2 Timɔte 1:7​—“Mawu De Na Gbɔngbɔn Ci a Do Vɔnvɔn Nɔ Mì O”

“Ðo Mawu dena vɔnvɔn gbɔngbɔn mì o, vɔ ŋsɛn, lɔnlɔn koɖo susu nywi ɖoɖo gbɔngbɔn yí ena mì.”​—2 Timɔte 1:7, Xexe Yeye Gɔmeɖeɖe.

“Mawu de na gbɔngbɔn ci a do vɔnvɔn nɔ mì o.Gbɔngbɔn ci a na ŋsɛn, lɔnlɔn, koɖo amɛɖekijiɖuɖu yí Mawu na mì.”​—2 Timɔte 1:7, Mawu Nyɔ.

2 Timɔte 1:7 gɔnmɛɖeɖe

Mawu hɛn akpedo mɛɖe nu yí agbe dɔn awa enunywi. Mawu dejijiɛ mɔ mɛɖe alɔn yí “vɔnvɔn” adɔ amɔ yeawa enu ci yí ajɔ ji nɔ Mawu yí aglo o.

Kpɔ enuvevi amɛtɔn ciwo nyɔ wonu do kpukpui cɛ mɛ, ciwo Mawu nanɔ mì keŋ nɔ mìasɔ ɖu vɔnvɔn ji.

“Ŋsɛn.” Kristotɔwo kpe ji yí sɛnnɔ Mawu koɖo edɔngbegbe ci ketɔnɔ vwin sugbɔ delɔnkɔ nu nɔ wo yí wogbedokɔ go cukaɖawo sugbɔ can. Wodelɔn yí vɔnvɔn ɖunɔ wo ji o. (2 Korɛntitɔwo 11:23-27) Lé ecɛ jɔnɔ doɔ? Apotru Pɔlu nu mɔ: “Na wa enuwo pleŋ dru toto Yesu Kristo mɛ, ɖo É yí nanɔ ŋsɛn ŋ.” (Filipitɔwo 4:13) Mawu hɛn ana ‘ŋsɛn ci yí wugan jɔjɔmɛtɔ’ yí sɛntɔwo Keŋ nɔ woasɔ to cukaɖa ɖekpukpui mɛ.​—2 Korɛntitɔwo 4:7, NWT.

“Lɔnlɔn.” Nɔ Kristotɔ ɖe ɖo lɔnlɔn akun-akun nɔ Mawu ɔ, ésɔ edɔngbegbe nɔnɔ godu nɔ enywiwawa. Ahanke, lɔnlɔn ɖoɖo nɔ amɛkpena dɔ Kristotɔ sɔnɔ mɛbuwo Ʒanwo ɖonɔ ŋkɔ nɔ yiŋtɔtɔ, nɔ ékpanŋkɔ yumɛcici alo le afɔku ɖe mɛ nɛ.​—Ʒan 13:34; 15:13.

“Susu nywi ɖoɖo.” Le Bibla mɛɔ, susu nywi ɖoɖo gɔnmɛ yí nyi enujikpekpe ci Kristotɔ ɖe ɖo yí sɔnɔ gbɛta nywi ciwo yí sɔnɔgbe koɖo Bibla. Mɛ ci yí ɖonɔ susu nywi tɛnŋ kpɔnɔ nuwo shigbe mɔ Mawu nɛ nɔ enuwo gbɔngbɔnnu ni can. Étɛnŋ sɔnɔ gbeta ciwo yí sɔnɔgbe koɖo Mawu susu, yí nyanɔ mɔ exlɔ ci yenyi koɖo Mawu yí nyi enuvevitɔ sɔwu mɛbuwo susuwo.

Enyɔ ciwo yí trɔdo 2 Timɔte 1:7

Apɔtru Pɔlu ŋwlɛ wema amɛvetɔ ɖaɖa Timɔte ci yí nyi yi xlɔ vevi koɖo mɛ ci yí wanɔ dɔ koɖi. Le wema cɛ mɛɔ, Pɔlu dokɔ ŋsɛn jajɛ Timɔte veviɖe mɔ yɛ le kpɔtɔ awanɔ edɔ sɛnsinɖe le sunmɔsunmɔdɔ lɔ mɛ. (2 Timɔte 1:1, 2) Ewa mɔ ŋkpɛn wanɔ Timɔte yí dexonɔ nuxu ahan o, yí ecɛ atɛnŋ adɔ yí dasun ji awanɔ enu ciwo pleŋ atɛnŋ awa le Kristotɔwo hamɛ lɔ mɛ o. (1 Timɔte 4:12) Vɔ Pɔlu ɖo ŋwi nɔ Timɔte mɔ yɛxɔ enunana ɖeka, enunana lɔ yí nyi sunmɔsunmɔdɔ vevi ci wosɔ ni le hamɛ lɔ mɛ. Edo ŋsɛn yi mɔ yɛŋgbevɔn o hwenu ale e hamɛwo jijikpɔdɔ lɔ wakɔ, hwenu ale eŋɛnnywi lɔ drakɔ, koɖo hwenu woacikɔ yumɛ ni do yi xɔse ŋci.​—2 Timɔte 1:6-8.

Ci enyi Timɔte yí woŋwlɛ enyɔ cɛwo ɖaɖa hwenɔnu can ɔ, wonanɔ kankandoji mɛ ciwo pleŋ yí jijiɛ gbɛ mɔ yewoasɛn Mawu mɔ yɛakpedo wo nu nɔ wododoɔ go cukaɖa ɖekpukpui can.