Pwede Kang Mabuhi sa Owa it Katapusan—Paalin?

1. Ham-an abung tawo ro nagaisip nga imposible nga mabuhi sa owa it katapusan?

GINATINGUHAAN it mga tawo nga magkaon it masustansyang pagkaon ag mag-exercise it regular agud mas maghaba ro andang kabuhi. Pero, owa sanda nagapaabot nga mabuhi sanda sa owa it katapusan. Para kanda, imposible ra nga matabo ag bukon ra it manami dahil abung kalisdanan kon maggueang eon. Pero, naghambae si Jesus nga pwedeng mabuhi sa owa’t katapusan ro mga tawo, pareho sa anang ginhambae sa Juan 3:16 ag 5:24.

2. Ano ro ginahambae it Juan kapitulo 6 parti sa kabuhi nga owa it katapusan? (Juan 6:​39, 40)

² Sang adlaw, milagruso nga ginpakaon ni Jesus it tinapay ag isda ro linibo nga mga tawo.a Daeayawon gid ra, pero ro anang ginhambae pagkasunod nga adlaw hay mas daeayawon pa. Ginsundan imaw it mga tawo sa Capernaum maeapit sa baybay it Galilea. Igto na ginsugid kanda nga pwedeng banhawon ro mga patay ag pwede sandang mabuhi sa owa’t katapusan. (Basaha ro Juan 6:​39, 40.) Isipa ro kahueogan kara para sa ing mga amigo ag myembro it pamilya nga namatay eon. Nagapasalig kimo ro ginhambae ni Jesus nga abung namatay ro pagabanhawon, ag ikaw ag ro imong mga pinalangga hay pwedeng mangin masadya sa owa’t katapusan! Pero nalisdan ro kaabuan nga eubton ro masunod nga mga ginhambae ni Jesus sa Juan kapitulo 6. Ano ro anang ginhambae?

3. Ano ro ginhambae ni Jesus sa Juan 6:51 parti kana?

³ Nakita it mga tawo sa Capernaum ro koneksyon sa tinapay nga ginpakaon kanda ni Jesus ag sa manna nga gintao ni Jehova sa andang mga kalolo-lolohan. Ro matuod, ginatawag it Kasueatan ro manna nga “tinapay nga kaean-on halin sa eangit.” (Sal. 105:40; Juan 6:31) Gingamit ni Jesus ro manna para sa anang masunod nga ituro. Maskin milagruso nga gintao it Dyos ro manna, ratong mga nagkaon kara hay namatay man gihapon. (Juan 6:49) Sa kabaliskaran, gintawag ni Jesus ro anang sarili nga “matuod nga tinapay halin sa eangit,” “tinapay nga ginatao it Dyos,” ag “tinapay it kabuhi.” (Juan 6:​32, 33, 35) Ginturo ni Jesus kon ano ro kinaiba it manna ag ku anang sarili. Naghambae imaw: “Ako ro buhi nga tinapay nga naghalin sa eangit. Ro bisan sin-o nga magkaon sa raya nga tinapay magakabuhi sa owa it katapusan.” (Basaha ro Juan 6:51.) Ratong mga Judio hay naguluhan kara. Indi nanda maintindihan kon paalin nahambae ni Jesus nga imaw ro “tinapay” nga halin sa eangit ag rayang tinapay hay mas eabaw pa kaysa sa manna nga gintao it Dyos sa andang mga kalolo-lolohan. Gintaw-an sanda ni Jesus it ideya kat naghambae imaw: “Ro tinapay nga akong itao ruyon ro akong unod.” Ano ro anang buot hambaeon kara? Importante nga maintindihan naton ra dahil ginapakita kara kon paalin nangin posible ro kabuhi nga owa’t katapusan para katon ag sa atong mga pinalangga. Tan-awon ta kon ano ro kahueogan it ginhambae ni Jesus.

RO BUHI NGA TINAPAY AG RO ANANG UNOD

4. Ham-an nakibot ro iba sa ginhambae ni Jesus?

⁴ Nakibot ro iba nga nakabati sa ginhambae ni Jesus nga ro tinapay nga dapat nandang kan-on hay ro “unod, nga [anang] ginatao para sa kabuhi kung kalibutan.” Ginaisip baea nanda nga itao ni Jesus ro anang literal nga unod para kan-on nanda, pareho sa kanibalismo? (Juan 6:52) Mas nakibot pa gid sanda kat naghambae si Jesus: “Kon indi kamo magkaon ku unod ku Unga it Tawo ag mag-inum it anang dugo owa kamo it kabuhi sa inyong kaugalingon.”​—Juan 6:53.

5. Kat ginhambae ni Jesus nga imnon ro anang dugo, ham-an makasigurado kita nga owa na kara ginatukoy ro anang literal nga dugo?

⁵ Sa panahon ni Noe, ginbawaean it Dyos ro mga tawo nga magkaon it dugo. (Gen. 9:​3, 4) Gin-uman man ra ni Jehova sa anang Kasugoan sa Israel. Ro maskin sin-o nga nagakaon it dugo hay “pagapatyon.” (Lev. 7:27) Ginsunod ni Jesus rayang Kasugoan. (Mat. 5:​17-19) Ngani imposible nga palig-unon ni Jesus ro mga Judio nga kan-on ro anang literal nga unod o imnon ro anang literal nga dugo. Pero, sa rayang makakieibot nga ginhambae ni Jesus, gusto na eang ituro sa mga tawo kon paalin mabaton ro kabuhi—“kabuhi nga owa it katapusan.”​—Juan 6:54.

6. Paalin naton nasayran nga naggamit eang it ilustrasyon si Jesus sa Juan 6:53?

⁶ Ano ro ginatukoy ni Jesus? Klaro nga naggamit si Jesus it sangka ilustrasyon, pareho sa anang ginhambae sa sangka Samaritana: “Ro bisan sin-o nga nagainom ku tubi nga akong itao indi eunggid pag-uhawon. Ay ro tubi nga akong itao kana mangintuboran sa sueod nana nga magatao kana it tubi nga buhi ag it kabuhi nga owa it katapusan.” (Juan 4:​7, 14)b Owa ginhambae ni Jesus sa Samaritana nga makabaton imaw it kabuhi nga owa’t katapusan sa simple nga pag-inom it literal nga tubi. Pareho kara, owa na ginhambae sa mga tawo sa Capernaum nga mabuhi sanda sa owa’t katapusan kon kan-on nanda ro anang literal nga unod ag imnon ro anang literal nga dugo.

RO KINAIBA IT DAYWANG OKASYON

7. Ano ro pagpati it iba sa ginhambae ni Jesus sa Juan 6:53?

⁷ Nagapati ro ibang relihiyusong tawo nga ro ginhambae ni Jesus sa Juan 6:53 parti sa pagkaon it anang unod ag pag-inom it anang dugo hay pareho sa Paihapon ku Ginuo. Dahil sa ruyong okasyon, haeos pareho ro anang gingamit nga mga pamisaea. (Mat. 26:​26-28) Ginahambae nanda nga ro tanan nga naga-attend sa Paihapon ku Ginuo hay dapat magkaon it ginapasa nga tinapay ag mag-inom it aeak. Tama baea ron? Importante gid nga masayran naton kon tama ro andang ginhambae dahil kada dag-on, minilyon nga tawo sa bilog nga kalibutan ro nagatipon sa rayang okasyon kaibahan naton. Talakayon naton ro kinaiba sa ginhambae ni Jesus sa Juan 6:53 ag sa anang ginhambae sa Paihapon ku Ginuo.

8. Ano ro mga kinaiba it daywang ka hitabo? (Tan-awa man ro piktyur.)

⁸ Talakayon ta kon ano ro kinaiba it rayang daywang ka hitabo. Una, kan-o ag siin si Jesus kat ginhambae na ro nakasueat sa Juan 6:​53-56? Ginhambae na ra sa mga Judio sa Galilea ku 32 C.E. Natabo ra mga sang dag-on bago na gin-umpisahan ro Paihapon ku Ginuo sa Jerusalem. Pangaywa, para kanyo na ra ginhambae? Kaeabanan sa mga nagpamati kana sa Galilea hay mas interesado sa andang pisikal nga mga kinahang-eanon kaysa sa andang espiritwal nga mga kinahang-eanon. (Juan 6:26) Ro matuod, kat nalisdan sanda nga intindihon ro ginhambae ni Jesus, naduea eagi ro andang pagtuo kana. Maskin ro pila sa anang mga disipulo hay nagpundo eon sa pagsunod kana. (Juan 6:​14, 36, 42, 60, 64, 66) Iba gid ro gin-obra it rayang mga tawo sa gin-obra it 11 nga matutom nga mga apostoles ni Jesus pagtaliwan it sang dag-on ku 33 C.E. sa Paihapon ku Ginuo. Sa ruyong okasyon, owa man ngani maintindihan it mayad ku mga apostoles ro anang ginaturo. Pero, buko’t pareho sa ratong mga tawo sa Galilea, ro matutom nga mga apostoles ni Jesus hay kumbinsido nga imaw ro Unga it Dyos nga nagpanaog halin sa eangit. (Mat. 16:16) Ginkomendahan na sanda: “Gin-unongan ninyo ako sa tanan nga mga paghingabot kakon.” (Luc. 22:28) Sa rayang daywang ka detalye, makita naton ro kinaiba sa ginhambae ni Jesus sa Juan 6:53 ag sa anang ginhambae sa Paihapon ku Ginuo. Ag abu pang dugang nga mga pamatuod.

NADAEAHIG KA

9. Para kanyo ro mga ginhambae ni Jesus sa Paihapon ku Ginuo?

⁹ Sa Paihapon ku Ginuo, gintaw-an ni Jesus ro anang mga apostoles it tinapay nga owa it lebadora ag ginhambae na kanda nga raya hay nagarepresentar sa anang eawas. Gintaw-an na man sanda it aeak ag ginhambae nga nagarepresentar ra sa “dugo nga napalig-on ku kasugtanan.” (Mar. 14:​22-25; Luc. 22:20; 1 Cor. 11:24) Importante gid ra. Gin-obra rayang bag-ong kasugtanan para sa “mga tawo it [espiritwal nga] Israel” nga mangin parte ku “Ginharian it Dyos,” bukon it para sa tanan nga tawo. (Heb. 8:​6, 10; 9:15) Owa ra naintindihan it mga apostoles sa ruyong panahon, pero sa indi magbuhay pilion sanda it baeaan nga espiritu ag mangin parte it bag-o nga kasugtanan para taw-an sanda it lugar ni Jesus sa eangit.​—Juan 14:​2, 3.

10. Ano pa ro kinaiba sa ginhambae ni Jesus sa mga tawo sa Galilea ag sa anang ginhambae sa Paihapon ku Ginuo? (Tan-awa man ro piktyur.)

¹⁰ Tandai nga ro ginhambae ni Jesus sa Paihapon ku Ginuo hay para eang sa “maisot nga panong.” Rayang maisot nga grupo hay nag-umpisa sa matutom nga mga apostoles nga kaibahan nana sa ruyong okasyon. (Luc. 12:32) Sanda ag ro iba pa nga makaibahan sa ruyong grupo hay dapat magkaon it tinapay ag mag-inom it aeak. Sanda ro makabaton it lugar sa eangit kaibahan ni Jesus. Ngani, iba gid ro anang ginhambae sa anang mga apostoles sa rayang okasyon kaysa sa anang ginhambae sa mga tawo sa Galilea. Dahil ro ginhambae na sa Paihapon ku Ginuo hay para eang sa limitado nga mga tawo, pero ro ginhambae na sa mga tawo sa Galilea hay para sa kaabuan.

11. Kat sa Galilea si Jesus, ano ro anang ginhambae nga nagapakita nga owa na ginatukoy ro sangka maisot nga grupo?

¹¹ Kat sa Galilea si Jesus ku 32 C.E., kaabuan sa anang kaistorya hay gusto eang it pagkaon. Pero, ginbuligan sanda ni Jesus nga maintindihan nga may mas importante pa kaysa sa literal nga pagkaon. Kon siin, raya ro makatao kanda it kabuhi nga owa’t katapusan. Ag ginhambae ni Jesus nga ratong mga namatay hay pagabanhawon sa katapusan nga adlaw ag mabuhi sa owa’t katapusan. Owa na ginatukoy kara ro pagpakamayad nga mabaton it sangka grupo eang, pareho sa anang pagaobrahon sa ulihi sa Paihapon ku Ginuo. Kundi, kat sa Galilea imaw, ginatukoy na ro mga pagpakamayad nga mabaton it tanan nga tawo. Ro matuod, naghambae imaw: “Ro bisan sin-o nga magkaon sa raya nga tinapay magakabuhi sa owa it katapusan; ag ro tinapay nga akong itao ruyon ro akong unod, nga akong ginatao para sa kabuhi kung kalibutan.”​—Juan 6:51.c

12. Ano ro kinahang-ean obrahon para mabaton ro mga benepisyo nga ginhambae ni Jesus?

¹² Owa ginhambae ni Jesus sa mga Judio sa Galilea nga mabaton it tanan nga tawo rayang pagpakamayad. Ratong nagakaon eang it tinapay o nagatuo kay Jesus ro makabenepisyo kara. Abung mga tawo makaron ro nagahambae nga nagapati sanda kay Jesus ag imaw ro andang manog-euwas. (Juan 6:29) Pero bukon eang it ruyon. Abu man nga mga Judio ro nagtuo kay Jesus ku una, pero gin-aywan man rayon nanda imaw. Ham-an?

13. Ano ro kinahang-ean obrahon para mangin matuod nga disipulo ni Jesus?

¹³ Haeos tanan sa ginpakaon ni Jesus hay nagsunod eang kana dahil gintao na ro mga gusto nanda. Gusto eang nanda nga pamayron, pakan-on, ag sugiran it mga bagay nga gusto nandang mabatian. Pero ginpakita ni Jesus nga bukon eang it ruyon ro kinahang-ean para mangin matuod na nga disipulo. Ag ginklaro na nga owa imaw nag-agto sa eugta para itao eang ro andang gusto. Dapat nandang batunon ro anang imbitasyon nga “magpaeapit” kana paagi sa pagpamati ag pagtuman it tanan nanang ginturo.​—Juan 5:40; 6:44.

14. Ano ro dapat natong obrahon para makabenepisyo sa unod ag dugo ni Jesus?

¹⁴ Ginturo ni Jesus kanda nga paagi sa pagsakripisyo it anang unod ag dugo, mangin posible nga mabuhi sanda sa owa’t katapusan. Kinahang-ean nandang magtuo sa ruyong kamatuoran. Ruyong pagtuo hay importante sa ratong mga Judio ag pati man katon makaron. (Juan 6:40) Huo, para makabenepisyo kita sa unod ag dugo ni Jesus nga ginsambit sa Juan 6:​53, kinahang-ean natong magtuo sa pangtubos. Rayang pagpakamayad hay posible gid para sa tanan nga tawo.​—Efe. 1:7.

15-16. Ano ro importanteng mga bagay ro matun-an naton sa Juan kapitulo 6?

¹⁵ Abung kitang natun-an sa Juan kapitulo 6 nga importante gid ag makapalig-on para katon tanan. Natun-an naton nga nagakabaeaka gid si Jesus sa mga tawo. Habang sa Galilea, ginpamayad na ro mga may sakit, gintur-an sanda parti sa Ginharian, ag ginsigurado na nga may pagkaon sanda. (Luc. 9:11; Juan 6:​2, 11, 12) Ag ro pinakaimportante, ginturo na kanda nga imaw ro “tinapay it kabuhi.”​—Juan 6:​35, 48.

¹⁶ Ratong mga gintawag nga ibang karnero hay owa nagakaon ag indi dapat magkaon it tinapay ag mag-inom it aeak sa Paihapon ku Ginuo. (Juan 10:16) Pero, makabenepisyo gihapon sanda sa unod ag dugo ni Jesu-Cristo. Ginaobra nanda ra paagi sa pagtuo sa sakripisyo nga gin-obra ni Jesus ag sa manami nga mga bagay nga nangin posible dahil kara. (Juan 6:53) Sa kabaliskaran, ratong mga dapat magkaon it tinapay ag mag-inom it aeak hay nagapakita nga parte sanda it bag-ong kasugtanan ag magagahum sa eangitnon nga Ginharian. Ngani, pinili man kita o ibang karnero, importante gid nga tun-an naton ro Juan kapitulo 6. Ginapabahoe kara nga dapat may mabakud kita nga pagtuo agud mabaton ro kabuhi nga owa’t katapusan.