Ŋkpɛnwatɔ Vanyi Ejugoduŋɛnywidratɔ

Wojiŋ le 1951 mɛ le Vienne le Autriche le Katoliki xomu ɖeka mɛ. Ŋwanɔ ŋkpɛn, vɔ ŋxɔ Mawu ji se yí donɔ gbe ɖaɖa ni blaŋblaŋ. Hwenu ŋɖo exwe amashiɖekɛɔ, danyɛ tɔ enukplakpla koɖo Yehowa Kunuɖetɔwo; yí nɔnyɛ vabɔ do nu le yiyimɛ.

Dejinjin o, mìvale Döbling Hamɛ lɔ mɛ le Vienne. Ci mìnyi xomuɔ, mìwanɔ edɔ sugbɔ doju. Mìhlɛnnɔ Bibla yí kplɛni, yinɔ hamɛ lɔ bɔbɔwo yí gbewanɔ lɔnlɔn faa dɔ le takpekpewo. Le anyi vihwɛ mɛ kakaɔ, edanyɛ do zo lanmɛ nɔŋ mɔ malɔn Yehowa. Edanyɛ gbedodoɖa yí nyi mɔ nyɛ koɖo nɔvinyɛ le vanyi emɔɖetɔwo. Vɔ denyi ŋtɔ́ yí xa nyɛ nɛ o.

ŊTƆ GASHIAGAMƐ KUNUÐEÐEDƆ LƆ JI

Ŋwa ʒinʒindoshimɛ le 1965 mɛ hwenu ŋɖo exwe 14. Vɔ, égbɔnnɔnu nɔŋ mɔ maxo nuxu koɖo mɛ ciwo ŋdejeshi ɖɛ le kunuɖeɖedɔ lɔ mɛ. Éwanɔ nɔŋ mɔ jajɛ anyi kpenawo wuganŋ yí ŋjinɔ veviɖe mɔ male shigbe wowo hannɛ. Ci ŋwa ʒinʒindoshimɛ dejinjin ɔ, ŋtɔ ehadodo koɖo jajɛ ciwo yí desɛnnɔ Yehowa o. Ci ehadodo koɖo mɛ ciwo yí denyi Yehowa Kunuɖetɔ lɔwo jɔnɔ ji nɔŋ can ɔ, anyi yexa donɔ ehwɛŋ. Vɔ, ŋdeɖo ŋsɛn yí atrɔ o. Nyi yí vakpedo ŋnuɔ?

Le gaŋtɔ́mɛɔ, nyɔnuvi ɖeka ci woyɔnɔ mɔ Dorothée ci yí ɖo exwe 16 vaci mìwo hamɛ. Lé eɖenɔ kunu so axomɛ yi axomɛ koɖo ezolelanmɛ do wa dɔ do ŋji. Ŋshin wui hwɛɖeka, ŋdedodoɔ vevi kunuɖeɖedɔ lɔ ahan o. Ŋnu nɔ nyɛɖeki mɔ: ‘Anyi jilawo nyi Kunuɖetɔwo, vɔ Dorothée yɛ deɖo xomu ɖe le nyɔnɔnwi lɔ mɛ o. Éle koɖo nɔlɔ ci yí blé, vɔ évanɔ kunuɖegbe tɛgbɛɛ!’ Yi kpɔwɛ lɔ do ŋsɛnŋ yí ŋji mɔ nawa sugbɔ nɔ Yehowa. Le hwenu kleŋ ɖe goduɔ, dejinjin o, nyɛ koɖo Dorothée vanyi emɔɖetɔwo doju. Doŋkɔɔ, mìnyi kpekpedonu mɔɖetɔwo doju, yí le yiyimɛɔ, mìvanyi gashiagamɛ mɔɖetɔwo. Dorothée sɔ ezolelanmɛ yitɔ ba nɔŋ. Ékpedo ŋnu ŋɖo Bibla nukplavi ŋkɔtɔ. Éna yí evale fafɛɖe nɔŋ mɔ maxo nuxu nɔ amɛwo nɔ ŋwakɔ so axomɛ yi axomɛ, le emɔ ji koɖo le nɔnɔmɛ buwo mɛ.

Le exwe ŋkɔtɔ ci mɛ yí ŋnyi emɔɖetɔ leɔ, nɔviŋsu ɖeka ci yí so Autriche ci woyɔnɔ mɔ Heinz vaci mìwo hamɛ mɛ. Éxɔ nyɔnɔnwi lɔ le Canada ci eyi ji nɔviɛ ci yí nyi Yehowa Kunuɖetɔ kpɔ le enɔ. Wosɔ Heinz ɖaɖa mìwo hamɛ ci yí le Vienne mɛ yí enyi emɔɖetɔ vevi. Yi nu jɔ ji nɔŋ zeɖeka so tɔtɔmɛ lɔ. Vɔ, éji mɔ yeanyi ejugoduŋɛnywidratɔ, yí woanyi ejugoduŋɛnywidratɔ dele susu mɛ nɔ nyɛ kpetii o. Eyi taɖo ci yi nu jɔ ji nɔŋ can ɔ, ŋsɔ wla di. Vɔ, le yiyimɛɔ, nyɛ koɖo Heinz vatɔ mìwo nɔnɔwo jiji yí vale alɔ yí gbetɔ emɔɖeɖedɔ lɔ wawa doju le Autriche.

EJUGODUŊƐNYWIDRADRADƆ LƆ VANYI MÌWO TAJINU

Heinz xonɔ nuxu nɔŋ blaŋblaŋ so lé eji mɔ yeavanyi ejugoduŋɛnywidratɔ do nu. Ci desɔ ʒinnɔ do ŋji can ɔ, ébiɔnɔ nyɔ ɖewo ciwo yí ado zo lanmɛ nɔŋ se shigbe mɔ: “Ci mìdejijiɛ aji evi le yiyimɛ ɖe, mìdavawa sugbɔ doji le Yehowa sɛnsɛn mɛ ba?” Ci ŋkpɛn wanɔŋ ɔ, ŋvɔnnɔ nɔ ejugoduŋɛnywidradradɔ lɔ. Nyɔnɔnwi enyi mɔ ŋwakɔ emɔɖeɖedɔ lɔ, vɔ ŋkpɔɛni mɔ ejugoduŋɛnywidradradɔ lɔ agbɔnnu nɔŋ. Gan, Heinz gbɔn ji ɖɛ yí kpɔtɔ xonɔ nuxu so tajinu lɔ nu nɔŋ. Égbedo ŋsɛn mɔ nyɛ le sɔ susu ɖo lé nakpenɔdo mɛbuwo nu ji sɔwu mɔ nasɔ susu ɖo nyɛɖeki ji. Nukplamu yitɔ lɔwo kpedo ŋnu koŋ.

Viviviɔ, ejugoduŋɛnywidradradɔ lɔ vatɔ ŋdrodro, eyi taɖo mìvado alɔ wema mɛ nɔ Gileadi Suklu yiyi. Vɔ, alɔjedɔwaxu lɔ nu nɔŋ mɔ nyɛ le vayi kpla ŋlɛshigbe doji gbɔxwe. Ci ŋje agbla yí kpla ŋlɛshigbe lɔ nanɔ exwe amɛtɔn ɔ, ékpaca mì mɔ wosɔ mì ɖaɖa Yougoslavie hamɛ mɛ le Salzbourg ci yí le Autriche. Le exwe amadrɛ ciwo yí kplɔɛ do mɛɔ, mìɖe kunu le nyigbanmama lɔ mɛ yí wa exwe ɖeka le ekan lɔ mɛ hamɛwo jijikpɔdɔ lɔ mɛ. Serbo-Croate-gbe lɔ gbɔnnu, vɔ mìɖo Bibla nukplavi sugbɔ le mɛ.

Le 1979 mɛɔ, mìbiɔ mɔ mìayi “gbɔndomɛ” le Burgarie. Woɖo te kunuɖeɖedɔ lɔ le enɔ. Eyi taɖo, mìdegbetɛnŋ wa kunuɖeɖedɔ ɖekpokpui le gbɔndomɛ lɔ mɛ o. Vɔ, mìtonɔ nɔvinyɔnu amatɔn ɖeka ciwo yí le Sofia jugan lɔ mɛ ji yí benɔ keŋ yí sɔnɔ wema hwɛhwɛ ɖewo va eju lɔ mɛ. Ŋvɔnnɔ sugbɔ, vɔ Yehowa kpedo ŋnu le edɔ lɔ wawa mɛ. Nɔ ŋkpɔ lé wogbenɔdɔn yí kpɔnɔ jijɔ nɔ woale wo do gakpa mɛ le edɔ lɔ wawa mɛ can ɔ, énanɔŋ kankandoji mɔ mawa ci ji ŋkpe le edɔ ci Yehowa habɔbɔ lɔ ɖo nɔŋ mɛ.

Le exwe ɖewo goduɔ, mìtrɔ yí gbedo alɔ̀ Gileadi wema lɔ mɛ yí ecɛyɛɔ, wovayɔ mì. Mìkpɔ mɔ mìatɛnŋ avayi suklu lɔ le ŋlɛshigbe mɛ le États-Unis. Vɔ le Novembre 1981 mɛɔ, wotɔ Gileadi suklu lɔ wawa hɛnnɛ le alɔjedɔwaxu Allemagne tɔ ci yí le Wiesbaden mɛ. Ecɛyɛɛɔ, mìatɛnŋ awa suklu lɔ le Allemangne-gbe ci ŋdonɔ nywiɖe mɛ. Fini woavasɔ mì ɖaɖaɔ?

KUNUÐEÐE LE EJU CI MƐ AHWA LE

Wosɔ mì ɖaɖa Kenya! Vɔ, Kenya lɔjedɔwaxu lɔ biɔ mì se mɔ mìji mɔ mìawa dɔ koɖo mìwo nɔviwo le Ouganda ju lɔ mɛ ma. Ewu exwe amɛ́wo vayi yí ahwaŋkɔnɔtɔ Idi Amin xɔ Ouganda cɛkpakpa lɔ akpasɛnsintɔ. Le exwe ciwo yí vakplɔɛ do mɛɔ, yi cɛkpakpa akpasɛnsintɔ lɔ hɛn eku va nɔ amɛ miliɔn nɛniɖe. Yí le 1979 mɛɔ, mɛbu gbeɖe Ouganda cɛkpatɔ lɔ si akpasɛnsintɔ. Ci ŋvɔnɔɔ, de enyɔ nu kpɔ egbenyi mɔ ŋdatɛnŋ ayi eju ci mɛ wowakɔ ahwa le o. Vɔ Gileadi suklu lɔ dra mì do ɖɛ nɔ mìakando Yehowa ji. Eyi taɖo mì mɔ ɛɛ.

Ouganda ju lɔ da ahɛn keŋkeŋ. Heinz dri ahan do exwewema 2010 tɔ mɛ. Énu mɔ: “Dɔwaxu sugbɔ shigbe mɔ ciwo yí wanɔ eshi. . . ciwo yí kpenɔ ŋkuvi do ekatenuwo nu gban keŋkeŋ. . . . Ecudadawo koɖo efififiwo yí vabɔ vevitɔ le zan mɛ. . . . Amɛshiamɛ cì wowo xɔwo mɛ yí dodoɔ gbe ɖaɖa yí kpɔkpɔ emɔ mɔ ŋɖe ŋgbejɔ do yewo ji le zan mɛ o.” Ci cukaɖa cɛwo jɔjɔ can ɔ, nɔvi ciwo yí le enɔ kpɔtɔ le nywiɖe le gbɔngbɔn mɛ!

Le 1982 mɛɔ, nyɛ koɖo Heinz yi Kampala ci yí nyi Ouganda fyɔju. Le wleci amatɔn ŋkɔtɔwo mɛɔ, mìnɔ Sam koɖo Christina Waiswa xomɛ koɖo wowo vi amatɔn sɔ kpe nɔ wowo xomumɛtɔ amɛnɛ. Blaŋblaŋ ɔ, zeɖeka yí nɔviŋsu koɖo nɔvinyɔnu Waiswa koɖo wowo xomu ɖunɔ enu le ŋkeke ɖeka mɛ. Mɛdruxɔxɔ wowotɔ wa dɔ do mì ji sugbɔ. Hwenu mìnɔ koɖo Waiswa woɔ, nyɛ koɖo Heinz kpla nu ŋtɔŋtɔ ɖewo ciwo yí kpedo mì nu le ejugoduŋɛnywidradra gbenɔnɔ mìwotɔ mɛ. Le kpɔwɛ mɛ, mìkpla lé mìalenɔ eshi koɖo eshi kankin yí azan eshi ci wosɔ kpasa enuwo nɔ adaduwo do. Le 1983 mɛɔ, nyɛ koɖo Heinz kpɔ mìwoŋtɔwo xwe ci mɛ mìanɔ vofamɛ le le Kampala.

Ejugoduŋɛnywidradradɔ lɔ jɔ ji nɔ mì sugbɔ. Ŋɖo ŋwi mɔ le wleci ɖeka mɛɔ, mìmanɔ wema wu kotokun 4000 han! Vɔ mɛ ciwo mìkpɔnɔ le kunuɖeɖedɔ lɔ mɛ le veviɖe nɔ mì sɔwu. Wobunɔ Mawu yí jinɔ mɔ yewoakan seŋ so Bibla nu. Heinz kplanɔ Bibla koɖo amɛ 10 yi 15 han yí nyɛ can ŋwanɔ ahan hɛnnɛ. Gbesɔ kpe niɔ, mìkpla enu sugbɔ so mìwo nukplaviwo gbɔ. Le kpɔwɛ mɛ, éjɔnɔ ji nɔ mì nɔ mìkpɔ yí wozɔnkɔ zɔnlin yí yikɔ bɔbɔwo kwɛshila ɖekaɖeka duu, yí wodevatonɔ nyɔ o yí agbekokɔ nukui.

Le 1985 koɖo 1986 mɛɔ, ahwa gangan amɛve jɔ le Ouganda. Mìkpɔnɔ ɖevihwɛwo blaŋblaŋ yí wohɛnnɔ ecuwo yí wosɔnɔ wo danɔdo afi ɖewo nɔ eju lɔ nɔ woacɔcɔ amɛwo. Hwenɔnuɔ, mìdonɔ gbe ɖaɖa nɔ Yehowa nɔ ana enugɔnmɛsese mì nɔ mìagbenɔ kpuu hwenu mìjijiɛ ejinywitɔwo kpɔ le kunuɖeɖedɔ lɔ mɛ. Eyi Yehowa ɖo mìwo gbedodoɖawo ŋci. Blaŋblaŋ ɔ, mìŋlɔnɔbe vɔnvɔn mìwotɔwo nɔ mìdo go mɛɖe ci yí sɔ eɖe le Fyɔɖuxu ŋɛnywi lɔ ji.

Migbekpɔ jijɔ ci mìɖe kunu nɔ mɛdruwo hɛnnɛ. Le kpɔwɛ mɛ, mìkpla Bibla koɖo Murat koɖo Dilbar Ibatullin, asu koɖo ashi ciwo yí so Tatarstan (Centrale Russie). Murat nyi doto. Asu koɖo ashi lɔwo va nyɔnɔnwi lɔ mɛ yí kpɔtɔ sɛnkɔ Yehowa so tɛgbɛɛ. Le yiyimɛɔ, mɔnukpɔkpɔ enyi nɔŋ mɔ ŋdo go Tatjana Vileyska nyɔnu ɖeka ci yí so Ukraine ci yí ji mɔ yeawu yeɖeki sa. Ci Tatjana wa ʒinʒindoshimɛ ɖegbɔɔ, étrɔ yi Ukraine yí le yiyimɛɔ, evatrɔ egbegɔnmɛɖetɔ nɔ mìwo wemawo.a

CUKAÐA YOYUWO

Le 1991 hwenu yí nyɛ koɖo Heinz yi gbɔndomɛ le Autrucheɔ, mìdo go koɖo alɔjedɔwaxu ci yí le nɔ, eyi woɖo edɔ yoyu ɖeka nɔ mì le Bulgarie. Ci communisme cɛkpakpa lɔ vajuin le wezexu nɔ Europu goduɔ, wovaɖe emɔ do Yehowa Kunuɖetɔwo dɔ lɔ nu le ese nu le Bulgarie. Shigbe lé ŋnui vayi nɛɔ, nyɛ koɖo Heinz be yí sɔ wema ɖewo vayi eju ŋnɔ mɛ sa hwenu yí woɖo te mìwo dɔ lɔ. Vɔ ecɛyɛɛɔ, wovasɔ mì ɖaɖa enɔ nɔ mìaɖe kunu.

Wonu nɔ mì mɔ mìŋgbetrɔ yi Ouganda o. Eyi taɖo mìyi Betɛli le Allemagne yí sɔ ehun yí zɔn emɔ yi Bulgarie yí mìdegbetɛnŋ trɔyi ejugoduŋɛnywidratɔwo xwe mɛ lɔ yí alɔ́ mìwo nuwo alo ado babayi nɔ mìwo xlɔwo kpetii o. Wosɔ mì ɖaɖa gbɛbɔbɔ ɖeka ci mɛ eŋɛnywidratɔ 20 le le Sofia.

Mìdo go cukaɖa yoyu sugbɔsugbɔ le Bulgarie. Ŋkɔtɔ, mìdese egbe o. Gbesɔ kpe niɔ, wema ciwo ɖekɛ yí le Bulgarie-gbe lɔ mɛ wo yí nyi La vérité qui conduit à la vie éternelle koɖo Recueil d’histoires bibliques. Yí egbɔnnu nɔ mì mɔ mìatɔ Bibla nukplakpla wawa koɖo amɛwo. Ci mìdokɔ go cukaɖawo can ɔ, Kunuɖetɔwo gbɛbɔbɔ hwɛhwɛ ci mɛ yí ezo le lɔ wakɔ ŋkɔyiyi. Orthodox Cɔci lɔ do jeshi yi, eyi cukaɖawo fɛn kɔɖo mì ji.

Le 1994 mɛɔ, wodelɔn ajeshi Yehowa Kunuɖetɔwo ɖɛ mɔ wonyi sɛnsɛn o, wokpɔnɔ wo shigbe gbɛbɔbɔ kpotu ɖe ci yí klan do akpo nɛ. Wolé nɔvi ɖewo cu. Wokaka ŋsunyɔwo do mì nu le Radio koɖo televiʒiɔnwo ji yí nunuɔ mɔ denyi ɖeviwo ɖekɛ yí Yehowa Kunuɖetɔwo wuwuɔ o, vɔ wogbedodoɔ ŋsɛn wowo kpenawo nɔ woawu wowoɖekiwo. Egbɔnnu nɔ nyɛ koɖo Heinz mɔ mìaɖe kunu. Blaŋblaŋ ɔ, mìdonɔ go xomɛvetɔwo yí wodonɔ axwa do ta nɔ mì amɔ yewoayɔ Kpovishiwo nɔ mì yí adɔdɔ ekpe koɖo enuwo mì. Emɔ ɖe deli ci ji mìato yí ahɛn wemawo va eju lɔ mɛ o yí cukaɖa enyi mɔ woakpɔ exɔ axaya keŋ awa bɔbɔwo le mɛ. Kpovishiwo can gban mì do le mìwo takpekpe ɖeka mɛ yí ɖo te yi. Defa do nyɛ koɖo Heinz le amɛnuveamɛnu nyɔ cɛ mɛ o. Nyigbanmama ci mɛ mìwa dɔ le le Ouganda to akpo xesexese nɔ cɛ yí gbesɛn ku! Nyi yí kpedo mì nu mìdo ji le trɔtrɔ ŋtɔ́ mɛɔ?

Ejunɔnɔ koɖo nɔviŋsu koɖo nɔvinyɔnu ciwo yí le nɔtɔxu na yí mìkpɔ jijɔ. Éjɔnɔ ji nɔ wo mɔ yewokpɔ nyɔnɔnwi lɔ yí kpekpedonu ci mìna wo gbejenɔŋ nɔ wo. Wo pleŋ nɔnɔ ju yí kpenɔdo wowonɔnɔwo nu. Mìkpla le ŋtɔ́wo pleŋ mɛ mɔ mìatɛnŋ akpɔnɔ jijɔ le edɔ ci woɖo nɔ mì mɛ nɔ mìkpɔtɔ yí sɔnɔ eɖe le ji nɔ mɛbuwo.

Ci hwenuwo vayikɔɔ, enu lɔwo vatrɔ. Le 1998 mɛɔ, wotrɔ yí dashi do mìwo dɔ lɔ ji le Bulgarie yí wotrɔ yí gbetɔ gɔnmɛ ɖeɖe nɔ wema sugbɔ le Bulgarie-gbe mɛ. Le 2004 mɛɔ, wocu alɔjedɔwaxu yoyu ɖeka nɔ mì. Egbɛyɛɔ, hamɛ 57 yí le Bulgarie yí eŋɛnywidratɔwo nyi 2953. Le exwe 2024 mɛɔ, amɛ 6475 yí va eŋwiɖoɖo lɔ. Le gaɖeka mɛ vayiɔ, nɔvinyɔnu amatɔn kpaŋ yí le Sofia, vɔ ecɛyɛɛɔ, mìvaɖo hamɛ amashiɖekɛ! Le nyɔnɔnwi mɛɔ, nyɛ koɖo Heinz vakpɔɛ mɔ “xomu hwɛhwɛ. . . va trɔ sun akɔta gangan” le Bulgarie.—Ezai 60:22.

MÌWOŊTƆWO CUKAÐAWO

Le anyi gbe mɛɔ, ŋdo go lanmɛsɛn cukaɖa sugbɔ. Ci exwewo vayikɔɔ, wokpɔ kanŋsɛ sugbɔ le afi vovovowo nɔŋ, ɖeka vayi le tamɛ nɔŋ hɛnnɛ. Wozan edɔ̀dada mɔnu ci woyɔnɔ mɔ Radio-Thérapie. Eyi ŋvayi Inde yí dotowo vawa edɔ̀ nɔŋ nanɔ gaxoxo 12 keŋ yí sɔ ɖe kanŋsɛdɔ̀ ci yí le tamɛ nɔŋ swi. Ci wowa edɔ lɔ nɔŋ ɖegbɔɔ, mìvayi Betɛli Inde tɔ keŋ nɔ matɛnŋ agbɔn do mɛ hwɛɖeka, yɛ goduɔ, mìtrɔ vayi Bulgarie yí ayi mìwo dɔ lɔ ji.

Hwenɔnuɔ, Heinz lé edɔ̀ ɖeka ci exɔ so yi jilawo gbɔ, woyɔnɔ edɔ̀ lɔ mɔ Huntington. Edɔ̀ lɔ dɔ yí egbɔnnɔnu ni mɔ azɔn zɔnlin, axo nuxu yí ahwannɔ yi ŋcinuwo do gamɛ. Ci edɔ̀ lɔ sɛnsɛnŋ ni dojiɔ, enyɛ yí vawakɔ edɔ ɖekpokpui ni. Hweɖewonuɔ, enu cinɔ kɔ nɔŋ sugbɔ eyi ŋlonɔ nu kpɔ so lé enu lɔwo avayi do nu. Ele ahan gan, blaŋblaŋ ɔ, nɔviŋsu jajɛ ɖeka ci yí tɔ mɔ Bobi ɖenɔ kunu koɖo Heinz. Ci yí Heinz dexonɔ nuxu nywiɖe o yí lé ewanɔ alɔ do koɖo lé ezɔnnɔ zɔnlin do dejenɔ amɛwo tɔ ji can ɔ, enu ŋtɔ́wo dedonɔ aya nɔ Bobi o. Nɔ ŋdasun ji yí akpedo Heinz nu gaɖewomɛɔ, Bobi nɔnɔ enɔ nɔ mì yí kpenɔdo mì nu gashiagamɛ. Ci nyɛ koɖo Heinz ɖui mɔ mìdaji evi le xexe cɛ mɛ can ɔ, Yehowa zan Bobi yí sɔ kpedo mì nu yí evale shigbe mìwo vi ŋsuvi hannɛ nɔ mì!—Maki 10:​29, 30.

Heinz can gbele kanŋsɛdɔ̀ sɔ kpenɔ edɔ̀ ɖetɔ lɔwo. Éwa ŋshishi mɔ le 2015 ɔ, asunyɛ vevi lɔ ku. Ci asunyɛ ku ɖegbɔɔ, ŋkpɔɛ mɔ mɛɖe datɛnŋ cu yi du nɔŋ kpɔ o. Yi ku lɔ deɖyi nyɔnɔnwi do nu nɔŋ o. Vɔ le anyi susu mɛɔ, Heinz kpɔtɔ le agbe! (Luiki 20:38) Le ŋkeke ɖewo jiɔ, ŋɖonɔ ŋwi enyɔgbe fafa ciwo ezannɔ nɔŋ koɖo nukplamu nywi ciwo enanɔŋ vayi wo. Ŋdo akpe sugbɔ nɔ exwe ciwo pleŋ mìsɛn Yehowa doju na nɔ.

AKPE MƆ YEHOWA KPEDO ŊNU

Le nyɔnɔnwi mɛɔ, Yehowa le koɖoŋ le anyi cukaɖawo pleŋ mɛ. Égbena yí ŋvaɖu anyi ŋkpɛn ji yí vanyi ejugoduŋɛnywidratɔ ci yí lɔn amɛwo. (2 Tim. 1:7) Ŋdo akpe nɔ Yehowa mɔ nyɛ koɖo nɔvinyɛhwɛ wakɔ gashiagamɛ sumɔsumɔdɔ lɔ ɖɛyɛ. Egbɛɔ, yɛ koɖo asuɔ wakɔ ekan lɔ mɛ hamɛwo jijikpɔdɔ lɔ le Serbie-gbe mɛ le Europe. Yehowa ɖo gbedoɖa ciwo pleŋ danyɛ wanɔ sa hwenu mìnyi ɖevihwɛwo ŋci!

Anyi Bibla kplakpla na yí ŋkpɔnɔ fafa le ji mɛ. Le hwenu gbɔnnugbɔnnuwo mɛɔ, ŋkpla yí donɔ gbe ɖaɖa veviɖe shigbe lé Yesu wɛ nɛ. (Luiki 22:44) Anyi xlɔ ciwo yí le Nadezhda hamɛ lɔ mɛ le Sofia sɔnɔ lɔnlɔn koɖo xomɛvu kpenɔdo ŋnu. Wonyi emɔ ɖeka ci ji Yehowa to yí nanɔ ɖoŋci nɔ anyi gbedoɖawo. Woyɔnɔŋ yí ŋnɔnɔ eju koɖo wo yí gbenunɔ lé wokpɔnɔ jijɔ do ŋnu do nɔŋ, ecɛ dɔ yí ŋkpɔnɔ jijɔ sugbɔ.

Ŋbunɔ tamɛ kpɔ blaŋblaŋ so fɔnfɔnsoku nu. Le susu mɛɔ, ŋkpɔnɔ anyi jilawo le ju le paradiso mɛ le ŋkɔ nɔ mìwo xwe yí wowa ɖaŋ gbenyɔ vi shigbe lé wole hwenu wolé alɔ le jajɛ mɛ ɛnɛ. Ŋkpɔ nɔvinyɛ nyɔnu yí eɖaɖa enu. Ŋkpɔnɔ Heinz le te le axa nɔ yi sɔ. Enu cɛwo ɖenɔ susu dɔndɔnwo so tamɛ nɔŋ yí dɔnɔ yí anyi ji ɖɔnɔ koɖo akpedodo nɔ Yehowa.

Nɔ ŋbu tamɛ kpɔ so anyi gbe nu yí kpɔ lé esɔ mɛ avanɔ doɔ, ŋlɔnnɔ do enyɔ ciwo yí Davidi nu le Ehajiji Wema 27:​13, 14 mɛ ji keŋkeŋ. Énu mɔ: “Fini yí nale nɔ xɔse dele ŋshi sa nɔ makpɔ Yehowa nywiwawa le amɛleagbewo domɛ le nyigban jiɔ? Kpɔ emɔ nɔ Yehowa, gbedɔn yí asɛnŋ. Ɛɛ, kpɔ emɔ nɔ Yehowa.”