Enuwo vavekɔ ho le xexeɛ pleŋ mɛ—Enyɔ ci Bibla nu so nuɔ?

“Ehonyɔwo gbeɖo afɔku mɛ ke le xexeɛ pleŋ mɛ,” Enyɔ cɛ yí mɛgan ci yí kpa nɔ Xexeɛ pleŋ mɛ banŋki gbɛbɔbɔ lɔ nu le enyɔjɔjɔ yoyu ɖeka mɛ le juin 2022 mɛ. Énu kpi mɔ, “Le gaxoxo ɖekɛ lɔ mɛɔ, eho vajejeɛ nuwo ji kabakaba, wokankan ho nɔ edɔwo yí amɛwo dekpɔ ho yí zanzan kpeti o.”

Banŋki FMI (Fond Monetaire International) do jeshi mɔ, “Eho vajejeɛ ŋɖuɖu koɖo ehunmiwo ji kabakaba, mɛ ciwo yí le eju ciwo mɛ enu dedo amɛwo ji le yí kpekpeɛ yi fun koŋ”.

Bibla kpenɔdo mì nu mìnyanɔ enu ci yí taɖo ehonyɔwo vagbɔngbɔnnu ahan, lé mìawɛ keke ato eho cukaɖa lɔwo mɛ koɖo lé eho cukaɖa lɔwo avavɔ do yí mìdagbevase ɖe nɔ wo kpɔ o.

Enu ci yí taɖo enuwo veveɛ ho le “ŋkeke vɔvɔ” cɛwo mɛ

• Bibla yɔ ŋkeke ciwo mɛ mìle mɔ “ŋkeke vɔvɔwo.”—2 Timɔte 3:1.

• Yesu nu mɔ “enujiŋwo ciwo yí a do vɔnvɔn nɔ amɛ a jɔjɔ” alo enudovɔnvɔnnamɛwo, ajɔjɔ le ŋkeke lɔwo mɛ. (Luiki 21:11) Lé eho vajejeɛ nuwo ji kabakaba do sosoɔ jika nɔ amɛwo. Amɛwo loloɔ mɔ lé enuwo avayi do le esɔ mɛ ma, yewoasun ji avakpɔ yewo xomuwo ji ma.

• Enyɔdasɛ wema nu ɖɛ mɔ enuwo ave ho le hwenu cɛwo ciwo mɛ mìle. “Eyi, ŋ se egbe ɖeka ɖyiɖyiɛ . . . Yi nu mɔ, ‘jinuku kilo ɖeka ho nyi gbeɖeka-dɔ ho. Abɔkun kilo amɛtɔ̀n ho nyi gbeɖeka-dɔ ho.’”—Enyɔdasɛ 6:6, Mawu Nyɔ.

Nɔ èji mɔ yease nu sugbɔ mɛ kuso “ŋkeke vɔvɔwo” koɖo enyɔnuɖɛ ci yí le Enyɔdasɛ wema lɔ mɛ nuɔ, kpɔ video ci yí nyi Xexea Trɔ Tso Ƒe 1914 Me yí agbehlɛn nyɔci ci yí nyi “Sɔdola Eneawo Ame Kawoe Wonye?”

Enu ci yí avakpɔ ehonyɔ lɔwo pleŋ gbɔ

• ‘Nɔ mɛɖe cu axweɔ, anɔ mɛ, nɔ mɛɖe do vɛnkusɛnsɛn do bojiɔ, aɖu vɛnkusɛnsɛn ci yí so boji hunnɔ. So gbenɔgbeɔ, mɛbu dacu axwe yí mɛbu anɔ mɛ gbeɖe o. So gbenɔgbeɔ, mɛɖe dado jinuku do boji yí mɛbu aɖu jinuku ci yí so ebo lɔ ji gbeɖe o.’—Ezai 65:21, 22.

• “Jinukuwo asugbɔ le nyigban ji; woaɖɔ etowo ji zaan. Sɛnsɛn yi tɔ ale shigbe Liban han ɛnɛ, yí eju lɔ mɛ tɔwo ale mlamlamla shigbe egbewo le nyigban ji ɛnɛ.”—Ehajiji Wema 72:16, NWT.

• “Vɔ Tɔhonɔ [alo Yehowa] nu mɔ, ‘Amɛ vɔnwo finɔ enu le wamɛnɔwo shi. Wosɔnɔ enuwo le amɛ ciwo shi enu de le o. Vɔ evyɛ ɔ, Na jete yí a xɔ ŋkɔ nɔ amɛkpokpo hunnɔwo.’”—Ehajiji Wema 12:5.a

Sabaɖe yɛɔ, Yehowa akpɔ nuwo pleŋ gbɔ yí ehonyɔ ɖe dagbeɖe fun nɔ mɛɖekɛ o. Denyi eju kuɖeka mɛ awɛ le o, vɔ áwɛ toto xexeɛ keŋkeŋ mɛ. Nɔ àkpɔ lé awɛ doɔ, hlɛn enyɔci ci yí nyi “Ðe Nɔnɔmeawo Ava Sɔ Na Mí Katã Gbe Ðeka?”

Vɔ le egbɛ mɛ can ɔ, Bibla atɛnŋ akpedo eo nu le enuwo ci yí veveɛ ho nyɔ cɛ mɛ. Lé akpedo eo nu doɔ? Le Bibla lɔ mɛɔ, àkpɔ enukplamu ŋtɔŋtɔ ciwo yí akpedo eo nu nawa ɖaŋ azannɔ ao ho nywiɖe. (Elododo Wema 23:4, 5; Ŋununyatɔ 7:12) Nɔ àse nubuwo mɛ dojiɔ, hlɛn nyɔci ciwo yí nyi “Kpɔ Nu Si Nu Nènɔa Agbe Ðoa Ta” koɖo “Lé woawɛ anɔ agbe nɔ enyi eho kankin yí le amɛ shi can.”