Agbenɔnɔ koɖo sumɔsumɔdɔ bɔbɔ nukplawema nyɔsoxuwo
5-11 JUILLET
MAWU NYƆ MƐ DƆKUNUWO | 2 ESE WEMA 11-12
“Lé Yehowa mɔ wo le sɛn ye do”
it-1 93 mm. 7
Ese
Woasumɔ koɖo amɛ se pleŋ. Wozannɔ nyɔgbe “ese” nɔ amɛ lɔ pleŋ. Enyi ahan, vɔ kpukpui ɖewo do ŋsɛn mì mɔ, mìwo le ji Mawu, aluin yí asin koɖo ‘mìwo ji pleŋ, koɖo mìwo gbɔngbɔn pleŋ.’ (2 Ese Wema 4:29; 11:13, 18) Eyi 2 Ese Wema 6:5 nu mɔ: “Mí ɖo a lɔn Tɔhonɔ míwo Mawu koɖo míwo ji pleŋ, míwo gbe pleŋ, koɖo míwo ŋsɛn pleŋ.” Yesu nu mɔ yɛ le veviɖe mɔ, woasɛn Mawu koɖo amɛ gbe pleŋ, ŋsɛn pleŋ, yí gbesɔ kpe niɔ, ‘koɖo amɛ susu pleŋ.’ (Maki 12:30; Luiki 10:27) Mɛɖe atɛnŋ abiɔ se mɔ, nyi yí taɖo woyɔ enu cɛwo pleŋ bɔdo agbe nu vɔ yí wo pleŋ lɔ trɔ le agbe lɔ mɛ ma. Wohɛn woadre mɛ mɔ: Mɛɖe hɛn asa yiɖeki (yi gbe) anyi hwashi nɔ mɛɖe, yí atrɔ mɛ ci yí xwlui tɔ. Ele ahan agan, dasumɔ yi xwetɔ koɖo yi ji pleŋ o, koɖo dro mɔ yeawa nu nɔ ye nu ajeŋ ni o dru. Eyi dazannɔ yi ŋsɛn pleŋ alo yi susu mɔ yeana nuwo le nyɔ nɔ ye xwetɔ o. (Sɔ sɔ koɖo Efezitɔwo 6:5; Kolosetɔwo 3:22.) Eyi dɔ taɖo woyɔ enu cɛ lɔwo pleŋ keŋ nɔ mìwo susu anɔ wo ji yí mìazannɔ wo pleŋ le sɛnsɛn ci mìsɔkɔ nɔ Mawu, mɛ ci tɔ mìnyi koɖo Eviɛ ci yí sɔ yi gbe na tafɛn do ta nɔ mì. Mawu sɛnsɛn koɖo amɛ ‘se pleŋ’ yí nyi mɔ woasin koɖo amɛ gbe pleŋ, lankpu, enujikpekpe alo edro pleŋ.—Sɔ sɔ koɖo Matie 5:28-30; Luiki 21:34-36; Efezitɔwo 6:6-9; Filipitɔwo 3:19; Kolosetɔwo 3:23, 24.
it-1 232 mm. 10
Vɔnsakpe
Wonu nɔ Izraɛliviwo mɔ wo le gban hojusɛntɔwo vɔnsakpewo pleŋ yí acuku ekpe kɔkɔɛ ciwo wocunɔ do axa nɔ wo. (Hunhun 34:13; 2 Ese Wema 7:5, 6; 12:1-3) Wodeɖo awa vɔnsakpe ŋtɔ́wo han alo atɔ zo wowo viwo asɔ wa vɔnsa shigbe Kannatɔwo nɛ gbeɖe o. (2 Ese Wema 12:30, 31; 16:21) Ci Izraɛliviwo aɖo vɔnsakpe hamɛhamɛwoɔ, kuɖeka kpaŋ woɖo aɖo yí eyi ji woasɛnnɔ Mawu adodwi ɖeka kpaŋ lɔ le, le fini Yehowa mɔ wo le ɖui do. (2 Ese Wema 12:2-6, 13, 14, 27; eto akpo nɔ Babiloni shini vɔnsakpe 180 yí li nɔ mawunɔ Ishtar ɖekɛ.) Ci Izraɛliviwo so Ʒurdɛn tɔsasa lɔɔ, wonu nɔ wo ŋkɔtɔ mɔ wo le sɔ ekpe ciwo wodedrado o yí wodezan ekpegbannu do wo ji sɔ wa vɔnsakpe ɖeka (2 Ese Wema 27:4-8), yí Ʒozue yí wɛ le Ebali to ji. (Ʒozue 8:30-32) Ci woma nyigban ci woxɔ lɔ ɖegbɔɔ, Ruibɛn koɖo Gadi kɔta mɛ tɔwo koɖo Manashe kɔta mamu wa vɔnsakpe ɖeka do Ʒurdɛn gbɔ, edɔ yí kɔta kpɛtɛ mɛ tɔwo wa dɔmɛzi keŋ gbɔxwe yí vakpɔɛ nya mɔ de xɔsegbegbe ŋɖe enyi o. Vɔ wowɛ asɔ ɖonɔŋwi egbejinɔnɔ nɔ Yehowa mɔ eyi nyi Mawu adodwi lɔ.—Ʒozue 22:10-34.
Bibla mɛ nuveviwo
it-1 1037
Garizimu To
Ci Izraɛliviwo ɖu Ai ji sabaɖe goduɔ, Ʒozue bɔ Izraɛli kɔta mɛ tɔwo pleŋ do Garizimu koɖo Ebali Towo gbɔ shigbe lé Moizi nui mɔ wo le wɛ nɛ. Wohlɛn shicu ciwo eju lɔ axɔ nɔ wose tonu nɔ Yehowa koɖo kpɛnsɛn ciwo ava wo ji nɔ wogbe to ni nɔ wo le nɔ yí wose. Shimeɔn, Levi, Ʒuda, Isaka, Ʒozɛfu koɖo Bɛnʒamɛ kɔta mɛ tɔwo le te le ŋkɔ nɔ Garizimu To. Levitɔwo koɖo enublabladaka lɔ le bali lɔ mɛ, yí kɔta amadɛn kpɛtɛ mɛ tɔwo le te le ŋkɔ nɔ Ebali To. (2 Ese Wema 11:29, 30; 27:11-13; Ʒozue 8:28-35) Ele shigbe mɔ, kɔta ci mɛ tɔwo le ŋkɔ nɔ Garizimu To xɔkɔ gbe do shicu ciwo wohlɛnkɔ ɖaɖa wo gbɔ ji, yí kɔta kpɛtɛ mɛ tɔwo xɔkɔ gbe do kpɛnsɛn ciwo wohlɛnkɔ ɖaɖa Ebali To lɔ gbɔ ji. Mɛɖewo mɔ wohlɛn shicu lɔwo ɖaɖa Garizimu To gbɔ ɖo egangan yí nya kpɔkpɔ yí yi nyigban nyɔ. Vɔ Ebali To lɔ yɛ nyi ekpenyigban yí yi nyigban lɔ denyɔ o. Vɔ Bibla yɛ denu enyɔ ɖe so nu o. Wohlɛn Ese lɔ nɔ “Izraɛli jukɔn lɔ pleŋ . . . Nyɔlunwo koɖo ɖeviwo pleŋ, koɖo mɛdruwo pleŋ ciwo yí nɔ̀nɔ koɖo Izraɛlitɔwo” yí wose. (Ʒozue 8:35). Ele shigbe mɔ, lé texwe lɔ le do yí dɔ amɛ-ahwa gangan cɛ tɛnŋ se enyɔ lɔwo le fini wole nɔ eto lɔwo ɖeka ɖeka.—Kpɔ ÉBAL (MONT).
12-18 JUILLET
MAWU NYƆ MƐ DƆKUNUWO | 2 ESE WEMA 13-15
“Lé Yehowa bu wamɛnɔwo tɔ kpɔ le Seɛ mɛ do”
it-1 648 mm. 5
Madowo
Ele shigbe mɔ, madowo bu ɖe gbeli ci wosɔnɔ ɖɛ xwe ɖeka mɛ duu yí denyi alɔdodo Levitɔwo vɔnsatɔdɔ tiin o. Ci ele ahan can ɔ, Levitɔwo xɔnɔ le mɛ. Nɔ Izraɛliviwo xomuwo vabɔ nɔ azanɖuɖuwo yí wozannɔ madowo cɛ lɔ. Nɔ enyi mɔ, fini xomu lɔ aso le ava Ʒerusalɛmu jinjin ci yí adɔ wodaɖeŋ asɔ madowo lɔ vɛɔ, woatrɔɛ anyi eho ci yí xomu lɔ avazin nɔ ŋɖuɖu koɖo nubuwo le takpekpegan kɔkɔɛ lɔ hwenu. (2 Ese Wema 12:4-7, 11, 17, 18; 14:22-27) Vɔ le vɔvɔnu nɔ xwe amɛtɔn koɖo amadɛn tɔ nɔ xwe adrɛ-adrɛ sabatiɔ, wodegbezannɔ madowo cɛ nɔ azanɖuɖu nyɔwo o. Wosɔnɔ madowo cɛ lɔ ɖɛ nɔ Levitɔwo, mɛdruwo, kposhuwo koɖo nyɔcɔvi ciwo yí le juɔ mɛ.—2 Ese Wema 14:28, 29; 26:12.
it-2 843
Sabati xwe
Woyɔnɔ Sabati xwe mɔ “vovomɛ-exwe [hash·shemit·tahʹ].” (2 Ese Wema 15:9; 31:10) Le exwe ŋtɔ́ mɛɔ, nyigban lɔ gbɔnnɔ keŋkeŋ alo vonɔ, wodedenɔ agble o. (Hunhun 23:11) Ahanke, wosɔnɔ efɛnwo kenɔ amɛwo nɛ yí wovonɔ. Efɛn enyi wosɔ ke amɛ ‘le Yehowa ŋmɛ.’ Amɛwo nunɔ enyɔ vovowo so nyɔ cɛ nu. Mɛɖewo nunɔ mɔ wodesɔ efɛn lɔ kenɔ amɛ keŋkeŋ o, vɔ mɛ ci woɖu fɛn do lɔ degbenɔnɔ godu nɔ yi kpena Ebretɔ efɛnɖutɔ lɔ amɔ yi le cu ye fɛn nɔ ye o. Enu ci yí taɖo enyi ahan yí mɔ, glɛshinɔwo dekpɔnɔ ŋɖe xwe ŋtɔ́ mɛ o. Vɔ mɛ ci yí woɖu fɛn do hɛn ado cɔcɔ nɔ mɛdru ci yí le ju lɔ mɛ nɔ acu yi fɛn ni. (2 Ese Wema 15:1-3) Rabi ɖewo mɔ nɔ wodo ho nɔ wamɛnɔ ɖe yí sɔ kpedo nuɔ, wodabiɔ eho lɔ yɛ yi o, vɔ nɔ ajɔnyɔwo ŋci wodo ho nɔ amɛ lɔɔ, yɛ to akpo. Wogbenu mɔ le xwe sanŋdi ŋkɔtɔ mɛɔ, Hillel ɖo toto ɖe ci yí adɔ yí mɛ ci yí do ho nɔ amɛ hɛn ayi nu nyɔ ɖe le kojoɖoxu keŋ nɔ yi ho ŋgbevalɛ o.—The Pentateuch and Haftorahs, ci yí J. Hertz ta, London, 1972, kpashi 811, 812.
it-1 794 mm. 2
Hwashi
Ese ciwo yí li nɔ hwashi koɖo yi xwetɔ gblamɛ nyɔwo. Le Izraɛliviwo mɛɔ, lé woawa nu koɖo Ebretɔ hwashi to akpo nɔ lé woawa nu koɖo hwashi ci yí nyi mɛdru alo ci yí denyi Ebretɔ o. Hwashi ci yí denyi Ebretɔ o nyinɔ yi xwetɔ nuvevi yí agbesɔɛ nɔ eviɛ ŋsuvi dru. (1 Ese Wema 25:44-46) Vɔ woɖo atashi hwashi Ebretɔ yɛ le xwe amadrɛtɔ mɛ nɔ ci evayi nyi hwashi alo le Vovokpɔkpɔxwe mɛ, eso xwe ci yí va doŋkɔ le xwe lɔwo kuve mɛ gbɔ. Hwenu Ebretɔ ɖe nyi hwashiɔ, woakpɔɛni do apadɔwatɔ ji. (Hunhun 21:2; 1 Ese Wema 25:10; 2 Ese Wema 15:12) Nɔ Ebretɔ ɖe sa yiɖeki nɔ mɛdru ɖe ci yí le juɔ mɛ alo nɔ mɛdru lɔ xomumɛtɔ ɖeɔ, yiŋtɔ hɛn atrɔ axwle yiɖeki alo mɛɖe ci yí ɖo acɛ axwlui hɛn axwlui le hweɖekpokpui nu. Exwe nɛni ci yí kpɔtɔ awa gbɔxwe Vovokpɔkpɔxwe lɔ ava alo xwe amadrɛtɔ lɔ aɖo, ho yí wodrɔ asɔ axwlui. (1 Ese Wema 25:47-52; 2 Ese Wema 15:12) Nɔ hwashi Ebretɔ ɖe xwetɔ nakɔ vovo yiɔ, éɖo ana ŋɖe ci yí akpedo nu nɔ ci esokɔ le gbɔ yí trɔkɔ amɛ vovo alo amɛ ci yí degbenyi hwashi o. (2 Ese Wema 15:13-15) Nɔ hwashi ɖe va koɖo ashiɛɔ, agbeso koɖo ashiɛ. Vɔ nɔ yi xwetɔ yí na nyɔnu yiɔ (anyi nyɔnu ci yí nyi mɛdru ci wodaɖeŋ ana vovo le xwe amadrɛtɔ mɛ nɔ ci enyi hwashi o), nyɔnu lɔ koɖo evi ciwo eji ni kpɔtɔ nyi yi xwetɔ tɔ. Eyi nɔ evanyi ahan ɔ, hwashi Ebretɔ lɔ hɛn amɔ yeakpɔtɔ anɔ ye xwetɔ gbɔ. Eyi woasɔ enutɔnnu tɔn to ni yí anyi mɔ anyi hwashi tɛgbɛɛ.—Hunhun 21:2-6; 2 Ese Wema 15:16, 17.
Bibla mɛ nuveviwo
w06 4/1 31
Enyɔbɔse ciwo yí so yi hlɛntɔwo gbɔ
Nyi mìatɛnŋ akpla le ese ci yí le Hunhun 23:19 ci mɛ wonu le mɔ: ‘Ŋgbeɖa gbɔvi le nɔlɔ nɔshu mɛɔ’?
Ese cɛ ci yí le Moizi Seɛ mɛ, yí eze zetɔn le Bibla mɛ atɛnŋ akpedo mì nu mìanya enu ci yí nyi Yehowa susu le enunywi nu, lé ekunɔ ŋshishi yí gbefa xomɛ do. Egbedasɛ lé ŋsusɛnsɛn nu dekpenɔ ni ɖeeɖe do.—Hunhun 34:26; 2 Ese Wema 14:21.
Egbɔvi alo elan bu ɖe ɖaɖa le nɔlɔ nɔshu mɛ anyi nuwawa ci yí to akpo nɔ jɔjɔmɛ toto ci Yehowa wa nɔ nuwo. Mawu wa nɔshu lɔ nɔ anyi enuɖuɖu nɔ elanvi lɔ keŋ nɔ akpedo nu ashin. Wemanyatɔ ɖeka nu mɔ, elan ɖe ɖaɖa le nɔlɔ ŋtɔ nɔshu mɛ nyi “ekacaca ci yí le gblamɛ nɔ elan koɖo eviɛ ci Mawu wa yí ele kɔkɔɛ gbaligbali.”
Ahanke, mɛɖewo mɔ elan ɖaɖa le enɔlɔ nɔshu mɛ nyi hojusɛntɔwo kɔnu ɖeka ci wowanɔ nɔ eshi aja. Eyi nɔ ele ahan ɔ, ese cɛ lɔ aglɔn ta nɔ Izraɛliviwo yí wodawa xomɛveve sɛnsɛn kɔnu ciwo mɛ nunya ɖekɛ dele o ciwo eju ciwo trɔdo wo wanɔ o. Moizi Se lɔ gbe nɔ Izraɛliviwo tiin mɔ woŋgbewa enu ciwo eju cɛwo wanɔ ɖe o.—1 Ese Wema 20:23.
Eyi le vɔvɔnuɔ, ese vevi cɛ dɔ mìkpɔ lɔnlɔn koɖo ŋshishikuku Yehowa tɔ. Le nyɔnɔnwi mɛɔ, ese ciwo mɔ woŋgbe ve xomɛ le lanwo nu sugbɔ le Seɛ mɛ, yí woglɔnnɔ ta nɔ wo yí wodezannɔ wo nɔ dɔwawa ci yí desɔgbe o. Le kpɔwɛ mɛ, ese li mɔ wodasɔ elan ɖe sa vɔn nɔ denɔ enɔ lɔ gbɔ esun ŋkeke amadrɛ o, wodawu elan ɖe koɖo viɛ le azan ɖekɛ ji o yí wodasɔ xevi ɖe le yi tɔ mɛ bɔdo yi ʒinwo nu o.—1 Ese Wema 22:27, 28; 2 Ese Wema 22:6, 7.
Eze petii mɔ, denyi ese gbogbo ciwo mɛ wodatɛnŋ amɔŋje yí gbesɛnŋ yí le Moizi Seɛ mɛ o. Ese lɔwo kpenɔdo mì nu mìɖonɔ susu nywi do agbenywinɔnɔ ci yí nyi Yehowa nɔnɔmɛ nywiwo kpaxwe ɖe.—Ehajiji Wema 19:7-11.
19-25 JUILLET
MAWU NYƆ MƐ DƆKUNUWO | 2 ESE WEMA 16-18
“Gɔnmɛɖosewo nɔ kojo jɔjɔɛ ɖoɖo”
it-1 410 mm. 2
Ŋkuvitɔntɔn
Ŋkuvitɔntɔn nyinɔ jeshidu nɔ kojoɖotɔ ɖe ci yí deɖo kojo jɔjɔɛ o. Moizi Seɛ gbe mɔ kojoɖotɔ ɖe ŋgbexɔ ŋɖe, abu nyɔ do amɛ nu o ɖo woatɛnŋ adɔ kojoɖotɔ lɔ ablu afɔ nɔ nyɔ lɔ yí atra amɛ mɛ le kojo lɔ mɛ. ‘Bebemɛ nunana tɔnnɔ ŋkuvi nɔ mɛ ciwo kpɔnɔ nu nywiɖe.’ (Hunhun 23:8) ‘Bebemɛ nununa tɔnnɔ ŋkuvi nɔ ŋɖɛnyatɔwo.’ (2 Ese Wema 16:19) Nɔ kojoɖotɔ ɖe nyi amɛ jɔjɔɛ yí gbesenɔ nu gɔnmɛ can ɔ, yí mɛ ciwo ejikɔ aɖo kojo nɔ ɖe na nu yi yí exɔɛɔ; atɛnŋ adɔ nɔ enya alo denya can ɔ, dagbetɛnŋ aɖo kojo lɔ shigbe lé aɖui do nɛ o. Mawu se lɔ kanxle wo mɔ nɔ kojoɖotɔ ɖe xɔ enunana ɖe alo sɔ lé ekpɔkɔ amɛ lɔwo do ɖo kojoɔ, adɔ abaɖa afɔ nɔ kojo lɔ. Eyi taɖo Mawu nu nɔ wo mɔ: “Mí de ɖo a nɔ̀ wamɛnɔ ji o. Yi mí de ɖo a nɔ̀ amɛ kpɛnkpin ji o.” (1 Ese Wema 19:15) Eyi taɖo kojoɖotɔ dakpɔ do lé enu le do nɔ yiŋtɔ nu alo amɔ ye nu le jɔ ji nɔ amɛwo yí amɔ dɔkunɔ nyɔ dejɔ o ɖo eje dɔku ŋci o.—Hunhun 23:2, 3.
it-2 415 mm. 2
Hlɛnhlɛnmɛ
Amɛve. Esenyɔwo mɛ yí hlɛnhlɛnmɛ amɛve zenɔ le kabakaba. Kunuɖetɔ amɛve ci wowo nyɔwo nyi ɖeka dɔ wokannɔdo enyɔ ci wonukɔ nu ji. Nɔ woasɔ nyɔ ɖe yi kojoɖotɔwo gbɔɔ, woɖo akpɔ kunuɖetɔ amɛve alo amɛtɔn. Gɔnmɛɖose ŋnɔ ke wozannɔ le Kristotɔwo hamɛ nɛ. (2 Ese Wema 17:6; 19:15; Matie 18:16; 2 Korɛntitɔwo 13:1; 1 Timɔte 5:19; Ebretɔwo 10:28) Mawu wa do gɔnmɛɖose cɛ ji hwenu esɔ Eviɛ na mɔ yɛahwlɛn agbetɔwo gan. Yesu nu mɔ: “Le míwo se mɛ, wo ŋwlɛ mɔ ɖashifu amɛ amɛve tɔ nyi nyɔnɔnwi. Enyɛ ɖekɛ yí ɖuɖuɔ ɖashifu nɔ Enyɛɖeki. Anyi ɖashifuɖutɔ amɛve tɔ nyi Eda ci dɔ Ŋ ɖaɖa.”—Ʒan 8:17, 18.
it-2 657 mm. 3
Avɔnsatɔ
Avɔnsatɔwo yí nyi amɛ ŋkɔtɔ ciwo ɖo acɛ aɖe Mawu se lɔ gɔnmɛ, yí wowanɔ akpaxwe vevi ɖeka le Izraɛli kojoɖoɖonyɔwo mɛ. Le eju ciwo mɛ womɔ wo le wa dɔ leɔ, wokpenɔdo kojoɖotɔwo nu, yí bɔnɔdo wo nu le enyɔ sɛnŋsɛnŋwo ciwo gbɔ kpɔkpɔ gbɔnnu nɔ kojoɖoxu ci yí le juɔ mɛ. (2 Ese Wema 17:8, 9) Wosɔ wo bɔnɔdo juɔ mɛ mɛshinshinwo nu le enyɔ ciwo kudo amɛwuwu nu, nɔ woakpɔ nyɔ lɔ gbɔ nywiɖe keŋ nɔ woazɔn do toto ci yí li ji nywiɖe nɔ eju lɔ ŋgbeɖu ehufɛn o. (2 Ese Wema 21:1, 2, 5) Nɔ ŋsu ŋhwantɔnɔ ɖe do hwɛ ashiɛ mɔ yido afɔ gbe le bebemɛɔ, éɖo akplɔ nyɔnu lɔ va kɔkɔɛtɔxu lɔ. Le kɔkɔɛtɔxu lɔɔ, avɔnsatɔ lɔ awa kɔnu ci wonu ɖɛ mɔ woawa asɔ biɔ Yehowa ci yí nya nɔ nyɔnu lɔ wa asu abi dewɛ o, nɔ Yehowa ŋtɔ aɖo kojo ni zeɖeka. (Amɛ Hlɛnhlɛn 5:11-31) Le nyɔ ɖekpokpui mɛɔ, woɖo alɔn do kojo ci kojoɖotɔwo alo avɔnsatɔwo ɖo ji. Woawu mɛɖe ci yí xashi gbali alo gbe mɔ yedalɔn do kojo lɔ ji o.—Amɛ Hlɛnhlɛn 15:30; 2 Ese Wema 17:10-13.
Bibla mɛ nuveviwo
it-1 852
Amɛɖeɖeti
Le Moizi Seɛ mɛɔ, woɖo ase kunuɖetɔ amɛve numɛgbe kpetii gbɔxwe yí aso ku kojo nɔ amɛ. (2 Ese Wema 19:15) Kunuɖetɔ cɛwo yí nyi amɛ ŋkɔtɔ ci wonunɔ nɔ mɔ wo le xo kpe amɛ ci yí wa nuvɔn lɔ. (2 Ese Wema 17:7) Wowɛni ahan asɔ dasɛ lé Mawu se lɔ le veviɖe nɔ wo koɖo lé Izraɛli ha lɔ ɖo anɔ mɛmiɖe do. Egbenanɔ yí wodalɔ ju avaɖe kunu, akan ŋsu alo wodabu nyɔ lɔ kpɔ xwe avanui o.
26 JUILLET–1er AOÛT
MAWU NYƆ MƐ DƆKUNUWO | 2 ESE WEMA 19-21
“Agbetɔ gbe ve nɔ Yehowa”
w17.11 14 mm. 4
Ðyi Yehowa ci yí le jɔjɔɛ yí kunɔ ŋshishi nɔ amɛ
4 Shishi yi bexuju lɔwo mɛ degbɔnnu o. Yehowa nu nɔ Izraɛliviwo mɔ wole ɖo bexuju lɔwo sɔsɔminasɔɛ do ago amɛve lɔwo ji nɔ Ʒurdɛn Tɔ. Nyi yí taɖoɔ? Nɔ mɛ ci yí shikɔ lɔ atɛnŋ akpɔ bexu blaŋ fafɛɖe. (Amɛ Hlɛnhlɛn 35:11-14) Wodranɔ emɔ ciwo yí yi bexuju lɔwo mɛ do yí wonɔnɔ nywiɖe. (2 Ese Wema 19:3) Le Ʒuifuwo xolɔlɔ mɛɔ, woɖo emɔdasɛnamɛnuwo do emɔ lɔwo ji keŋ nɔ mɛ ciwo yí shi yikɔ ajeshi bexuju lɔwo. Ci bexujuwo liɔ, adɔ yí daʒan mɔ mɛ ci yí denya xwe yí wu amɛ ashi ayi eju bu xesexese mɛ shini taŋfuin avayi ŋsusɛnsɛn fɛnca mɛ o.
w17.11 15 mm. 9
Ðyi Yehowa ci yí le jɔjɔɛ yí kunɔ ŋshishi nɔ amɛ
9 Bexuju lɔwo glɔnnɔ ta nɔ Izraɛliviwo yí wodewunɔ amɛmanyaɖe o. (2 Ese Wema 19:10) Agbe nyi nuvevi nɔ Yehowa yí delɔnnɔ “alɔ̀ ciwo yí wunɔ amɛ manyaɖe o.” (Elododo Wema 6:16, 17) Ci enyi Mawu jɔjɔɛ yí gbele kɔkɔɛɖeɔ, daɖeŋ aŋwla ŋkuvi do amɛ ci wodenya xwe yí wu ji kpetii o. Nyɔnɔnwi mɛɔ, wokunɔ ŋshishi nɔ mɛ ci yí denya gbɔxwe yí wu amɛ o. Ele ahan agan, éɖo ayi nu enyɔ lɔ nɔ amɛshinshinwo. Eyi nɔ woso nyɔ ni mɔ gbe yidenya gbɔxwe yí wu amɛ nyaoɔ, éɖo akpɔtɔ anɔ bexuju lɔ mɛ keke aje hwecinu avɔnsatɔ gangantɔ lɔ aku. Ecɛ atɛnŋ anyi mɔ anɔ ŋnɔ le yi gbezan kpɛtɛ mɛ. Alɔzu sɛnŋsɛnŋ cɛ ciwo woaɖu dɔ Izraɛliviwo kpɔɛni mɔ agbe nyi enukɔkɔɛ. Nɔ woabu Agbenatɔ lɔɔ, woɖo aze nɔ enuwana ɖekpokpui ci yí atɛnŋ adɔ wowo kpena ɖe abu yi gbe.
it-2 892
Ehun
Mawu wa agbetɔ mɔ yi le se vivi nɔ agbe ci yeni, yí abiɔ kɔnŋta mɛɖekpokpui ci yí axɔ agbe lɔ le shi. Ecɛ ze hwenu Mawu nu nɔ amɛwutɔ Kayɛn mɔ: “Nɔvio hùn le axwa dokɔ nɔ ŋ so nyigban mɛ.” (Gɔnmɛjeje 4:10) Mɛ ci yí xakɔ yi kpena, yí jikɔ ku ni alo nukɔ yi nyɔ sɔ xokɔ ɖyi yi alo vayi kan ŋsu do nu ni mɔ yiwa ŋɖe yí edɔ yi gbe ɖo afɔku mɛɔ, woado hwɛ amɛ lɔ do nɔviɛ hun ŋci.—1 Ese Wema 19:16; 2 Ese Wema 19:18-21; 1 Ʒan 3:15.
Bibla mɛ nuveviwo
it-2 1106 mm. 1
Kojoɖoxu
Eju lɔ gbonu yí kojoɖoxu lɔ nɔnɔ. (2 Ese Wema 16:18; 21:19; 22:15, 24; 25:7; Ruta 4:1) Nɔ womɔ ‘agbonuɔ,’ texwe ɖe ci woɖo ɖɛ do agbo lɔ gbɔ le ejuɔ mɛ nyɔ wonukɔ. Agbonu yí amɛwo bɔnɔdo yí wohlɛnnɔ Ese lɔ nɔ wo yí gbenunɔ gbeta ciwo wosɔ nɔ wo. (Nexemi 8:1-3) Le agbonuɔ, enɔnɔ fafɛɖe mɔ woakpɔ kunuɖetɔwo nɔ amɛwo domɛ nyɔwo shigbe, enusasanyɔwo alo nubuwo nɛ, ɖo amɛ sugbɔ ɖonɔ juɔ mɛ yí tonɔ to ŋnɔ le ŋkekeɛ pleŋ mɛ. Ahanke ci enyi jugbaja yí woaɖo kojo lɔ lɛɔ, edɔnɔ yí kojoɖotɔwo jenɔ aye yí ɖonɔ kojo jɔjɔɛ. Woɖonɔ texwe ɖe ɖɛ le shini yí sɔ agbo lɔ gbɔ le fini kojoɖotɔwo atɛnŋ avoŋ le aɖo kojo. (Job 29:7) Samiɛli dannɔ to Betɛli kanmɛ, Gigali, koɖo Mispa yí “ɖonɔ kojo yi kplɔnɔ Izraɛlitɔwo so ejugan hunnɔ mɛ.” Égbeɖonɔ kojo le Rama fini yi xwe le.—1 Samiɛli 7:16, 17.
2-8 AOÛT
MAWU NYƆ MƐ DƆKUNUWO | 2 ESE WEMA 22-23
“Lé Seɛ dasɛ do mɔ Yehowa lenɔ bu nɔ elanwo”
it-1 868
Agban
Le sasa hwenuwoɔ, wozannɔ elanwo yí sɔ hɛnnɔ agbanwo. Wonu nɔ Izraɛliviwo mɔ nɔ wokpɔ sɔkɛtɛ ci yí nyi mɛ ci yí xakɔ wo tɔ yí agban kpinkɔ yí eci gɔnmɛ niɔ, woŋgbebɛdɛ mɛ ni yí aso o, vɔ ‘wo le cu agban lɔ le ji.’ (Hunhun 23:5)
it-1 635 mm. 2
2 Ese Wema
Wobu elanwo can tɔ kpɔ le 2 Ese Wema tɔ lɔ mɛ. Wodo se nɔ Izraɛliviwo mɔ woŋgbesɔ xevi le yi tɔ mɛ o, ɖo enu ci yí dɔ woatɛnŋ ali yí nyi mɔ le ele nɔ mɔ yeaglɔn ta nɔ ye viwo yí enyi jɔjɔmɛnu. Woaɖeŋ asɔ xevi vi lɔwo, vɔ woatashi xevinɔ lɔ nɔ ashi. Ecɛ awɛ mɔ atɛnŋ agbevaɖo aʒin buwo keŋ axo vi. (2 Ese Wema 22:6, 7) Agbledetɔ ɖe deɖo asɔ sɔkɛtɛ koɖo nyibusu doju mɔ wo le de agble o, keŋ nɔ elan ci yí kle wu ŋgbekpe fun o. (2 Ese Wema 22:10) Wodeɖo asɔ enu bla nu nɔ nyibusu hwenu etokɔ jinuku o. Ðo nɔ wowɛ ahan ɔ; shive aciciɛ vɔ ŋɖuɖu le gbɔ gan yí dasɛnŋ aɖui o, yí agbele ŋsɛn zankɔ.—2 Ese Wema 25:4.
w03 10/15 32 mm. 1-2
‘Míŋgbesɔ míwoɖekiwo do acikplakɔ masɔgbe gɔnmɛ o’
SHIGBE lé èkpɔkpɔɛ le lɛ nɛɔ, esɔkpotɔnɔ lɔ koɖo nyibusu lɔ ci yí le dɔ wakɔ doju le fun kpekɔ sugbɔ. Acikplakɔ ci wosɔ kplakɔ nɔ wo kuve lɔ nyi ci wowa nɔ elan ciwo yí ɖo ganganmɛ ɖekɛ koɖo ŋsɛn ɖekɛŋmɛ. Vɔ ci enyi eyi wovasɔ ku kɔ nɔ wowo kuve lɔɔ, edɔ wokpekpeɛ fun. Ci elan ciwo hɛnnɔ agban nyɔnyɔ le veviɖe nɔ Mawuɔ, énu nɔ Izraɛliviwo mɔ: “Ŋgbesɔ aci kpla kɔ nyibusu koɖo esɔkɛtɛ nɔ woade agble doju o.” (2 Ese Wema 22:10, NWT) Gɔnmɛɖose cɛ yi nɔ nyibusu koɖo esɔkpotɔnɔ zanzan doju hɛnnɛ.
Nɔ anyɔɔ, agbledetɔ deɖo asɔ yi lanwo do efunkpekpe cɛ hanci mɛ o. Vɔ nɔ devaɖo nyibusu amɛveɔ, éhɛn asɔ elan amɛve ciwo yí le shi doju mɔ wo le wa dɔ. Ele shigbe mɔ enu ci exwe sanŋdi 19 tɔ mɛ glɛshinɔ cɛ ci yí le enutata lɔ ji ɖo mɔ yeawa nɛ. Ci ganganmɛ koɖo ŋsɛn wowo tɔ denyi enuɖekɛɔ, elan ci yí kle wu lɔ ɖo ado gbla keŋ anɔ agbanu koɖo yi kpena, yí agban aci kɔ ji nɔ ci yí ɖo ŋsɛn wu lɔ.
Bibla mɛ nuveviwo
it-1 629
Efɛn, Efɛntɔnɔ
Efɛn nyi ŋɖe ci woɖu do amɛ, ci woɖo acu alo atrɔ sɔ jo. Le blema Izraɛliɔ, hwenu yí eho wa aya nɔ amɛwo yí woɖunɔ fɛn koŋ. Nɔ Izraɛlivi ɖe ɖu fɛn ɔ, awobi enyi yí le kɔ ni. Ðo étrɔnɔ hwashi nɔ mɛ ci eɖu fɛn do. (Elododo Wema 22:7) Eyi taɖo Mawu nu nɔ yi mɛwo mɔ wo le wa xomɛvu yí wodale wowoɖekɛ tɔ nyakɔ hwenu wodokɔ ho nɔ wowo kpena Izraɛlivi ci yí le ʒan mɛ o, yí azɔn do awobi ci yí xui nu keŋ aɖu le do ji o. (Hunhun 22:25; 2 Ese Wema 15:7, 8; Ehajiji Wema 37:26; 112:5) Vɔ wohɛn woaxɔ hovi do ho ji le mɛdruvi yɛ shi. (2 Ese Wema 23:20) Ʒuifu numɛɖetɔwo nu mɔ nɔ mɛɖe do ho asɔ wa ajɔɔ, woaxɔ hovi do ho ji le shi, vɔ wodado ho nɔ mɛ ci yí le ʒan mɛ yí axɔ hovi do ho ji o. Enu ci yí jɔnɔ blaŋblaŋ yí nyi mɔ, mɛdruwo denɔnɔ Izraɛli jinjinɖe o yí kabakabaɔ, wonyinɔ ajɔdotɔwo. Eyi taɖo wotɛnŋ ɖo ŋkuvi do wo nu mɔ woacu hovi do ho ji ɖo wowoŋtɔwo can donɔ ho nɔ amɛwo yí xɔnɔ hovi do ho ji.
9-15 AOÛT
MAWU NYƆ MƐ DƆKUNUWO | 2 ESE WEMA 24-26
“Lé Yehowa bu nyɔnuwo tɔ kpɔ le Seɛ mɛ do”
it-1 874 mm. 4
Nyɔnu
Asu koɖo ashi kpɔnɔ nyɔna le ahwawawa sewo ŋtɔkpu can mɛ, ɖo ŋsu ci yí ɖe nyɔnu yoyu awa xwe ɖeka gbɔxwe ayi ahwa. Ecɛ adɔ ŋsu lɔ koɖo ashiɛ aji vi ci yí anyi akɔnfɛ gangan ɖeka nɔ nyɔnu lɔ nɔ ŋsu lɔ devali o alo nɔ evayi jɔ mɔ éku ahwaku.—2 Ese Wema 20:7; 24:5.
it-1 994 mm. 8
Eklisasa
Eze petii mɔ toto nywi cɛ ci Mawu wa nɔ wamɛnɔ ciwo le nyigban ji nyɔ, ɖo edɔ wowanɔ xomɛvu. Ahanke edɔ wodenyanɔ amɛɖekɛ tɔ o yí wogbeɖonɔŋ do Yehowa nu mɔ yɛayra yewo. Ele ahan gan, de ɖyiɖɔnɔ yí eji mɔ wo le nyi o. Enyɔ cɛ ci Davidi nu dasɛ yi: “Ŋ de kpɔ Mawu yí É ɖekɔ le amɛ nywiwo nu gbeɖe o. Ŋ de kpɔ amɛ nywiwo viwo yí wo byɔbyɔ ŋɖuɖu gbeɖe o.” (Ehajiji Wema 37:25) Nɔ wamɛnɔwo lɔn yí wa do toto ci wowa nɔ wo le Seɛ mɛ yí wa dɔ sɛnsin ɔ, shive daci wo o, yí wowoŋtɔwo fin wowo viwo fin, dabiɔ ŋɖuɖu gbɔxwe aɖu o.
w11 3/1 23
Mínyaa?
Le blema Izraɛliɔ, nɔ ŋsu ɖe dewa evi ŋsuvi ɖɛ gbɔxwe yí kuɔ, wokpɔnɔ emɔ mɔ nɔviɛ asɔ kpo ashiɛ keŋ nɔ woaji vi ci yí adɔ ŋsu ci yí ku lɔ ŋkɔ dagu o. (Gɔnmɛjeje 38:8) Le yiyimɛɔ, wovasɔ toto cɛ lɔ do Moizi Seɛ mɛ. (2 Ese Wema 25:5, 6) Enu ci Boazi wa ci nyɔ wonu do Ruta wema mɛ dɔ mìkpɔɛ nya mɔ, nɔ mɛ ci yí ku nɔjiji ɖe deliɔ, ŋsu bu ci yí le xomu lɔ mɛ hɛn asɔ kpo nyɔnu lɔ.—Ruta 1:3, 4; 2:19, 20; 4:1-6.
Ekposɔsɔ amɛ nɔvi shi toto lɔ kpɔtɔ li wowanɔ le Yesu hwenu. Ðo shigbe lé Maki 12:20-22 nui nɛɔ, Sadusitɔwo xo nuxu so nu hwehunnɔnu. Le exwe sanŋdi ŋkɔtɔ mɛɔ, xolɔlɔ ŋwlɛtɔ Flavius Josephus ci yí nyi Ʒuifu nu mɔ toto cɛ na yí xomu lɔ ŋkɔ degunɔ o, enunɔamɛshi xomu lɔ tɔ cinɔ xomu lɔ mɛ yí egbenyi etaglɔnnu nɔ kposhuwo. Hwehunnɔnuɔ, nyɔnuwo deɖunɔ cinɔ nɔ wowo su nuwo o. Vɔ, ɖevi ci woji le ekposɔsɔ toto lɔ mɛ ɖunɔ cinɔ nɔ mɛ ci yí ku nuwo.
Bibla mɛ nuveviwo
it-1 657 mm. 5
Nɔnɔgbegbe
Nɔnɔgbegbewema. Mìdeɖo akpɔ do lé wowa afɛn yí zan nɔnɔgbegbe se ci yí le Moizi Se lɔ mɛ le yiyimɛ amɔ, yi le fafɛɖe nɔ Izraɛli ŋsu ɖe mɔ agbe ashiɛ o. Gbɔxwe agbe ashiɛɔ, éɖo aɖe afɔ ɖewo. Ele veviɖe mɔ aŋwlɛ wema, “nyɔlun gbégbé wemawo, yi á sɔ wo jo ni. Eyi, á nyi tí le yi xwe mɛ.” (2 Ese Wema 24:1) Ci Enuŋwlɛŋwlɛ lɔwo denu nyɔ buwo so lé nɔnɔgbegbe lɔ yinɔ do nu can ɔ, ele shigbe afɔ ciwo woagbeɖe ɖeka yí nyi woavayi kpɔ ŋsu ciwo woɖo ɖɛ yí wowo tenɔkpɔ mɔ yewoana woagbetrɔ anɔ ju. So hwenu ŋsu lɔ atɔ nɔnɔgbegbewema lɔ dradra do keke aje hwenu woagbe nɔnɔ le se ŋkɔ nyi hwenu ɖeka ci mɛ agbetɛnŋ atrɔ abu tamɛ kpɔ so gbeta ci esɔkɔ lɔ nu. Woɖo akpɔ enu ŋtɔŋtɔ ci yí adɔ woagbe nɔnɔ yí woɖo azɔn do afɔɖeɖe lɔwo ji pɛpɛpɛ. Nɔ wowɛ ahan ɔ, adɔ yí lanmɛ agble nɔ mɛ ci yí le hwlɛndoji mɔ yeagbe ye shiye. Egbeglɔnnɔ ta nɔ nyɔnuwo hɛnnɛ. Enuŋwlɛŋwlɛ lɔwo dexo nuxu so enu ciwo yí nɔnɔ “nɔnɔgbegbewema” lɔ mɛ nu o.
16-22 AOÛT
MAWU NYƆ MƐ DƆKUNUWO | 2 ESE WEMA 27-28
‘Yayra cɛwo pleŋ awugan eo’
w10 12/15 19 mm. 18
Xɔ shicuwo to Efyɔ ci Mawu gbɔngbɔn kplɔkɔ ji!
18 Le nyɔnɔnwi mɛɔ, etoɖoɖo Mawu yí nyi mɔ mìabunɔ tamɛ kpɔ veviɖe so enyɔ ciwo yí le yi Nyɔ lɔ mɛ koɖo gbɔngbɔnmɛ ŋɖuɖu ci enakɔ mì nu. (Matie 24:45) Yi gɔnmɛ yí gbenyi kpɔ mɔ, mìawanɔ do enyɔ ciwo Mawu koɖo Eviɛ nu ji. Yesu nu mɔ: “Dé nyi kpɔ mɔ amɛshamɛ ci yí yɔnɔ Ŋ mɔ, ‘Axwetɔ, Axwetɔ’ ɔ, wowo pleŋ yí a ɖo jeŋkwi fyɔju lɔ mɛ duudan o. Vɔ, á kudo amɛ ci ɖekɛ kpaŋ yí wanɔ do Edanyɛ ci yí le jeŋkwi mɛ nudrodro ji.” (Matie 7:21) Etoɖoɖo Mawu gɔnmɛ yí gbenyi kpɔ mɔ, woasɔ amɛɖeki ɖo gɔnmɛ nɔ toto ci ewa. Toto lɔ yí nyi woaɖo to hamɛmɛshinshin ciwo yí nyi “enunana” le Kristo hamɛ lɔ mɛ.—Efezitɔwo 4:8.
w01 9/15 10 mm. 2
Yehowa yayrawo wugan eoa?
2 Ebre dɔwanyɔ ci gɔnmɛ woɖe mɔ “kpɔtɔ aɖoɖoɔ to” le 2 Ese Wema 28:2 gɔnmɛ yí nyi woakpɔtɔ awawa nu. De hweɖewonu kpoŋ yí Yehowa mɛwo aɖonɔ to yi o, vɔ woɖo akpɔtɔ aɖonɔ to yi gashiagamɛ le wowo gbemɛ. Nɔ wowɛ ahan keŋ gbɔxwe Mawu ayra wo awugan wo. Wokpɔnɔ Ebre dɔwanyɔ ci gɔnmɛ woɖe mɔ ‘awugan’ mɔ yɛnyi adedada nyɔgbe. Yi gɔnmɛ yí nyi “woanyanya ŋɖe keke alɔ ali nɔ amɛ” alo “woakpɔ enu lɔ.”
w10 9/15 8 mm. 4
Ji yayra Yehowa tɔ veviɖe
4 Nɔnɔmɛ ci yí ale Izraɛliviwo shi yí anyi wose tonuɔ? Mawu Se lɔ nu nɔ wo mɔ nɔ wodesɛn Mawu koɖo ‘jijɔ koɖo eji kpɔ jijɔɔ,’ ave nu. (Hlɛn 2 Ese Wema 28:45-47, NWT.) De ci ele mɔ woaɖo to Yehowa taɖo mìɖonɔ to yi o, ɖo elanwo alo gbɔngbɔnvɔnwo can wanɔ ahan hɛnnɛ. (Maki 1:27; Ʒaki 3:3) Nɔ mìlɔn Mawu nyɔnɔnwi mɛ tɔɔ, mìaɖonɔ to yi so jimɛ. Nɔ mìɖonɔ to yi ahan ɔ, mìaɖonɔ to yi koɖo jijɔ yí axɔɛ se mɔ yi sewo degbɔnnu o yí “a kando ji mɔ Mawu a na akpedonu amɛ ciwo yí ji mɔ yewo a kpɔɛ nyɔnɔnwitɔ.”—Ebretɔwo 11:6; 1 Ʒan 5:3.
Bibla mɛ nuveviwo
it-1 364
Lixo
Yehowa do se nɔ Izraɛliviwo mɔ woŋgbeɖɔli texwe nɔ enu ci wosɔ do lixo koɖo mɛɖe o. (2 Ese Wema 19:14; gbekpɔ Elododo Wema 22:28.) Woasɛn kpɛn nɔ mɛɖe ci yí ‘ɖɔli texwe nɔ enu ci wosɔ do lixo nɔ yɛ koɖo yi kpena.’ (2 Ese Wema 27:17) Ci enyi mɔ jinuku ci nyigban ɖe na nyinɔ mɛ ci yí wa nyigban lɔ ɖɛ tɔɔ, nɔ mɛɖe ɖɔli texwe nɔ nyigban lɔ lixo niɔ, anyi exɔkɔ enu ci yi kpena aɖu anɔ agbe le shi. Le blema hwenuwoɔ, wokpɔnɔ mɛɖe ci yí wa nu ahan mɔ yɛfi fi. (Job 24:2) Vɔ mɛ ciwo yí wawa do ese ji ci dewanɔ ŋɖe nɔ gbannɔ se cɛ. Wonu so Ʒude fyɔvi ciwo ni le Oze hwenu nu mɔ, wonyi mɛ ciwo yí ɖɔnɔli texwe nɔ enu ci wosɔ do lixo nɔ wowo koɖo wowo kpena.—Oze 5:10.
23-29 AOÛT
MAWU NYƆ MƐ DƆKUNUWO | 2 ESE WEMA 29-30
“Yehowa sɛnsɛn degbɔnnu sugbɔ o”
w09 11/1 31 mm. 2
Yehowa mɔ enu ci dro mɛɖekaɖeka yí awa
Enugbɔnnu enyi mɔ mìanya enu ci Mawu jijiɛ mɔ mìwo le wa keŋ awɛa? Moizi nu mɔ: “Enuɖoɖo ci yí ŋ na mí egbɛ de nyi enu sɛnŋ nɔ mí o. Dé jinjin le mí gbɔ o.” (2 Ese Wema 30:11) Yehowa damɔ mìwo le wa enu ci mìdaɖeŋ awa o. Enu ciwo mìawa dru yí enunɔ mɔ mìwo le wa yí wo wawa degbɔnnɔnu nɔ mì o. Mìgbemɔnɔŋje enu ciwo emɔ mìwo le wa lɔwo mɛ. Deʒan mɔ mìayi “jeŋkwi mɛ” alo azɔn mɔ ayi “ago xlɔtɔ ji nɔ axu” gbɔxwe anya enu ci Mawu mɔ mìwo le wa o. (2 Ese Wema 30:12, 13) Bibla dre lé mìɖo anɔ agbe do mɛ hlɛnhlɛnhlɛn nɔ mì.—Mishe 6:8.
w09 11/1 31 mm. 1
Yehowa mɔ enu ci dro mɛɖekaɖeka yí awa
“Ŋ VƆNNƆ mɔ ŋdavanɔ gbeji nɔ Yehowa o, yí vɔnvɔn cɛ desɔgbe o.” Enyɔ cɛwo yí nɔvinyɔnu ɖeka ci yí to nuwo mɛ le yi vihwɛmɛ nu. Ékpɔnɔ yiɖeki mɔ yedatɛnŋ akpɔtɔ awakɔ nunywi o. Ahan enyi nyao nɛa? Nyɔnɔnwi enyi mɔ enu ciwo mɛ mìto vayi sa dɔ mìwo tɔ vɔ yí mìdaɖeŋ agbewa nunywia? Oo. Yehowa Mawu na mì amɛɖekishinɔnɔblɔɖe, eyi taɖo mìatɛnŋ asɔ gbeta so lé mìji mɔ mìanɔ agbe do nu. Yehowa ji mɔ mìwo le sɔ gbeta nywiwo, yí yi Nyɔ, Bibla nu lé mìawɛ do nɔ mì. Kpɔ enyɔ ciwo Moizi nu le 2 Ese Wema eta 30 lɔ mɛ ɖa.
w09 11/1 31 mm. 4
Yehowa mɔ enu ci dro mɛɖekaɖeka yí awa
Nɔ mìsɔ gbeta ɖe ɖe, enɔnɔ veviɖe nɔ Yehowaa? Ɛa, enɔnɔ veviɖe ni! Gbɔngbɔn kɔkɔɛ lɔ na Moizi nu mɔ: “Mí sɔ agbe!” (2 Ese Wema 30:19) Lé mìawɛ asɔ agbeɔ? Moizi nu mɔ: “Mí ɖo a lɔn Tɔhonɔ míwo Mawu, yi a bui. Mí ŋgbe so gbiɖi ɖɛ gbeɖe o!” (2 Ese Wema 30:20) Nɔ mìva lɔn Yehowaɔ, mìaji mɔ mìaɖo to yi yí anɔ gbeji ni nɔ ŋɖeŋɖe gbejɔjɔ can. Nɔ mìwa nu ahan ɔ, anyi mìsɔ agbe. Agbe ci yí nyi agbe nywitɔ ci mìanɔ gbɛ koɖo agbe mavɔmavɔ ci mìavanɔ le Mawu xexe yoyu ci yí gbɔgbɔ mɛ.—2 Piɛ 3:11-13; 1 Ʒan 5:3.
Bibla mɛ nuveviwo
it-2 453 mm. 3
Eto
Yehowa to yi sɛntɔwo ji yí nu so Izraɛlivi etotritɔ, tonumasetɔwo nu mɔ wonyi mɛ ciwo ‘towo nyi tɔtɔnɔ.’ (Ʒeremi 6:10; Edɔwawawo 7:51) Ele shigbe ŋɖe yí cu eto lɔwo nɔ wo ci yí dɔ wodegbeseseɛ tonu o. Yehowa dehun wowo towo o. Yehowa nanɔ eto ci yí senɔ nu gɔnmɛ yí senɔ tonu, mɛ ciwo yí jinni. Vɔ etanɔshi tonumasetɔwo gbɔngbɔnmɛ towo wotrinɔ. (2 Ese Wema 29:4; Rɔmatɔwo 11:8) Apotru Pɔlu nu ɖɛ mɔ, gaɖeka mɛ avava yí mɛ ciwo yí nunɔ mɔ yewonyi Kristotɔwo atrɔ le ŋgbe nɔ xɔse adodwi lɔ. Wodaji mɔ yewoase nyɔnɔnwi ci yí le Mawu Nyɔ lɔ mɛ o, vɔ woaji mɔ yewo towo le se enyɔ ciwo ‘woji mɔ yewoase’ yí woaɖonɔ to enukplamɛtɔ ŋsukantɔwo. (2 Timɔte 4:3, 4; 1 Timɔte 4:1) Nɛnɛke mɛɖe towo tɛnŋ “ke” nɔ ese enyɔ vɔnwo vevitɔ awobi nyɔwo.—1 Samiɛli 3:11; 2 Efyɔwo 21:12; Ʒeremi 19:3.
30 AOÛT–5 SEPTEMBRE
MAWU NYƆ MƐ DƆKUNUWO | 2 ESE WEMA 31-32
“Kpla nu le kpɔwɛnyɔ ciwo yí le gbɔngbɔnmɛha ɖeka mɛ”
“Na eji blebuŋ nɔ mavɔn nɔ ao ŋkɔ”
8 Ci ekpɔtɔ hwɛɖeka Izraɛliviwo aɖo Gbeɖu Nyigban lɔ jiɔ, Yehowa kpla eha ɖeka Moizi. (2 Ese. 31:19) Moizi can ɖo akpla eha lɔ jukɔn lɔ. (Hlɛn 2 Ese Wema 32:2, 3, NWT.) Nɔ mìbu tamɛ kpɔ so kpukpui 2 koɖo 3 nuɔ, eze petii mɔ Yehowa deji mɔ ye ŋkɔ aci wlawlamɛ o, alo ŋkɔ lɔ le kɔkɔɛɖe keke wodayɔɛ o. Éji mɔ amɛshiamɛ anya ye ŋkɔ! Mɔnukpɔkpɔ enyi nɔ Izraɛliviwo hwenɔnu mɔ Moizi kpla nu wo so Yehowa koɖo Yi ŋkɔ gangan lɔ nu! Enu ci Moizi kpla wo na wowo xɔse sɛnŋ yí do ŋsɛn wo shigbe lé eshijaja na aci shinnɔ hannɛ. Lé mìawɛ yí mìwo nyɔwo can awa dɔ do mìwo nukplaviwo jiɔ?
9 Nɔ mìɖekɔ kunu so axomɛ yi axomɛ alo le jugbajaɔ, mìatɛnŋ azan Bibla yí adasɛ Mawu ŋkɔ Yehowa nɔ amɛwo. Mìatɛnŋ ana wema nyakpɔkpɔ ɖe wo, axo video nywi ɖewo nɔ wo alo adasɛ mìwo siti ci yí kanfukɔ Yehowa nɔ wo. Nɔ mìle dɔmɛ, suklu alo nɔ mìxɔ mɔɔ, mìatɛnŋ aji emɔ ciwo ji mìato yí axo nuxu so mìwo Mawu amɛlɔntɔ lɔ koɖo Mɛ ciŋmɛ enyi nu. Mìatɛnŋ axo nuxu nɔ wo so enudojijɔnamɛ ciwo Yehowa avawa nɔ mì koɖo susu ci eɖo do nyigban lɔ nu. Nɔ wose nyɔ cɛwo zeɖekaɔ, atɛnŋ ana woado jeshi lé Yehowa lɔn mì sugbɔ do. Nɔ mìdrakɔ nyɔnɔnwi ci yí kudo mìwo Da amɛlɔntɔ lɔ nuɔ, anyi mìwakɔ akpaxwe ɖe le yi ŋkɔ ŋcikɔkɔ mɛ. Mìkpekɔdo amɛwo nu yí womɔmɔŋje mɛ mɔ wokan ŋsu sugbɔ so Yehowa nu nɔ yewo. Enu ci mìkplakɔ amɛwo le Bibla mɛ yí nyi enu ci yí afa akɔn nɔ wo sɔwu.—Ezai 65:13, 14.
w09 5/1 14 mm. 4
Èsenɔ kpɔwɛnyɔ ciwo yí le Bibla mɛ mɛa?
Bibla gbesɔ Yehowa sɔnɔ koɖo enu ciwo mɛ agbe dele o. Eyɔɛ mɔ “Ekpe Izraɛlitɔ” koɖo “Bexu.” (2 Samiɛli 23:3; Ehajiji Wema 18:2; 2 Ese Wema 32:4) Nyi yí dɔ wosɔ Yehowa sɔ sɔ koɖo enu cɛwoɔ? Shigbe lé ekpe lonɔ kpeŋkpeŋ yí lonɔdo sɛnŋsɛnŋ ɖe nɛɔ, ahanke Yehowa atɛnŋ anyi bexutɔxu sɛnŋ ɖeka nɔ eo nɛ.
w01 10/1 9 mm. 7
Ðyi Yehowa nɔ èle ekpla nakɔ viowo
7 Bu tamɛ kpɔ so lé Yehowa lɔn Izraɛliviwo hwecinu ewakɔ nu koɖo wo ɖa. Moizi sɔ enusɔdredonunu nywi ɖeka dre lɔnlɔn ci Yehowa ɖo nɔ Izraɛli ju yoyu ci woɖoɖoɔ lɔ. Mìhlɛn mɔ: “Ehɔ́n vinɔ̀ lɔ nyá eviɛwo tí le atrɔ mɛ nɔ wo a kpla zozo. É zonɔ koɖo yi viwo yí cɔn wo ji. Tɔhonɔ le shigbe xevi lɔ ɛnɛ. Tɔhonɔ ɖekɛ kpaŋ yí kplɔnɔ [Ʒakɔbu].” (2 Ese Wema 32:9, 11, 12) Nɔ ehɔn vinɔ ɖe akpla zozo eviɛwoɔ, ‘ehunhunnnɔ atrɔ lɔ,’ yí atɔ awawo xoxo keŋ nɔ viɛwo akpɔ le gbɔ awa. Nɔ ehɔnvi ɖe zo to le atrɔ lɔ mɛ, ci blaŋblaŋ ehɔn vinɔ ɖonɔ do ekpe yiji tamɛɔ, enɔlɔ kenɔ yi wawo yí ‘acɔn’ ji. Nɔ evale shigbe mɔ ejikɔ aje nyigban hannɛɔ, ehɔn vinɔ lɔ zonɔ va gɔnmɛ yí kɔɛni do yi “wawo” ji. Ahanke Yehowa lɔn Izraɛli ju yoyu lɔ yí le bu nɔ wo nɛ. Éna wo Moizi Se lɔ. (Ehajiji Wema 78:5-7) Mawu le bu nɔ wo haan, yí le gbesɔsɔ yí hwlɛnnɔ wo gan nɔ woɖo xaxawo mɛ.
Bibla mɛ nuveviwo
w04 9/15 27 mm. 11
Enyɔ vevi ciwo yí le 2 Ese Wema tɔ mɛ
31:12. Ðeviwo ɖo anɔ nyinɔnɔ do mɛgan xoxuwo gbɔ le hamɛ bɔbɔwo mɛ yí aji mɔ yewoase tonu yí akpla nu.