ENUKPLAKPLA 28
Dasɛ mɔ enu ci Yehowa koɖo Yesu wa jeŋ nɔ ye
Le ewanɔ nɔ eo nɔ ao xlɔ na nunywi ɖe eoɔ? Nɔ mìdable nɔnɔɔ, eji ŋtɔ teŋ yí jɔnɔ eo, yí àji mɔ yeawa ŋɖe asɔ dasɛ nɔ ye xlɔ mɔ enu ci yɛna ye jɔ ji nɔ ye. Enu ci mɛɖekɛ datɛnŋ ana mì gbeɖe o, yí Yehowa koɖo Yesu na mì. Nyi yí nyi enu lɔɔ, yí lé mìadasɛ do mɔ enu ci wona mì lɔ jeŋ nɔ mìɔ?
1. Emɔ ɖeka ci ji mìato adasɛ mɔ enu ci Yehowa koɖo Yesu wa jeŋ nɔ mìɔ?
Bibla ɖo gbe mɔ “amɛ ɖekpokpwi ci xɔ [Yesu] ji se” atɛnŋ anɔ agbe sɔyi mavɔ. (Ʒan 3:16) Lé mìaxɔ Yesu ji se doɔ? Eyi nyi mɔ, mìadanasɛ xɔse le mìwo gbetasɔsɔwo koɖo mìwo wanawo mɛ. (Ʒaki 2:17) Nɔ mìdanasɛ mɔ mìɖo xɔse to ŋciwo mìwanɔ koɖo enyɔ ciwo mìnunɔ jiɔ, anyi kpɔ mɔ mìdodoɔ ŋsɛn exlɔnyinyi ci yí le mìwo koɖo Yesu koɖo Edalɔ Yehowa gblamɛ.—Hlɛn Ʒan 14:21.
2. Wana vevi ci yí akpedo mì nu mìadasɛ mɔ enu ci Yehowa koɖo Yesu wa jeŋ nɔ mìɔ?
Le ezan ci yí doŋkɔ nɔ Yesu ku mɛɔ, énu lé woagbedasɛ mɔ vɔnsa lɔ jeŋ nɔ amɛ do nɔ yi dokplɔtɔwo. Ébɔ wo doju yí sɔ afɔ sɔ ɖo te nɔ wana vevi ɖeka ci Bibla yɔ mɔ “Axwetɔ [fiɛfi] nuɖuɖu,” alo ci mìgbeyɔnɔ mɔ Eŋwiɖoɖo Yesu Kristo ku. (1 Korɛntitɔwo 11:20) Yesu wɛ ahan keŋ nɔ apotru yitɔwo sɔ kpe nɔ Kristotɔ adodwi ciwo pleŋ yí avaje ŋgbe nɔ wo aɖonɔ ŋwi mɔ, yɛsɔ yi gbe na do ta nɔ mì. Sɔgbe koɖo wana cɛɔ, Yesu nu mɔ: ‘Míwanɔ ecɛ asɔ ɖonɔ ŋwiŋ.’ (Luiki 22:19) Nɔ èyi Eŋwiɖoɖoɔ, anyi èdasɛ mɔ lɔnlɔn gangan ci Yehowa koɖo Yesu ɖo nɔ mì jeŋ nɔ ye.
JI DWI NI KPƆ DOJI
Kpɔ emɔ buwo ciwo ji àto adasɛ mɔ lɔnlɔn gangan ci Yehowa koɖo Yesu ɖo nɔ mì jeŋ nɔ ye. Gbeje lé Eŋwiɖoɖo Yesu Kristo ku lɔ le veviɖe do mɛ.
3. Lé mìadasɛ do mɔ enu jeŋ nɔ mìɔ?
Sɔɛ le kpɔwɛ mɛ mɔ, èjikɔ aku etɔ ku yí mɛɖeka va hwlɛn eo gan. Àŋlɔbe enu ci amɛ lɔ wa nɔ eo kpoŋ anyi evɔa? Alo àji emɔ ciwo ji àto adasɛ ni mɔ enu ci yiwa jeŋ nɔ yea?
Emɔ hun nɔ mì mɔ mìanɔ agbe tɛgbɛɛ, ɖo Yehowa nyi xomɛvunɔ. Hlɛn 1 Ʒan 4:8-10, keŋ agbeje nyɔbiɔse cɛwo mɛ:
Nyi yí taɖo Yesu vɔnsa lɔ nyi enunana vevi ɖekaɔ?
Lé enu ci Yehowa koɖo Yesu wa lɔ, wa nɔ eoɔ?
Lé mìatɛnŋ adasɛ do mɔ enu ci Yehowa koɖo Yesu wa jeŋ nɔ mìɔ? Hlɛn 2 Korɛntitɔwo 5:15 koɖo 1 Ʒan 4:11; 5:3. Nɔ èhlɛn kpukpui ɖe ɖegbɔɔ, nagbeje nyɔbiɔse cɛ mɛ:
Sɔ koɖo kpukpui cɛ ɖe, lé mìatɛnŋ adasɛ do mɔ enunana lɔ jeŋ nɔ mìɔ?
4. Wa shigbe Yesu nɛ
Nubu ci mìawa asɔ dasɛ mɔ enu jeŋ nɔ mì yí nyi kpɔ mɔ, mìawa Yesu tɔ han. Hlɛn 1 Piɛ 2:21, keŋ agbeje nyɔbiɔse cɛ mɛ:
Nyiwo mɛ èkpɔ mɔ yeakplɔ Yesu fɔteshiwo do pɛpɛpɛ leɔ?
Yesu lɔn Mawu Nyɔ lɔ, dra eŋɛnywi lɔ, yi gbekpedo amɛwo nu
5. Yi Eŋwiɖoɖo Yesu ku lɔ tɔxu
Nɔ àkpɔ lé nuwo yi do le Axwetɔ Fiɛfiŋɖuɖu ŋkɔtɔ hwenuɔ, Hlɛn Luiki 22:14, 19, 20. Yí agbeje nyɔbiɔse cɛwo mɛ:
Nyi yí jɔ le Axwetɔ Fiɛfiŋɖuɖu lɔ hwenuɔ?
Nyi yí kpɔnnɔ koɖo vɛn lɔwo le dumɛ nɔɔ?—Kpɔ kpukpui 19 koɖo 20.
Yesu ji mɔ ye dokplɔtɔwo le ɖonɔ ŋwi ye ku lɔ xwekpekpe ɖeka ɖuu, do azan lɔ ji pɛɛ. Eyi taɖo, xwekpekpe ɖeka duuɔ, Yehowa Kunuɖetɔwo bɔnɔ doju, yí ɖonɔ ŋwi Kristo ku lɔ shigbe lé emɔ wo le wɛ do nɛ. Nɔ àkpla nu sugbɔ so bɔbɔ vevi cɛ nuɔ, xo VIDEO lɔ. Yi godu nagbeje nyɔbiɔse ci yí gbɔgbɔ mɛ.
Nyi yí jɔnɔ le Eŋwiɖoɖo lɔ hwenuɔ?
Kpɔnnɔ koɖo vɛn lɔwo le dumɛ nɔ ŋɖekawo. Kpɔnnɔ lɔ le dumɛ nɔ Yesu gbaza maɖoafɛn ci esɔ na do ta nɔ mì. Vɛn lɔ yɛle dumɛ nɔ yi hun
MƐÐEWO NUNƆ MƆ: “Enu ci àwa yí akpɔ hwlɛngan kpoŋ yí nyi mɔ, àxɔ Yesu ji se.”
Lé àtɛnŋ azan Ʒan 3:16 koɖo Ʒaki 2:17 do asɔ dasɛ mɔ enu sugbɔ li woawaɔ?
ENU CI ÈKPLA
Mìadasɛ mɔ enu ci Yesu wa jeŋ nɔ mì, nɔ mìɖo xɔse do nu, yí gbeyinɔ Eŋwiɖoɖo yi ku lɔ tɔxu.
Enumɛtoto
Woaxɔ Yesu ji se gɔnmɛ ɖe?
Lé èji mɔ yeadasɛ do mɔ enu ci Yehowa koɖo Yesu wa nɔ ye jeŋ nɔ yeɔ?
Nyi yí taɖo ele veviɖe mɔ woayi Eŋwiɖoɖo Yesu ku lɔ tɔxuɔ?
KPƆ ŊCƐWO KPƆ
Nyi Kristo ku lɔ dɔ yí mìwanɔɔ?
Kpla nubuwo so xɔse nu, koɖo lé mìatɛnŋ adasɛ do mɔ mìɖo xɔse.
Le exolɔlɔ ci yí nyi “Ŋkpɔ mɔ ŋmɛ́, ŋle blebu, yí le agbe” mɛɔ, kpɔ lé nyɔnu ɖeka gbenɔnɔ trɔ do hwenu evamɔŋje enu ci Yesu vɔnsa lɔ wa ni mɛ ɖa.
Kpɔ mɔ nyi yí taɖo enyi amɛ kankin ɖowo yí ɖunɔ kpɔnnɔ lɔ yí gbenunɔ vɛn lɔ le Eŋwiɖoɖo hwenu ma.