Lé Alɔlele ɖe Ado Bubu Yehowa nu do

1-2. Lé Yehowa kpɔnɔ alɔlele doɔ?

ÈDRADRA do nɔ ao lɔlelea? Nɔ ényi ahan yɔ nɛɔ, eo koɖo edɔ loo! Kankandoji li mɔ èxa sugbɔ ci èwawa toto so alɔlele lɔ nu. Yehowa ji mɔ ao lɔlele lɔ le yi nywiɖe. Éji mɔ míase vivi nɔ míwo lɔlele lɔ gbenɔgbe yí akpɔ jijɔ asɔyi mavɔmavɔ.a—Elo. 5:18; Salomɔ Ha 3:11.

² Éle veviɖe mɔ ao lɔlele ado bubu Yehowa nu. Nyi yí taɖo mìnu ahan ɔ? Yí lé àwɛ doɔ? Ci enyi mɛ ciwo yí dradra do yí jikɔ ale alɔ nu yí nyɔta cɛ jikɔ axo nuxu nɔ can ɔ, gɔnmɛɖose ciwo nu mìakan seŋ so atɛnŋ akpedo mì pleŋ nu nɔ mìado bubu Yehowa nu nɔ mìyi alɔlele ɖe tɔxu alo nɔ woyɔ mì mɔ mìawa toto so eɖe nu.

NYI YÍ TAÐO AO LƆLELE ÐO ADO BUBU JEHOVAH NUƆ?

3. Nyi Kristotɔ ɖe ci yí wawa toto nɔ alɔlele ɖo abu kpɔɔ, yí nyi yí taɖoɔ?

³ Kristotɔ ciwo yí wakɔ toto nɔ alɔlele ɖe ɖo atekpɔ azɔn do gɔnmɛɖose ciwo Yehowa nu yí woŋwlɛ do yi Nyɔ lɔ mɛ ji. Nyi yí taɖoɔ? Yehowa yí nyi mɛ ci gbɔ yí alɔlele So. Éyi wa toto nɔ alɔlele ŋkɔtɔ. Mɛ ciwo yí ele alɔ̀ nɔ lɔwo yí nyi Adamu koɖo Ɛva. (Gɔnm. 1:28; 2:24) Ci enyi ahan ɔ, Mawu susu ɖo anɔ tamɛ nɔ mɛ ci yí wawa toto yí alé alɔ̀.

4. Nyi yí taɖo mɛ ciwo yí jikɔ aɖe nɔnɔ ɖo ado bubu Yehowa nu le wowo lɔlele zangbeɔ?

⁴ Enuvevi ɖeka ci yí taɖo èɖo aɖo Yehowa susu le ao lɔlele zangbe ke: Eyi nyi Edao ci yí le jeŋkwi mɛ koɖo ao Xlɔ vevi. (Ebre. 12:9) Kankandoji li mɔ èji mɔ yeanyi exlɔ koɖo Yehowa. Dàji gbeɖe mɔ enu ɖe ajɔ gbenɔgbe alo hwebunu yí adahɛn Exlɔ ci ènyi koɖo Yehowa o. (Eha. 25:14) Nɔ èbu tamɛ kpɔ so enu ciwo Yehowa wa nɔ eo vayi koɖo enu ciwo avawa nɔ eo le esɔ mɛ nuɔ, dàji gbeɖe mɔ yedado bubu yi nu le ye lɔlele zangbe o.—Eha. 116:12.

LÉ ATƐNŊ ADO BUBU YEHOWA NU DOƆ?

5. Lé Bibla atɛnŋ akpedo alɔletɔwo nu woasɔ gbeta nywiwo nɔ alɔlele wowotɔ doɔ?

⁵ Bibla dedo esewo kɔɖɛ gblɛlɛlɛ so lé woale alɔ̀ do alo lé woaɖu agɔ le alɔlele lɔ hwenu do o. Eyi taɖo mɛ ciwo yí wakɔ toto mɔ yewoaɖe nɔnɔwo ɖo awa nu asɔ koɖo wowo nɔnɔmɛ, lé wowanɔ nu do le wowo tɔxu alo lé wowoŋtɔwo ji do. Mawu sɛntɔ adodwiwo can gbewanɔ do ese ciwo Acɛkpatɔwo do so alɔlele nu ji. (Mat. 22:21) Éle ahan gan, alɔlele ci nu wowa toto so yí esɔ koɖo Bibla mɛ gɔnmɛɖosewo donɔ bubu Yehowa nu yí gbena yí eji jɔɛni. Eyi taɖo, gɔnmɛɖose ciwo yí ɖo anɔnɔ susu mɛ nɔ eoɔ?

6. Nyi yí taɖo ele veviɖe mɔ mɛ ciwo yí jijiɛ nɔnɔ aɖe ɖo awa do ese ciwo acɛkpatɔwo do so alɔlele nu jiɔ?

⁶ Wado Ese Ciwo Acɛkpatɔwo do ji. (Rɔm. 13:​1, 2) Le eju sugbɔ mɛɔ, mɛ ciwo yí jikɔ aɖe nɔnɔ ɖo awa do ese ciwo acɛkpatɔwo do ji gbɔxwe alé alɔ̀. Mɛ ciwo yí jikɔ aɖe wowonɔnɔwo ɖo ajeshi ese ciwo wodo le wowo tɔxu yí awa do wo ji. Nɔ èɖo enyɔ ɖewo abiɔ se so lé àwɛ awa do ese lɔwo ji nuɔ, voŋ fɛɛ yí anu nɔ hamɛmɛshinshinwo nɔ woakpedo eo nu.b

7. Lé alɔlele zan ɖe ayi nywiɖe doɔ?

⁷ Wɛ nɔ enuwo ayi nywiɖe. (1 Kor. 10:​31, 32) Je agbla awɛ nɔ Mawu gbɔngbɔn lɔ kusɛnsɛn azenɔ le ao nuwanawo mɛ yí danyi xexe lɔ gbɔngbɔn o. (Gal. 5:​19-26) Ci enyi ŋsu lɔ yí avanyi ta nɔ xomu lɔɔ, éɖo awɛ nɔ alɔlele zangbe lɔ anyi jijɔ hwenu koɖo ŋci nu bubu le. Nyi yí atɛnŋ akpedo nuɔ? Wosɔ lɔnlɔn koɖo bubu sɔ xonɔ Bibla mɛ nuxu kuso alɔlele nu. Ékpenɔdo enyɔsetɔwo pleŋ nu yí womɔnɔŋje mɛ mɔ alɔlele nyi enunana ci yí so Mawu gbɔ. Nuxu lɔ gbekpenɔdo wo nu wonyanɔ mɔ wana lɔ le veviɖe. Eyi dɔ taɖo nɔ anya wawaɔ, Kristotɔ sugbɔtɔ jinɔ mɔ yewoawa wana vevi cɛ le Fyɔɖuxuxɔ ɖe mɛ. Nɔ èji mɔ yeazan Fyɔɖuxuxɔ ɖeɔ, èɖo gbe aŋwlɛ nu nɔ hamɛmɛshinshinwo-ha lɔ doŋkɔ yí akpɔ mɔ woaxɔ gbe nɔ eye ma.

8. Nyi yí atɛnŋ ana yí alɔlele gɔɖuɖu ɖe ayi nywiɖeɔ? (Rɔmatɔwo 13:13)

⁸ Hlɛn Rɔmatɔwo 13:13. Nɔ èwa totó yí aɖu agɔ le ao lɔlele hwenu ɖe, lé àtɛnŋ awɛ yí Xexe lɔ gbɔngbɔn daze le mɛɔ? Grɛki nyɔgbe ci wozan mɔ “agɔɖuxu” gɔnmɛ yí nyi ego ci amɛwo ado, anu aha amu yí aɖu ewe keke ezan ashin ji. Nɔ èsɔ gbeta mɔ yeana aha sɛnŋsɛnŋ amɛwo le nɔ tɔxuɔ, kàndo ji mɔ mɛɖe danui keke amu o.c Nɔ woaxo mizikiɔ, wo le wɛ keke nɔ ŋgbedo axwa sugbɔ o nɔ mɛ ciwo yí va lɔwo atɛnŋ akan seŋ. Tèkpɔ yí acan miziki ciwo yí waxo koɖo ehagbe lɔwo nywiɖe nɔ ŋgbeva do aya nɔ mɛɖe o.

9. Nyi yí ɖo anɔ susu mɛ nɔ asu koɖo ashi lɔwo kuso nuxu ciwo woaxo alo nubu ɖewo nu le wowo lɔlele zanɖuɖu hwenuɔ?

⁹ Le agɔɖuxu lɔ ɖe, èji mɔ mɛɖewo axo nuxu kleŋ ɖewo, axo video kleŋ ɖewo alo awa nubu ɖea? Blaŋblaŋ ɔ, enu cɛwo wawa tɛnŋ dɔ yí ŋkeke lɔ anyi ŋkeke vevi ɖeka. Éle ahan gan, tèkpɔ nɔ enu ciwo ajɔ le enɔ anyi enu ciwo yí ado ŋsɛn amɛ. (Fili. 4:8) Biɔ eoɖeki se mɔ: ‘Enu lɔwo adasɛ mɔ ŋdo bubu mɛbuwo nua? Woadasɛ mɔ ŋdo bubu alɔlele toto nua?’ Eyi ci yí le veviɖe wuɔ, biɔ eoɖeki se mɔ: ‘Enu ciwo woawa le ŋtɔxu gbenɔgbe ɖe, woado bubu Yehowa nua?’ Ci ɖɔkwi ɖewo wa ɖaŋ vivinɔ le wana lɔ hwenu can ɔ, woɖo aze nɔ enu ɖekpokpui ci yí desɔgbe o. Shigbe nyɔgbe ɖewo alo ŋɖewo ciwo ahɛn susu yí amɛgbɔdɔndɔn ji nɛ. (Efe. 5:3) Kandoji mɔ ao xomumɛtɔ ɖe koɖo ao xlɔ ɖe ciwo yí aji mɔ yewoaxo nuxu kleŋ ɖe le wana lɔ hwenu mɔŋje ao drowo mɛ yí agbedo bubu wo nu.

10. Nyi yí taɖo mɛ ciwo yí jikɔ aɖe nɔnɔ lɔwo ɖo awa toto nɔ alɔlele lɔ anɔ kleŋ ɔ?(1 Ʒan 2:​15-17)

¹⁰ Jeshi sɛnxu nɔ eoɖeki. (Hlɛn 1 Ʒan 2:​15-17.) Éjɔnɔ ji nɔ Yehowa nɔ yi sɛntɔwo jijiɛ mɔ yewoado bubu yi nu yí danyi mɔ woadɔn susu va wowoɖekiwo ji o. Eyi taɖo, Kristotɔ ciwo yí jeshi sɛnxu nɔ wowoɖekiwo zenɔ nɔ eho sugbɔ zanzan koɖo “droamu ŋkuvitɔ” le wowo lɔlele lɔ hwenu. Nɔ ao lɔlele lɔ le kleŋ ɖe, nyɔna ciwo yí akpɔ le mɛɔ? Taŋfuin enuwo ayi nywiɖe shigbe lé enyi nɔ nɔviŋsu ci yí tɔ mɔ Mike yí so Norvège hannɛ. Énu mɔ: “Mìze nɔ efɛnɖuɖu yí kpɔtɔ wawa emɔɖeɖedɔ lɔ. Mìwo lɔlele lɔ le kleŋ, vɔ ényakpɔkpɔ yí mìdaŋlɔbe kpɔ o.” Tabitha ci yí so Inde nu mɔ: “Mìze nɔ enu lolokpɔ sugbɔ ci mìwo lɔlele lɔ le kleŋ, édɔ yí enuwo yi nywiɖe yí dedo aya nɔ mɛɖe o.”

11. Lé nyɔnu yoyu lɔ koɖo asuɔ atɛnŋ adasɛ do mɔ yewowa nu le dredrenu le wowo nudodowo mɛɔ? (Kpɔ foto lɔwo hɛnnɛ.)

¹¹ Èsɔ gbeta so enu ciwo avado nua? Kankandoji li mɔ èji mɔ yeanyakpɔkpɔ koŋ. Le Bibla hwenuwo can ɔ, ŋsu koɖo nyɔnu ciwo yí dradra do nɔ wowo lɔlele lenɔ ŋkuvi do enu ciwo woado nu. (Ezai 61:10) Àji mɔ enu ciwo yeado gbenɔgbe lɔ ato akpo nɔ enu ciwo yedonɔ sa. Éle ahan gan, èɖo awa enu le dredrenu. (1 Tim. 2:9) Le ao lɔlele lɔ hwenuɔ, ŋgbelɔn nɔ enudodowo alo dradrado bu ɖe avanyi enu ci yí ale veviɖe nɔ eo sɔwu o.—1 Piɛ 3:​3, 4.

12. Nyi yí taɖo alɔletɔ lɔwo ɖo akando ji mɔ yewoze nɔ kɔnu ciwo desɔ koɖo Bibla le yewotɔxuɔ?

¹² Ze nɔ kɔnu ciwo yí desɔ koɖo Bibla o. (Enyɔ. 18:4) Satana vabaka alɔlele wanawo koɖo ŋsusɛnsɛn kɔnu, gbɔngbɔnyɔyɔ koɖo jixɔse trofitrofiwo. Yehowa kanxle mì mɔ mìwo le nɔ azɔge kpanŋkpanŋ nɔ enumakɔmakɔ ŋnɔwo. (2 Kor. 6:​14-17) Nɔ wowanɔ wana alo kɔnu ŋtɔ́wo le míwo tɔxuɔ, mígbeje fini woso mɛ kpɔ yí akpɔ mɔ wosɔ koɖo Bibla mɛ gɔnmɛɖosewo keke yeawa wo le alɔlele yewotɔ hwenu ma.

13. Lé alɔletɔ lɔwo atɛnŋ asran lé Yehowa kpɔnɔ enunanawo doɔ?

¹³ Le fini yí ènɔnɔ ɖe, wojinɔ mɔ mɛ ciwo woyɔ va alɔlele lɔ tɔxu ana nu alɔletɔ lɔwoa? Lé eho le mɛɖe shi do nu akpɔ do yí asɔ gbeta so enu ci ana nu. Lé nyɔnɔnwi mɛɔ, wodo ŋsɛn Kristotɔwo mɔ wo le nanɔ enu amɛ yí ecɛ wawa dɔ yí wokpɔnɔ jijɔ. (Elo. 11:25; Edɔ. 20:35) Éle ahan gan, mìdeɖo aʒin mɛ ciwo mìyɔ va mìwo lɔlele waxu ji mɔ woɖo ana nu dandandan o. Ahanke, mìdeɖo awɛ yí woakpɔɛ mɔ enu ciwo yewona lɔ dejeŋ nɔ mì o. Mìakpɔnɔ enunana shigbe lé Yehowa kpɔɛni do nɛ. Mìatashi mɛbuwo nɔ woana nu sɔ koɖo enu ciwo yí le wo shi faa.—2 Kor. 9:7.

ZENƆ NƆ CUKAÐAWO YÍ AÐU CIWO YÍ AVAVAWO JI

14. Cukaɖa ciwo yí alɔletɔ ɖewo donɔ egoɔ?

¹⁴ Ci èteteɛ kpɔ mɔ yeawɛ nɔ alɔlele lɔ ayi nywiɖe yí ado bubu Yehowa nu can ɔ, àtɛnŋ ado go cukaɖawo. Le kpɔwɛ mɛ, étɛnŋ gbɔnnu nɔ eo mɔ àwa toto so alɔlele ci yí le kleŋ nu. Charlie ci yí so Salomon tɔdomɛnyigban ji nu mɔ: “Nɔ wobubuɔ tamɛ kpɔ so mɛ ciwo woayɔ nɔ alɔlele zanɖuɖu lɔ nuɔ, ényinɔ taɖui nɔ amɛ haan. Mìɖo exlɔ sugbɔ yí mɛshiamɛ trɔgbɔ jijiɛ mɔ wo le yɔ yewo!” Tabitha, ci nu mìxo nuxu so vayi nu mɔ: “Le mìwo gbɔɔ, alɔlele zanɖuɖu ganganwo yí amɛwo wanɔ. Ci mìsɔ gbeta mɔ mìayɔ amɛ 100 kpoŋ ɔ, éxɔ gamɛ sugbɔ gbɔxwe mìwo jilawo vaxɔ egbe do ji.” Sarah ci yí so Inde nu mɔ: “Mɛ ɖewo sɔnɔ susu do enu ciwo amɛkpɛnkpinwo avana ji. Alɔ̀ ci tɔgannyɛ vi ciwo denyi Yehowa Kunuɖetɔwo lé vayi yɛ defa ɖeeɖe o, ékpɛn ʒin haan. Eyi taɖo, ŋkpɔɛ mɔ alɔ̀ ci nyɛnale akpɛn wu wowotɔ.” Nyi yí atɛnŋ akpedo eo nu naɖu cukaɖa ŋtɔ́wo koɖo ebuwo jiɔ?

15. Nyi yí taɖo gbedodoɖa le veviɖe nɔ wowawa toto nɔ alɔleleɔ?

¹⁵ Donɔ gbe ɖaɖa blaŋblaŋ kuso toto ci èwawa nɔ ao lɔlele lɔ nu. Le ao gbedoɖawo mɛɔ, nù cukaɖa ciwo èdodoɔ go alo lé enuwo wawa do nɔ eo nɔ Yehowa. (Fili. 4:​6, 7) Ètɛnŋ biɔɛ mɔ yɛ le kpedo ye nu nɔ yeasɔ gbeta nywiwo yí anɔ kpuu hwenu yí enulolokpɔwo ava. Àgbebiɔɛ mɔ yɛ le na edɔngbegbe ci yeʒan ye. (1 Piɛ 5:7) Ci èkando Yehowa jiɔ, adɔ yí nàvakpɔ lé éɖonɔ ao gbedoɖawo ŋci do. Tabitha ci nu mìxo nuxu so vayi yɛ nu mɔ: “Nyɛ koɖo anyi ɖajɛ lo nu kpɔ sugbɔ kuso mìwo xomu alo mɛbu ciwo mìwo lɔlele lɔ dakpe nɔ nu. Eyi taɖo, mìdonɔ gbe ɖaɖa hweɖekpokpuinu ci mìakan seŋ so mìwo lɔlele lɔ totowo nu. Mìkpɔɛ teŋ mɔ Yehowa kpedo mì nu yí enuwo yí nywiɖe le fafa mɛ.”

16-17. Lé seŋkankan atɛnŋ akpedo alɔletɔwo nu hwenu wowawa toto so alɔlele lɔ nuɔ?

¹⁶ Jè aye yí anu enu ciwo èjijiɛ koŋ koɖo bubu. (Elo. 15:22) Ci míatrɔ xomu sabaɖe yɛɔ, míɖo asɔ gbeta sugbɔ so enu ciwo yí míawa le alɔlele lɔ hwenu nu. Enu lɔ ɖewo yí nyi azan ci gbe yí míale alɔ̀ lɔ, eho nɛni ci yí míazan, amɛ nɛni ci yí míayɔ koɖo nubuwo. Gbɔxwe míasɔ gbeta ɖeɔ, mítrɔ alé enyɔ ɖewo kpɔ doju yí akan sɛŋ so Bibla gɔnmɛɖosewo nu hɛnnɛ. Ahanke, míagbebiɔ enukplamu ɖekpokpui so Kristotɔ ciwo yí shin le gbɔngbɔn mɛ gbɔ nɛ. Nɔ míxoxoɔ nuxu so enu ciwo yí míwoŋtɔwo jijiɛ nuɔ, mífanɔ xomɛ, asɔnɔ eɖe le ji nɔ míwonɔnɔwo yí agbetrɔnɔ do nɔnɔmɛwo nu. Nɔ ao xomumɛtɔ ɖewo shigbe ao jilawo nɛ, biɔ ŋɖe ciwo yí le dredrenuɔ, tèkpɔ awa do ji yí asɔ do bubu wo nu. Ðo ŋwi mɔ hwenu vevi ɖeka yí nyi ecɛ nɔ wowo hɛnnɛ. Nɔ dàtɛnŋ awa enu ciwo yí wojijiɛɔ, sɔ̀ ayejeje yí adre mɛ nɔ wo. (Kol. 4:6) Wɛ nɔ ao xomumɛtɔwo amɔŋje mɛ gbajɛɛ mɔ ao tajinu enyi mɔ yeawɛ nɔ jijɔ hwenu lɔ ado bubu Yehowa nu.

¹⁷ Nɔ ao jilawo dele nyɔnɔnwi lɔ mɛɔ, átɛnŋ agbɔn nu mɔ àdre gbeta ciwo èsɔ mɛ nɔ wo. Vɔ àtɛnŋ awɛ yí enu lɔwo ayi nywiɖe. Nɔviŋsu Santhosh ci yí so Inde nu mɔ: “Mìwo xomumɛtɔwo ji mɔ woawa Hindoue kɔnu vovovowo le alɔlele lɔ zangbe. Exɔ gamɛ sugbɔ gbɔxwe nyɛ koɖo anyi nyɔnuvi vadre gbeta ciwo mìsɔ mɛ nɔ wo yí womɔŋje mɛ. Mìtrɔ ŋɖewo yí esɔ gbe koɖo ŋciwo wojijiɛ yí deda le Yehowa sewo ji o. Le kpɔwɛ mɛ, mìtrɔ ŋciwo mìji mɔ mìaɖa le agɔɖuɖu lɔ tɔxu. Ahanke mìsɔ gbeta mɔ mìdaji eha ɖekpokpui alo aɖu ewe ɖe nɛ. Ðo enu cɛwo dema do wo o.”

18. Nyi yí atɛnŋ akpedo eo nu yí enuwo ayi nywiɖe le alɔlele ŋkeke lɔ jiɔ? (1 Korɛntitɔwo 14:40) (Kpɔ foto lɔ hɛnnɛ.)

¹⁸ Wa toto nywiɖe. Nɔ míwa ɖaŋ wa toto nywiɖe so lé enuwo ayi do le alɔlele lɔ zangbe nuɔ, ádɔ yí mídalo nu kpɔ sugbɔ o. (Hlɛn 1 Korɛntitɔwo 14:40.) Wayne ci yí so Taïwan nu mɔ: “Azan kleŋ ɖewo doŋkɔ nɔ mìwo lɔlele lɔɔ, mìwa bɔbɔ kleŋ ɖeka koɖo mɛ ciwo yí lɔn faa mɔ yewoava kpedo mì nu le wana lɔ hwenu. Mìkan seŋ so toto ciwo mìwa nu yí gbetrɔ yí xo nuxu so ŋɖewo koŋ nu. Mìnu enu ŋtɔŋtɔ ɖewo ciwo woɖo awa le alɔlele lɔ hwenu nɔ wo. Mìkando ji mɔ woawɛ do ahan ji pɛɛ.” Nɔ àdo bubu mɛ ciwo èyɔ nuɔ, tèkpɔ keke nɔ enu lɔwo anɔ gamɛ ji.

19. Lé àwɛ yí ao ŋkuviwo anɔ enu ciwo ajɔ le ao lɔlele gɔɖuɖu lɔ hwenuɔ?

¹⁹ Àtɛnŋ aze nɔ cukaɖa sugbɔ ciwo atɛnŋ ava nɔ èbu tamɛ kpɔ so wo nu doŋkɔ. (Elo. 22:3) Le kpɔwɛ mɛ, fiɖekatɔwo li yí nɔ wodeyɔ mɛɖewo can ɔ, wovanɔ alɔlele lɔ gɔɖuɖu tɔxu. Eyi taɖo, wa enu ciwo àtɛnŋ awa keŋ nɔ nɛnɛ nu ŋgbevajɔ do eo ji o. Nui nɔ wo mɔ nɔ wodeyɔ mɛɖe gbɔxwe yí evaɔ, datɛnŋ akpɔ texwe o. Gbewɛ keke nɔ ao xomumɛtɔ ciwo yí dele nyɔnɔnwi lɔ mɛ anya lé èji mɔ enuwo ayi do koɖo enu ci yí taɖo dewanɔ alɔlele kɔnu ɖekatɔwo o. Àtɛnŋ asɔ nyɔta ci yí nyi “Comment se passe un mariage chez les Témoins de Jéhovah?” ci yí le jw.org ji ɖaɖa wo. Nɔ èji mɔ enuwo ayi nywiɖe le alɔlele gɔɖuxu lɔɔ, tèkpɔ asɔ nɔviŋsu ɖeka ci yí shin le gbɔngbɔn mɛ nɔ anyi alɔlelezanɖuɖu lɔ jikpɔtɔ. (Ʒan 2:8) Nɔ èwa ɖaŋ dre lé alɔlele lɔ totowo ayi do ni nywiɖeɔ, ákpedo eo nu yí nàkandoji mɔ bubu anɔ alɔlele lɔ nu yí enuwo ayi do toto ji.

20. Nyi yí mɛ ciwo yí jikɔ alé alɔ̀ aɖo ŋwi so wowo lɔlele lɔ nuɔ?

²⁰ Hweɖewonuɔ, étɛnŋ wa nɔ eo mɔ enu lɔwo wugan eye yí ebubuɔ tamɛ kpɔ so lé enuwo ayi do le ao lɔlele lɔ hwenu nu. Vɔ, ŋgbeŋlɔbe mɔ gbeɖeka nu kpoŋ yí ao lɔlele lɔ nyi o. Ényi tɔtɔmɛ nɔ ŋkeke ciwo yí míanɔ ju yí ase vivi nɔ Yehowa sɛnsɛn. Tèkpɔ awa ci ji ekpe keŋ nɔ ao lɔlele lɔ anɔ kleŋ yí bubu agbele nu. Kàndo Yehowa ji mɔ to yi kpekpedonu mɛɔ, yeatɛnŋ asun ji awa toto nɔ alɔlele nywi. Eyi nɔ èvatrɔ ekɔ kpɔ goduɔ, eji ajɔ eo yí kpakpa agbesɔ eo do nu. Davave nɔ eo kpɔ o.—Eha. 37:​3, 4.