Na nɔ ao Kristotɔwo mɔkpɔkpɔ lɔ akpɔtɔ asɛnŋ

1. Mɔkpɔkpɔ ci Yehowa na mìɔ?

YEHOWA na mì emɔkpɔkpɔ nywi ɖeka ci yí nyi agbe mavɔ nɔnɔ. Mɛɖewo ɖokɔ ŋkuvi mɔ yewoavanɔ agbe tɛgbɛɛ le jeŋkwi mɛ yí anyi gbɔngbɔn mɛ nuwawa ciwo datɛnŋ aku o. (1 Kor. 15:50, 53) Amɛ sugbɔ ɖokɔ ŋkuvi mɔ yewovanɔ agbe mavɔ le nyigban ji yí yewoanɔ lanmɛsɛn mɛ, yewodagbeble gbeɖe o yí yewoanɔ jijɔkpɔkpɔ mɛ. (Enyɔ. 21:3, 4) Nɔ jeŋkwi mɛ alo nyigban ji mìɖoɖoɔ ŋkuvi mɔ mìavanɔ agbe tɛgbɛɛ le can ɔ, mìwo mɔkpɔkpɔ lɔ ve nɔ mì.

2. Nyi ji mìwo mɔkpɔkpɔ lɔ nɔ te doɔ, yí nyi yí taɖo mìatɛnŋ anu ahan ɔ?

² Woatɛnŋ aɖe nyɔgbe “mɔkpɔkpɔ” ci wozan le Bibla mɛ gɔnmɛ mɔ “woaɖoɖoɔ ŋkuvi enunywiwo mɔ woava.” Mìatɛnŋ akando esɔ mɛ mɔkpɔkpɔ mìwotɔ lɔ ji keŋkeŋ ɖo Yehowa yí ɖo gbe nɔ mì. (Rɔm. 15:13) Mìnya egbe ciwo eɖo nɔ mì yí mìgbenya hɛnnɛ mɔ ewanɔ do egbe ciwo eɖo ji gashiagamɛ. (Amh. 23:19) Mìkando ji mɔ Yehowa ɖo edro koɖo ŋsɛn awa do enyɔ ɖekpokpui ci enu ji. Denyi enu ci mìbukɔ kpɔ alo enu ci mìji mɔ le jɔ ji yí mìwo mɔkpɔkpɔ lɔ nɔ te do o; vɔ enuŋtɔŋtɔ koɖo nyɔnɔnwi ji yí mìwo mɔkpɔkpɔ lɔ nɔ te do.

3. Nyi nu mìaxo nuxu so le nyɔta cɛ mɛɔ? (Ehajiji Wema 27:14)

³ Mìwo Da ci yí le jeŋkwi mɛ lɔn mì yí ji mɔ mìwo le kando ye ji. (Hlɛn Ehajiji Wema 27:14.) Nɔ mɔkpɔkpɔ ci mìɖo do Yehowa nu sɛnŋ ɔ, mìakpe ji ado ji le tetekpɔ ɖekpokpui mɛ yí agbe dɔn yí ale jijɔ mɛ nɔ ŋɖekpokpui gbejɔjɔ do mì ji can. Ecɛyɛɔ, mìakpɔ lé mɔkpɔkpɔ cɛ glɔnnɔ ta nɔ mì do. Ŋkɔtɔɔ, mìatrɔ akpɔ lé mìwo mɔkpɔkpɔ lɔ le shigbe sege koɖo gakuku nɛ do. Yi goduɔ, mìakpɔ lé mìawɛ ado ŋsɛn mìwo mɔkpɔkpɔ lɔ.

MÌWO MƆKPƆKPƆ LƆ LE SHIGBE SEGE NƐ

4. Lé mɔkpɔkpɔ le shigbe sege nɛ doɔ? (Ebretɔwo 6:19)

⁴ Le wema ci apotru Pɔlu ŋwlɛ ɖaɖa Ebretɔwo mɛɔ, ésɔ mìwo mɔkpɔkpɔ lɔ sɔ koɖo sege alo gaka lodo. (Hlɛn Ebretɔwo 6:19.) Ci Pɔlu zɔnnɔ emɔ blaŋblaŋ to axu jiɔ, eyi dɔ énya mɔ wozannɔ segewo asɔ lé tɔjihun ɖɛ, nɔ tɔjihun lɔ anɔ texwe ɖeka nɔ ŋgbete le fini ele o. Hweɖekanuɔ, éɖo tɔjihun yikɔ yí jihɔntwi ɖeka bla le axu lɔ ji. Hwenu yí jihɔn lɔ xokɔɔ, ékpɔ tɔjihunkutɔ lɔwo yí wodɔ segewo ɖaɖa shi lɔ mɛ keŋ nɔ tɔjihun lɔ ŋgbeyikɔ avayi xo ekpewo nɔ woaje fɔku o. (Edɔ. 27:29, 39-41) Shigbe lé sege lenɔ tɔjihun do texwe ɖeka nɛɔ, mìwo mɔkpɔkpɔ lɔ kpenɔdo mì nu yí mìkpɔtɔ nɔnɔ Yehowa gbɔ yí mìdesonɔ gbeɖi ɖɛ o, nɔ mìtokɔ nɔnɔmɛ sɛnŋsɛnŋwo mɛ can. Mìwo mɔkpɔkpɔ sɛnŋ lɔ kpenɔdo mì nu yí mìtonɔ cukaɖa ciwo yí le shigbe jihɔntwi sɛnŋsɛnŋwo mɛ ɖo mìkando ji mɔ fafa hwenu ava sabaaɖe yɛ. Ðo ŋwi mɔ Yesu kanxle mì mɔ woaci yumɛ nɔ mì. (Ʒan 15:20) Eyi taɖo tamɛbubukpɔ so egbe ciwo yí Yehowa ɖo nɔ mì so esɔ mɛ nu kpenɔdo mì nu yí mìkpɔtɔ sinni.

5. Ci Yesu nya mɔ yejikɔ aku can ɖe, lé mɔkpɔkpɔ do ŋsɛn yi doɔ?

⁵ Bu tamɛ kpɔ so lé mɔkpɔkpɔ kpedo Yesu nu yí ekpɔtɔ nɔ gbeji ci enya mɔ woado vevisese nɔ ye yí awu ye can. Le Pantekoti xwe 33 K.H. jiɔ, apotru Piɛ yɔ enyɔ so enyɔnuɖɛ ci yí le Ehajiji Wema mɛ ci yí dre lé Yesu voŋ le yiɖeki mɛ yí ɖo kankandoji do. Émɔ: “Anyi lankpu a le ŋkuɖoɖomɛ, ɖo da tashi Anyi se [alo ekla] le ekudi o. Da tashi Ao Mɛ Kɔkwɛ cɔ a nyinyɔ le yɔdumɛ o. . . . È gogo Ŋ, yí ejijɔ Ŋ sugbɔ.” (Edɔ. 2:25-28; Eha. 16:8-11) Ci Yesu nya mɔ yeaku can ɔ, ékando ji keŋkeŋ mɔ Mawu afɔn ye yí yeagbevanɔ ju koɖo ye Daye le jeŋkwi mɛ.—Ebre. 12:2, 3.

6. Enyɔ ci yí nɔviŋsu ɖeka nu so mɔkpɔkpɔ nuɔ?

⁶ Mìwo Kristotɔwo mɔkpɔkpɔ lɔ kpedo nɔviŋsu koɖo nɔvinyɔnu sugbɔ nu yí wodo ji. Mìakpɔ nɔviŋsu Leonard Chinn ci yí nɔ Angleterre kpɔwɛ; ényi nɔviŋsu ɖeka ci yí nɔ gbeji. Le Xexemɛ Hwa Ŋkɔtɔ mɛɔ, wocui do gakpa mɛ ɖo egbe mɔ yedayi ahwa o. Wocui do amɛɖekɛgakpa mɛ na nɔ wleci amɛve, yí goduɔ, wovaɖo edɔ sɛnŋsɛnŋwo ni mɔ yi le wanɔ. Évaŋwlɛ mɔ: “Enu ciwo mɛ ŋto na ŋkpɔɛ mɔ ele mɔ mìaɖo mɔkpɔkpɔ keŋ gbɔxwe asun ji ado ji. Le Bibla mɛɔ, mìɖo Yesu, apotruwo koɖo enyɔnuɖɛtɔwo kpɔwɛwo yí gbeɖu nywiwo gbele Bibla mɛ nɔ mì. Enu cɛwo pleŋ na yí esɔ mɛ mɔkpɔkpɔ mìwotɔ sɛnnɔŋ yí edonɔ ŋsɛn mì mìdonɔ ji.” Mɔkpɔkpɔ le shigbe sege nɛ nɔ Leonard, yí atɛnŋ anyi sege nɔ mìwo hɛnnɛ.

7. Lé cukaɖawo atɛnŋ ado ŋsɛn mìwo mɔkpɔkpɔ lɔ doɔ? (Rɔmatɔwo 5:3-5; Ʒaki 1:12)

⁷ Nɔ mìdo ji le tetekpɔwo mɛ yí kpɔ lé Yehowa kpedo mì nu doɔ, mìkpɔnɔ mɔ mìwo nu kpe ni yí ewɛni mɔ mìwo mɔkpɔkpɔ lɔ sɛnnɔŋ kpi. (Hlɛn Rɔmatɔwo 5:3-5; Ʒaki 1:12.) Eyi mìwo mɔkpɔkpɔ lɔ vasɛnnɔŋ wu lé ele hwenu mìxɔ eŋɛnywi lɔ. Satana jinɔ mɔ mìwo cukaɖawo le wugan mì, vɔ Yehowa akpedo mì nu mìado ji ato wo pleŋ mɛ.

MÌWO MƆKPƆKPƆ LƆ LE SHIGBE EGAKUKU NƐ

8. Lé mɔkpɔkpɔ le shigbe egakuku nɛ doɔ? (1 Tɛsalonikitɔwo 5:8)

⁸ Bibla gbesɔ mìwo mɔkpɔkpɔ lɔ sɔ koɖo egakuku. (Hlɛn 1 Tɛsalonikitɔwo 5:8.) Sɔjawo cɔnnɔ egakuku keŋ asɔ glɔn ta nɔ wowo eta keŋ nɔ enu ciwo yí ketɔnɔwo dakɔ ɖaɖa ŋgbevaxo eta nɔ wo o. Le gbɔngbɔn mɛ hwa ci mìwakɔ mɛɔ, mìɖo aglɔn ta nɔ mìwo susu so amɛjijeje Satana tɔwo mɛ. Ézannɔ enu vovovowo yí sɔ tenɔ mì kpɔ koɖo susu dɔndɔnwo keŋ asɔ dahɛn mìwo susu. Shigbe lé egakuku glɔnnɔ ta nɔ sɔja ɖe ta nɛɔ, mìwo mɔkpɔkpɔ lɔ glɔnnɔ ta nɔ mìwo susu yí mìkpɔtɔ nɔnɔ gbeji nɔ Yehowa.

9. Lé mɛ ciwo yí deɖo mɔkpɔkpɔ ɖekɛ wanɔ nu doɔ?

⁹ Agbe mavɔ nɔnɔ ci mìɖoɖoɔ ŋkuvi akpedo mì nu mìawa nu le nunya mɛ yí asɔ gbeta nywiwo. Vɔ nɔ mìwo mɔkpɔkpɔ lɔ tɔ gblegble yí enyi mìwo drowo ɖekɛ nu yí mìvabukɔ kpɔɔ, mìatɛnŋ aŋlɔbe agbe mavɔ nɔnɔ mɔkpɔkpɔ mìwotɔ lɔ. Kpɔ enu ci yí jɔ do Kristotɔ ɖewo ciwo yí nɔ Korɛnti vayi sa ji ɖa. Wodegbekando Mawu gbeɖu vevi ci yí nyi fɔnfɔnsoku mɔkpɔkpɔ lɔ ji o. (1 Kor. 15:12) Pɔlu nu nɔ wo mɔ, mɛ ciwo yí deɖo mɔkpɔkpɔ ɖekɛ do esɔ mɛ nu nɔnɔ agbe nɔ egbɛ ɖekɛ. (1 Kor. 15:32) Le egbɛ mɛɔ, amɛ sugbɔ ciwo yí dekpɔkɔ mɔ nɔ Mawu gbeɖuwo wanɔ ŋɖekpokpui ci yí dro wo kakayɛ keŋ atɛnŋ asɔ kpɔ jijɔ. Vɔ mìwo to akpo nɔ wo, ɖo mìkando egbe ci Mawu ɖo kudo esɔ mɛ nu ji. Mìwo mɔkpɔkpɔ le shigbe egakuku nɛ yí glɔnnɔ ta nɔ mìwo susu yí gbekpenɔdo mì nu mìdebunɔ tamɛ kpɔ so mìwoŋtɔwo ɖekɛ nu yí adahɛn exlɔnyinyi ci yí le mìwo koɖo Yehowa gblamɛ o.—1 Kor. 15:33, 34.

10. Lé mɔkpɔkpɔ atɛnŋ aglɔn ta nɔ mì so susu dɔndɔnwo bubu kpɔ nuɔ?

¹⁰ Mìwo mɔkpɔkpɔ lɔ ci yí le shigbe gakuku nɛ atɛnŋ agbeglɔn ta nɔ mì yí mìdava bubuɔ mɔ de buɖe anyi yí mìawa ŋɖe keke mìwo nu akpe nɔ Yehowa o. Le kpɔwɛ mɛ, mɛɖewo tɛnŋ nu le wowoɖekiwo mɛ mɔ: ‘Nyɛŋdatɛnŋ anɔ mɛ ciwo yí anɔ agbe tɛgbɛɛ mɛ o. Ŋdenyi amɛnywi ahan tɔ o. Ŋdasun ji awa do Mawu sewo ji gbeɖe o.’ Ðo ŋwi mɔ Elifazi akɔnfanamɛtɔ ŋsukantɔ zan susu ŋtɔ́ hanwo hwenu exokɔ nuxu nɔ Job. Elifazi nu mɔ: “Nyi yí agbetɔ nyi yí anyi amɛmɛmiɔ?” Gbesɔ kpe niɔ, énu so Mawu nu mɔ: “Kpɔ ɖa! Dekando yi mɛkɔkɔɛwo ji o, yí jeŋkwiwo demɛ le ŋmɛ ni kpetii o.” (Job 15:14, 15, NWT) Ŋsu teŋ nyɔ cɛwo nyi! Ðo ŋwi mɔ Satana yí le godu nɔ susu ŋtɔ́ hanwo. Énya mɔ nɔ ètɔ susu ŋtɔ́ hanwo ɖoɖoɔ, ao mɔkpɔkpɔ lɔ dagbesɛnŋ o. Eyi taɖo gbe ŋsunyɔ ŋtɔ́ hanwo yí asɔ susu ɖo Yehowa gbeɖuwo ji. Kando ji mɔ Yehowa ji mɔ yele nɔ agbe mavɔ, eyi ákpedo eo nu.—1 Tim. 2:3, 4.

WƐ NƆ AO MƆKPƆKPƆ AKPƆTƆ ASƐNŊ

11. Nyi yí taɖo ele mɔ mìado ʒinxo ci mìle te kpɔ Mawu mɔ awa do yi gbeɖuwo jiɔ?

¹¹ Dele fafɛɖe gashiagamɛ mɔ mìana nɔ mìwo mɔkpɔkpɔ lɔ akpɔtɔ asɛnŋ o. Ci mìle te kpɔ Mawu mɔ awa do yi gbeɖuwo jiɔ, taŋfuin davasɔsɔ doŋ nɔ mì o. Vɔ Yehowa yɛ li tɛgbɛɛ yí lé ekpɔnɔ gamɛ do to akpo nɔ mìwotɔ. (2 Piɛ 3:8, 9) Áwa do egbe ci eɖo ji do gamɛ nywitɔ ji, vɔ taŋfuin danyi do hwenu mìwo kpɔkpɔ mɔ ni ji o. Nyi yí atɛnŋ akpedo mì nu yí mìwo mɔkpɔkpɔ lɔ akpɔtɔ asɛnŋ ci mìdodoɔ ʒinxo yí le te kpɔ Mawu mɔ awa do yi gbeɖuwo jiɔ?—Ʒaki 5:7, 8.

12. Sɔgbe koɖo Ebretɔwo 11:1, 6, ɖe, lé mɔkpɔkpɔ koɖo xɔse ca eka doɔ?

¹² Nɔ mìteteɛ gogo Yehowaɔ, mìwo mɔkpɔkpɔ lɔ akpɔtɔ asɛnŋ, ɖo Yehowa awa do yi gbeɖuwo ji dandandan. Gbɔxwe mìaɖo mɔkpɔkpɔɔ, mìɖo axɔɛ se mɔ Yehowa li yí akando ji “mɔ Mawu a na akpedonu amɛ ciwo yí ji mɔ yewo a kpɔɛ nyɔnɔnwitɔ.” (Hlɛn Ebretɔwo 11:1, 6.) Nɔ Yehowa nyikɔ amɛ ŋtɔŋtɔ nɔ mìɔ, kandoji ci mìɖo mɔ yiawa do egbe ciwo pleŋ eɖo ji asɛnsɛnŋ doji. Ecɛyɛɔ, mìakpɔ enuŋtɔŋtɔ ɖewo ciwo mìawa keŋ nɔ exlɔnyinyi ci yí le mìwo koɖo Yehowa gblamɛ asɛnsɛnŋ doji yí mìwo mɔkpɔkpɔ lɔ akpɔtɔ asɛnŋ.

13. Lé mìawɛ yí atɛnŋ ate gogo Mawuɔ?

¹³ Donɔ gbe ɖaɖa nɔ Yehowa yí ahlɛnnɔ yi Nyɔ lɔ. Ci mìdatɛnŋ akpɔ Yehowa can ɔ, mìatɛnŋ ate gogui. Mìatɛnŋ axo nuxu ni le gbedodoɖa mɛ, yí akando ji mɔ yiaɖo to mì. (Ʒer. 29:11, 12) Mìatɛnŋ aɖonɔ to Mawu nɔ mìhlɛnnɔ yi Nyɔ lɔ yí bunɔ tamɛ kpɔ so nu. Nɔ mìhlɛnnɔ nu so lé Yehowa le bu nɔ mɛ ciwo yí nɔ gbeji ni vayi nuɔ, mìwo mɔkpɔkpɔ lɔ asɛnsɛnŋ doji. Ŋɖekpokpui ci woŋwlɛ do Mawu Nyɔ lɔ mɛɔ, “wo ŋwli yí a kpla enu mì. Wo ŋwlɛ wo nɔ mì a tɛnŋ ɖo ŋkuɖoɖo. Ŋkuɖoɖo lɔ so ʒinxododo koɖo ŋsɛn ciwo yí Enuŋwlɛŋwlɛwo na mì mɛ.”—Rɔm. 15:4.

14. Nyi yí taɖo mìɖo abunɔ tamɛ kpɔ so enu ci Yehowa wa nɔ mɛbuwo nuɔ?

¹⁴ Bunɔ tamɛ kpɔ so lé Yehowa wa do egbe ciwo eɖo vayi ji nu. Mìakpɔ enu ci Mawu wa nɔ Abraxamu koɖo Sara. Wodatɛnŋ agbeji evi o, ɖo exwe le ta nɔ wo haan. Ele ahan gan, Mawu ɖo gbe nɔ wo mɔ woaji vi. (Gɔnm. 18:10) Lé Abraxamu wa nu doɔ? Bibla nu mɔ: “Abraxamu kandoji koɖo ŋkuɖoɖo mɔ ye a trɔsun tɔgbi nɔ jukɔn sugbɔ shigbe lé Mawu nwi do ɛnɛ.” (Rɔm. 4:18) Le agbetɔ nukpɔkpɔ mɛɔ, ɖewaxu degbeli nɔ Abraxamu mɔ yiatɛnŋ aji evi o, vɔ Abraxamu kando Yehowa ji mɔ yiawa do egbe ci eɖo ji. Eyi Mawu dedo ŋkpɛn ŋsu egbejinɔtɔ cɛ o. (Rɔm. 4:19-21) Exolɔlɔ cɛ hanwo kpla mì mɔ, nɔ egbeze shigbe mɔ ɖewaxu deli nɔ mì le nɔnɔmɛ ci mɛ mìle can ɔ, mìatɛnŋ akando Yehowa ji gashiagamɛ mɔ awa do egbe ciwo eɖo ji.

15. Nyi yí taɖo mìɖo abunɔ tamɛ kpɔ so enu ci Mawu wa nɔ mì nuɔ?

¹⁵ Bunɔ tamɛ kpɔ so enu ci Yehowa wa nɔ eoŋtɔ nu. Bu tamɛ kpɔ so nyɔna ci eoŋtɔ èkpɔ ci egbe ciwo yí le Mawu Nyɔ lɔ mɛ vamɛ nu. Le kpɔwɛ mɛ, Yesu ɖo gbe mɔ ye Daye ana eo enuvevitɔwo le agbe mɛ. (Mt. 6:32, 33) Yesu gbekando ji nɔ eo mɔ Yehowa ana eo gbɔngbɔn kɔkɔɛ lɔ nɔ èbiɛ. (Lk. 11:13) Yehowa wa do gbeɖu ŋtɔ́wo ji nɔ eo. Ètɛnŋ gbebu tamɛ kpɔ so gbeɖu bu ciwo ji Yehowa wa do nɔ eo. Le kpɔwɛ mɛ, éɖo gbe mɔ yeasɔ ao nuvɔnwo ke eo, afa kɔn nɔ eo yí ana eo gbɔngbɔnmɛŋɖuɖu. (Mt. 6:14; 24:45; 2 Kor. 1:3) Nɔ èbukɔ tamɛ kpɔ so enu ci Mawu wa nɔ eo vayi nuɔ, kandoji ci èɖo do nu mɔ yiawa do egbe ciwo yí eɖo kudo ao sɔ mɛ nu asɛnsɛnŋ doji.

MÍÐO ALE JIJƆKPƆKPƆ MƐ LE MÍWO ŊKUÐOÐO MƐ

16. Nyi yí taɖo emɔkpɔkpɔ nyi enunana nywi ɖekaɔ?

¹⁶ Agbe mavɔ nɔnɔ mɔkpɔkpɔ lɔ nyi enuvevi ɖeka ci Mawu na mì. Mìɖoɖoɔ ŋkuvi esɔ mɛ nywi ɖeka yí mìkando ji mɔ avamɛ. Mìwo mɔkpɔkpɔ lɔ le shigbe sege nɛ, yí na mìnɔnɔ te goguiɖe yí tɛnŋ donɔ ji le tetekpɔ koɖo yumɛciciwo mɛ yí nɔ mìaku can ɔ, mìdevɔnnɔ o. Mìwo mɔkpɔkpɔ lɔ gbele shigbe gakuku nɛ, yí glɔnnɔ ta nɔ mìwo susu yí mìgbenɔ enudɔndɔn wawa yí wanɔ enunywi. Emɔkpɔkpɔ cɛ ci nu Bibla xo nuxu so kpenɔdo mì nu mìtenɔ gogo Mawu doji yí egbedasɛ lé Mawu lɔn mì sugbɔ do nɔ mì. Nɔ mìwɛ yí mìwo mɔkpɔkpɔ lɔ kpɔtɔ sɛnŋ ɔ, mìkpɔnɔ nyɔna sugbɔ haan.

17. Nyi yí taɖo mìwo mɔkpɔkpɔ lɔ na yí eji jɔnɔ mìɔ?

¹⁷ Apotru Pɔlu do ŋsɛn Rɔmatɔwo le wema ci eŋwlɛ ɖaɖa wo mɛ mɔ, “mí ɖo a le jijɔ kpɔkpɔmɛ le míwo ŋkuɖoɖo mɛ.” (Rɔm. 12:12) Pɔlu atɛnŋ akpɔ jijɔ, ɖo énya mɔ nɔ yekpɔtɔ nɔ gbejiɔ, yeakpɔ agbe mavɔ le jeŋkwi mɛ. Mìwo can mìatɛnŋ akpɔ jijɔ le mìwo ŋkuɖoɖo mɛ, ɖo mìkando ji mɔ Yehowa awa do egbe ciwo eɖo ji. Ehakpatɔ lɔ ŋwlɛ mɔ: ‘Amɛ ciwo yí kpɔkɔ emɔ nɔ Tɔhonɔ wowo Mawu le jijɔkpɔkpɔ mɛ. Ényi mɛ ci yí nɔnɔ gbeji gashiagamɛ.’—Eha. 146:5, 6.