Agbenɔnɔ Koɖo Sumɔsumɔdɔ Bɔbɔ Nukplawema Nyɔsoxuwo
© 2024 Watch Tower Bible and Tract Society of Pennsylvania
6-12 MAI
MAWU NYƆ MƐ DƆKUNUWO EHAJIJI WEMA 36-37
“Ŋgbelɔn nɔ Nuvɔn ci Amɛwo Wakɔ Adɔ Naxa o”
w17.04 10 mm. 4
Hwenu Mawu Fyɔɖuxu lɔ Ava ɖe, nyi yí Dagbeliɔ?
4 Lé amɛvɔnwo nuwanawo dadahɛn nu le mì nu le kakayɛ doɔ? Hwenu apotru Pɔlu ŋwlɛŋwlɛ nu daɖɛ so mìwo hwenu nu mɔ “cukaɖa sugbɔ a va le ŋkeke vɔvɔwo” mɛɔ, gbɔngbɔn kɔkɔɛ kpedo nu eŋwlɛ mɔ: “Amɛ vɔnwo koɖo amɛ bletɔwo a yi jinjin tɔxu nɔ wowo nuvɔn wawa.” (2 Tim. 3:1-5, 13) Èkpɔ mɔ enyɔnuɖɛ cɛwo vavamɛa? Amɛvɔn ciwo nyi tamɛsɛnnuwatɔwo, eɖyixoamɛtɔ ciwo amɛ nu dekpenɔ nɔ o koɖo amɛkpotuwo cucuɔ nu kpɔ koɖo amɛ sugbɔ le mì mɛ. Mɛɖewo le amɛvɔn cɛwo mɛ wanɔ enumaɖotawo gannaganna; eyi ebuwo nyi amɛbletɔ ciwo wanɔ nu shigbe mɔ wonyi amɛjɔjɔɛ hannɛ gan yí le nyɔnɔnwi mɛɔ, wotrɔnyi amɛvwinwo. Nɔ wodecu nu kpɔ koɖo mì tiin can ɔ, wowo nuwanawo danahɛn nu le mì nu dandan. Nɔ mìse enudaʒi ciwo wowawaɔ, évenɔ mì nu sugbɔ. Lé amɛvɔnwo sɛnnɔ tamɛ le ɖeviwo, amɛshinshinwo koɖo mɛ ciwo dewa mɛɖe ɖɛ nu, ɖyinɔ vɔnvɔn nɔ mì. Wowanɔ nu shigbe elanwo nɛ, eyi wowo nuwana lɔwo ɖyinɔ gbɔngbɔn vɔnwo nuwanawo. (Ʒaki. 3:15) Jijɔ enyi nɔ mì mɔ Yehowa na eŋɛnywiwo mì.
Yehowa Cunɔ Shi nɔ mɛ Ciwo yí sɔ nu Kenɔ Amɛ
10 Mìdanahɛn nu le mìwoɖekiwo nu nɔ mìlé amɛ do dɔmɛ. Dɔmɛzidodo le shigbe agban kpɛnkpin hannɛ, eyi taɖo Yehowa nu nɔ mì mɔ mìwo le sɔ dɔmɛzi kɔ ɖɛ yí avoŋ le mìwoɖekiwo mɛ. (Hlɛn Efezitɔwo 4:31, 32.) Édo ŋsɛn mì mɔ, “ŋgbe do dɔmɛzi o. Ŋgbe bi eji o.” (Eha. 37:8) Nɔ enyi mɔ mìzɔn do enukplamu cɛ jiɔ, akpedo mì nu sugbɔ. Nɔ mìkpɔtɔ le dɔmɛzi ji do mɛɖe nuɔ, atɛnŋ adahɛn nu le mì nu le gbaza koɖo susu mɛ. (Elo. 14:30) Nɔ mìkpɔtɔ le dɔmɛzi ji do mɛɖe ci yí je agɔ do mì nuɔ, dawa ŋɖe nɔ mɛ lɔ o. Ele shigbe mɔ mìnu aɖyiwuamɛ ɖe yí bukɔ mɔ yeawa ŋɖe nɔ mɛbu hannɛ, dawa ŋɖe nɔ yɛ o, mìwoŋtɔwo yí awa nu koɖo. Ewaɖeɔ, nɔ mìsɔ nu kenɔ mɛbuwoɔ, mìnana nu mìwoŋtɔwo. (Elo. 11:17) Mìakpɔ fafa le susu koɖo eji mɛ, yí ecɛ adɔ mìakpɔtɔ asɛnkɔ Yehowa.
w03 12/1 13 mm. 20
“Kpɔ Jijɔ Sugbɔ le Yehowa mɛ”
20 Eyi, “mɛ ciwo yí hwe wowoɖekiwo kpɔtɔ a xɔ Mawu gbeɖu nyigban” (Ehajiji Wema 37:11a) Vɔ miwo yí nyi ‘mɛ ciwo yí hwe wowoɖekiwo kpɔtɔɔ’? Nyɔgbe ci woɖe gɔnmɛ nɔ mɔ “hwe”, so le nyɔgbe ciwo yí nyi “vɔnvɔn, amɛɖekisɔsɔhwe, amɛɖekisɔsɔdogɔnmɛ” mɛ. Nyɔnɔnwi yɔ, “mɛ ciwo yí hwe wowoɖekiwo kpɔtɔ” nyi mɛ ciwo enumajɔmajɔwawa mɛbuwo tɔ dahɛn nu le wo nu, eyi wosɔ wowoɖekiwo hwe yí le te kpɔ Yehowa mɔ yɛavadra wo do. “wo a gbe xɔ fafa.” (Ehajiji Wema 37:11b) Kakacɛɔ, mìkpɔkɔ fafa sugbɔ le gbɔngbɔn mɛ paradiso ci mɛ mìle le Kristotɔ adodwiwo hamɛ lɔ mɛ.
Bibla mɛ Nuveviwo
it-2 341
Eto
Dehwannɔ o, éli tɛgbɛɛ yí yi eji. Nɔ woxokɔ nuxu so etowo nuɔ, wonunɔ mɔ wodehwannɔ o, eyi wonini tɛgbɛɛ. (Ezai 54:10; Xab 3:6; sɔ sɔ koɖo Eha 46:2.) Gbesɔ kpe niɔ, nɔ ehakpatɔ lɔ mɔ jɔjɔɛnyinyi Yehowa tɔ le shigbe “eto yìji” nɛɔ, (Eha 36:6) taŋfuin nu enunuɔ mɔ jɔjɔɛnyinyi Yehowa tɔ dehwannɔ o. Alo nɔ enyi ejiyiyi etowo tɔ nu exokɔ nuxu soɔ, étɛnŋ nyi ji ejikɔ anu mɔ jɔjɔɛnyinyi Yehowa tɔ yi ji wu agbetɔwo tɔ. (Sɔ sɔ koɖo Ezai 55:8, 9.) Sɔ koɖo kɔnkpu amadrɛtɔ ci yí ɖɔ koɖo jibibi ci yí mawudɔla sɔ kɔŋgbeɔ, Enyɔdasɛ 16:20 nu mɔ: “Etowo de gbe li o.” Ecɛ dasɛ mɔ, nɔ enuɖe gbegangan wu etowo can ɔ, dawa eɖe agangan wu Mawu dɔmɛzi o.—Sɔ sɔ koɖo Ʒer 4:23-26.
13-19 MAI
MAWU NYƆ MƐ DƆKUNUWO EHAJIJI WEMA 38-39
Ŋgbedo Hwɛ Eoɖeki Ðoɖu o
Ao ŋkuviwo le nɔ esɔ mɛ ji truɖuɖu
12 Hlɛn 1 Ʒan 3:19, 20. Mì pleŋ yí donɔ hwɛ mìwoɖeki hweɖewonu. Le kpɔwɛ mɛ, mɛɖewo donɔ hwɛ wowoɖekiwo nɔ enu ciwo wowa gbɔxwe vakpla nyɔnɔnwi lɔ. Nuvɔn ci mɛɖewo wa le ʒinʒindoshimɛ godu na wodonɔ hwɛ wowoɖekiwo. Mì pleŋ yí senɔ le mìwoɖekiwo mɛ ahan. (Rɔm. 3:23) Le nyɔnɔnwi mɛɔ, mìjinɔ mɔ mìawa enu ci yí nyɔ. Vɔ “mìwo keŋkeŋ wanɔ afɛn le emɔ sugbɔtɔwo ji.” (Ʒaki 3:2; Rɔm. 7:21-23) Ci mìdejinɔ mɔ mìado hwɛ mìwoɖekiwo can ɔ, atɛnŋ awa enywi ɖewo nɔ mì. Nyi yí taɖoɔ? Ðo ehwɛdodo amɛɖeki atɛnŋ ana mìatrɔ mìwo gbenɔnɔ, yí aɖui gligaan mɔ mìdagbewa nuvɔn lɔ ke o.—Ebre. 12:12, 13.
13 Ele ahan gan, mìtɛnŋ vadokɔ hwɛ mìwoɖekiwo ɖoɖu, yi gɔnmɛ yí nyi mɔ, mìakpɔtɔ dokɔ hwɛ mìwoɖekiwo nɔ mìtrɔ jimɛ yí Yehowa sɔ enu ci mìwa sɔ ke mì can. Ehwɛdodo amɛɖeki ahan atɛnŋ adahɛn nu le amɛ nu. (Eha. 31:10; 38:3, 4) Lé ewɛ yí nyi ahan ɔ? Bu tamɛ kpɔ so nɔvinyɔnu ɖeka ci yí kpɔtɔ dokɔ hwɛ yiɖeki so nuvɔn ciwo ewa vayi nu. Énu mɔ: “Ŋkpɔɛ mɔ nɔ ŋwakɔ edɔ sɛnsinɖe le Yehowa sɛnsɛn mɛ can ɔ, gbali yɔ, ɖo taŋfuin ɖewaxu deli mɔ nakpɔ agbe o.” Mìwo sugbɔtɔ tɛnŋ senɔ le mìwoɖekiwo mɛ shigbe nɔvinyɔnu cɛ nɛ. Eyi taɖo ele veviɖe mɔ mìanya wawa nɔ mìŋgbedonɔ hwɛ mìwoɖekiwo ɖoɖu o. Enyɔ lɔ yí nyi mɔ, nɔ Yehowa sɔ nuvɔnwo ke mì, gan yí mìkpɔtɔ dokɔ hwɛ mìwoɖeki keke yí mi sinsin ɔ, ajɔ ji nɔ Satana sugbɔ!—Sɔ sɔ koɖo 2 Korɛntitɔwo 2:5-7, 11.
w02 11/15 20 mm. 1-2
Lé Mìawɛ Anɔ Agbe Nywi le Ŋmɛ nɔ Yehowaɔ?
AGBE ŋkeke mìwotɔ kpokpo yí ɖeblɛ vɔnɔ. Ci ehakpatɔ Davidi bu tamɛ kpɔ so lé agbe lɔ kpokpo do nuɔ, énu le gbedoɖa mɛ mɔ: “Tɔhonɔ, enu ci yí a jɔ do ŋ ji le evyɛ mɛ ɔ? Nui nɔ ŋ. Exwe nɛni na kpɔtɔ a le agbe ɔ? Nui nɔ ŋ. Na nɔ ma nya le anyi gbe a kpokpo do nyɔnɔnwi tɔ. Tɔhonɔ, agbe kpokpwi kɛɖɛɛ yí E na ŋ. Anyi gbe kpokpwi de nyi enu ɖe [yí] wo a sɔ sɔ koɖo Eo o.” Enu ci yí xa Davidi yí nyi mɔ, ánɔ agbe ci yí kpe nɔ Mawu sɔ to yi nuxu koɖo yi nuwanawo mɛ. Ci enya mɔ Mawu yí na enuwo pleŋ yeɔ, énu ni mɔ: “E nyi anyi mɔkpɔkpɔ lɔ.” (Ehajiji Wema 39:4, 5, 7) Eyi Yehowa ɖo to yi. Gbesɔ kpe niɔ, ékpɔ edɔ ciwo Davidi wa keŋ yí ɖo tɔxu ni.
Ánɔ fafɛɖe mɔ mìajan le minici ɖeshiaɖe mɛ le ŋkeke ɖeka ɖeka ji, eyi edɔ ciwo mìwanɔ ŋkeke ɖeka duu axa mì keke mìavo aglo. Ecɛ tɛnŋ do xaxa nɔ mì keke mìavo aglo, vevitɔ ci enu sugbɔ le kɔ nɔ mì yí mìawa yí agbekpɔ nyɔ buwo gbɔ. Vɔ gamɛ desunnɔ nɔ mì yí mìawa wo o. Shigbe lé Davidi ji mɔ yeanɔ agbe keŋ nɔ ye nu akpe nɔ Mawu nɛ ɖe, ahanke ele nɔ mìwo can nɛa? Kando ji mɔ, Yehowa glonɔ mì kpɔ nywiɖe yí nyanɔ mɛ ciŋmɛ mìnyi teŋ. Éwa exwe 3600 vayi yí Job, ŋsu ci yí vɔnnɔ nɔ Mawu nya mɔ Yehowa kpɔ agbe ci yenɔnɔ yí hlɛnnɔ ye fɔɖeɖewo kpɔ. Job biɔ se mɔ: “Enyɔ ci na nu hwecinu Mawu a byɔ ŋ mɔ nyɛ le dre enu ci yí ŋ wa ɔ?” (Job 31:4-6, 14) Mìawɛ yí mìwo gbe anyɔ le ŋmɛ nɔ Mawu dru, nɔ mìsɔnɔ gbɔngbɔnmɛnuwo ɖonɔ texwe ŋkɔtɔ, wanɔ do Mawu sewo ji yí gbezannɔ mìwo gamɛwo koɖo nunya. Mìakpɔ lé enyɔ cɛwo kan mì do.
Gbedo ŋsɛn exlɔnyinyi ci yí le eɔ koɖo Yehowa gblamɛ
Xonɔ nuxu nɔ Yehowa blaŋblaŋ. Edao mɔŋje mɛ mɔ nɔ èkpɔtɔ dokɔ hwɛ eoɖeki gbɛmɛgbɛmɛ do nuvɔn ciwo èwa vayi ŋciɔ, etɛnŋ gbɔnnu nɔ eo mɔ àdo gbe ɖaɖa nɔ ye. (Rɔm. 8:26) Ele ahan gan, kpɔtɔ “[a] donɔ egbe ɖaɖa tɛgbɛɛ” yí anu lé èjikɔ mɔ ye koɖo Yehowa ave sugbɔ do ni. (Rɔm. 12:12) Andrej ɖo ŋwi mɔ: “Ŋdo hwɛ nyɛɖeki yi ŋkpɛn wakɔŋ. Vɔ hweɖekpokpuinu ci ŋdo gbe ɖaɖa ɖegbɔɔ, ŋkpɔnɔ nyɛɖeki mɛ. Ŋkpɔnɔ fafa le ji mɛ.” Nɔ denya enu ci àdo gbe ɖaɖa abiɔ, kpɔ jimɛtrɔtrɔ gbedoɖa ci Efyɔ Davidi wa yí woŋwlii do Ehajiji Wema 51 koɖo 65 mɛ.
Bibla mɛ Nuveviwo
Nyi mɛ ci ji woatɛnŋ akannɔdo
16 Amɛɖekijiɖuɖu can le veviɖe gbɔxwe woatɛnŋ akando mì ji. Nɔ nukpa fiofioɔ mì mɔ mìanu enyɔwlawla ɖeɔ, amɛɖekijiɖuɖu akpedo mì nu mìale mìwoɖeki do mɛ. (Hlɛn Elododo Wema 10:19.) Nɔ mìzannɔ jugbajahadoxuwo le ɛntɛnɛti jiɔ, atɛnŋ agbɔnnu nɔ mì mɔ mìaɖu mìwoɖekiwo ji. Nɔ mìdenya wawaɔ, mìanunɔ enyɔwlawlawo le nɔtɔxu yí amɛ sugbɔ ase gbɔxwe mìavanyɔ va mìwoɖekiwo mɛ. Eyi ci mìnui le ɛntɛnɛti ji ahan ɔ, mìdegbeɖo acɛ yí atrɔ ŋɖe o. Mìdenya lé mɛ ciwo yí se nyɔ lɔ, avayi zin do koɖo cukaɖa ciwo atɛnŋ avahɛn vɛ o. Amɛɖekijiɖuɖu atɛnŋ agbekpedo mì nu yí mìabɔ nu kplii nɔ ketɔnɔwo ʒinkɔ mì ji mɔ mìanu enyɔ ɖe ci yí asɔ mìwo nɔviŋsu koɖo nɔvinyɔnuwo gbe do afɔku mɛ. Ecɛ atɛnŋ ajɔ hwenu kpobishiwo avabiɔ nyɔ mì se le eju ciwo mɛ woɖo te mìwo dɔwo le alo ciwo mɛ wodeɖe emɔ do mìwo dɔwo pleŋ nu le. Mìatɛnŋ awa do gɔnmɛɖose cɛ ji yí abɔ mìwo nu cu le nɔnɔmɛ ŋtɔ́wo koɖo ebuwo mɛ. (Eha. 39:1) Mìɖo anyi mɛ ciwo ji woakannɔdo nɔ mìle koɖo mìwo xomumɛtɔwo, mìwo xlɔwo, nɔviŋsu koɖo nɔvinyɔnuwo alo mɛbuwo. Yí gbɔxwe mìanyi mɛ ciwo ji woatɛnŋ akannɔdoɔ, mìɖo aɖunɔ mìwoɖekiwo ji.
20-26 MAI
MAWU NYƆ MƐ DƆKUNUWO EHAJIJI WEMA 40-41
Nyi yí Taɖo Woakpedo Mɛbuwo nuɔ?
w18.08 22 mm. 16-18
Mɛ Ciwo yí Nanɔ nu Amɛ Kpɔnɔ Jijɔ
16 Mɛ ciwo yí nyi xomɛvunɔ ŋtɔŋtɔwo dekpɔnɔ emɔ mɔ nɔ yewona nu mɛɖeɔ, mɛ lɔ agbevana yewo do nu o. Enyɔ cɛ yí le susu mɛ nɔ Yesu ci enu mɔ: “Vɔ, gayimɛ e ɖo exwezan ɔ, yɔ wamɛnɔwo, kplibɔnɔwo, koɖo ŋkuvitɔnnɔwo, nɔ na xɔ shicu, ɖo wo da tɛnŋ ɖefi nɔ eo o.” (Luiki 14:13, 14) Bibla ŋwlɛtɔ ɖeka nu mɔ: “Wo a cushi nɔ amɛ ci yí na enu amɛ vofamɛtɔ.” Ebu nu mɔ: “Amɛ ci yí kpedo wamɛnɔwo nu yí wo ɖuji ɔ, á xɔ eshicu sugbɔ.” (Elo. 22:9; Eha. 41:1) Gbesɔ kpe niɔ, mìɖo ana enu, ɖo mìkpɔnɔ jijɔ nɔ mìkpedo mɛbuwo nu.
17 Hwenu Pɔlu yɔ nyɔ so Yesu nyɔwo mɛ yí mɔ ‘jijɔkpɔkpɔ le enunana mɛ sɔwu enuxɔxɔɔ,’ nu Pɔlu nunuɔ mɔ de gbazamɛnuwo ɖekɛ yí woana amɛ o, vɔ woado ŋsɛn mɛ ciwo yí le ʒan mɛ, ánu enu ci woawa nɔ wo yí akpedo wo nu hɛnnɛ. (Edɔ 20:31-35) Le nuxu koɖo kpɔwɛ ci eɖo ɖɛ mɛɔ, apotru lɔ kpla mì mɔ mìwo le sɔ mìwoɖekiwo na yí alɔn nɛnɛmunɔwo, ále bu nɔ wo keŋ azan mìwo gamɛ koɖo mìwo ŋsɛn do wo nu.
18 Mɛ ciwo yí jinɔ enugɔnmɛ kpɔ so lé woanɔ agbe do nu can, do jeshi mɔ nɔ wonakɔ nu amɛwoɔ, eji jɔnɔ amɛ. Wema ɖeka nu mɔ, “amɛ sugbɔ nu mɔ eji jɔnɔ yewo sugbɔ yí yewovonɔ le yewoɖekiwo mɛ haan nɔ yewona nu mɛbuwo.” Mɛ ciwo yí jinɔ enugɔnmɛ kpɔ so lé woanɔ agbe do nu, nu mɔ kpekpedo mɛbuwo nu na yí “mìwo gbe” ɖonɔ ta, “ɖo mìkpɔkɔ eʒan vevi agbetɔwo tɔ gbɔ.” Eyi taɖo enugɔnmɛjikpɔtɔwo nu nɔ amɛwo mɔ, wo le wanɔ lɔnlɔn faa dɔwo, ɖo ecɛ adɔ woanɔ lanmɛsɛn mɛ yí agbekpɔkpɔ jijɔ. Ecɛ dekpaca mì o, ɖo Yehowa ci yí nyi mìwo Watɔ kpla mì daɖɛ xoxo mɔ, nɔ mìna nu amɛɔ, éna mìkpɔnɔ jijɔ.—2 Tim. 3:16, 17.
w15 12/15 24 mm. 7
Yehowa Akpedo eo nu
7 Nɔ mìbleɔ, mìkpɔnɔ emɔ mɔ Yehowa afa akɔn nɔ mì, ana mì ŋununya yí agbenɔ ŋgbe nɔ mì shigbe lé ewɛ nɔ yi sɛntɔ adodwi ciwo yí ni vayi nɛ. Efyɔ Davidi ŋwlɛ mɔ: “Amɛ ci yí kpedo wamɛnɔwo nu yí wo ɖuji ɔ, á xɔ eshicu sugbɔ. Hwecinu cukaɖawo a kɔɖɛ ɔ, Tɔhonɔ a hwlɛn amɛ huntɔ gan. Tɔhonɔ a cɔn amɛ huntɔ ji [yí] a gbe hwlɛn yi gbe gan.” (Eha. 41:1, 2) Mìnya mɔ mɛɖe ci yí nɔ agbe le Davidi hwenu yí sɔ ɖe le ji nɔ mɛ ci yí sɔ yiɖeki hwe denɔ agbe tɛgbɛɛ o. Nyɔnɔnwi enyi mɔ Davidi denunuɔ mɔ mɛ ci yí sɔ ɖe le ji nɔ mɛɖe, anɔ agbe tɛgbɛɛ enujiŋtɔ yí anyi mɔ wosɔ agbe mavɔ cu fɛn ni o. Mìatɛnŋ anu mɔ gbɔngbɔn mɛ nyɔ cɛwo gɔnmɛ yí nyi mɔ Mawu akpedo mɛ ci yí sɔ eɖe le ji nɔ amɛ nu. Lé awɛ doɔ? Davidi dre mɛ mɔ: “Hwecinu amɛ hunnɔ a ble yi á le eba ji ɔ, Tɔhonɔ a na ŋsɛn yi. Amɛ hunnɔ tɛnŋ ble le eba ji, vɔ Tɔhonɔ a yɔdɔ̀ ni.” (Eha. 41:3) Nyɔnɔnwi yɔ, mɛɖe ci yí sɔ ɖe le ji nɔ mɛ ci yí sɔ yiɖeki hwe, atɛnŋ akando ji mɔ Mawu kpɔkɔ ŋciwo mɛ yetokɔ koɖo egbeji ci yenɔkɔ ni. Eyi Mawu awɛ yí ŋsɛn ci ena agbetɔ lankpu yí ewanɔ ahwa koɖoe edɔ̀lelewo ana akpɔ yiɖeki mɛ yí edɔ̀ ami ni.
w17.09 12 mm. 17
Wa Yehowa tɔ Han yí Akpɔ Adɔnusoswi nɔ Amɛ
17 Denyi ci èkpɔ mɔ nɔ yekpɔ adɔnusoswi nɔ amɛ, yɛawa enywi nɔ ye yí adɔ naje agbla mɔ yeakpɔnɔ adɔnusoswi nɔ amɛ o. Ŋci koŋ adɔ nawɛ ahan yí nyi mɔ, yeawa Yehowa Mawu tɔ han, mɛ ci yí nyi agu nɔ adɔnusoswikpɔnɔamɛ, keŋ akanfui. (Elo. 14:31) Éɖo kpɔwɛ nywitɔ ɖɛ nɔ mì. Ele mɔ mìawa ci ji mìakpe yí awa yitɔ han. Mìatekpɔ nɔ lɔnlɔn ci yí le mìwo koɖo mìwo nɔviwo gblamɛ asɛnŋ doji yí mìanɔ ekacaca nywi mɛ koɖo mìwo kpenawo yí akpɔ adɔnusoswi nɔ wo.—Gal. 6:10; 1 Ʒan 4:16.
Bibla mɛ Nuveviwo
it-1 1261
Yehowa
Exolɔlɔ ciwo pleŋ yí le Bibla mɛ xo nuxu so acɛkpatɔnyinyi Yehowa tɔ nu. Susu ŋkɔtɔ ci yí Yehowa Mawu ŋtɔ can ɖo hɛnnɛ nɛ: yi ŋkɔ ŋci kɔkɔ. Woakɔ ŋkɔ lɔ ŋci dasɛ mɔ woaɖe ŋciwo pleŋ yí xo ɖyi Mawu ŋkɔ lɔ swi. Gbesɔwu hunnɔɔ, enuwawa nyaŋɖɛ ciwo yí le jeŋkwi mɛ koɖo nyigban ji ɖo ado bubu ŋkɔ lɔ nu yí akpɔ mɔ yile kɔkɔɛɖe. Ecɛ dasɛ mɔ woalɔn do texwe ci Yehowa le ji yí adonɔ bubu yi nu. Nɔ wolɔn faa yí wɛni ahan ɔ, woaji mɔ yewoasin so ji mɛ, eyi woasɔ jijɔ sɔ wanɔ yi dro, ɖo woluin. Gbedoɖa ci Davidi wa nɔ Yehowa le Ehajiji Wema 40:5-10 wa ɖaŋ dasɛ lé Davidi ji veviɖe do mɔ yeawa nu ahan yí awa ɖaŋ akɔ Yehowa ŋkɔ lɔ ŋci. (Do jeshi lé apotru lɔ wa do nyɔ cɛ ci wonu le eha cɛ mɛ ji do Kristo Yesu nu le Ebre 10:5-10 mɛ.)
27 MAI–2 JUIN
MAWU NYƆ MƐ DƆKUNUWO EHAJIJI WEMA 42-44
Wa Ðaŋ Awanɔ do Emɔdasɛnamɛ Yehowa Tɔwo ji
w06 6/1 9 mm. 4
Enyɔ Vevi Ciwo yí le Wema Amɛvetɔ mɛ nɔ Ehajiji Wema
42:4, 5, 11; 43:3-5. Ŋɖewo ciwo yí denyi mìwoŋtɔwo dro o tɛnŋ dɔ yí mìate le Kristotɔwo hamɛ lɔ nu na nɔ hwenu ɖe. Nɔ evajɔ ahan ɔ, mìaɖonɔ ŋwi jijɔ ci mìkpɔ hwenu mìle ju koɖo nɔviŋsu koɖo nɔvinyɔnuwo, eyi ecɛ ado ŋsɛn mì dru. Nyɔnɔnwi enyi mɔ le tɔtɔmɛɔ, ecɛ adɔ mìaɖu cukaɖa ciwo yí le akogocici mɛ ji. Le yiyi mɛɔ, ádɔ mìaɖo ŋwi mɔ Mawu yí nyi mìwo bexu, eyi taɖo mìɖo aɖoŋdo nu yí akando ji mɔ yɛakpedo mì nu.
w12 1/15 15 mm. 2
Le Mìawɛ Akpɔ Jijɔ Koɖo Nukplamu le Enukplakpla Mìwotɔ Hwenu
1 DO EGBE ÐAÐA: Enu ŋkɔtɔ ci woawa yí nyi mɔ woado gbe ɖaɖa. (Eha. 42:8) Nyi yí taɖoɔ? Mìɖo asɔɛ mɔ Mawu Nyɔ lɔ kplakpla nyi akpaxwe ɖeka le sɛnsɛn ci mìsɔ nanɔ Mawu mɛ. Gbesɔ kpe niɔ, mìabiɔ Yehowa mɔ le na mì eji nywi koɖo yi gbɔngbɔn kɔkɔɛ. (Luiki 11:13) Barbara ci yí wa exwe sugbɔ le ejugodu ŋɛnywidradradɔ lɔ mɛ nu mɔ: “ŋdonɔ gbe ɖaɖa tɛgbɛɛ gbɔxwe ahlɛn alo akpla Bibla. Le yi goduɔ, éwanɔ nɔŋ mɔ Yehowa le koɖoŋ yí lɔn do enu ci ŋwakɔ ji.” Nɔ mìdo gbe ɖaɖa keŋ gbɔxwe yí tɔ enu kplakplaɔ, éhunnɔ mìwo susu koɖo mìwo ji yí wolɔnnɔ do gbɔngbɔn mɛ ŋɖuɖu sugbɔ ci yí le ŋkɔ nɔ mì ji.
w16.09 5 mm. 11-12
“Ŋgbegbɔjɔ o”
11 Gbɔngbɔn mɛ nukplamu ciwo mìxɔnɔ le Kristotɔwo bɔbɔwo, takpekpewo, takpekpe ganwo koɖo teokrasi sukluwo gbedonɔ ŋsɛn mì hɛnnɛ. Ekpla cɛwo atɛnŋ akpedo mì nu mìaɖo edro, aɖo gbɔngbɔn mɛ tajinuwo yí agbewa edɔ ciwo yí le ekɔ nɔ mì le Kristotɔwo hamɛ lɔ mɛ. (Eha. 119:32) Èjinɔ veviɖe mɔ yeakpɔ ŋsɛn le ekpla cɛ xɔxɔ mɛa?
12 Yehowa kpedo Izraɛliviwo nu woɖu Amalesitiwo koɖo Etiopitɔwo ji. Éna ŋsɛn Nexemi koɖo yi kpedonutɔwo nɔ woatrɔ aɖo egli lɔwo. Ahanke Mawu akpedo mì nu mìasɛnŋ le ŋkɔ nɔ yumɛcici koɖo enulolokpɔ hɛnnɛ nɛ. Ecɛ adɔ mìawa mìwo kunuɖeɖedɔ lɔ nywiɖe. (1 Piɛ. 5:10) Mìdekpɔkɔ emɔ mɔ Yehowa le wa enuwo nɔ mì enujiŋtɔ o. Ewaɖeɔ, mìawa ci yí nyi mìwotɔ. Ecɛ dasɛ mɔ mìahlɛnnɔ Mawu Nyɔ lɔ gbeɖeka duu, ádranɔ bɔbɔwo do yí ayinɔ wo. Ahanke mìagbewanɔ amɛɖekɛnukplakpla, sɛnsɛn xomumɛtɔ yí agbekannɔdo Yehowa ji le mìwo gbedoɖawo mɛ. Ecɛwo wawa adɔ mìana gbɔngbɔnmɛŋɖuɖu mìwo susu koɖo mìwo ji. Mìatekpɔ keke mìdakplɔ nubuwo alo mìwo dɔwo do yí woaxɔ texwe le ŋciwo ji Yehowa tonɔ yí donɔ ŋsɛn mì shi o. Nɔ èkpɔ mɔ yegbɔjɔ le ŋɖewo mɛɔ, biɔ Yehowa nɔ akpedo eo nu. Le yi goduɔ, kpɔ lé yi gbɔngbɔn kɔkɔɛ lɔ “dɔ yí enuwawa dronɔ” mì yí gbenanɔ ŋsɛn mì yí mìwɛni do. (Fili. 2:13) Ci ele ahan can ɖe, lé àwɛ akpedo mɛbuwo nu nɔ woŋgbegbɔjɔɔ?
Bibla mɛ Nuveviwo
it-1 417
Tɔvu
Blaŋblaŋ ɔ, Enuŋwlɛŋwlɛ lɔwo xonɔ nuxu so tɔvu nu yí asɔ dre enyɔ ɖe mɛ. Le kpɔwɛ mɛ, ci Job jikɔ axo nuxu so nɔnɔmɛ waŋshishi ci mɛ ele nuɔ, énu mɔ “ŋvanyi nɔvi nɔ tɔvuwo”. (Job 30:29, NWT) Ci ehakpatɔ lɔ xokɔ nuxu so ŋkpɛn ci Mawu mɛwo ɖu ci wodeɖu ji nuɔ, taŋfuin exokɔ nuxu so ahwawaxu ɖe nu, ci yí etɔvuwo bɔ do keŋ aɖu mɛ ciwo wowu lanwo. (sɔ sɔ koɖo Eha 68:23) Ehakpatɔ lɔ xo nuxu koɖo ŋshishi mɔ: “Ècuku mì do fini yí etɔvuwo nɔnɔ.” (Eha 44:19, NWT) Ci Babilonitɔwo je Ʒerusalɛmu ji le exwe 607 D. Y. mɛɔ, édɔ yí eju to. Ecɛ dɔ yí vinɔwo wa xomɛvevenu koɖo wowoŋtɔwo viwo. Sɔ koɖo nyɔ cɛwoɔ, Ʒeremi sɔ xomɛveve “yi jukɔn tɔ” sɔ sɔ koɖo ebu ci yí tɔvuwo lenɔ nɔ wowo viwo yí mɔ woto akpo xesexese.—Avin 4:3, 10, NWT.
3-9 JUIN
MAWU NYƆ MƐ DƆKUNUWO EHAJIJI WEMA 45-47
Eha ci Woji so Alɔlele Efyɔ lɔ tɔ nu
w14 2/15 9-10 mm. 8-9
Kpɔ Jijɔ le Lɛngbɔvi lɔ Lɔlele Hwenu!
8 Hlɛn Ehajiji Wema 45:13, 14a. Wokplɔ nyɔnu yoyu ci yí le “awu nyakpɔkpɔ” mɛ, nɔ avalé alɔ koɖo efyɔ lɔ. Le Enyɔdasɛ 21:2 mɛɔ, wosɔ nyɔnu yoyu lɔ sɔ sɔ koɖo jugan ɖeka ci yí nyi Ʒerusalɛmu Yoyu, eyi “wo drɛ do shigbe nyɔlun ci yí wo ɖo acɔ nɔ nɔ asuɔ ɛnɛ.” Jeŋkwi mɛ jugan cɛ nyi “kanfukanfu Mawutɔ” yí klɛnklɛn, “shigbe jenu veho ɛnɛ, shigbe jasipɛkpe ɛnɛ. É kɔ shigbe kpɔnkpɔnlin ɛnɛ.” (Enyɔ. 21:10, 11) Wowa ɖaŋ dre lé Ʒerusalɛmu Yoyu lɔ gangan yí gbenyakpɔkpɔ nywiɖe do le Enyɔdasɛ wema mɛ. (Enyɔ. 21:18-21) Dekpaca mì ci ehajitɔ lɔ dredreɛ nyɔnu yoyu lɔ mɔ yi le shigbe “awu nyakpɔkpɔ” nɛ o! Ewaɖeɔ, jeŋkwi mɛ yí wowa alɔlele lɔ le.
9 Amɛ ci yí wokplɔ nyɔnu yoyu lɔ va nɔ yí nyi nyɔnu lɔ Su—Mɛsia ci yí nyi Efyɔ. Wowa ɖaŋ drɛ do ɖɛ nywiɖe, yí klɔɛ koɖo eshi sɔ toto Mawu Nyɔ lɔ mɛ.’ Éle “mɛ̀miɖe yí gbekɔ.” (Efe. 5:26, 27, NWT) Le azan lɔ jiɔ, nyɔnu yoyu lɔ ɖo ado enu nyakpɔkpɔ yí asuɔ akpɔɛ adro. Eyi ewa! Gbesɔ kpe niɔ, “Efyɔvi nyɔlunvi do awu nyakpɔkpɔ ciwo yí wo sɔ shika kawo sɔ wa.” Le Lɛngbɔvi lɔ lɔlele hwenuɔ, “Wo ni avɔn adodwi ci yí dada ezo nɔ a do. (avɔn dazo lɔ gɔnmɛ yí nyi enu nywi ciwo yí Mawu mɛ kɔkwɛwo wanɔ.)”—Enyɔ. 19:8.
Enyɔ ci yí Enyɔdasɛ wema lɔ nu so ao sɔ mɛ nuɔ?
10 Nɔ wovaje Mawu sɛntɔwo ji ɖe, lé Yehowa awa nu doɔ? Yehowa nu mɔ: “Anyi dɔmɛzi awugan.” (Eze. 38:18, 21-23; NWT) Enyɔdasɛ eta 19 dre enu ci yí ajɔ kplɔɛdo. Yehowa adɔ Eviɛ ɖaɖa nɔ avaglɔn ta nɔ Yi mɛwo yí aɖu ketɔnɔ lɔwo ji. Mawudɔla egbejinɔtɔwo koɖo amɛ 144000 lɔwo ciwo yí nyi “jeŋkwi mɛ hwakɔnwo” abɔdo Yesu nu keŋ awa ahwa kpe Gɔgi ci yí so Magɔgi. (Enyɔ. 17:14; 19:11-15) Lé ahwa cɛ avɔ doɔ? Mɛɖekpokpui koɖo habɔbɔ ɖekpokpui ci yí fɔn gu do Yehowa ji agu pleŋpleŋ!—Hlɛn Enyɔdasɛ 19:19-21.
11 Kpɔ lé anɔ do, nɔ wogu Mawu ketɔnɔwo pleŋ yí enyi Mawu sɛntɔwo ɖekɛ yí akpɔtɔ le nyigban lɔ ji ɖa! Jijɔ hwenu teŋ yí anyi! Hwenu woagu Babiloni Gangantɔ lɔ swiɔ, eji ajɔ jeŋkwi mɛ tɔwo. Vɔ nubu li ci yí adɔ woagbekpɔ jijɔ wu hunnɔ. (Enyɔ. 19:1-3) Eyi nyi nyɔnuɖeɖe “Lɛngbɔvi” lɔ tɔ. Alɔlele cɛ yí nyi enu ci yí do jijɔ nɔ amɛ sɔwu ci nu Enyɔdasɛ wema lɔ xo nuxu so.—Enyɔ. 19:6-9.
12 Hwenu woawa alɔlele lɔɔ? Amɛ 144000 lɔwo pleŋ ɖo asɔgbe le jeŋkwi mɛ gbɔxwe Harmagedɔn hwa lɔ akpan. Vɔ denyi gahunnɔmɛ yí Lɛngbɔvi lɔ awa alɔlɔle lɔ o. (Hlɛn Enyɔdasɛ 21:1, 2.) Nɔ wowa Harmagedɔn hwa lɔ ɖegbɔ yí gu Mawu ketɔnɔwo xloŋ si gbɔxwe Lɛngbɔvi lɔ awa alɔlele lɔ.—Eha. 45:3, 4, 13-17.
it-1 1041
Ahwa
Le vɔvɔnu nɔ ahwa lɔɔ, nyigban lɔ pleŋ akpɔ fafa na nɔ exwe kotoku nɛniɖe. Ehakpatɔ lɔ nu mɔ “[Yehowa] tɛnŋ a ɖote ahwawo le afi ɖekpokpwi le nyigban ji. É tɛnŋ ŋɛ ahwawaviwo anŋguwo yi a zɛn wowo vlɔwo, yi a tɔzo wowo kpoxɔnuwo.” Enyɔ cɛ ci ehakpatɔ lɔ nu vamɛ hwenu yí Mawu hɛn fafa va Izraɛli keŋ yí cuku yi ketɔnɔwo hwawanuwo. Nɔ Kristo ɖu ahwawatɔwo ji le Harmagedɔn goduɔ, nyigban lɔ keŋkeŋ akpɔ jijɔ koɖo fafa. (Eha 46:8-10) Mɛ ciwo woaku ŋshishi nɔ yí ana agbe mavɔ nyi mɛ ciwo yí “a sɔ wowo anŋguwo yi a sɔ wa edukunuwo. Wo a zan wowo dekpiwo yi a sɔ wa acisonuwo” eyi mɛ cɛwo “da gbe kpla ahwa wawa gbeɖe o.” “Ðo ɔ, Tɔhonɔ Ŋsɛnwo Pleŋtɔ nu mɔ yi a jɔ do ahan ji!”—Ezai 2:4; Mishe 4:3, 4.
Bibla mɛ Nuveviwo
w17.04 11 mm. 9
Nyi yí Avajɔ Hwenu Mawu Fyɔduxu lɔ Avavaɔ?
9 Nyi avaɖɔli gbɛbɔbɔ ciwo yí nanɔ nu le bebemɛɔ? Le Harmagedɔn hwa lɔ godu ɖe, gbɛbɔbɔ ɖe agbevanɔ nyigban lɔ jia? Bibla nu mɔ: “Mì lete kpɔ jeŋkwi yoyu koɖo anyigban yoyu, fini jɔjwɛnyinyi a nɔ̀, do yi gbeɖu lɔ ŋci.” (2 Piɛ. 3: 13) Agbetɔ cɛkpakpa, enu ficifici watɔwo koɖo agbetɔwo gbɛbɔbɔ ciwo pleŋ yí le gɔnmɛ nɔ wo yí nyinyiɛ jeŋkwi xoxui koɖo nyigban xoxui lɔ. Woagu wo swi keŋkeŋ. Nyi yí avanɔ dumɛ nɔ woɔ? Enyɔgbe “jeŋkwi yoyu koɖo anyigban yoyu” dadasɛ mɔ acɛkpakpa yoyu bu ava, eyi agbetɔwo gbɛbɔbɔ yoyu ɖeka avanɔ yi cɛkpakpa gɔnmɛ le nyigban ji. Fyɔɖuxu ci Yesu Kristo akpa cɛ nɔ aɖo Yehowa Mawu ci yí nyi toto Mawu nɔnɔmɛwo han pɛpɛpɛ. (1 Kor. 14:33) Eyi taɖo, enuwo anɔ totomɛ le “nyigban yoyu” lɔ ji. Amɛnywiwo ale bu nɔ nyigban ji nuwo. (Eha. 45:16) Kristo koɖo amɛ 144000 lɔwo yí akpa nɔ wo. Kpɔ lé enuwo avanɔ do ɖaa le susu mɛ hwenu woavasɔ acɛkpakpa kuɖeka kpaŋ ci egbe ale ju nɔ, ci yí deflunɔ amɛ o, asɔ ɖɔli agbetɔ cɛkpakpa enu ficificiwatɔwo tɔ!
10-16 JUIN
MAWU NYƆ MƐ DƆKUNUWO EHAJIJI WEMA 48-50
Jilawo—Mído Ŋsɛn Míwo Xomu nɔ Akando Yehowa Habɔbɔ lɔ ji
Sɛnsɛn adodwitɔ lɔ akpedo eo nu nakpɔ jijɔ doji
11 Mìsɛnnɔ Yehowa nɔ mìkplanɔ yi Nyɔ lɔ yí gbekplɛni koɖo mìwo viwo. Le Sabatigbeɔ, Izraɛliviwo dewanɔ dɔ ɖe o, wotanɔshi wowo dɔwo yí sɔ susu ɖonɔ Yehowa sɛnsɛn ji. (Hun. 31:16, 17) Egbejinɔtɔwo kplanɔ nu wowo viwo so Yehowa koɖo enunywi ciwo ewa nu. Nɛnɛke le egbɛ mɛ can ɔ, mìɖo aɖo gamɛ ɖe ɖɛ yí ahlɛnnɔ Mawu Nyɔ lɔ agbekplɛni. Yehowa sɛnsɛn kpaxwe ɖe enyi; yí ekpenɔdo mì nu mìtenɔ gogo Yehowa doji. (Eha. 73:28) Eyi nɔ mìwakɔ sɛnsɛn xomumɛtɔɔ, mìatɛnŋ akpedo mìwo viwo nu nɔ wowo can atekpɔ anyi xlɔ koɖo mìwo Da amɛlɔntɔ ci yí le jeŋkwi mɛ.—Hlɛn Ehajiji Wema 48:13.
w11 3/15 19 mm. 5-7
Èwɛ yí mìkpɔ jijɔ
“Zɔn a trɔdo Siɔn. Kpɔ jugan lɔ. Hlɛn agbogbuwo kpɔ. Kpɔ egli yìjiwo. Glo Siɔn fyɔnɔ̀xuwo kpɔ. Eyi, a tɛnŋ xo nuxu nɔ hɛnnu ci yí gbɔ so nu.” (Eha. 48:12, 13) Ehakpatɔ lɔ dɔdɔ Izraɛliviwo mɔ wo le te gogo Ʒerusalɛmu yí aglui kpɔ nywiɖe. Nɔ èyi susu mɛ kpɔɔ, àkpɔ mɔ enunywi sugbɔ aci susu mɛ nɔ xomu ciwo yí yinɔ eju kɔkɔɛ lɔ mɛ hwenɔnu le exwe ciwo woɖunɔ xweshiaxwe hwenu yí glonɔ gbedoxɔ nyakpɔkpɔ lɔ kpɔ. Kpakpa ɖo asɔ wo mɔ ‘yewoaxo nuxu nɔ hɛnnu ci yí gbɔ so nu.’
Bu tamɛ kpɔ so Sheba fyɔ nyɔnu lɔ nu. Ci ese enyɔ so lé acɛkpakpa Salomɔ tɔ le do koɖo ŋnunya gangan yi tɔ nuɔ, dekando ji doŋkɔ o. Nyi yí kpedo nu ekando ji mɔ enyɔ ciwo wonu nyi nyɔnɔnwiɔ? Énu mɔ “Ŋdekando wowo nyɔwo ji o, keke vaje hwenu ŋva yí vakpɔ wo koɖo nyɛŋtɔ ŋkuviwo.” (2 Kro. 9:6, NWT) Nyɔnɔnwi yɔ, ŋci mìkpɔ koɖo mìwoŋtɔwo “ŋkuviwo” atɛnŋ awa dɔ do mì ji sugbɔ.
Lé àwɛ akpedo viowo nu yí woakpɔ enunywi ciwo kudo Yehowa habɔbɔ lɔ nu koɖo wowoŋtɔwo ‘ŋkuviwoɔ’? Nɔ míwo xwe dejinjin le Alɔjedɔwaxu Yehowa Kunuɖetɔwo tɔ gbɔɔ, kplɔ wo nɔ míayi ɖyi sa le nɔ. Le kpɔwɛ mɛ, Mandy koɖo Bethany zɔn mɔ kpeci 1 500 yí yi Betɛli ci yí le wowo ju mɛ. Nyɔnɔnwi enyi mɔ, wowo jilawo kplɔnɔ wo yi nɔ blaŋblaŋ, taŋtaŋ hwenu yí wowo vi nyɔnuvi lɔ tɔ shinshin. Wonu mɔ “Keŋ gbɔxwe mìavayi Betɛliɔ, mìbunɔ sa mɔ amɛ shinshinwo kɛɖɛɛ yí le nɔ. Vɔ ci mìvayiɔ, mìkpɔ jajɛ ciwo yí wakɔ dɔ le nɔ sɛnŋsɛnŋɖe yí gbekpɔkɔ jijɔ le yi wawa mɛ! Ecɛ dɔ yí mìvakpɔɛ mɔ de mìwo ju ɖekɛ mɛ yí habɔbɔ lɔ wakɔ dɔ le o. Eyi nɔ mìyi Betɛli yí gbɔ duuɔ, mìgbekpɔnɔ ŋsɛn doji le gbɔngbɔn mɛ.” Ci yí Mandy koɖo Bethany vajeshi Yehowa habɔbɔ lɔ do jiɔ, edɔ yí wotɔ emɔɖeɖedɔ lɔ wawa, eyi wogbeyɔ wo mɔ wo le va wa lɔnlɔn faa dɔ hwenu kleŋtɔ le Betɛli.
w12 8/15 12 mm. 5
Wa nu Shigbe Fyɔɖuxu lɔ Jumɛvi nɛ!
5 Kpla exolɔlɔ lɔ. Nɔ mɛɖe ji mɔ yeanyi eju bu ɖe mɛ viɔ, éɖo akpla nu so eju lɔ xolɔlɔ nu. Ahanke mɛ ciwo yí ji mɔ yewoanyi Fyɔɖuxu lɔ jumɛviwo ɖo akpla enu ciwo woatɛnŋ akpla so Mawu Fyɔɖuxu lɔ nu nɛ. Mìaxo nuxu so Kore vi ŋsuvi ciwo yí wa sɛnsɛndɔwo le blema Izraɛli nu. Fini wosɛnnɔ Mawu le le Ʒerusalɛmu koɖo Ʒerusalɛmu lɔ ŋtɔ jɔnɔ ji nɔ wo yí wojinɔ mɔ yewoalɔ xo so nu. Denyi exɔcunu ciwo yí wozan yí sɔ cu exɔ lɔ yí jɔnɔ ji nɔ wo o, vɔ eju lɔ koɖo Mawu sɛnxu lɔ yí jɔnɔ ji nɔ wo. Ʒerusalɛmu nyi “ejugan Efyɔ gangan” Yehowa tɔ, ɖo nɔtɔxu yí nyi Mawu sɛnxu nɛ. Enɔtɔxu yí wokplanɔ Mawu Se lɔ amɛwo le. Ʒerusalɛmu Fyɔ ci yí kplɔkplɔ jukɔn lɔ ji yí Yehowa tonɔ yí danasɛ lɔnlɔn egbejinɔnɔtɔ nɔ jukɔn lɔ. (Hlɛn Ehajiji Wema 48:1, 2, 9, 12, 13.) Ahanke le egbɛ mɛɔ, Yehowa ɖo yi habɔbɔ ɖeka do nyigan ji. Shigbe wowo han nɛ ɖe, èji mɔ yeakpla nu so habɔbɔ cɛ xolɔlɔ nua? Nɔ èkplanɔ nu doji so Mawu habɔbɔ lɔ nu koɖo lé Yehowa nɔnɔ ŋgbe nɔ yi mɛwo doɔ, fyɔɖuxu lɔ agbevanyi enu ŋtɔŋtɔ nɔ eo doji. Edro sɛnŋ agbevale lanmɛ nɔ eo so fyɔɖuxu ŋɛnywidradradɔ lɔ nu, yí nawɛwɛ koɖo jijɔ.— Ʒer 9:24; Luiki 4:43.
Bibla mɛ Nuveviwo
it-2 799
Dɔkunuwo
Ci enu do Izraɛliviwo jiɔ, édɔ yí enu ci woaɖu koɖo ŋci woanu can le wo shi. (1 Efy 4:20; Ŋun 5:18, 19) Dɔkunu lɔwo dɔ yí wodese vevi yí enyi abɔjeje yi dɔ o. (Elo 10:15; Ŋun 7:12) Ele ahan gan, ci Yehowa dro enyi mɔ enu ado Izraɛliviwo ji can ɔ, woɖo awa edɔ sɛnŋsɛnŋɖe gbɔxwe aɖo dɔkunu cɛwo (sɔ sɔ koɖo Elo 6:6-11; 20:13; 24:33, 34). Izraɛliviwo deɖo aŋlɔbe mɔ dɔkunu ciwo yewowa ɖɛɔ, Yehowa yí na wo yewo o, eyi yewodeɖo akando dɔkunu lɔwo ji o. Yehowa ɖonɔ ŋwi nyɔ cɛwo nɔ wo nɔ woŋgbevaje afɔku cɛ mɛ o. (2 Ese 8:7-17; Eha 49:6-9; Elo 11:4; 18:10, 11; Ʒer 9:23, 24) Woɖo aɖonɔ ŋwi mɔ dɔkunu lɔwo li na nɔ hwenu kleŋ ɖe (Elo 23:4, 5), yí wodatɛnŋ sɔ wo na Mawu shigbe tafɛn nɛ nɔ ahwlɛn amɛ so eku shi o. (Eha 49:6, 7) Dɔkunu cɛwo deɖo kpɛnkpɛnmɛ ɖe le eku gbɔ o. (Eha 49:16, 17; Ŋun 5:15) Woɖe mɛ nɔ wo mɔ, nɔ wokplɔ dɔkunu cɛwo do ɖoɖuɔ, ádɔ yí woatɔ enu ficificiwo wawa, eyi wowo nu dagbekpe nɔ Yehowa o. (Elo 28:20; sɔ sɔ koɖo Ʒer 5:26-28; 17:9-11.) Wogbedo ŋsɛn wo hɛnnɛ mɔ wo le ‘na bubu Yehowa koɖo wowo dɔkunuwo.’—Elo 3:9.
17-23 JUIN
MAWU NYƆ MƐ DƆKUNUWO EHAJIJI WEMA 51-53
Ŋciwo Àtɛnŋ Awa Keŋ Ami Afɛn Ganganwo Wawa
Lé àtɛnŋ aglɔn ta nɔ ao ji doɔ?
4 Le Elododo Wema 4:23 mɛɔ, enyɔgbe “eji” ci wozan hɛn susu yi enu ci yí amɛ nyi “so eji mɛ ɖaa” alo ‘keke yiɖeki mɛ’ ji. (Hlɛn Ehajiji Wema 51: 6, nwt koɖo gɔnmɛnuŋwlɛŋwlɛ.) Mìanu kpoŋ mɔ, enyɔgbe “eji” nyi susu, seselelanmɛ, koɖo edro mìwo tɔwo alo enu ci yí cucunɔ mì yí mìwanɔ nu. Enu ci yí mìnyi le mìwoɖekiwo mɛ ŋtɔŋtɔ yí enyi, denyi lé mìzenɔ amɛwo kpɔnɔ yɔ o.
5 Do jeshi lé lanmɛsɛnmɛnɔnɔ le ŋcilan mɛ dasɛ do mɔ, enu ci mìnyi le mìwoɖekiwo mɛ le veviɖe. Ŋkɔtɔ, nɔ mìanɔ nywiɖe le ŋcilan mɛɔ, eʒan mɔ mìaɖunɔ ŋɖuɖu nywiwo, yí atenɔ kanmɛ kabakaba. Ahanke nɔ mìji mɔ mìanɔ nywiɖe le gbɔngbɔnmɛɔ, mìɖo ahlɛnnɔ Bibla koɖo wema ciwo wocu do Bibla ji yí agbedanasɛ kabakaba mɔ mìxɔ Yehowa ji se nɛ. Nɔ mìwanɔ do enu ciwo mìkpla ji yí xonɔ nuxu so wo nuɔ, édanasɛ mɔ mìxɔ Yehowa ji se. (Rɔm. 10: 8-10; Ʒaki 2:26) Amɛvetɔ, ejɔnɔ mɔ lé mìzenɔ do atɛnŋ ana mìabu mɔ mìle lanmɛsɛn mɛ, vɔ le nyɔnɔnwi mɛɔ, mìble do te. Ahanke ejɔnɔ mɔ, teokrasidɔ ciwo mìwanɔ kabakaba atɛnŋ ana mìabui mɔ mìsɛnŋ le gbɔngbɔnmɛ nɛ, gan edro vɔn mìwo tɔwo atɛnŋ ashinkɔ doji le mìwo ji mɛ. (1 Kor. 10:12; Ʒaki 1: 14, 15) Mìɖo aɖo ŋwi mɔ Satana jinɔ mɔ, yeasɔ ye susuwo do dɔ̀ mì. Lé aji mɔ yeawa ecɛ do koŋ ɔ? Yí lé mìawɛ aglɔn ta nɔ mìwoɖekiwoɔ?
w15 6/15 14 mm. 5-6
Ànɔ Gbeji Dru
5 Emɔ ɖeka ci ji mìato yí adasɛ nɔ Yehowa mɔ mìkando ji keŋkeŋ yí nyi mɔ, mìadonɔ gbe ɖaɖa ni, yí axonɔ nuxu ni so susu dɔndɔn ciwo mìdokɔ gbla koɖo. Nɔ mìtenɔ gogo Yehowa le gbedodoɖa mɛɔ, yɛ can tenɔ gogo mì. Ésɔ xomɛvu nanɔ yi gbɔngbɔn kɔkɔɛ mì, ecɛ donɔ ŋsɛn gbeta ci mìsɔ mɔ mìanɔ mɛ̀miɖe le susu mɛ yí anɔ gbeji ni. Eyi taɖo mìanu nɔ Mawu mɔ, mìji veviɖe mɔ ŋciwo mìbunɔ kpɔ le mìwo ji mɛ akpe ni. (Eha. 19:14) Mìlɔn yí sɔ mìwoɖekiwo hwenɔ yí biɛni mɔ yi le kpɔ mìwo ji mɛ yí akpɔ mɔ mìɖo “susu vɔn” ɖe, edro alo nubu ɖe li yí jiji adɔn mì do nuvɔn mɛ ma? (Eha. 139:23, 24) Mìɖenɔ kuku ni blaŋblaŋ mɔ yi le kpedo mì nu mìakpɔtɔ anɔ gbeji ni nɔ mìdo go tetekpɔ ɖekpokpuia?—Mat. 6:13.
6 Ekpla ci mìxɔ alo adɛn dɔndɔn ci yí le mì shi sa tɛnŋ vadɔ yí mìagbevatɔ jiji mɔ mìawa enu ci Yehowa gbe. Nɔ egbele ahan can ɔ, Yehowa atɛnŋ kpedo mì nu mìawa trɔtrɔ ciwo yí ʒan yí akpɔtɔ asinsin ɛ shigbe lé eji do nɛ. Efyɔ Davidi can nya ahan hɛnnɛ. Hwenu Davidi wa hashi koɖo Baceba ɖegbɔɔ, éɖe kuku nɔ Yehowa mɔ: ‘Jɔ eji mɛmi do lanmɛ nɔ ŋ. . . . Sɔ gbɔngbɔn yoyu ci yí sɛnŋ do lanmɛ nɔŋ.’ (Eha. 51:10, 12) Hweɖewonuɔ, nuvɔn wawa kpɔnɔ ŋsɛn dɔndɔn do mìwo gbaza ji, vɔ Yehowa ana mì edro koɖo gbɔngbɔn ci yí ale gbesɔsɔ ase tonu ni. Nɔ edro vɔnwo do ke do lanmɛ nɔ mì yí kpɔkpɔ ŋsɛn do susu ci mìɖo mɔ mìanɔ gbeji nɔ Yehowa ji can ɔ, Yehowa atɛnŋ adasɛ emɔ ci ji mìato nɔ mì yí ase tonu ni keŋ awa do yi sewo ji. Daɖe mɔ yí nuvɔn ɖekpokpui asun mì ji o.—Eha. 119:133.
Bibla mɛ Nuveviwo
it-1 663
Doegi
Edomitɔ ɖeka nyi lɛngbɔ kplɔtɔwo ga nɔ Efyɔ Sɔlu, edɔ cɛ nyi edɔ vevi nɔ enujikpɔkpɔdɔ lɔ. (1Sam 21:7; 22:9) Antiɔshi jumɛ tɔwo yí Doegi anyi dandandan. Ci “wo kplɔ Doegi va enɔ do ŋkɔ nɔ [Yehowa]” le Nɔbuɔ, taŋfuin etɛnŋ nyi gbeɖu ɖe, mamɛmamɛ ɖe alo ekpodɔ ɖe nu ekuso. Ékpɔ hwenu Avɔnsatɔ Gangantɔ Ahimelɛki sɔsɔ kpɔnnɔ kɔkwɛ koɖo Goliati hwawawi sɔ jojoɔ nɔ Davidi. Hwenu Sɔlu va xoxoɔ nuxu nɔ yi dɔwaviwo le yiyi mɛ yí nu nɔ wo mɔ woblabla enu do ye nuɔ, Doegi xo nuxu so enu ciwo ekpɔ le Nɔbu nu. Hwenu Sɔlu do go koɖo avɔnsatɔ gangantɔ koɖo avɔnsatɔ bu ciwo le Nɔbu ɖegbɔɔ, ébiɔ nyɔ Ahimelɛki se. Le yi goduɔ, énu nɔ ejulɔtɔwo mɔ wo le wu avɔnsatɔwo pleŋ. Ci wowogbe mɔ yewodawa ahan ɔ, Doegi wado nyɔ ci Sɔlu nu ji yí zɔn avɔnsatɔ 85 ji yí wu wo zeɖeka. Ci ewa xomɛvevenu cɛ ɖegbɔɔ, étrɔn Nɔbu ju lɔ yí wu eju lɔ mɛ tɔwo, jajɛwo koɖo mɛganxoxuwo yí gbegu wowo lankpuwo swi.—1Sam 22:6-20.
Shigbe lé tamɛnuŋwlɛŋwlɛ ci yí bɔdo Ehajiji Wema 52 nu nui nɛɔ, Davidi ŋwlɛ nu so Doegi nu mɔ: “E wanɔ totomɛ masɔgbewo yí ao ɖe vezo shigbe ehɛ ɖaɖa ɛnɛ. E kannɔ ŋsu tɛgbɛɛ [yí] jeje agbla yí a trɔ amɛwo tomɛ! E lɔn enu vwin sɔwu enu nywi. E lɔn ŋsu kankan sɔwu nyɔnɔnwi nunu. Eo koɖo aɖe ŋsukantɔ aotɔ wo lɔn vevisese dodo lanmɛ nɔ amɛwo.”—Eha 52:2-4.
24-30 JUIN
MAWU NYƆ MƐ DƆKUNUWO EHAJIJI WEMA 54-56
Mawu le Axa nɔ eo
w06 8/1 22 mm. 10-11
Nya Ŋɖɛ yí Avɔn nɔ Mawu
10 Évaje hweɖekanuɔ, Davidi vayi ji bexu le efyɔ Akishi gbɔ le Gati jugan mɛ le Filisitɛnwo ju mɛ, fini yí Goliati so. (1 Samiɛli 21:10-15) Efyɔ lɔ dɔwaviwo sa Davidi mɔ yɛnyi ketɔnɔ nɔ jukɔn lɔ. Lé Davidi wɛ yí to le afɔkunyɔ cɛ mɛɔ? Édo gbe ɖaɖa nɔ Yehowa so ji mɛ. (Ehajiji Wema 56:1-4, 11-13) Ci Davidi wa shigbe mɔ sukunɔ yenyi hannɛ can ɔ, énya mɔ Yehowa yí cu shi do ye gblajejewo ji keŋ yí hwlɛn ye gan. Davidi kando Yehowa ji koɖo yi ji keŋkeŋ yí sɔ dasɛ mɔ yevɔnnɔ nɔ Mawu.—Ehajiji Wema 34:4-6, 9-11.
11 Shigbe lé Davidi vɔn nɔ Mawu nɛɔ, mìwo can mìatɛnŋ awa yitɔ han yí akando egbe ci Mawu ɖo nɔ mì ji mɔ yeakpedo mì nu hwenu mìtotoɔ cukaɖawo mɛ. Davidi nu mɔ: “Godo Tɔhonɔ nu. Kando ji yí Á wa enu ci yí ɖo a nyi wawa.” (Ehajiji Wema 37:5) De eyi enyi mɔ mìasɔ mìwo cukaɖawo do alɔ mɛ nɔ Yehowa keŋ ava yi xo alɔ do atamɛ keŋ akpɔkpɔ mɔ ni mɔ yɛakpɔ wo gbɔ nɔ mì o. Davidi dedo gbe ɖaɖa nɔ Mawu mɔ yi le va kpedo ye nu keŋ yi bɔ nu kpuu o. Davidi zan susu koɖo ŋsɛn ci Yehowa ni yí sɔ kpɔ yi cukaɖa lɔ gbɔ. Gbesɔ kpe niɔ, Davidi nya mɔ agbetɔ ŋsɛn ɖekɛ datɛnŋ akpɔ cukaɖa lɔ gbɔ o. Ahanke mìwo can mìɖo akpɔnɔ enuwo nɛ. Mìawa enu ciwo pleŋ mìakpe ji awa yí atashi Yehowa nɔ awa kpɛtɛ. Le nyɔnɔnwi mɛɔ, ŋɖe deli mìawa sɔwu mɔ mìakan do Yehowa ji o. Ecɛ tɔ mɛ wokpɔɛni le mɔ mɛɖe vɔnnɔ nɔ Mawu. Mìatɛnŋ akpɔ akɔnfafa le enyɔ ciwo Davidi nu so ji mɛ mɛ: “Yehowa nu nɔ Yi nyɔ wlawlawo nɔ Yi mɛ ci yí kplɔɛ do.”— Ehajiji Wema 25:14.
cl 243 mm. 9
Ŋɖe da Tɛnŋ “Aklan mì le Mawu Lɔnlɔn nu o”
9 Nɔ mìdodoɔ jiɔ, yɛ can gbejɔnɔ ji nɔ Yehowa hɛnnɛ. (Matie 24:13) Ðo ŋwi mɔ Satana jijiɛ mɔ yeatrɔ eo le ŋgbe nɔ Yehowa. Nɔ èvlɛ yí nɔnɔ egbeji nɔ Yehowa ŋkeke ɖeka duuɔ, anyi mɔ èkpekpeɛdo Yehowa nu yí enana ɖoŋci nɔ enyɔjiji Satana tɔwo. (Elododo Wema 27:11) Hweɖewonuɔ, defanɔ mɔ woanɔ gbeji o. Edɔ̀lelenyɔwo, ehonyɔwo, enulolokpɔwo koɖo cukaɖa buwo tɛnŋ wɛ mɔ ŋkeke ɖekaɖeka agbɔnnu nɔ mì. Nɔ wokpɔkpɔ mɔ nɔ ŋɖe ci yí devaɔ, átɛnŋ adɔ mìagbɔjɔ hɛnnɛ. (Elododo Wema 13:12) Éjɔnɔ ji nɔ Yehewa sugbɔ nɔ mìdokɔ ji yí tokɔ cukada cɛ hanwo mɛ. Ecɛ yí dɔ taɖo Efyɔ Davidi nu nɔ Yehowa mɔ yihlɛn ye “ɖashiwo pleŋ kpɔ” yí gbenu kpi mɔ: “deŋwlɛ wo do ao wema mɛ ba?” (Ehajiji Wema 56:8) Nyɔnɔnwi yɔ, efunkpekpe ciwo mɛ mìdonɔ ji le koɖo ɖashi ciwo mìkɔnɔ gbɔxwe yí nɔnɔ gbeji nɔ Yehowa cinɔ susu mɛ ni yí edonɔ afixɔxɔ wo nu. Enuvevi ŋtɔteŋ wonyi le ŋmɛ ni.
Lɔnlɔn atɛnŋ akpedo mì nu mìaɖu vɔnvɔn ji
16 Satana nya mɔ agbe mìwotɔ ve nɔ mì. Eyi taɖo enunuɔ mɔ mìasɔ enushianu ci yí le mì shi, keke je exlɔnyinyi ci yí le mìwo koɖo Yehowa gblamɛ sɔ sa vɔn keŋ anɔ agbe. (Job 2:4, 5) Vɔ Satana wa afɛn kpɔɛ! Mìnya mɔ “eku hlɔnhlɔn” le Satana shi yí awu amɛ dru. Eyi taɖo ezannɔ vɔnvɔn nɔ eku ci yí le mì mɛ yí awɛ keke nɔ mìagbe Yehowa sɛnsɛn. (Ebre. 2:14, 15) Hweɖewonuɔ, mɛ ciwo ji Satana kpɔ ŋsɛn do donɔ vɔnvɔn nɔ Mawu mɛwo mɔ yewoawu wo nɔ wogbe mɔ yewodami Yehowa sɛnsɛn o. Nɛnɛke nɔ mìle edɔ̀baji yí enu gbɔnkɔnu nɔ mìɔ, Satana tɛnŋ zan nɔnɔmɛ ŋtɔ́ ado mì kpɔ nɔ mìawa ŋɖewo keŋ ada le Yehowa se ji. Dotowo koɖo mìwo xomumɛtɔ ciwo yí denyi Yehowa Kunuɖetɔwo o, atɛnŋ aʒin mì ji nɔ woado ehun nɔ mì, ci yí adɔ mìada le Mawu se ŋtɔ́ ji. Mɛɖewo tɛnŋ dasɛ edɔ̀damɔnu ɖe nɔ mì yí amɔ nɔ mìwo zin ɔ, mìagan. Vɔ desɔgbe koɖo Bibla gɔnmɛɖosewo o.
17 Mìdejinɔ mɔ mìaku o, vɔ nɔ evajɔ mɔ mìku can ɔ, mìkando ji mɔ Yehowa akpɔtɔ alɔnkɔ mì. (Hlɛn Rɔmatɔwo 8:37-39.) Nɔ Yehowa xlɔwo kuɔ, ékpɔtɔ ɖonɔ ŋwi wo, ele shigbe mɔ wokpɔtɔ le agbe ni nɛ. (Luiki 20:37, 38) Éjijiɛ veviɖe mɔ yeafɔn wo va agbe. (Job 14:15) Yehowa cu efɛn gangan ɖeka do ta nɔ mì nɔ mìatɛnŋ “a kpɔ agbe mavɔ.” (Ʒan 3:16) Mìnya mɔ Yehowa lɔn mì sugbɔ yí sɔnɔ ɖe le ji nɔ mì. Eyi taɖo nɔ mìlé edɔ̀ veviɖe alo wododoɔ vɔnvɔn nɔ mì mɔ woawu mìɔ, mìdaso gbeɖe Yehowa ɖɛ o, ewaɖeɔ, mìate gogui yí afa akɔn nɔ mì yí ana mì nunya koɖo ŋsɛn. Enu ci pɛɛ yí Valérie koɖo asuɔ wa nɛ.—Eha. 41:3.
Bibla mɛ Nuveviwo
it-2 646
Mawunuɖoɖo, Xɔsosexwe
Amɛwuwunu ci Ʒudasi Iskariɔti wa na yí enyɔnuɖɛ veviwo vamɛ yí dasɛ lé Yehowa koɖo eviɛ atɛnŋ anya nu so esɔ mɛ nu do. (Eha 41:9; 55:12, 13; 109:8; Edɔ 1:16-20) Nɔ mɛɖe nu mɔ, Mawu ŋtɔ yí tui daɖɛ mɔ Ʒudasi ji yí nyɔ cɛ ato ajɔɔ, anyi ékan ŋsu. Enyɔnuɖɛ lɔwo nu daɖɛ mɔ Yesu xlɔ vevi ɖeka yí avasɛ, vɔ denu Yesu xlɔ ci teŋ yí avasɛ o. Gbesɔ kpe niɔ, Bibla gɔnmɛɖosewo dedre afɔ ciwo Ʒudasi aɖe keke avanyi Yesu satɔ o. Enyɔ ci yí so Mawu gbɔ ci apotru Pɔlu nu yí nyi mɔ: “Ðe susu nywiɖe gbɔxwe a sɔ ao lɔ̀ kɔdo amɛ ci yí a ɖo edɔ lɔ nɔ ji, le Mawu ha mɛ. Kpɔ eoɖeki ji nywiɖe nɔ ŋgbe xoca koɖo mɛbuwo gɔjejewo o. Ðo eoɖeki kɔkwɛ ɖe.” (1Tim 5:22; sɔ sɔ koɖo 1Tim 3:6.) Yesu xa le yiɖeki mɛ so lé awɛ awa ɖaŋ acan apotru 12 lɔwo koɖo nunya do. Eyi taɖo esɔ ezan blebu ɖeka yí sɔ do egbe ɖaɖa nɔ dalɔ gbɔxwe yí sɔ gbeta cɛ. (Luiki 6:12-16) Nɔ Mawu ŋtɔ yí wa toto mɔ Ʒudasi avanyi amɛwutɔɔ, anyi mɔ enyɔ ciwo enu koɖo emɔdasɛnamɛ yitɔwo desɔgbe o, eyi yɛŋtɔ can ɖo alɔ le nuvɔn ci ŋsu cɛ wa mɛ.
Éwa mɔ hwenu wocan Ʒudasi yí enyi apotruɔ, ŋɖe dedasɛ mɔ amɛwuwu ŋɖe le lanmɛ ni o. Étashi yiɖeki yí nuvɔnwawa do ke do lanmɛ ni yí xo ɖyi yi. Ecɛ dɔ yí eso le mɔ nywitɔ ci yí nyi Mawu tɔ ji keŋ yí va lɔn do Legba tɔ ji ci yí dui do efififi koɖo amɛwuwu mɛ. (Ebre 12:14, 15; Ʒan 13:2; Edɔ 1:24, 25; Ʒaki 1:14, 15; kpɔ JUDAS No. 4.) Ci evaje fini ajeɔ, Yesu kpɔ nyɔ lɔ le ji mɛ nɔ Ʒudasi keke yí nu ni mɔ yɛavasa ye.—Ʒan 13:10, 11.