Enyɔbiɔse Ciwo yí so yi Hlɛntɔwo Gbɔ
Hwenu yí Kunuɖeɖedɔ lɔ Avɔɔ?
Yesu nu mɔ: “Woadra Fyɔɖuxu ŋɛnywi lɔ le nyigban lɔ pleŋ ji yí anyi kunuɖeɖe nɔ jukɔnwo pleŋ. Yi goduɔ, vɔvɔnu lɔ ava.” (Matie 24:14, nwt) Grɛki nyɔgbe ci gɔnmɛ woɖe mɔ “vɔvɔnu” le kpukpui cɛ mɛ shigbe lé ele le kpukpui 6 koɖo 13 tɔ lɔ mɛ nɛ yí nyi teʹlos. Vɔvɔnu nɔ Satana xexe cɛ le Armagedɔn hwenu nu yí exokɔ nuxu so. (Enyɔ. 16:14, 16) Ecɛ dasɛ mɔ mìakpɔtɔ adradra eŋɛnywi lɔ keke aje hwenu kleŋ ɖe doŋkɔ nɔ Armagedɔn. Ecɛ trɔ enumɛmɔŋje mìwotɔ sasatɔ.
Mìmɔŋje mɛ sa mɔ mìaɖo ete eŋɛnywidradradɔ lɔ, hwenu efunkpekpe gangan lɔ atɔ ji koɖo Babiloni Gangan lɔ gugu. (Enyɔ. 17:3, 5, 15, 16) Mìxɔɛ ji se mɔ enujɔjɔ cɛ adasɛ vɔvɔnu nɔ “Yehowa dɔmɛnywi” le kpɔwɛnyɔnunu mɛ. (Ezai 61:2) Mìgbebuini sa mɔ mɛ ciwo yí aci agbe le efunkpekpe gangan lɔ godu anyi mɛ ciwo yí adasɛ amɛɖekisɔsɔna wowotɔ nɔ Yehowa gbɔxwe enujɔjɔ cɛ atɔ ji. Mìsɔnɔ wo sɔ sɔ kpɔ koɖo Ʒuifu ciwo yí ci agbe hwenu wogban Ʒerusalɛmu le exwe 607 D.Y. Mɛ cɛwo sun ji yí ci agbe ɖo wosɛn Yehowa yí gbe enuvwin wawa doŋkɔ nɔ Ʒerusalɛmu gbangban. (Ezek. 5:11; 9:4) Ele ahan gan, mìdatɛnŋ asɔ enyɔ cɛwo sɔ sɔ koɖo enyɔ ciwo yí Yesu nu le Matie 24:14 mɛ o. Yesu nyɔ lɔwo dasɛ mɔ emɔ atɛnŋ ahun nɔ amɛwo yí woaxɔ eŋɛnywi lɔ le hwenu kleŋ ɖe doŋkɔ nɔ Armagedɔn vɔvɔnu.
Lé mìmɔŋje Matie 24:14 mɛ do vayi gbedɔ yí eʒan mɔ mìatrɔ lé mìmɔŋje nyɔ ci wonu ɖɛ kuso eshikpe ŋɛdu ci yí le Enyɔdasɛ 16:21 mɛ doji. Enu gɔnmɛ jiji cɛwo dasɛ mɔ kpukpui amɛve cɛwo tanɔ wowonɔnɔwo. Lé enyi ahan doɔ? Enu ci yí kpedo mì nu mìnya ahan yí nyi nyɔ ci Bibla nu kuso lé amɛwo axɔnɔ Fyɔɖuxu ŋɛnywi lɔ do nu. Apotru Paul ŋwlɛ mɔ ŋɛdu lɔ nyi eŋɛnywi ci yí nyi ami “hwɛnte nɔ mɛ ciwo yí le hwlɛngan mɔ ji.” Vɔ ŋɛdu lɔ nyi ami “hwɛnte eku tɔ ci yí nyi eŋɛvwin” nɔ Mawu ketɔnɔwo. (2 Kor. 2:15, 16) Wodelɔnnɔ Fyɔɖuxu ŋɛdu lɔ o, ɖo éklonɔ nu so wowo xexe vwin cɛ ci ji Satana kpakpa acɛ do, ci woagu sabaɖeyɛ ji.—Ʒan 7:7; 1 Ʒan 2:17; 5:19.
Mìagbeɖo ŋwi mɔ eshikpe gangan ci nyɔ wonu le enyɔdasɛ wema 16: 21 mɛ anyi “ayadonɔamɛ sɛnŋ.” Ecɛ dasɛ mɔ le efunkpekpe gangan lɔ hwenuɔ, kunuɖeɖedɔ lɔ tɛnŋ gbevasɛnŋ doji, eyi amɛwo agbevajeshi Yehowa ŋkɔ ɖɛ sɔwu sa. (Ezek. 39:7) Le gaŋtɔ́mɛ ci woagu Babiloni Gangan lɔ godu ɖe, eŋɛdu lɔ agbekpɔtɔ anyi ami hwɛnte nɔ amɛwoa? Etɛnŋ nyi ahan dru. Taŋfuin wotɛnŋ ɖo ŋwi mɔ alo akpla mɔ so exwe nɛniɖewo keɔ, Yehowa Kunuɖetɔwo nunuɔ mɔ woagu ŋsusɛnsɛnwo pleŋ.
Ale shigbe enu ci yí jɔ le Eʒipti blema hwenu Efunkpekpe Amɛ́wo lɔwo va wo ji godu nɛ. Ci Yehowa “[do hwɛ] Eʒipti mawuwo pleŋ” goduɔ, “akɔta buwo mɛtɔwo sugbɔ” vabɔ do Izraɛliviwo nu. (Hun. 12:12, 37, 38) Taŋfuin Eʒiptitɔ cɛwo sɔ gbeta mɔ yewoanɔ eju koɖo Yehowa mɛwo hwenu ci yí wokpɔ yí enyɔ ciwo pleŋ yí Moizi nu kuso Efunkpekpe Amɛ́wo lɔwo nu vamɛ nyao godu.
Le Babiloni Gangan lɔ gugu goduɔ, emɔ ahun nɔ mɛɖekpokpui ci yí asɔ gbeta mɔ yeasɛn Yehowa yí anɔ godu nɔ Kristo nɔviɛ ciwo yí akpɔtɔ ale nyigban lɔ ji hwenɔnu. (Matie 25:34-36, 40) Eyi taɖo, emɔ cɛ ci yí ahun nɔ amɛwo yí woahlɛn wo do lɛngbɔwo mɛ ava vɔvɔnu le hwenu kleŋ ɖe doŋkɔ nɔ Armagedɔn, hwenu yí amɛshiaminɔ kpɛtɛwo axɔ fɛnxu wowotɔ yí ayi jeŋkwi mɛ.
Enumɛɖeɖe cɛ ci mɛ mìmɔŋje waɖaŋ dre lɔnlɔn koɖo ŋshishikuku gangan ci Yehowa ɖo nɔ mì mɛ. Le nyɔnɔnwi mɛɔ, Yehowa “Dé jiji mɔ amɛ ɖe a trɔn o, vɔ, É jijiɛ mɔ amɛshamɛ a trɔjimɛ.”—2 Piɛ 3:9.