Agbenɔnɔ koɖo sumɔsumɔdɔ bɔbɔ nukplawema nyɔsoxuwo
3-9 MAI
MAWU NYƆ MƐ DƆKUNUWO | AMƐ HLƐNHLƐN 27-29
“Ðyi Yehowa yí ŋgbetranɔ amɛ mɛ o”
w13 6/15 11 mm. 14
Yehowa nɔnɔmɛwo nu le jɔ ji nɔ eo vɛ
14 Nyɔnu amatɔn ciwo yí nyi nɔjinɔwo yi Moizi gbɔ yí biɛ se mɔ: “Nyi yí taɖo mìwo da ŋkɔ abu le dalɔ viwo mɛ nɔ ci dewa evi ŋsuvi ɖɛɔ?” Woɖe kuku ni mɔ: “Na nyigban mì do mìwo da nɔviɛ ŋsuviwo mɛ.” Moizi mahɛn keŋ yí nu nɔ wo mɔ, ‘Ese ese yɔ, nyɔ ɖe degbelia’? Oo, “Moizi sɔ wowo nyɔ lɔ sɔ ɖo ŋmɛ nɔ Yehowa.” (Amɛ Hlɛnhlɛn 27:2-5, NWT) Lé Yehowa nu do nuɔ? Yehowa nu nɔ Moizi mɔ: “Zelofexadi vi nyɔnuviwo nyɔ le mɛ. Eyi na taɖo na cinɔ wo do wowo da nɔviɛ ŋsuviwo mɛ, yí asɔ wowo da cinɔ sɔ na wo.” Yehowa gbenu nyɔ buwo kpi. Ésɔ nyɔ lɔ trɔ ese bu yí sɔ do Eseɛ mɛ yí nu nɔ Moizi mɔ: “Nɔ ŋsu ɖe dewa evi ŋsuvi ɖɛ gbɔxwe yí kuɔ, míɖo asɔ cinɔ yi tɔ na eviɛ nyɔnuvi.” (Amɛ Hlɛnhlɛn 27:6-8, NWT; Ӡozue 17:1-6) So hwenɔnuɔ, ese yoyu lɔ wa nywi nɔ Izraɛli nyɔnuwo pleŋ ciwo yí enu ŋtɔ́ han vawa.
w13 6/15 11 mm. 15
Yehowa nɔnɔmɛwo nu le jɔ ji nɔ eo vɛ
15 Amɛmɛmatramatra gbeta ŋtɔ́ teŋ yí nyi cɛ Yehowa sɔ! Yehowa bu nyɔnu cɛwo ciwo ji enu dedo o, shigbe lé ebu Izraɛlivi ciwo ji enu do nɛ. (Ehajiji Wema 68:5) Ecɛ nyi ɖeka le Bibla mɛ xolɔlɔ sugbɔ ciwo dɔ mìnya mɔ, Yehowa sɔnɔ yi mɛwo do alɔ ɖekɛ ji, detranɔ wo mɛ o.—1 Samiɛli 16:1-13; Edɔwawawo 10:30-35, 44-48.
w13 6/15 11 mm. 16
Yehowa nɔnɔmɛwo nu le jɔ ji nɔ eo vɛ
16 Lé mìawɛ yí mìdatranɔ amɛ mɛ shigbe Yehowa nɛɔ? Nɔ mìaɖo ŋwiɔ, enu amɛve yí le amɛmɛmatramatra mɛ. Nɔ mìnyi mɛ ciwo yí detranɔ amɛ mɛɔ, eyi keŋ gbɔxwe yí mìdadonɔ mɔ to amɛwo mɛ le mìwo wanawo mɛ o. Nyɔnɔnwi enyi mɔ, mìbunɔ mɔ mìkonɔ do amɛwo pleŋ ji yí mìdetranɔ amɛ mɛ o. Vɔ àlɔn do ji mɔ, denɔnɔ fafɛɖe gashiagamɛ mɔ mìanya mɛ ci mìnyi teŋ o. Ecɛyɛ lé mìawɛ anya mɔ, amɛwo kpɔnɔ mì do mɛ ciwo yí detranɔ amɛ mɛ jiɔ? Ci Yesu ji mɔ yeanya mɛ ci amɛwo nukɔ mɔ yenyiɔ, ébiɔ yi xlɔ ciwo ji ekando se mɔ: “Mi yí amɛ lɔwo nu mɔ Amɛagbetɔ Vi lɔ nyi ɔ?” (Matie 16:13, 14) Danyɔ mɔ àwa Yesu tɔ han ba? Èhɛn abiɔ ao xlɔ ɖeka ci ji èkando mɔ yɛanu nyɔnɔnwi nɔ ye se mɔ, yenyi mɛ ci yí detranɔ amɛ mɛ ma. Nɔ ao xlɔ lɔ nu nɔ eo mɔ, yɛ le shigbe mɔ eɔkpɔnɔ do fini mɛɖe so, fini eyi suklu sɛn alo eho ci yí le shi nu yí sɔ tranɔ amɛ mɛ ɖe, lé àwɛɔ? Do gbe ɖaɖa nɔ Yehowa yí anu ao xomɛnyɔwo ni. Fan kwi ni mɔ yi le kpedo ye nu nɔ yeatrɔ yeɖeki aji yí aɖyi, keŋ ami amɛ mɛ tratra gbijigbiji.—Matie 7:7; Kolosetɔwo 3:10, 11.
Bibla mɛ nuxɔafiwo jiji
it-2 850 mm. 1
Vɔnsawo
Enununuvɔnsawo. Wowanɔ enununuvɔnsa bɔnɔ do vɔnsa sugbɔtɔ nu, vevitɔ Izraɛliviwo tɔ wɛwɛ ahan so hwenu wovayi ci Gbeɖu Nyigban lɔ ji. (Amɛ Hlɛnhlɛn 15:2, 5, 8-10) Nɔ woawɛɔ, wosɔ vɛn kɔnɔ do vɔnsakpeɛ ji. (Amɛ Hlɛnhlɛn 28:7, 14; sɔ sɔ koɖo Hunhun 30:9; Amɛ Hlɛnhlɛn 15:10.) Apotru Pɔlu ŋwlɛ nu ɖaɖa Kristotɔ ciwo yí le Filipi mɔ: “Ganŋke nɔ wosɔŋ kɔkɔ ɖɛ shigbe enununuvɔnsa hannɛ do vɔnsa lɔ koɖo sumɔsumɔdɔ kɔkɔɛ ci gbɔ míwo xɔse kplɔ mí va ji can ɔ, eji jɔkɔŋ, yí ŋkpɔkpɔ jijɔ koɖo mí pleŋ.” Le lɛɔ, enu yí Pɔlu sɔ drekɔ do nu nu yí sɔ nunuɔ mɔ yele gbesɔsɔ awa ŋɖekpokpui do tamɛ nɔ ye kpena Kristotɔwo. (Filipitɔwo 2:17, NWT) Ci ekpɔtɔ hwɛɖeka yí akuɔ, éŋwlɛ nu nɔ Timɔte mɔ: “Wo sɔ anyi gbe savɔn nɔ Mawu. Gamɛ ɖo nɔ ŋ, yí na so le agbe cɛ mɛ.”—2 Timɔte 4:6.
10-16 MAI
MAWU NYƆ MƐ DƆKUNUWO | AMƐ HLƐNHLƐN 30-31, NWT
“Wa do egbe ciwo èɖo ji”
it-2 1165
Egbeɖoɖo
Amɛ ŋtɔ nyɔ yɔ, vɔ woɖo awa do ji. Amɛ ŋtɔ yí lɔn yí ɖonɔ gbe. Vɔ Mawu seɛ nu mɔ nɔ amɛ lɔ ɖo gbeɛ ɖegbɔɔ, éɖo awa do ji dandandan. Eyi na taɖo wonunɔ mɔ, egbeɖoɖo nyi ‘enuɖoɖo nɔ amɛ ŋtɔ gbe.’ Yi gɔnmɛ yí nyi mɔ, amɛ lɔ sɔ yiŋtɔ gbe sɔ do awoba mɔ yeawa nyɔ ci yenu. (Amɛ Hlɛnhlɛn 30:2; gbekpɔ Rɔmatɔwo 1:31, 32.) Ci nyɔɔ le ahan yí egbeɖoɖo anyi eku alo agbe nɔ mɛ ci yí ɖo gbeɛ druɔ, eyi na taɖo Bibla mɔ mìwo le bu tamɛ kpɔ nywiɖe so wawa do egbe ci mìjiji aɖo ji nu gbɔxwe aɖo gbe lɔ. Eseɛ mɔ: “Nɔ èɖo gbe nɔ Yehowaɔ, . . . Mawu dagɔn amɔ eo le wɛ o. Eyi avanyi nuvɔn nɔ. Vɔ nɔ deɖo gbe ɖeɔ, davanyi nuvɔn nɔ o.”—2 Ese Wema 23:21, 22, NWT.
it-2 1165
Egbeɖoɖo
Egbeɖoɖo nɔ Mawu gɔnmɛ yí nyi mɔ, woaɖo gbe ni mɔ woawa ŋɖe ni, woana ŋɖe yi, woasɔ amɛɖeki jo awa edɔ ɖe koŋ ni, abi agbe ŋɖewo nɔ amɛɖeki nɔ enu lɔwo dedɔn can. Amɛ ŋtɔ yí sonɔ yí nunɔ mɔ yeaɖo gbe. Ci wawa do egbeɖoɖo ji nyi dandanmɛ nuɔ, ŋɖekɛ yí woaɖo gbe koɖo woata nu nyi. Eyi hweɖewonu le Bibla mɛɔ, enyɔ cɛwo koɖo ve zɔnnɔ doju. (Amɛ Hlɛnhlɛn 30:2; Matie 5:33) Amɛ ŋtɔ yí dronɔ mɔ yeaɖo gbe yí ɖonɔ gbe. Vɔ nunu le se ŋkɔ mɔ, nyɔ ɖe nyi nyɔnɔnwi abi dandanmɛ yí ele mɔ woawa nyɔ ci wonu yí dɔ wotanɔ nu. Eyi kabakaba nɔ wobla nu ɖegbɔɔ, wotanɔ nu xu ji.—Gɔnmɛjeje 26:28; 31:44, 53.
w04 8/1 27 mm. 3
Enyɔ vevi ciwo yí le 2 Ese Wema tɔ mɛ
30:6-8—Kristotɔ ŋsu ɖe agbe nɔ ashiɛ dru mɔ yɛdawa do egbe ci yɛɖo jia? Yehowa koɖo yi sɛntɔ ɖekaɖeka nyɔ yí egbeɖoɖo vanyi le egbɛmɛ. Ðeka yí nyi mɔ, amɛ ŋtɔ yí sɔ yiɖeki jonɔ nɔ Yehowa mɔ yeasin. (Galatitɔwo 6:5) Ŋsu deɖo acɛ yí agbe nɔ ashiɛ mɔ, yɛdeɖo awa do egbe ɖe ci eɖo ji o. Ele ahan gan, nyɔnu le asuxwe deɖo aɖo gbe ci yí desɔ koɖo Mawu Nyɔ lɔ o. Eyi ahanke deɖo aɖo gbe ci yí adɔ edɔ ciwo eɖo awa le asuxwe avanyi dɔnnyidɔnnyi o.
Bibla mɛ nuxɔafiwo jiji
it-2 1203 mm 4
Ʒɛfute
Hweɖewonuɔ, wosɔ amɛ jonɔ nɔ Yehowa keŋkeŋ yí awa dɔ le avɔnzavaa mɛ. Eyi ajitɔ koɖo ajinɔwo ɖo acɛ hwenɔnu yí awa ahan. Samiɛli nyi mɛɖeka ci wosɔ ɖo gbe ahan. Nɔlɔ Xana sɔ Samiɛli ɖo gbe mɔ, yɛawa Mawu dɔ le avɔnzavaa mɛ gbɔxwe yí vaji. Eyi asuɔ Ɛlkana lɔn do gbe ci eɖo lɔ ji. Eyi ci evlɛ yí so anɔ nɔ Samiɛliɔ, ésɔ jo nɔ awa dɔ le avɔnzavaa mɛ. Hwecinu ehin yikɔɔ, ésɔ lan ɖeka ci asɔ sa vɔn bɔdo nu. (1 Samiɛli 1:11, 22-28; 2:11) Samson can nyi ɖevi ɖeka ci wosɔ ɖo gbe koŋ ahan mɔ, yɛanyi Naziritɔ awa Mawu dɔ.—Kojoɖoɖo Wema 13:2-5, 11-14; kpɔ Amɛ Hlɛnhlɛn 30:3-5, 16 yí akpɔ acɛ ci vida koɖo vinɔ ɖo do wowo vi nyɔnuvi ji.
17-23 MAI
MAWU NYƆ MƐ DƆKUNUWO | AMƐ HLƐNHLƐN 32-33
“Mínya mɛ ciwo pleŋ yí le nyigban lɔ ji si”
w10 8/1 23
Mínyaa?
Nyi yí “afiyiji” ciwo yí le Ebre Nuŋwlɛŋwlɛwo mɛ nyiɔ?
Hwecinu Izraɛliviwo jiji asɔ wowo fɔwo sɔ ɖo nyigban ci wosɔ ɖo gbe nɔ wo jiɔ, Yehowa nu nɔ wo mɔ, wo le ɖe finiwo pleŋ Kannatɔ ciwo le nyigban lɔ ji sɛnnɔ wowo vojuwo le si. Mawu nu nɔ wo mɔ, “Mícuku . . . wowo voju ciwo wokpa kpe yí sɔ wa. Mícuku wowo voju ciwo wosɔ gawo sɔ wa, yí agban finiwo pleŋ woxenɔ nuwo le hannyahannya. (Amɛ Hlɛnhlɛn 33:52, NWT) Finiwo wosɛnnɔ vojuwo le hɛn anyi eto alo gbajatɔxuwo le toviwo ji, abi fibu ciwo wocu vojuxɔwo do, shigbe aciwo gɔnmɛ abi juɔ mɛ ɛnɛ. (1 Efyɔwo 14:23; 2 Efyɔwo 17:29; Ezekiɛli 6:3) Ŋciwo yí nɔnɔ ŋnɔ dru wo yí nyi aci ciwo wosɔ wa vojuwo, avɔnsakpewo, legbawo, enu ciwo ji woatɔ zo linfin do, koɖo nubu ciwo woasɔ wa kɔnuwo.
w08 2/15 27 mm. 5-6
Kpla nu so afɛn ciwo Izraɛliviwo wa mɛ
Enu ciwo yí nyi tetekpɔ nɔ Izraɛliviwo ke han yí gbenyinyiɛ tetekpɔ nɔ mìwo can le egbɛmɛ. Enu ciwo yí nyi vojuwo han bɔ le mìwo hwenu cɛ. Ciwo yí le ta yí nyi eho, amɛnɔnwiwo, kanmɛtetɔ ganganwo, politikiwatɔwo, cɔci ŋkɔnɔtɔ ɖewo koɖo hweɖewonuɔ, mìwo mɛ ɖe. Enu cɛwo ɖe hɛn avanyi enuvevitɔ nɔ mì le agbemɛ. Exlɔnyinyi koɖo mɛ ciwo yí delɔn Yehowa ɖoɖu ɖekatɔ, adɔ mìaku le gbɔngbɔnmɛ dru.
Nɔnɔ gbɔ dɔndɔn nyɔŋwo yí nyi nu ci wowanɔ le Bali sɛnsɛn mɛ. Wana ŋnɔwo do Izraɛlivi sugbɔ do mɛ yí wowa nuvɔn. Gamɔ cɛ hanwo leleɛ amɛwo le Yehowa mɛwo mɛ gbɛ. Mìasɔɛ mɔ, mɛɖe wakɔ dɔ le ɔdinatɛɛ ji le yiŋtɔ xɔmɛ. Ŋɖeka ʒinʒin le ji ahan koɖo jiji mɔ yeakpɔ tritri alo ace ji manɔ yi tɔ adɔ yí awu ayexadohwɛnamɛnu yi tɔ dru. Ŋshishi nyɔ teŋ anyi nɔ Kristotɔ ɖe lɔn yí kpɔnɔ nɔnɔ gbɔ dɔndɔn fimuwo le ɛntɛnɛti ji!
it-1 392 mm. 4
Kanna
Ʒozue nyaŋ ɖɛ yí “wa nyɔ ciwo pleŋ Yehowa nu nɔ Moizi mɔ yi le wa.” Ðeka yí nyi Kannatɔwo gugu si keŋkeŋ. (Ʒozue 11:15, NWT) Vɔ Izraɛliviwo dewa nyɔ ci Ʒozue nu nɔ wo yí gu enu ciwo pleŋ wowa yí sɔ dodoɔ gu nyigban lɔ si o. Ci Kannatɔwo kpɔtɔ le wo mɛɔ, wovado wo yí wowa nuvɔn. Eyi ci ŋkeke lɔwo yikɔɔ, mɛ ciwo yí ku gbaŋ dele nunu o. Mɛ ciwo yí ku wugan wu Kannatɔ ciwo yí aku nɔ enyi kpɔ mɔ gu wogu wo pleŋ si sa. (Wodagbenu xomɛvevenu, gbɔdɔndɔn masɔkoɖose koɖo vojunu ciwo wowa o) (Amɛ Hlɛnhlɛn 33:55, 56; Kojoɖotɔwo Wema 2:1-3, 11-23; Ehajiji Wema 106:34-43) Yehowa kanxle Izraɛliviwo mɔ, nɔ wovayi sɔ gbɛ ca koɖo Kannatɔwoɔ, enunywiwawa koɖo kojo jɔjɔɛ ye tɔ adɔ yí yedaku ŋshishi nɔ wo o. Eyi nɔ enyi kpɔ mɔ, wovayi tɔ ha dodo koɖo Kannatɔwo yí ɖe wowo viwo yí wowo can ɖe wowo viwo, tɔ wowo vojuwo sɛnsɛn, tɔ wowo vojuwo kɔnuwo wawa, yí gbetɔ enu dakpudakpu ciwo wowanɔ wawaɔ, eya ga ya fyɔ anyi. Ese bayɛ ci yeasɔ xo Kannatɔwo saɔ, eyi lɔ ke yeasɔ xo wo yí nyigban ci ji wole ‘ajo’ wo kɔŋgbe.—Hunhun 23:32, 33; 34:12-17; 1 Ese Wema 18:26-30; 2 Ese Wema 7:2-5, 25, 26.
Bibla mɛ nuxɔafiwo jiji
it-1 933 mm. 6
Lixo
Nɔ wosɔ nu kpɔ yí kpɔ fini han woasɔ na akɔta ɖe ɖegbɔɔ, ele mɔ woagbekpɔ egbɔsusu mɛ nɔ akɔta lɔ keŋ anya ganganmɛ nɔ nyigban ci woasɔ ni. “Mísɔ nu kpɔ do nyigban lɔ ji yí ami do nu nɔ xomuwo. Mɛ ciwo yí sugbɔ cinɔ asugbɔ yí mɛ ciwo desugbɔ o, cinɔ ahwe. Fini enusɔsɔkpɔ lɔ sɔ nɔ wo yí woanɔ.” (Amɛ Hlɛnhlɛn 33:54, NWT) Nɔ wosɔ nu kpɔ yí kpɔ fini han akɔta ɖe anɔɔ, hunnɔ yí woɖo asɔ na kɔta lɔ nɛ. Vɔ woatrɔ ganganmɛ alo hwehwemɛ nɔ nyigban lɔ dru. Eyi wowa hwenu wokpɔ mɔ, nyigban ci wosɔ na Ӡuda kɔta mɛ tɔwo gangan ɖoɖu. Wokan le nu nɔ Shimeɔn kɔta mɛ tɔwo.—Ӡozue 19:9.
24-30 MAI
MAWU NYƆ MƐ DƆKUNUWO | AMƐ HLƐNHLƐN 34-36
“Sɔ Yehowa wa kpotɔnu yí abe do gbɔ”
w17.11 9 mm. 4
Èsɔ Yehowa wa kpotɔnu yí be do gbɔa?
4 Nɔ Izraɛlivi ɖe denya gbɔxwe yí wu amɛ ɖe, lé Izraɛliviwo kpɔnɔ yɛ gbɔ doɔ? Ci denya gbɔxwe yí wu amɛ can ɔ, amɛmanyaɖe ewu yí ɖu hun fɛn. (Gɔnmɛjeje 9:5) Ele ahan gan, Ese lɔ mɔ yi le shi ayi be do bexuju amadɛn lɔwo ɖeka mɛ nɔ mɛ ci yí aɖe hlɔn ŋgbevawui o. Nɔ évayi ci nɔɔ, wodagbewa ŋɖe ni o. Mɛ ci denya gbɔxwe yí wu amɛ lɔ ɖo akpɔtɔ anɔ bexujuɔ mɛ keke aje hwecinu avɔnsatɔ gangantɔ aku.—Amɛ Hlɛnhlɛn 35:15, 28.
w17.11 9 mm. 6
Èsɔ Yehowa wa kpotɔnu yí be do gbɔa?
6 Nɔ mɛ ci denya gbɔxwe yí wu amɛ shi yí vaɖo bexuju ci mɛ eshi yikɔɔ; enu ŋkɔtɔ ci awa yí nyi mɔ, éɖo “aɖe enyɔ lɔ nɔ ejuɔ mɛ mɛganwo” le juɔ gbo nu. Nɔ evayi ɖo bexujuɔ mɛɔ, woaxɔɛ nywiɖe. (Ӡozue 20:4, NWT) Eyi nɔ ewa zaanɖeɔ, woakplɔɛ yi nɔ eju ci mɛ ewu amɛ le mɛganwo yí wowo aɖo kojo ni. (Hlɛn Amɛ Hlɛnhlɛn 35:24, 25.) Nɔ woɖo kojo ni yí kpɔɛ mɔ gbedenya gbɔxwe yí wu amɛ nyaoɔ, eyi keŋ gbɔxwe atrɔ ayi bexujuɔ mɛ.
w17.11 11 mm. 13
Èsɔ Yehowa wa kpotɔnu yí be do gbɔa?
13 Nɔ évatrɔ yi juɔ mɛ ɖegbɔɔ, evɔ wodagbewa ŋɖe ni o. Yehowa nu so bexuju lɔwo nu mɔ: “Woanyi bexu nɔ mí.” (Ӡozue 20:2, 3, NWT) Yehowa mɔ wodagbetrɔ aɖo kojo nɔ amɛ lɔ do enyɔ kuɖeka lɔ ke ji o, eyi ahanke ehlɔnɖetɔ lɔ can deɖo gbe ayi bexuju lɔ mɛ ayi wu mɛ ci yí shi vayi be lɔ o. Ci nyɔ lɔ le ahan ɔ, mɛ ci yí shi vayi be lɔ dagbevavɔnvɔn amɔ woawa ŋɖe koɖo ye o. Nɔ éle bexujuɔ mɛ duuɔ, Yehowa acɔn alɔ yi ji yí ŋɖekɛ dawɛ o. De gakpamɛ yí bexujuɔ nyi o. Éhɛn awa dɔ, akpedo mɛbuwo nu yí avo asɛn Yehowa nywiɖe. Ávoŋ le yiɖeki mɛ yí ji ajɔɛni le nɔ tɔxu dru!
Bibla mɛ nuxɔafiwo jiji
w91 2/15 13 mm. 13
Tafɛn ci wocu do ta nɔ amɛwo pleŋ
13 Adamu fin, Ɛva fin, wo koɖo ve lɔ daɖu le ɖekɛ nɔ tafɛn lɔ o. Moizi Seɛ nu mɔ: “Míŋgbelɔn nɔ woacu fɛn ɖekɛ do ta nɔ amɛwutɔ ci woɖo awu o.” (Amɛ Hlɛnhlɛn 35:31, NWT) Wodeble Adamu o, yiŋtɔ yí xa shi yí wa nuvɔn. (1 Timɔte 2:14) Nuvɔn ŋnɔ ci Adamu wa dɔ yí eviɛ koɖo viviɛwo trɔ agɔjetɔwo, eyi taɖo eku yí le kɔ nɔ wo. Ci Adamu denyi agɔjetɔɔ, xa exa yí da le Mawu seɛ ji. Eyi taɖo ci ekuɔ, yi tɔ kpa do nɔ. Ci Yehowa nyi enujɔjɔɛwatɔɔ, dawa ɖe alɔn amɔ Adamu aɖu le nɔ tafɛn lɔ o. Vɔ ci Yehowa cu nuvɔn ci Adamu wa fɛn ɔ, eku degbenyi enu yí le kɔ nɔ Adamu vi koɖo viviɛwo o. (Rɔmatɔwo 5:16) Le seɛ mɛɔ, wogu ku nɔ enugbleju ŋsɛn nuvɔn tɔ. Mɛ ci wosɔ cu nuvɔn lɔ fɛn “ku dota nɔ amɛ ɖeka ɖeka,” yí sɔ nuvɔn lɔ lɔzu ciwo Adamu viviɛwo pleŋ ɖukɔ sɔ hɛn yi.—Ebretɔwo 2:9; 2 Korɛntitɔwo 5:21; 1 Piɛ 2:24.
31 MAI–6 JUIN
MAWU NYƆ MƐ DƆKUNUWO | 2 ESE WEMA 1-2
‘Mawu gbɔ yí enyɔ soso a so’
w96 3/15 23 mm. 1
Kojo jɔjɔɛ koɖo enujɔjɔɛ jɔnɔ ji nɔ Yehowa
Nɔ mɛɖe wa nuvɔn gangan ɖeɔ, hamɛmɛshinshinwo ɖonɔ kojo ni. (1 Korɛntitɔwo 5:12, 13) Nɔ wole kojoɔ ɖokɔɔ, woɖonɔ ŋwi mɔ nɔ ŋɖe li ci nu woakpɔ do aku ŋshishi nɔ amɛɔ, Mawu kunɔ ŋshishi nɔ amɛ. Vɔ nɔ ŋɖe deli o, yí taŋtaŋ amɛ lɔ detrɔ jimɛɔ, wodaku ŋshishi ni o. Ele ahan agan, denyi lé enu ci yí jɔ lɔ wa nɔ hamɛmɛshinshinwo yí adɔ woaɖe amɛ lɔ ti le haa mɛ o. Wonɔnɔ te mɔ, ɖeɖe ci woɖe amɛ lɔ ti ɖekɛ adɔ anyɔ le yiɖeki mɛ. (Sɔ sɔ koɖo Ezekiɛli 18:23.) Kristo yí kplɔkɔ hamɛmɛshinshinwo. Eyi dɔ taɖo woɖonɔ kojo jɔjɔɛ yí nɔnɔ shigbe “afi ci wo be do nɔ jihɔn koɖo eshijaja ɛnɛ.” (Ezai 32:1, 2) Eyi taɖo wodeɖo atranɔ amɛ mɛ o, yí asenɔ nu gɔnmɛ nɔ amɛ.—2 Ese Wema 1:16, 17.
w02 8/1 10 mm. 4
Nɔ gbeji yí abubɔ nɔ mɛ ciwo Mawu sɔ ɖo acɛtɔxuwo
4 Woanyi kojoɖotɔ le ŋkɔ nɔ woanya se. Ci Izraɛli mɛganwo nyi nuvɔnmɛwoɔ, woɖo ami adɛn ɖekatɔwo wuwu. Ðowo yí nyi amɛŋtɔ tɔ nyanya, amɛmɛtratra koɖo ŋbya. Ðo wana ŋnɔwo adɔ wodaɖeŋ aɖo kojo nywiɖe o. Moizi nu nɔ wo mɔ: “Mí ɖo a ɖo kojo lɔ amɛ ji maӡin. Nɔ́ mí le kojo ɖokɔ ɔ, mí de ɖo a nu mɔ amɛ ɖeka nyi amɛ vevi wu amɛ evetɔ lɔ o. Mí ŋgbe ӡin amɛ ɖe ji o. Mí ŋgbe vɔn nɔ amɛ ɖe o. Ðo Mawu gbɔ yí enyɔ soso míwotɔ a so.” Ɛɛ, Mawu tɔxu yí Izraɛlivi kojoɖotɔwo le yí le kojo ɖokɔ. Edɔ gangan ŋtɔ teŋ enyi Yehowa mɔ wo le wa nɔ ye!—2 Ese Wema 1:16, 17.
Bibla mɛ nuxɔafiwo jiji
w13 9/15 9 mm. 9
Eŋwiɖonujinamɛnyɔ Yehowa tɔwo nyi nyɔnɔnwi
9 Gbɔxwe Izraɛliviwo atɔ emɔ ci yí xɔ exwe 40 zɔnzɔn to “zogbe vezo gangan” lɔ mɛɔ, Yehowa denu lé akplɔ wo, lé aglɔn ta nɔ wo koɖo lé ale bu nɔ wo o. Ele ahan gan, enu ciwo ewa wokpɔ adɔ woakando yiŋtɔ koɖo lé emɔ wo le wa nuwo do ji. Lé Yehowa sɔ ejiɖoɖwi kplɔ Izraɛliviwo le kede mɛ koɖo ejiɖoɖwi ezo tɔ kplɔ wo le zanmɛ le zogbeɛ mɛ, ɖonɔ ŋwi nɔ Izraɛliviwo mɔ Yehowa le godu nɔ wo. (2 Ese Wema 1:19; Hunhun 40:36-38) Yehowa gbewa enuwo pleŋ nɔ wo. “Wowo vɔnwo de vu o. Yi, wowo fɔwo de tɛn yi xɔ abiwo o.” Nyɔnɔnwi enyi mɔ, éna “enuwo pleŋ ciwo yí ӡan wo.”—Nexemi 9:19-21.
7-13 JUIN
MAWU NYƆ MƐ DƆKUNUWO | 2 ESE WEMA 3-4
“Yehowa sewo nyɔ yí ŋɖe dedɔn le wo nu o”
it-2 1199 mm. 2
Enugɔnmɛsese
Mɛ ci yí kplanɔ Mawu Nyɔ nywiɖe yí wanɔ do Mawu sewo koɖo enu ciwo ekplakɔ ji, nyanɔ ŋɖɛ wu mɛ ciwo kpla nu yi, yí gbesenɔ nu gɔnmɛ wu amɛshinshinwo. (Ehajiji Wema 119:99, 100, 130; sɔ sɔ koɖo Luiki 2:46, 47.) Enu ci yí na taɖo enyi ahan yí nyi kpɔ mɔ, Mawu sewo koɖo kojoɖoɖose yi tɔwo yí dɔ wonyanɔ ŋɖɛ yí gbesenɔ nu gɔnmɛ. Eyi dɔ taɖo nɔ Izraɛliviwo nɔ gbeji yí nyi Mawu sewoɔ, eju ciwo trɔdo wo akpɔ mɔ wonyi “ŋununyatɔwo koɖo amɛ senugɔnmɛwo.” (2 Ese Wema 4:5-8; Ehajiji Wema 111:7, 8, 10; sɔ sɔ koɖo 1 Efyɔwo 2:3.) Mɛ ci yí senɔ nu gɔnmɛ nyanɔ mɔ denyɔ mɔ yeada le Mawu Nyɔɔ ji o. Eyi ejinɔ mɔ ye nuwanawo le sɔ koɖo yi sewo, yí fannɔ kwi nɔ Mawu mɔ yi le kpedo ye nu yeanɔ gbeji ni. (Ehajiji Wema119:169) Étenɔkpɔ yí Mawu Nyɔ lɔ yinɔ lanmɛ ni kpaŋkpaŋ (Matie 13:19-23), éŋwlini do yi yexa mɛ (Elododo Wema 3:3-6; 7:1-4), yí tekpɔ yí gbenɔ “nukplamu manyɔmanyɔ” gbijigbiji (Ehajiji Wema 119:104). Hwecinu Mawu Vi lɔ va nyigban ji can ɔ, ése nu gɔnmɛ yí lɔn mɔ yeaku le efuntrenamɛci ji shigbe lé Enuŋwlɛŋwlɛ lɔwo nu mɔ yɛaku do nɛ.—Matie 26:51-54.
w99 11/1 20 mm. 6-7
Xomɛvu sugbɔ wawa
Enu ciwo efyɔnyɔlunshi lɔ se koɖo ciwo ekpɔ kpacɛ keke esɔ yiɖeki hwe yí nu mɔ: “Ao [sumɔviwo] xɔ shicu sugbɔ! Wo tɛnŋ . . . ɖoto ao ŋununyanya ŋkeke ɖeka ɖeka!” (1 Efyɔwo 10:4-8) De dɔkunu ciwo mɛ yí Salomɔ sumɔviwo le yí efyɔnyɔlunshi lɔ kpɔ taɖo yí nu nɔ wo mɔ, wocu shi nɔ wo o. Vɔ ci Salomɔ sumɔviwo ɖonɔ to ŋununyanya ci Mawu na Salomɔ tɛgbɛɛ yí dɔ taɖo enu mɔ wocu shi nɔ wo. Shigbe lé Sheba fyɔnyɔlunshi lɔ va se ŋɖɛ ci Salomɔ nya nɛɔ, ahanke Yehowa mɛ ciwo li gbɛ ɖukɔ le nɔ Gbɛɖotɔ lɔ ŋtɔ koɖo Eviɛ Yesu Kristo ŋɖɛnyanya nɛ.
Efyɔnyɔlunshi lɔ gbenu nyɔnɔnwi ɖeka nɔ Salomɔ mɔ: “Kanfukanfu nɔ Tɔhonɔ ao Mawu.” (1 Efyɔwo 10:9) Eze gbawlɛ mɔ, ékpɔɛ nya mɔ Yehowa yí wɛ yí Salomɔ nya ŋɖɛ yí gbeje dɔku. Enu cɛ sɔ koɖo egbe ci Yehowa ɖo nɔ Izraɛliviwo vayi sa. Yehowa nu nɔ wo mɔ: “Mí bu ese lɔwo veviɖe. Wana cɛ a dasɛ nɔ jukɔn kpɛtɛwo mɔ ŋununyanya koɖo gɔnmɛsese le mí shi. Jukɔn hunnɔ lɔwo a se enyɔ so ese lɔwo nu. Wo a nu mɔ, ‘Enyɔnɔnwitɔ ɔ, Izraɛli jukɔnmɛtɔwo nyi ŋununyatɔwo koɖo amɛ senugɔnmɛwo.’”—2 Ese Wema 4:5-7.
w07 8/1 29 mm. 13
Ènyi ‘dɔkunɔ nɔ Mawua’?
13 Nɔ Yehowa cu shi nɔ yi mɛwoɔ, enu ci yí nyi nywitɔ yí esɔ nanɔ wo gashiagamɛ. (Ӡaki 1:17) Ðeka yí nyi mɔ, hwenu Yehowa na nyigban ci ji Izraɛliviwo anɔ woeɔ, nyigban lɔ nyi nyigban ci ji “nyibunɔshu koɖo enyishi sanɔ tó.” Nyɔnɔnwi enyi mɔ enu cɛ hanciwo can le Eӡipti nyigban ji, vɔ nyigban ci Yehowa sɔ na Izraɛliviwo nyɔ wu. Moizi nu nɔ Izraɛliviwo mɔ, nyigban lɔ nyi ‘nyigban ci Yehowa ao Mawu le be nɔ.’ Nɔ mìanuiɔ, enuwo azɔn nɔ wo le nyigban lɔ ji nywiɖe, ɖo Yehowa le godu nɔ wo. Nɔ Izraɛliviwo le gbeji nɔ Yehowa duuɔ, eshi ci Yehowa cunɔ nɔ wo gbaŋ dehwenɔ o. Eyi ju ɖekɛ devonɔ sɔ koɖo wo o. Nyɔnɔnwi yɔ, shicu ci yí so Yehowa gbɔ hɛnnɔ “dɔkunu nyɔnɔnwitɔ vɛ.”—Amɛ Hlɛnhlɛn 16:13; 2 Ese Wema 4:5-8; 11:8-15.
Bibla mɛ nuxɔafiwo jiji
w04 9/15 25 mm. 3
Enyɔ vevi ciwo yí le 2 Ese Wema tɔ mɛ
4:15-20, 23, 24—Gbe ese ci yí le lɛ gbegbeɛ mɔ wodasɔ ŋɖe ta nu alo asɔ kpa nu keŋ asɔ ɖo acɔa? Oo. Gbe ese ci yí le lɛ gbegbeɛ mɔ, wodasɔ ŋɖe sɔ ta nu alo asɔ kpa nu keŋ amɔ woasin o. Gbe egbegbeɛ mɔ ‘wodasɛn nukplawo alo asumɔ wo o.’ Bibla degbe mɔ, wodasɔ nu sɔ ta nu alo asɔ kpa nu keŋ asɔ ɖo acɔ o.—1 Efyɔwo 7:18, 25.
14-20 JUIN
MAWU NYƆ MƐ DƆKUNUWO | 2 ESE WEMA 5-6
“Kplanɔ nu viowo nɔ woalɔn Yehowa”
w05 6/15 20 mm. 11
Ajitɔ koɖo ajinɔwo, míkpɔ míwo xomuwo ji
11 Bibla degbexo nuxu so enyɔ ci mìnukɔ nu le fiɖe sɔwu 2 Ese Wema 6:5-7 mɛ o. Mìɖe kuku, míhun míwo Biblawo yí ahlɛn kpukpui cɛwo. Míakpɔ le lɛ mɔ ajitɔ koɖo ajinɔwo yí nyi amɛ ŋkɔtɔ ciwo yí aje agbla anyi gbɔngbɔnmɛmɛwo, alɔn Yehowa yí atekpɔ nɔ yi nyɔ lɔ aɖo jimɛ nɔ wo. Ele veviɖe mɔ míakplanɔ Mawu Nyɔ lɔ nywiɖe, ahlinni blaŋblaŋ yí abunɔ tamɛ kpɔ so nu keŋ amɔŋje lé Yehowa wanɔ nu do, yi gɔnmɛɖosewo koɖo yi sewo mɛ yí woajɔnɔ ji nɔ mí. Nɔ míwɛni ahan ɔ, eyi adɔ yí nyɔnɔnwi vivi ciwo yí le Bibla mɛ aɖɔ míwo jimɛ fulii. Eyi adɔ eji ajɔnɔ mí, míashi Yehowa yí agbeluin. Enunywi sugbɔ aɖɔ mí shi keke akɔkɔ, yí míasɔ wo kpla míwo viwo.—Luiki 6:45.
w07 5/15 15-16
Nyiwo nawawa teŋ yí anyi mɔ ŋkplakpla vinyɛwoɔ?
De nyɔ ciwo mínunɔ ɖekɛ mɛ yí enu ciwo mídrɔnɔ, bunɔ kpɔ, ciwo le veviɖe nɔ mí koɖo ciwo jɔnɔ ji nɔ mí azenɔ le o. Vɔ woagbezenɔ le míwo wanawo mɛ hɛnnɛ. (Rɔmatɔwo 2:21, 22) So keke hwecinu ɖeviwo nyi vihwɛ kɛnniwo yí wolenɔ ŋkuvi do wowo da koɖo wowo nɔwo nu yí kpɔnɔ enu ciwo wowanɔ. Eyi taɖo wonunɔ mɔ ama ci enɔ dan ɔ, eyi evi dannɔ. Nɔ ɖeviwo kpɔkpɔ wowo da koɖo wowo nɔwoeɔ, wonyanɔ enu ciwo yí le veviɖe nɔ wo. Eyi nɔ wovashin ɔ, enu lɔwo ke yí gbevanyinɔ enuvevi nɔ wowo can hɛnnɛ. Enu ci yí jɔnɔ kabakaba nɛ. Nɔ mílɔn Yehowa teŋ nyaoɔ, míwo viwo nyanɔ. Nɔ Bibla hlɛnhlɛn koɖo yi kplakpla le veviɖe nɔ míɔ, woakpɔɛ anya. Woagbevanya hɛnnɛ mɔ, Fyɔɖuxu lɔ yí nyi nu ŋkɔtɔ nɔ mí le míwo gbemɛ. (Matie 6:33) Nɔ míyinɔ Kristotɔwo bɔbɔwo yí dranɔ Fyɔɖuxu ŋɛnywi lɔɔ, woavakpɔɛ mɔ Yehowa sɛnsɛn yí nyi nuvevitɔ nɔ mí wu enuwo pleŋ.—Matie 28:19, 20; Ebretɔwo 10:24, 25.
w05 6/15 21 mm. 14
Ajitɔ koɖo ajinɔwo, míkpɔ míwo xomuwo ji
14 Shigbe lé 2 Ese Wema 6:7 nui nɛɔ, enu sugbɔ mɛ yí míakan seŋ so gbɔngbɔnmɛnuwo le koɖo míwo viwo. Nɔ mízɔnkɔ mɔ, wakɔ axomɛdɔwo alo mukɔ munuɔ, míhɛn míazan hwenu ŋtɔ́wo asɔ kan seŋ so gbɔngbɔnmɛnuwo nu koɖo míwo viwo. Vɔ de eyi enyi mɔ míale Bibla mɛ nyɔnɔnwi lɔwo nukɔ nɔ wo “mamimami” yɔ o. Vɔ ŋci míawa yí nyi mɔ, míatekpɔ akannɔ seŋ so enu ciwo ado ŋsɛn mí le gbɔngbɔnmɛ nu. Nɔ mìsɔ enyɔdrawema ci yí nyi Nyɔ! ci mìmanɔɔ, woxonɔ nuxu so enu sugbɔ nu le mɛ. Nɔ mísɔ nyɔ cɛwoɔ, míasun ji akan seŋ so elan ciwo Yehowa wa nu, afi nyakpɔkpɔ ciwo yí le xexeɛ mɛ, akɔta vovo mɛ tɔwo koɖo lé wowanɔ nuwo do nu. Seŋ cɛ ciwo míakannɔ koɖo míwo viwo atɛnŋ adɔ kpakpa asɔnɔ wo yí woahlɛnnɔ wema ciwo hwashi egbejinɔtɔ koɖo ŋɖɛnyatɔ lɔ wanɔ.—Matie 24:45-47.
Bibla mɛ nuxɔafiwo jiji
Lɔnlɔn koɖo enujɔjɔɛwawa le blema Izraɛli
11 Nukplamuwo: Denyi lé mìzenɔ le agogbe ɖekɛ yí Yehowa kpɔnɔ o. Ékpɔnɔ enu ci mìnyi le xomɛ alo nu ci mìnyi le ji mɛ. (1 Sam. 16:7) Mìdatɛnŋ awla susu, seselelanmɛ koɖo nuwana ɖekpokpui di o. Éji mɔ mìwo le ɖo nɔnɔmɛ nywiwo le mìwo ji mɛ yí gbedokɔ ŋsɛn mì nɔ woasun mì shi. Vɔ éji hɛnnɛ mɔ mìwo le do jeshi susu vwinwo yí aɖu wo ji, nɔ woŋgbecucu mì mìawa nuvwin o.—2 Kro. 16:9; Mt. 5:27-30.
21-27 JUIN
MAWU NYƆ MƐ DƆKUNUWO | 2 ESE WEMA 7-8
“Mí ŋgbe ɖe amɛ ɖe le wo mɛ o”
w12 7/1 29 mm. 2
Nyi yí taɖo Mawu nu mɔ ye sɛntɔwo ɖo aɖe wowo kpena xɔsetɔwo ɖekɛɔ?
Nɔ mìanu nyɔnɔnwiɔ, Yehowa nya mɔ Satana jijiɛ mɔ yeatrɔ ye sɛntɔwo nɔ woavayi tɔ vojuwo sɛnsɛn. Eyi na taɖo Yehowa kanxle yi mɛwo mɔ vojusɛntɔwo “a trɔ míwo viwo susumɛ, yi wo a ɖekɔ le anyi nyɔ nu. Míwo viwo a va kplɔ voju buwo do.” Enyɔ blebu yí nyi nyɔ cɛ. Nɔ Izraɛli juɔ pleŋ vayi tɔ vojuwo sɛnsɛn ɔ, wowo nu dagbekpe nɔ Yehowa o, yí dagbecɔn alɔ wo ji o. Eyi wowo ketɔwo asun wo ji fafɛɖe. Nɔ evanyi ahan ɖe, lé Izraɛli ju lɔ awɛ avaji Mɛsia lɔɔ? Nyɔnɔnwi yɔ, ji Satana jijiɛ mɔ yeado Izraɛliviwo yí woaɖe vojusɛntɔwo abi maxɔsetɔwo.
w15 3/15 30-31
Woaɖe asu alo nyɔnu “le Axwetɔ mɛ” le veviɖe le egbɛwo mɛa?
Yehowa nu so hwenɔnu mɔ nɔ ye sɛntɔ ɖe aɖe nyɔnu alo aɖe asuɔ, ye sɛntɔwo mɛ ke yɛaɖi le. Nyi yí taɖo enu ahan ɔ? Enu ci yí taɖo enu ahan yí nyi kpɔ mɔ, énya enu ci yí anyɔ nɔ yi mɛwo. Yehowa jijiɛ mɔ, ye mɛwo ŋgbevayi je nyɔwo mɛ keŋ atɔ fun kpekpe o. Vɔ de yi ɖekɛ yɔ o, égbejiji mɔ eji le jɔnɔ wo. Ci Ʒuifu sugbɔ vayi ɖe mɛ ciwo yí desɛnnɔ Yehowa le Nexemi hwenuɔ, Nexemi ɖo ŋwi enudɔndɔn ŋnɔ han pɛpɛpɛ ci Salomɔ wa nɔ wo. Ci Mawu lɔn Salomɔ can ɔ, ‘‘nyɔnu lɔwo dui yí ewa nuvɔn.’’ (Nexemi 13:23-26, NWT) Eyi taɖo ci enyi lé Mawu awɛ yí yi mɛwo anyɔ yí xɔ, eyi dɔ enu nɔ yi mɛwo mɔ ye sɛntɔ adodwiwo mɛ ɖekɛ woaɖe nyɔnu alo asu le. (Ehajiji Wema 19:7-10; Ezai 48:17, 18) Lé Mawu lɔn Kristotɔ adodwiwo yí lenɔ bu nɔ wo jɔnɔ ji nɔ wo, yí wowanɔ do yi nyɔ ji. Wonya mɔ eyi nyi Xexegbɛ Cɛkpatɔgan yí lɔn mɔ yɛ le kplɔ yewo.—Elododo Wema 1:5.
w15 8/15 24 mm. 12
Nya mɛ ciwo anyi xlɔ koɖo le ŋkeke vɔvɔɛ cɛwo mɛ
12 Ele veviɖe mɔ Kristotɔ trɛnnɔwo ɖo akpɔ mɛ ci woaɖe nywiɖe hwecinu wojiji asu alo nyɔnu aɖe. Mawu Nyɔɔ nu mɔ, “mí ŋgbe sɔ míwoɖeki xoca koɖo maxɔsetɔwo o. Ekacaca do ɖekɛ ci yí le gblamɛ nɔ enunywiwawa koɖo enuvwìnwawa ɔ? Alo, ɖekɛ nɔ̀nɔ̀ ci yí le gblamɛ nɔ klɛnklɛn koɖo vinvin ɔ?’’ (2 Korɛntitɔwo 6:14) Bibla nu nɔ Mawu mɛwo mɔ, nɔ woaɖe nyɔnu alo asuɔ, “Axwetɔ mɛ” ɖekɛ woaɖi le. Yi gɔnmɛ yí nyi mɔ, mɛ ci yí sɔ yiɖeki jo nɔ Yehowa yí wa ʒinʒindoshimɛ yí yi wanawo sɔ koɖo Mawu Nyɔ lɔ yi aɖe. (1 Korɛntitɔwo 7:39) Nɔ Kristotɔwo ɖe wowo kpena xɔsetɔwoɔ, anyi woɖe mɛ ci yí sɔ yiɖeki jo nɔ Yehowa. Eyi woado alɔ nɔnɔ keŋ anɔ gbe ji nɔ Yehowa.
Bibla mɛ nuxɔafiwo jiji
w04 2/1 14 mm. 4
Yehowa nanɔ gbeɖekatɔ mì
Egbe ci mìdonɔ ɖaɖa yí biɔnɔ gbeɖeka ŋɖuɖu ɖo aɖonɔ ŋwi nɔ mì hɛnnɛ mɔ, mìɖo aɖunɔ gbɔngbɔnmɛŋɖuɖu gbeɖeka duu. Ci Yesu nɔ shive yí ewa azan sugbɔ yí Satana va dui kpɔ mɔ yi le sɔ ekpewo trɔ kpɔnnɔ can ɔ, égbe kpeŋ yí nu ni mɔ: ‘‘Wo ŋwlɛ ɖɛ mɔ, ‘Agbetɔ de le agbe to kpɔnnɔ ɖekɛ kpaŋ ji o. Vɔ ɔ, sɔkudo enyɔ ɖeshaɖe ci yí tonɔso Mawu glan mɛ nu yí wo a nɔ̀ agbe do.’” (Matie 4:4) Enyɔ ci enyɔnuɖɛtɔ Moizi nu nɔ Izraɛliviwo yí Yesu trɔ yí nu le lɛ. Moizi nu nɔ wo mɔ: “[Yehowa] sɔ mí wa egomayìtɔwo yi sɔ mí tashi do shive. É na mana mí yí mí ɖu. (Mana lɔ nyi ŋɖuɖu veviɖe ci Mawu na wo) Ŋɖuɖu é nyi, yí mí de jeshii ɖɛ sa o. . . . Ðo, É ji mɔ míwo le nya mɔ de nyi kpɔnnɔ ɖekɛ yí nanɔ agbe amɛ o. Agbetɔ gbenɔ̀nɔ̀ so nɔ Tɔhonɔ nyɔ gbɔ.” (2 Ese Wema 8:3) Mìkpɔ lé Yehowa na mana Izraɛliviwo yí woɖu. De enu ci woaɖu ɖekɛ yí taɖo ena mana lɔwo ahan o, vɔ ekpla gbele mɛ nɔ wo. Ŋɖe yí taɖo Yehowa nu nɔ wo mɔ, “ci yí asun wo gbe ɖeka yí woacan.’’ Nɔ wocan mana esugbɔ wu ci yí asun wo gbeɖekaɔ, kpɛtɛ tɔnɔ hwɛnhwɛn yí jenɔ ye. (Hunhun 16:4, 20) Vɔ le ŋkeke amadɛntɔ jiɔ, nɔ wocan ŋkeke amɛvetɔ keŋ yí avakpɔ aɖu le sabatigbeɔ, ŋɖekɛ dewanɔ yɛ o. (Hunhun 16:5, 23, 24) Eyi taɖo mana lɔ ci wokpɔ yí ɖu ahan ɖonɔ ŋwi nɔ wo mɔ, woɖo ase tonu yí anya mɔ de to kpɔnnɔ ɖekɛ kpaŋ ji woanɔ agbe to o. Vɔ “sɔkudo enyɔ ɖeshaɖe ci yí tonɔso Mawu glan mɛ nu yí wo a nɔ̀ agbe do.”
28 JUIN–4 JUILLET
MAWU NYƆ MƐ DƆKUNUWO | 2 ESE WEMA 9-10
“Nyi yí Tɔhonɔ míwo Mawu jijiɛ le mí gbɔ nyɔnɔnwitɔ ɔ?”
w09 10/1 10 mm. 3-4
Nyi Yehowa jijiɛ mɔ mìwo le waɔ?
Nyiwo yí adɔ mìwoŋtɔwo alɔn ase tonu nɔ Mawuɔ? Moizi xo nuxu so ɖeka nu yí nu mɔ: “Tɔhonɔ ji mɔ míwo le na bubu Ye.” (Kpukpui 12) De vɔnvɔn nɔ alɔzu ciwo mìaɖu yí adɔ taɖo mìavɔnvɔn nɔ Yehowa o. Ewaɖeɔ, shishiɖoɖo nɔ Mawu yí adɔ mìavɔnnɔ ni. Nɔ mìvɔnnɔ nɔ Mawu yí ɖonɔ shishi ni nyɔnɔnwitɔɔ, mìdalɔn awa ŋɖe ci yí ave nu o.
Ci ele ahan can ɖe, nyi yí anyi nu ŋkɔtɔ ci yí adɔ mìasenɔ to nu nɔ Mawuɔ? Moizi nu mɔ: “Tɔhonɔ ji mɔ míwo le na bubu Ye. . . . Yi a sumɔ Tɔhonɔ míwo Mawu koɖo míwo ji xloŋ koɖo míwo kla xloŋ.” (Kpukpui 12) Woalɔn Mawu wugan wu lé nu wanɔ nɔ amɛ. Wema ɖeka nu mɔ, “Le Ebregbe mɛɔ, lé nu wanɔ nɔ amɛ dɔ wowanɔ ŋɖewo.” Eyi wema lɔ ke gbenu mɔ, woalɔn Mawu yí nyi kpɔ mɔ “woalɔn” awanɔ nu ciwo yí jɔnɔ ji ni. Nɔ mìanuiɔ, yi gɔnmɛ yí nyi mɔ nɔ mìlɔn Mawu nyɔnɔnwitɔɔ, mìalɔn awanɔ nu ciwo yí ajɔnɔ ji ni.—Elododo Wema 27:11.
w09 10/1 10 mm. 6
Nyi Yehowa jijiɛ mɔ mìwo le waɔ?
Nɔ mìsenɔ tonuɔ, ale ciwo mìaɖu gbaŋ dahwe o. Moizi mɔ: “Mí bu Tɔhonɔ sewo . . . ciwo ŋ na mí gbɛ. Woakpedo míwoŋtɔwo nu.” (Kpukpui 13) Eyi taɖo ji Yehowa jijiɛ mɔ mìwo le nyɔ taɖo enunɔ nɔ mì mɔ, mìwo le wanɔ do ese ciwo pleŋ yedo nɔ mì ji yí awanɔ enyɔ ciwo pleŋ yenunɔ nɔ mì. Lé ewɛ yí nyi ahan ɔ? Bibla nu mɔ “Mawu nyi lɔnlɔn.” (1 Ʒan 4:8) Ji ejijiɛ mɔ mìavo tɛgbɛɛ taɖo yí do se lɔwo nɔ mì. (Ezai 48:17) Nɔ mìwakɔ ŋciwo pleŋ Yehowa mɔ mìwo le waɔ, adɔ yí mìavo le egbɛmɛ. Eyi nɔ Mawu Fyɔɖuxuɔ vakpanɔ nyigban lɔɔ, ale ciwo mìaɖu anyi ɖumavɔ.
cl 16 mm. 2
Àsun ji ‘agogo Mawu’ nyaoa?
Abraxamu nyi mɛ ci yí ni vayi sa, yí yɛ koɖo Yehowa ve keke Yehowa yɔɛ mɔ ‘ye xlɔ.’’ (Ezai 41:8) Exlɔ vevi ɖeka teŋ yí Abraxamu nyi nɔ Yehowa. Enu ci yí na taɖo Abraxamu koɖo Yehowa sun ji yí ve ahan yí nyi kpɔ mɔ, “Abraxamu xɔ Mawu ji se.” (Ʒaki 2:23) Le egbɛmɛ can hɛnnɛɔ, Yehowa jijiɛ mɔ eye koɖo mɛ ciwo yí sɛnkɔ ye “ave.” (2 Ese Wema 10:15) Yi nyɔ lɔ nu nɔ mì mɔ: “Mí gogo Mawu nɔ Mawu agogo mí.” (Ʒaki 4:8) Le nyɔ cɛwo mɛɔ, Yehowa yɔyɔ mì yí gbeɖoɖoɔ gbe nɔ mì.
Bibla mɛ nuxɔafiwo jiji
it-1 115
Anaki
Wonyi mɛ ciwo yí jɔ asu sugbɔ yí nɔnɔ etowo ji koɖo eju ciwo yí trɔ do kanna ju mɛ, taŋtaŋ le kanna fɔde. Hweɖekanuɔ, ŋsu jɔasu amɛtɔn ciwo yí nyi Anakiviwo nɔ Xebrɔn. Wowo yí nyi Sesai, Ahiman koɖo Talmai. (Amɛ Hlɛnhlɛn 13:22) Ŋnɔ yí Izraɛlivi 12 ciwo wodɔ mɔ wo le vayi trɔ Kanna ju lɔ kpɔ Anakiviwo le nɛ. Eyi nɔ mìaɖo ŋwiɔ, ejutrɔtɔ 10 vanu jikaswinyɔwo nɔ Izraɛliviwo. Wonu mɔ, amɛ kakikaki ciwo yí le glijaglija ciwo yí ni gbɔxwe eshiɖɔɖɔɔ va viviwo yí Anakiviwo nyi. Eyi Ejawo han yí Ebreviwo alo Izraɛliviwo nyi le ŋmɛ nɔ wo. (Amɛ Hlɛnhlɛn 13:28-33; 2 Ese Wema 1:28) Nɔ woxoxoɔ nuxu so Emiti koɖo Refaimu ŋsu jɔasuwo nuɔ, wonunɔ mɔ wole shigbe Anakiviwo nɛ. Lé ŋsɛn le wo nu glijaa do dɔ wovasɔ wo tɔ elo dodo mɔ: “Mi yí agbedɔn anɔ te le ŋmɛ nɔ Anakiviwoɔ?”—2 Ese Wema 2:10, 11, 20, 21; 9:1-3.