Mauno Baea ro Kabuhi Kato sa Paraiso?

Gintaw-an ni Jehova sanday Adan ag Eba it mayad nga mga butang. Genesis 1:28

Gintuga ni Jehova ro unang babayi nga si Eba, ag gintao kay Adan agod anang mangin asawa.—Genesis 2:21, 22.

Gintuga sanda ni Jehova nga may perpektong eawas ag kaisipan.

Ro andang gin-istaran nga paraiso hay hardin it Eden—isaea ka lugar nga may manami gid nga mga suba, kakahuyan ag kasapatan.

Nagpakighambae si Jehova kanda ag gintur-an sanda. Kon namati eang kana, nabuhi kunta sanda it dayon sa paraiso nga eugta.

Naghambae ro Dyos nga pwede sanda magkaon it tanan nga bunga it kahoy euwas eang sa sambilog. Genesis 2:16, 17

Sambilog sa mga anghel hay nagrebelde sa Dyos. Ruyong maeaut nga anghel hay si Satanas nga Yawa.

Ginpakita ni Jehova kanday Adan ag Eba ro isaeang ka bunga it kahoy sa hardin ag naghambae kanda nga kon magkaon kato, mapatay sanda.

Owa naila si Satanas nga magtuman sanday Adan ag Eba kay Jehova. Ngani gingamit na ro sawa agod maghambae kay Eba nga kon kan-on na ro bunga it datong kahoy, indi imaw mamatay, kundi mangin katuead pa it Dyos. Syempre, dato hay pagpinuril gid.—Genesis 3:1-5.