KRISTOTƆWO GBENƆNƆ
Kunuɖeɖe koɖo enukplakpla le veviɖe nɔ enukplaviwo wawa
Yesu dɔ yi dokplɔtɔwo mɔ wo le yi keŋ awa enukplaviwo. (Mt 28:19) Ecɛ kudo kunuɖeɖe koɖo enukplakpla nu. Hweɖewonuɔ, mì pleŋ ɖo abiɔnɔ mìwoɖekiwo se mɔ, ‘lé nawɛ yí akpa vevi cɛwo nɔ enukplaviwawadɔ anyi tɔ anyɔ dojiɔ?’
KUNUÐEÐE
Ci yí mìanɔ te mɔ amɛwo le va mì gbɔɔ, mìɖo aji mɛ ciwo yí “je” veviɖe. (Mt 10:11) Mìnɔnɔ zanŋte do mɔnukpɔkpɔ ciwo yí mìasɔ xo nuxu koɖo mɛ ciwo yí ‘mìdonɔ go’ le kunuɖeɖedɔ lɔ mɛa? (Edɔ 17:17) Vevidodonu Pɔlu tɔ le kunuɖeɖedɔ lɔ mɛ yí na Lidi vatrɔ Yesu dokplɔtɔ.—Edɔ 16:13-15.
“Tɔ jinuku dodo nyidin kannyakannya, ŋgbe mi edɔ wawa keke a nanɔ fiɛfi o” (Ŋununyatɔ 11:6)
KPƆ VIDEO CI YÍ NYI KPƆTƆ AÐEKƆ KUNU “MAMIMAMI”—AVOMƐKUNUÐEÐE KOÐO SO AXOMƐ YI AXOMƐ, KEŊ ANA ÐOŊCI NƆ ENYƆBIƆSE CIWO YÍ GBƆGBƆ:
Le gbeshiagbe dɔ Samiɛli tɔ mɛ ɖe, lé ejinɔ veviɖe mɔ yeado nyɔnɔnwi ku lɔ doɔ?
Nyi yí taɖo mìɖo ado ji le kunuɖeɖe mɔnu ɖeshiaɖe mɛɔ?
Miwo yí àtɛnŋ anu Fyɔɖuxu ŋɛnywi lɔ nɔ le gbeshiagbe dɔ ao tɔ mɛɔ?
ENUKPLAKPLA
Gbɔxwe mìawa enukplaviwoɔ, mìɖo awa nu sɔ wu wemawo nana amɛwo kpoŋ. Nɔ mìakpedo wo nu yí woawa ŋkɔyiyi le gbɔngbɔnmɛɔ, mìɖo awanɔ trɔtrɔyi keŋ akplanɔ Bibla koɖo wo. (1Kor 3:6-9) Ecɛ yɛ ɖe, nyi yí ajɔ nɔ egbla ci yí mìdokɔ mɔ mìakpla Fyɔɖuxu ŋɛnywi lɔ amɛwo desɛnkɔ eku ɖeɔ? (Mt 13:19-22) Mìɖo akpɔtɔ ajikɔ mɛ ciwo yí eji le nɔ shigbe mɔ “nyigban nywi” hannɛ.—Mt 13:23; Edɔ 13:48.
“Enyɛ ɔ, ŋkan jinuku, yí Apolo wunɔ eshi yi, vɔ Mawu yí nanɔ shinshin jinuku lɔ” (1Kor 3:6)
KPƆ VIDEO CI YÍ NYI KPƆTƆ AÐEKƆ KUNU “MAMIMAMI”—ENUKPLAVIWO WAWA, KEŊ ANA ÐOŊCI NƆ ENYƆBIƆSE CIWO YÍ GBƆGBƆ:
Lé Salomɔ koɖo Mari wu shi nɔ nyɔnɔnwi ku ci yí wodo do ji mɛ nɔ Ezekiɛli koɖo Abigaɛl ɔ?
Tajinu ci yí ɖo anɔ mì shi le kunuɖeɖe mɔnu ɖeshiaɖe ci mɛ yí jugbajakunuɖeɖe can leɔ?
Lé mìawɛ asɔ nyɔnɔnwi lɔ kplakpla amɛwo ɖo enuvevitɔɔ?