Sa Pag-anaw —Sin-o ro Namati? Sin-o ro Owa?

Kaeabanan sa mga tawo sa panahon ni Noe hay nag-obra it kaeainan. Genesis 6:5

Sanday Adan ag Eba hay nagpangunga, ngani nag-abu ro mga tawo sa eugta. Nag-abot ro tyempo nga may mga anghel nga nagsunod sa pagrebelde ni Satanas.

Nagpanaog sanda iya sa eugta ag nagpakatawo agod makaasawa it mga babayi. Daya nga mga babayi nagpangunga it eabaw sa tawo nga mga tinuga—makusog ag maisog.

Napuno ro kalibutan it mga tawo nga nag-obra it maeain. Naghambae ro Biblia: “Ro kaeainan it mga tawo hay abu sa eugta ag ro una sa andang painu-ino ag tagipusuon hay puro eang kaeainan.”

Nagpamati si Noe sa Dyos ag nag-obra it arka. Genesis 6:13, 14, 18, 19, 22

Si Noe mabuot nga tawo. Ngani ginhambaean imaw ni Jehova nga dueaon na ro maeain nga mga tawo paagi sa anaw.

Naghambae pa gid ro Dyos kay Noe nga mag-obra it arka, ag pasudlon na dikara ro anang pamilya ag kada klase it sapat.

Ginpaandaman ni Noe ro mga tawo parti sa magaabot nga anaw, pero owa gid sanda namati. Ro iba hay naghinibayag pa kay Noe; ag ro iba naakig kana.

Pagkahuman ku arka, ginpasueod ni Noe ro mga sapat.