzalɛmu

Video kleŋ cɛ dasɛ emɔ ci yí so le kɔxui ci woyɔnɔ le egbɛmɛ mɔ et-Tur mɛ yí yikɔ Ʒeruzalɛmu wezexu, (Et-Tur lɔ yí wobu mɔ yi nyi Bɛtfaʒe ci nu woxo nuxu so le Bibla mɛ). Emɔ lɔ to finiwo yí yi ji sugbɔ wu nɔ eto Olivuciwo tɔ. Betani le wezexu, le balimɛ nɔ Bɛtfaʒe koɖo eto Olivuciwo tɔ. Nɔ Yesu koɖo yi nukplaviwo vayi Ʒeruzalɛmuɔ, wovayi dɔnnɔ Betani kabakaba. Betani lɔ yí woyɔnɔ le egbɛmɛ mɔ el-ʽAzariyeh” (El ʽEizariya). El-ʽAzariyeh” lɔ nyi Arabu gbe mɛ ŋkɔ ci gɔnmɛ yí nyi “Lazar tɔxu”. Kankandojitɔɔ, Yesu zenɔ Marta, Mari koɖo Lazar xomɛ. (Mt 21:17; Mk 11:11; Lk 21:37; Ʒan 11:1) Nɔ Yesu so le wowo xomɛ yí yikɔ Ʒeruzalɛmuɔ, étɛnŋ tonɔ emɔ ci hanci yí wodasɛ le video lɔ mɛ ji. Le ŋkeke 9 Nisan, 33 Y.H., hwecinu yí Yesu de esɔ ji so eto Olivuciwo tɔ lɔ ji yí yikɔ Ʒeruzalɛmuɔ, etɛnŋ nyi mɔ éto emɔ ci yí so le Bɛtfaʒe yí yi Ʒeruzalɛmu.

Emɔ ci yí so Betani vayi Bɛtfaʒe
Bɛtfaʒe
Eto Olivuciwo tɔ
Kidrɔn balimɛ
Gbedoxɔ ci yí le eto ji

Flɛnŋgo le afɔŋguinuxu mɛ

Ecɛ nyi foto nɔ agbetɔ fɔŋguinuxu ci mɛ wokan flɛnŋgo do. Flɛnŋgo lɔ jinjin shigbe mɔ alɔgba ɖeka madove hannɛ (11.5 cm). Wokpɔ agbetɔ fɔŋguinuxu lɔ le exwe 1968 mɛ, hwecinu yí wokukɔ nyigban mɛ le tagbe nɔ Ʒeruzalɛmu. So keke hwecinu yí Rɔmatɔwo kpakpacɛ do Ʒeruzalɛmu ji yí wowɛ. Édasɛ mɔ wozannɔ flɛnŋgo yí sɔ kannɔ amɛ do aci nu hwenɔnu. Atɛnŋ anyi flɛnŋgo cɛ hanci yí Rɔmatɔwo zan yí sɔ kan Yesu Kristo do aci nu. Wokpɔ afɔŋguinuxu lɔ le ekpedu ɖeka ci yí woyɔnɔ mɔ exuwoɖoxu mɛ. Edasɛ mɔ, woɖyinɔ mɛ ciwo yí wokan do aci nu.—Mt 27:35.