2. Lé enuwo yikɔ do le xexeɛ mɛɔ, yí lé amowo wakɔ nu do so xwe 1914 mɛɔ?

Yesu nukplaviwo biɔɛ se mɔ: ‘Nyi yí avanyi jeshidu nɔ ao trɔtrɔgbɔ koɖo xexe lɔ vɔvɔnuɔ?’ (Matie 24:3) Ci Yesu aɖo ŋci nɔ woɔ, éxo nuxu so enu sugbɔ nu mɔ woajɔ hwenu atɔ acɛ kpakpa le jeŋkwi mɛ shigbe Mawu Fyɔɖuxu lɔ Fyɔ hannɛ godu. Enu lɔwo ɖowo yí nyi ahwawawawo, ejutotwiwo koɖo nyigbanhunhunhunwo. (Hlɛn Matie 24:7.) Bibla gbedre mɛ mɔ lé agbetɔwo awawa nu do le “ŋkeke vɔvɔwo mɛ” adɔ yí “cukaɖa sugbɔ a va” amowo ji. (2 Timɔte 3:1-5) So xwe 1914 mɛ koŋ yí ŋciwo jɔjɔ le xexeɛ mɛ koɖo adɛn ciwo agbetɔwo wuwuɔ vanyinakɔ doji.

3. Nyi yí taɖo enuwo gbevanyinakɔ doji so hwenu Mawu Fyɔɖuxu lɔ tɔ acɛ kpakpaɔ?

Ci Yesu tɔ acɛ kpakpa le Mawu Fyɔɖuxu lɔ mɛ de jinjin ɔ, éwa ahwa koɖo Satana koɖo yi gbɔngbɔnvwinwo le jeŋkwi mɛ. Satana deɖu ji o. Bibla nu mɔ “wo dɔ edan lɔ koɖo yi dɔdɔlawo ɖaɖa nyigban ji.” (Enyɔdasɛ 12:9, 10, 12) Satana le dɔmɛzi ji keke, ɖo énya mɔ woagu ye si sabaɖe yɛ. Eyi taɖo ena yí amowo seseɛ vevi yí gbekpekpeɛ fun le nyigban lɔ keŋkeŋ ji. Edɔ mìmɔŋje ŋci yí taɖo enuwo fɔn yí dɔndɔn doji le xexegbɛ lɔ mɛ! Mawu Fyɔɖuxu avakpɔ cukaɖa cɛwo pleŋ gbɔ.