2. Enyɔ ci Bibla nu so Yehowa nuɔ?

Bibla nu mɔ, Yehowa ɖekɛ kpaŋ yí nyi Mawu adodwi lɔ le mawu ciwo pleŋ agbetɔwo sɛnnɔ mɛ. Nyi yí taɖoɔ? Enu sugbɔ yí dɔ. Acɛkpakpa Yehowa tɔ ɖekɛ kpaŋ yí sɛnxu deli nɔ o; gbesɔ kpe niɔ, yi ɖekɛ kpaŋ yí nyi “Mawu Ejiɖaatɔ, [eyi] nyi Mawu nɔ xexe lɔ keŋkeŋ!” (Hlɛn Ehajiji Wema 83:18.) Bibla yɔɛ mɔ ‘Ŋsɛnwopleŋtɔ,’ ci gɔnmɛ yí nyi mɔ yi ɖekɛ kpaŋ yí ɖo hlɔnhlɔn yí awa ŋɖekpokpui ci eɖo mɔ yeawa. Eyi “wa enuwo pleŋ.” Éwa xexegbɛ gblagada lɔ koɖo enuleagbu ciwo pleŋ yí le nyigban ji. (Enyɔdasɛ 4:8, 11) Yehowa ɖekɛ kpaŋ yí nyi Mawu ci yí li so tɛgbɛɛ yí agbeli sɔyi mavɔmavɔ.—Ehajiji Wema 90:2.

Ci Yehowa nyi mìwo Watɔɔ, yiɖekɛ kpaŋ mìɖo asɛn. (Enyɔdasɛ 4:11) Enyɔ cɛ gɔnmɛ yí nyi mɔ, mìɖo aluin yí asɛn yiɖekɛ kpaŋ. Mìdeɖo azan enutata, enumɛmɛ, acikpakpɛ alo enu ŋtɔ́ hanwo ɖe le yi sɛnsɛn mɛ o.—Hlɛn Ezai 42:8.

Mìwo sɛnsɛn ɖo anɔ “kɔkwɛ yí a nya kpɔkpɔ” gbɔxwe Yehowa axɔɛ. (Rɔmatɔwo 12:1) Yi gɔnmɛ yí nyi mɔ, mìɖo anɔ agbe asɔ koɖo agbenywinɔnɔ se yi tɔwo. Le kpɔwɛ, mɛ ciwo yí lɔn Yehowa ɖo alɔn gɔnmɛɖose ciwo yí kudo alɔlele nu yí awanɔ do wo ji. Yí wodewanɔ enu ciwo yí adahɛn nu le wo nu shigbe tabayɔyɔ, geeyɔyɔ alo ahanumu nɛ o.a