Lé Àwɛ Avoŋ Le Hamɛ Yoyu Ðe Mɛ

Nicolas koɖo Céline do go cukaɖa bu. Ci France lɔjedɔwaxu nu nɔ wo mɔ wo le vayi ci hamɛ yoyu ɖeka mɛɔ, wolɔn. Wonu mɔ: “Ŋkɔtɔɔ, kpakpa sɔsɔ mì vɔ le yiyimɛɔ, mìwo xlɔwo tɔ wuwu do mì. Mìdekpɔnyi exlɔ veviwo koɖo nɔvi ciwo yí le mìwo hamɛ yoyu lɔ mɛ hɔɖo o.”a Ci agbɔnnu can ɖe, lé àwɛ yí akpɔ jijɔ yí agbesɛn ku nɔ evayi ci hamɛ yoyu ɖe mɛɔ? Kpekpedonu ci mɛbuwo atɛnŋ anaɔ? Emɔ ciwo ji mɛbuwo atɛnŋ ado ŋsɛn eo le le gbɔngbɔn mɛɔ, yí lé eo can àtɛnŋ ado ŋsɛn mɛbuwo lé ao hamɛ yoyu lɔ mɛ doɔ?

ENU AMƐNƐ CIWO YÍ AKPEDO EO NAÐU CUKAÐA LƆ JI

1. Kando Yehowa ji. (Eha. 37:5) Kazumi, ci yí le Japon so le hamɛ ci mɛ ele so exwe 20 han ke, yí vayi ci hamɛ yoyu ɖeka mɛ hwenu yí edɔ ɖe asuɔ. Lé “[esɔ yi] mɔwo do alɔ mɛ nɔ Yehowa” doɔ? Énu mɔ: “Ŋnu anyi jimɛnyɔwo nɔ Yehowa yí nu lé ŋvɔnvɔn do, lé ŋci nyɛɖekɛ do koɖo lé ŋxa le nyɛɖeki mɛ do ni. Hweɖekpokpuinu yí ŋwɛni ahan yí enaŋ ŋsɛn ci ŋʒan.”

Lé àwɛ agbekando Yehowa ji sɔwuɔ? Shigbe lé aci ɖe ʒan eshi koɖo enuvevi ɖewo le kɔmɛ gbɔxwe yí ashin ɔ, ahanke yí mìwo xɔse can ʒan eshi koɖo enuvevi ɖewo le kpɔwɛnyɔnunu mɛ gbɔxwe yí atɛnŋ ashin nɛ. Nicolas, ci nyɔ mìnu vayi kpɔɛ mɔ tamɛbubukpɔ so mɛɖewo ciwo yí wa vɔnsa sugbɔwo yí wa Mawu dro kpɔwɛwo nu shigbe Abraxamu, Yesu koɖo Pɔlu, do ŋsɛn kankandoji ci ŋɖo mɔ Mawu akpedo ŋnu. De trɔtrɔ ciwo yí vanɔ amɛ ji le agbe mɛ ɖekɛ yí Bibla nukplakpla amɛɖekɛ tɔ aotɔ akpedo eo nu yí nà kpanŋkɔ o, vɔ agbena yí gbɔngbɔnmɛ nunana ɖewo asun eo shi yí nama koɖo mɛbuwo le ao hamɛ yoyu lɔ mɛ.

2. Ŋgbesɔ enuwo sɔnɔ kpɔ o (Ŋun. 7:10) Jules do go koɖo amɛ vovovowo ciwo wowo kɔnuwo to akpo hwenu eso le Bénin yí yi États-Unis. Éɖo ŋwi mɔ: “Ŋbui mɔ nɔ ŋdo go amɛyoyu ɖe duuɔ, ŋɖo ato agbe mɛ xolɔlɔ anyitɔ ni.” Ci denyi nu yí ma diɔ, étɔ yiɖeki sɔsɔ do azɔge nɔ amɛwo le hamɛ lɔ mɛ. Vɔ ci evajeshi nɔviŋsu koɖo nɔvinyɔnu lɔwo ɖɛ nywiɖeɔ, étrɔ yi susu. Énu mɔ: “Ŋvakpɔɛ mɔ fiɖekpokpui ci mìle nɔ nyigban lɔɔ, enu kuɖeka yí agbetɔwo keŋkeŋ nyi. Wowo nuwanawo koɖo wowo nuxuxoxowo tonɔ vo kpoŋ yɔ. Ele veviɖe mɔ mìalɔn anɔnɔ ju koɖo amɛwo nɔ wogbele do ɖe can. Eyi taɖo, ŋgbesɔ hamɛ ci mɛ èle yɛ sɔ sɔsɔ koɖo hamɛ ci mɛ èso le o. Nɔvinyɔnu mɔɖetɔ ɖeka ci yí tɔ mɔ Anne-Lise nu mɔ: “Ŋdeso keŋ ayi kpɔ enu ciwo ŋgbe do godu yɔ o. Vɔ ŋso keŋ ayi kpɔ enuyoyu buwo.”

Hamɛmɛshinshinwo can deɖo asɔ hamɛ ci mɛ wole yɛ sɔ sɔsɔ koɖo ci mɛ woso le o. Nɔ lé wowanɔ nuwo do to akpo can ɔ, de eyi enyi wodɔn dandandan yɔ o. Anyɔ nywiɖe mɔ woanya nɔnɔmɛ ci mɛ mɛ lɔwo le keŋ gbɔxwe yí aɖe susu ɖe ti. (Ŋun. 3:​1, 7b) Kpɔwɛ nywi ɖoɖo nyɔ wu mɔ woasɔ amɛŋtɔ susu asɔ ʒinʒin ɛ mɛbuwo ji le hamɛ lɔ mɛ.—2 Kor. 1:24.

3. Wanɔ dɔ sugbɔ le hamɛ yoyu lɔ mɛ. (Fili. 1:27) Hunhun avayi ci fibu biɔ gamɛ koɖo ŋsɛn sugbɔ, vɔ ele veviɖe mɔ so tɔtɔmɛ lɔ mìayinɔ hamɛ lɔ bɔbɔwo ŋmɛŋmɛ nɔ anya wawa nɔ mì. Ðo nɔ ao hamɛ lɔ mɛ tɔwo dekpɔ eo kpɔ o alo kpɔnɔ eo ɖaaɖaɔ, lé woawɛ akpedo eo nuɔ? Lucinda, ci yí vayi ci Afrique du Sud koɖo eviɛ nyɔnuvi amɛve ɖo ŋwi mɔ: “Anyi xlɔwo nu nɔŋ mɔ nyɛŋ le te gogo amɛwo le hamɛ yoyu lɔ mɛ yí awanɔ dɔ doju koɖo wo le kunuɖeɖedɔ lɔ mɛ yí agbenanɔ ɖoŋciwo le bɔbɔwo. Mìgbesɔnɔ mìwo xomɛ jo yí wowanɔ kunuɖegbe bɔbɔwo le mɛ.”

Nɔ “èwakɔ dɔ alɔ le alɔ mɛ” le teokrasidɔwo mɛ koɖo nɔviŋsu koɖo nɔvinyɔnu ciwo yí le ao hamɛ yoyu lɔ mɛɔ, ényi emɔ nywi ɖeka ci ji ato ado ŋsɛn eoɖeki yí agbedo ŋsɛn mɛbuwo.” Hamɛmɛshinshinwo do ŋsɛn Anne-Lise ci nyɔ mìnu vayi sa mɔ yile tekpɔ aɖe kunu koɖo mɛshiamɛ le yi hamɛ yoyu lɔ mɛ. Nyi yí to le mɛɔ? Énu mɔ “Ŋkpɔɛ zeɖeka mɔ enuvevitɔ ci ŋɖo awa yí akpɔɛ mɔ ŋnyi hamɛ lɔ mɛ tɔ ɖeka ke.” Gbesɔ kpe niɔ, nɔ èlɔn faa yí wanɔ edɔ ɖewo shigbe fyɔɖuxuxɔ lɔ mɛ klɔklɔ koɖo yi dradradowoɔ, anyi èvakpɔkpɔɛ yɛ mɔ ye hamɛ yɔ. Lé èsɔ mɛ lɔwo sɔ wa ao mɛwo nywiɖe do adɔ yí woaxɔ eo yí nagbekpɔɛ mɔ yenyi ɖeka le gbɔngbɔn mɛ xomu yoyu yetɔ ye lɔ mɛ.

4. Ðo xlɔ yoyuwo. (2 Kor. 6:​11-13) Eɖesɔjinamɛ dadasɛ nyi emɔ nywi ɖeka ci ji mìato yí awa exlɔ nywiwo ɖɛ, eyi taɖo gbɔxwe bɔbɔ lɔwo atɔ ji koɖo le bɔbɔ lɔwo goduɔ, jinɔ gamɛ keŋ akan seŋ koɖo mɛbuwo keŋ ajeshi wo ɖɛ nywiɖe. Je agbla veviɖe yí ajeshi wowo ŋkɔwo ɖɛ. Nɔ èɖonɔ ŋwi wowo ŋkɔwo yí hayanɔ do mɛbuwo ji yí gbedonɔ vivi do wo nuɔ, kankandoji li mɔ àɖo exlɔ yoyu veviwo.

Ci àle nɔ yí abiɔbiɔ eoɖeki se mɔ woxɔ ye ma ɖe, wɛ keŋ nɔ nɔvio ŋsu koɖo nɔvio nyɔnu yoyu lɔwo ajeshi eo ɖɛ nywiɖe. Wa Lucinda tɔ han ci yí nu mɔ, “Exlɔ veviwo le mì shi yɛ ɖo mìtekpɔ yí yɔnɔ amɛwo va mìwo xomɛ doŋkɔ.”

“MÍXƆNƆ MÍWONƆNƆWO”

Étɛnŋ ɖe fun nɔ mɛɖewo mɔ woaɖo Fyɔɖuxuxɔ mɛ ɖo wodejeshi mɛɖewo ɖɛ o. Eyi taɖo, lé mìawɛ nɔ anɔ fafɛɖe nɔ amɛyoyu ciwo yí va Fyɔɖuxuxɔ mɛ woɔ? Apotru Pɔlu do ŋsɛn mì mɔ “Kristo xɔ mì. É yí taɖo mì ɖo a xɔ, mìwonɔnɔwo.” (Rɔm. 15:7) Nɔ hamɛmɛshinshinwo srannɔ Kristoɔ woatɛnŋ akpedo amɛyoyuwo nu nɔ woakpɔɛ mɔ woxɔ yewo (Kpɔ dakavi ci yí nyi “Ŋciwo Yí Na Yí Enu Jenɔ Ji Nɔ Amɛ Nɔ Wovayi Ci Fibu.”) Vɔ mɛ ciwo pleŋ yí le hamɛ lɔ mɛ, ɖeviwo can atɛnŋ awa ɖe le mɛ keŋ aɖo xlɔ yoyuwo.

Mɛdruxɔxɔ dadasɛ can le amɛwo xɔxɔ lɔ mɛ, vɔ agbenyi mɔ woawa enu ŋtɔŋtɔ ɖe asɔ kpedo amɛ nu. Le kpɔwɛ mɛ, nɔvinyɔnu ɖeka zan gamɛ vevi yitɔ do amɛyoyu ɖeka ci yí va nu. Ékplɔɛ yí dan koɖi to eju lɔ mɛ keŋ yí dasɛ lé azan emɔzɔnnu lɔwo do ni. Enu ci nɔvinyɔnu lɔ wa wa dɔ do amɛyoyu lɔ ji sugbɔ yí egbekpedo nu yí ehaya le amɛwo mɛ zeɖeka.

MƆNUKPƆKPƆ CI YÍ HUN NƆ EO NƆ NASHIN

Nɔ ejan ɖe shinshin ɛɔ, eɖɔnɔli gbaza zenɛniɖe gbɔxwe yí awa yitɔwo vasun ji yí zronɔ nywiɖe. Ahanke nɔ evayi ci hamɛ yoyu ɖe mɛɔ, ele mɔ aɖe vɔnvɔn ciwo yí axe mɔ nɔ eo kɔŋgbe keŋ azro nywiɖe le kpɔwɛnyɔnunu mɛ le Yehowa sɛnsɛn mɛ. Nicolas Koɖo Céline lɔn do ji mɔ: “Hunhun avayi ci fiɖe nyi ekpla nana amɛɖeki nywi ɖeka. Nɔ mìkpla yí jenɔshi amɛyoyuwo le afi vovovowoɔ, edonɔ ŋsɛn mì yí mìɖonɔ nɔnɔmɛ yoyuwo.” Jean-Charles ci nyɔ mìnu le tɔtɔmɛ xo nuxu so nyɔna ci yí yi xomu kpɔ yí nu mɔ: “Le mìwo hamɛ yoyu lɔ mɛɔ, mìwo viwo vashinshin ɛ doji le gbɔngbɔn mɛ yí gbeteteɛ gogo Yehowa doji. Le wleci kleŋ ɖewo goduɔ, mìwo vi nyɔnuvi tɔ edɔ wawa le kwɛshila dodomɛ bɔbɔwo mɛ yí mìwo vi ŋsuvi trɔ eŋɛnywidratɔ mawa ʒinʒindoshimɛ”

Lé àwa nu do nɔ ao nɔnɔmɛwo deɖe mɔ nɔ eo natɛnŋ ahun avayi ci fini eʒan sugbɔ le wuɔ? Àtɛnŋ awɛ yí ao hamɛ xoxui lɔ avanyi yoyu han nɔ eo sɔ to wawa do emɔdasɛnamɛ ɖewo ci mìkpɔ le nyɔta cɛ mɛ ji. Kando Yehowa ji yí asɔ eoɖeki sɔ do hamɛ lɔ mɛ dɔwo mɛ keŋkeŋ yí awanɔ toto keŋ atonɔ koɖo mɛbuwo le kunuɖeɖedɔ lɔ mɛ, aɖo xlɔ yoyuwo alo agbena yí exlɔ ciwo èɖo sa asɛnŋ doji. Atɛnŋ awa enuŋtɔŋtɔ ɖe yí asɔ kpedo amɛ yoyu koɖo mɛ ciwo yí le ʒan mɛ nua? Ci enyi lɔnlɔn yí wosɔ donɔ jeshi Kristotɔ adodwiwoɔ, nɔ èwɛkɔ ahan ɔ, kankandoji li mɔ àshin le gbɔngbɔn mɛ. (Ʒan 13:35) Àtɛnŋ akando ji mɔ ŋnɔwo nyi “avɔnsa ciwo yí kpe nɔ Mawu.”—Ebre. 13:16.

Ci hunhun ayi ci hamɛ bu ɖe mɛ nyi enu gbɔnnu can ɔ, Kristotɔ sugbɔ sun ji yí wɛ yí egbeje ji nɔ wo. Eo can àtɛnŋ awɛ dru! Anne-Lise nu mɔ “Ci ŋɖɔli hamɛɔ, ekpedo ŋnu yí ŋvaɖo exlɔ sugbɔwo le hamɛ lɔ mɛ.” Kazumi vakando ji mɔ “nɔ èhun yí vayi ci fibu ɖeɔ, àkpɔɛ mɔ Yehowa akpedo ye nu le emɔ ciwo nu de ɖoŋ do kpɔ o.” Yí lé Jules yɛ nuɔ? Énu mɔ: “Exlɔ ciwo ŋɖo kpedo ŋnu yí ŋdegbexanɔ le nyɛɖeki mɛ ke o. Ecɛ ɖɛyɛɔ, ŋvate gogo ha lɔ mɛ tɔwo sugbɔ keke avagbɔnnu nɔŋ mɔ naso gbeɖe wo ɖɛ.”