Itao kay Jehova ro Himaya

1. Sa ano nakapukos ro kaabuan makaron?

POSIBLE nga napansin mo nga ro mga tawo makaron hay mas ginauna ro andang sarili kaysa sa iba. Halimbawa, ginagamit it iba ro social media para mapansin ag ipabugae ro andang mga naabot. Pero, sangkiri eang makaron ro nagatao it himaya kay Jehova nga Dyos. Sa rayang artikulo, talakayon naton kon ano ro buot hambaeon nga itao kay Jehova ro himaya, ag ano ro magapahueag katon nga obrahon ra. Matun-an man naton kon paalin itao kay Jehova ro himaya nga nagakadapat kana, ag kon paalin na himayaon ro anang pangaean sa paeaabuton.

PAALIN NATON MATAO KAY JEHOVA RO HIMAYA?

2. Paalin ginpakita ni Jehova ro anang himaya sa Bukid it Sinai? (Tan-awa man ro piktyur.)

² Ano ro himaya? Sa Biblia, ro termino nga “himaya” hay pwedeng magtukoy sa maskin alin nga bagay para mangin nakakabilib o daeayawon ro isaea. Mga pilang adlaw eang pagkatapos gin-euwas ni Jehova ro mga Israelita sa Ehipto, ginpakita na kon mauno imaw kagamhanan nga Dyos. Imadyina rayang eksena: Minilyon nga mga Israelita ro nagtipon maeapit sa Bukid it Sinai para mabatian kon ano ro ihambae kanda it Dyos. Ro bukid hay napuno it madamoe nga daeaura. Gulpi eang rayon nga naglinog it mabaskog—nag-alburuto ro bulkan—nag-uylog ro eugta habang nagapangilat, nagadaeugdug, ag may una makabueongoe nga tunog it budyong. (Ex. 19:​16-18; 24:17; Sal. 68:8) Imadyina kon paalin nakibot ag nagdayaw ro mga Israelita kat ginpakita ni Jehova ro anang himaya.

3. Paalin naton matao kay Jehova ro himaya?

³ Mahimaya man it mga tawo si Jehova. Ro sangka paagi nga matao naton ro himaya kay Jehova hay paagi sa pagsugid sa iba parti sa anang daeayawon nga mga gin-obra ag sa anang manami nga mga ugali. Mahimaya man naton ro Dyos kon itao naton kana ro pagdayaw sa mga bagay nga haobra naton sa bulig nana. (Isa. 26:12) Manami gid nga halimbawa si Haring David sa pagtao it himaya kay Jehova. Kat nangamuyo si David sa atubang it kongregasyon ku Israel, ginhambae na sa Dyos: “Imo, O Jehova, ro kadayawan ag ro kusog ag ro himaya ag ro kahayag ag ro kadungganan, dahil imo ro tanan nga bagay sa eangit ag sa eugta.” Pagkatapos it anang pangamuyo, “gindayaw it bilog nga kongregasyon si Jehova.”​—1 Cron. 29:​11, 20.

4. Paalin gintao ni Jesus ro himaya kay Jehova?

⁴ Kat iya si Jesus sa eugta, ginhimaya na ro anang Ama paagi sa pagsugid sa iba nga halin kay Jehova ro anang gahum sa pag-obra it mga milagro. (Mar. 5:​18-20) Ginhimaya na man si Jehova paagi sa pagsugid kon mauno kadaeayawon ro anang Ama, ag sa kon paalin na gintratar ro iba. Sang beses, nagaturo si Jesus sa sinagoga. Sambato sa mga nagapamati kana hay ro bayi nga ginsapian it demonyo sa sueod it 18 nga dag-on. Dahil kara, nangin buktot imaw ag indi makatindog it diretso. Makaeueuoy gid! Napahueag si Jesus it anang kaeuoy, ngani gin-eapitan na ro bayi ag gin-istorya sa mabuot nga paagi nga nagahambae: “Babayi, mayad ka eon sa imong baeatian!” Gintungtong rayon ni Jesus ro anang alima sa bayi, ag insigida nga nakatindog imaw it diretso ag “nagdayaw imaw sa Dyos.” Nagpasaeamat gid imaw kay Jehova dahil nagmayad eon imaw! (Luc. 13:​10-13) May mayad gid nga rason ratong bayi nga himayaon si Jehova, ag may rason man kita.

HAM-AN GINAHIMAYA NATON SI JEHOVA?

5. Ano ro mga rason kon ham-an ginatahod naton si Jehova?

⁵ Ginahimaya naton si Jehova dahil ginatahod gid naton imaw. Abu kitang rason para tahuron imaw. Si Jehova hay eabing gamhanan; owa’t limitasyon ro anang gahum. (Sal. 96:​4-7) Ro anang kaaeam hay makita sa mga bagay nga anang gin-obra. Imaw ro ginhalinan it atong kabuhi ag ginatao na ro tanan natong kinahang-ean para mabuhi. (Pah. 4:​11, NWT) Mainunongon imaw. (Pah. 15:4) Nagamadinaeag-on ro tanan nanang ginaobra, ag pirme nang ginatuman ro anang mga promisa. (Jos. 23:14) Ngani nakahambae si propeta Jeremias parti kay Jehova: “Sa tanan nga mga maaeam it mga nasyon ag sa tanan nanda nga ginharian, owa gid it pareho kimo”! (Jer. 10:​6, 7) Sigurado nga abu kita it rason para tahuron ro atong Ama sa eangit. Pero owa eang naton ginatahod si Jehova, palangga gid naton imaw.

6. Ham-an palangga naton si Jehova?

⁶ Ginahimaya naton si Jehova dahil palangga gid naton imaw. Palangga naton si Jehova dahil sa anang manami nga mga ugali. Maeueoy-on imaw. (Sal. 103:13; Isa. 49:15) May empatiya imaw; kon nasakitan kita, nasakitan man si Jehova. (Zac. 2:8) Ginabuligan na kita nga makilaea imaw ag mangin amigo. (Sal. 25:14; Binu. 17:27) Ag mapainubuson si Jehova; “nagadungok imaw sa pagtan-aw sa eangit ag sa eugta, ginapabangon na ro pobre halin sa tapu-tapo.” (Sal. 113:​6, 7) Dahil kara, ginahimaya naton ro atong gamhanan nga Dyos.​—Sal. 86:12.

7. Ano ro tsansa nga may una kita?

⁷ Ginahimaya naton si Jehova dahil gusto natong makilaea imaw it iba. Abung tawo ro owa nakasayod it kamatuoran parti kay Jehova. Ham-an? Dahil gindueman ni Satanas ro andang kaisipan paagi sa pagpaeapta it mga kapurilan parti kay Jehova. (2 Cor. 4:4) Ginpapati ni Satanas ro mga tawo nga si Jehova hay nagabaeos, owa nagakabaeaka, ag imaw ro rason it pag-antus sa kalibutan. Pero sayod naton ro kamatuoran parti sa atong Dyos! May tsansa kitang isugid sa iba kon anong klasi it Dyos si Jehova, ag buligan sanda nga himayaon man imaw. (Isa. 43:10) Nakapukos ro Salmo 96 sa pagtao it himaya kay Jehova. Habang ginatalakay naton ro pila nga mga ginhambae sa rayang salmo, matun-an naton kon paalin matao kay Jehova ro himaya nga nagakadapat kana.

IBA PANG PAAGI NGA MATAO NATON KAY JEHOVA RO HIMAYA NGA NAGAKADAPAT KANA

8. Ano ro sangka paagi nga mahimaya naton si Jehova? (Salmo 96:​1-3)

⁸ Basaha ro Salmo 96:​1-3. Mahimaya naton si Jehova paagi sa kon ano ro atong ginahambae parti kana. Sa rayang mga teksto, ginaimbitahan ro katawhan ni Jehova nga “magkanta kay Jehova,” ‘dayawon ro anang pangaean,’ “iwali . . . ro mayad nga balita parti sa anang pag-euwas,” ag “ipasayod ro anang himaya sa mga nasyon.” Tanan ra hay mga paagi nga mahimaya naton ro atong Ama sa eangit paagi sa atong ginahambae. Owa nagdaywang-isip ro matutom nga mga Judio ag ro unang siglo nga mga Cristyano nga isugid sa iba ro manami nga mga gin-obra ni Jehova para kanda, ag apinan ro anang reputasyon. (Dan. 3:​16-18; Binu. 4:29) Paalin naton sanda matuead?

9-10. Ano ing natun-an sa eksperyinsya ni Angelena? (Tan-awa man ro piktyur.)

⁹ Tan-awon ta ro eksperyinsya it sister nga si Angelenaa nga taga-United States. Maisog na nga gin-apinan si Jehova sa anang ginatrabahuhan. Bilang bag-o nga empleyado, gin-imbitahan si Angelena nga mag-attend sa miting kon siin pwede nandang isugid sa andang mga katrabaho ro parti sa andang sarili. Naghanda si Angelena it mga piktyur nga nagapakita it anang kasadya bilang sangka Saksi ni Jehova. Pero bago pa imaw maghambae, ro anang katrabaho hay nagpakilaea nga nagbahoe man imaw sa sangka Saksi nga pamilya. Naghambae imaw it maeain nga mga bagay parti sa atong mga pagpati. Naghambae si Angelena: “Kinuebaan gid ang. Pero naisip ko: ‘Pasugtan ko baea imaw nga maghambae it kapurilan parti kay Jehova? O apinan ko si Jehova?’”

¹⁰ Kat tapos eon it hambae ro anang katrabaho, madasig nga nagpangamuyo it mahipos si Angelena. Ginsabat na rayon imaw it mabuot nga nagahambae: “May pagkapareho kita. Nagbahoe man ako sa Saksi nga pamilya ag hasta makaron, Saksi gihapon ako.” Maskin kakueoeba ro sitwasyon, nagpabilin nga kalmado si Angelena. Ginpakita na sa anang mga katrabaho ro mga piktyur halin sa mga espiritwal nga pagtieipon nga anang haagtunan, ag matinahuron na nga gin-eksplikar kanda ro anang mga pagpati. (1 Ped. 3:15) Ano ro nangin resulta? Pagkatapos it presentasyon ni Angelena, nagkalma ro eaki. Ginsugid man it eaki nga may manami imaw nga mga eksperyinsya kat bata pa imaw kon siin nagaiba pa imaw sa mga Saksi ni Jehova. Naghambae si Angelena: “Nagakadapat gid nga apinan si Jehova. Sangka pribilehiyo nga isugid ro kamatuoran parti kana.” May pribilehiyo man kita nga dayawon ag himayaon si Jehova, maskin owa imaw ginatahod it iba.

11. Paalin ginpakita it kasaysayan nga padayon nga ginasunod it mga matuod nga nagasimba kay Jehova ro prinsipyo sa Salmo 96:8?

¹¹ Basaha ro Salmo 96:8. Mahimaya naton si Jehova paagi sa atong materyal nga mga bagay. Ro mga matuod nga nagasimba kay Jehova hay pirme imaw ginapadunggan sa ruyong paagi. (Hulu. 3:9) Halimbawa, ro mga Israelita hay nag-amot sa pagpatindog ag pagmentinar it templo. (2 Hari 12:​4, 5; 1 Cron. 29:​3-9) Ro pila sa mga disipulo ni Jesus hay nagtao man it andang mga pagkabutang agud buligan imaw ag ro anang mga apostoles. (Luc. 8:​1-3) Ro unang siglo nga mga Cristyano hay nagpadaea mat-a it andang bulig sa mga igmanghod nga naapektuhan it gutom. (Binu. 11:​27-29) Mahimaya man naton si Jehova makaron paagi sa atong boluntaryo nga mga donasyon.

12. Paalin makatao it himaya kay Jehova ro atong mga donasyon? (Tan-awa man ro piktyur.)

¹² Tan-awon ta ro sambato sa mga eksperyinsya nga nagapakita kon paalin nakatao it himaya kay Jehova ro atong mga donasyon. Ku 2020, ro Zimbabwe hay nakaeksperyinsya it mahaba nga tig-ieinit. Minilyon nga mga tawo ro haeos mamatay eon sa gutom, kaibahan kara ro atong sister nga si Prisca. Maskin malisud ro sitwasyon, padayon gihapon imaw sa anang rutina sa pag-preaching kada Myerkules ag Byernes. Ag padayon na ra nga gin-obra maskin tigtaeanum eon. Ngani gin-intrimis imaw it anang mga kaeapit dahil mas gin-una na ro pagministeryo kaysa sa anang pagpananum sa eanas. Ginhambae nanda, “Magutman kat ing karon.” Ginsabat sanda ni Prisca nga may kompyansa, “Indi gid pagpabay-an ni Jehova ro anang mga alagad.” Owa magbuhay, nakabaton imaw it relief goods halin sa atong organisasyon. Ag nangin posible ron dahil sa atong gintao nga mga donasyon. Nagdayaw gid kara ro mga kaeapit ni Prisca, ag naghambae sanda kana, “Owa ka gid ginpabay-an it Dyos, ngani gusto man namon nga makilaea imaw.” Dahil karon, pito sa anang mga kaeapit ro nag-umpisa sa pag-attend sa mga miting sa kongregasyon.

13. Paalin ro atong paggawi makatao it himaya kay Jehova? (Salmo 96:9)

¹³ Basaha ro Salmo 96:9. Mahimaya naton si Jehova paagi sa atong paggawi. Ro mga saserdote nga nag-alagad sa templo ni Jehova kato hay kinahang-ean mangin malimpyo sa pisikal. (Ex. 40:​30-32) Pero euwas karon, mas importante nga malimpyo ro andang paggawi. (Sal. 24:​3, 4; 1 Ped. 1:​15, 16) Kinahang-ean natong tinguhaan nga ubahon “ro daan [naton] nga kinaugali” o personalidad—ro maeain nga ugali ag mga paggawi—ag isuksok ro “bag-o nga kinaugali”—ro pag-isip ag paggawi nga nagapakita nga ginatuead naton ro manami nga mga ugali ni Jehova. (Col. 3:​9, 10) Sa bulig ni Jehova, pwedeng magbag-o maskin ro imoral ag bayolente nga mga tawo ag magsuksok it bag-ong personalidad.

14. Ano ing natun-an sa eksperyinsya ni Jack? (Tan-awa man ro piktyur.)

¹⁴ Tan-awon ta ro eksperyinsya ni Jack, sangka bayolente nga kriminal nga ginatawag man nga Demonyo. Dahil sa anang haobrang mga krimen, ginsentensyahan si Jack it kamatayon. Pero, habang ginahueat ro anang sentensya, nagpasugot si Jack nga magpa-Bible study sa sangka brother nga nagbisita sa prisuhan. Maskin pa maeain ro anang pagkabuhi kato, gin-uba ni Jack ro anang luma nga personalidad. Ag ku ulihi, nangin kwalipikado imaw nga mabautismuhan. Mabahoe gid ro pagbag-o ni Jack, ngani ku adlaw nga bitayon eon imaw, ro pila sa mga gwardya sa prisuhan hay nag-euha habang nagaba-bye kana. Ro sarhento sa ruyong prisuhan hay naghambae: “Dati si Jack ro pinakamaeain nga ginpriso sa rayang lugar. Pero makaron, sambato eon imaw sa pinakamabuot.” Sang domingo pagkatapos nga ginbitay si Jack, ro mga brother hay nagbalik sa prisuhan agud magdumaea it miting, ag nakilaea nanda ro sangka priso nga nag-attend sa pinakaunang beses. Ano ro nagpahueag kana nga mag-attend? Nagdayaw gid imaw sa pagbag-o it ugali ni Jack, ag gusto nang masayran kon ano ro anang dapat obrahon para masimba si Jehova. Klaro nga ro atong paggawi hay makatao gid it himaya sa atong Ama sa eangit!—1 Ped. 2:12.

PAALIN HIMAYAON NI JEHOVA RO ANANG PANGAEAN SA PAEAABUTON?

15. Paalin himayaon it dayon ni Jehova ro anang pangaean sa paeaabuton? (Salmo 96:​10-13)

¹⁵ Basaha ro Salmo 96:​10-13. Ginapakita it rayang ulihing mga bersikulo it Salmo 96 nga si Jehova hay matarung nga Huwis ag Hari. Paalin himayaon ni Jehova ro anang pangaean sa paeaabuton? Paagi sa anang matarung nga paghukom. Sa indi magbuhay, dueaon na it dayon ro Bantug nga Babilonia dahil sa pagpakahuya sa anang baeaan nga pangaean. (Pah. 17:​5, 16; 19:​1, 2) Ro pila sa makakita it pagkawasak ku Bantug nga Babilonia hay posibleng makaibahan naton sa matuod nga pagsimba. Pagkatapos, waskon ni Jehova ro bilog nga sistema ni Satanas sa Armagedon. Dueaon na ro tanan nga nagakontra kana ag nagapasipaea sa anang pangaean. Pero euwason na ro mga nagapalangga ag nagatuman kana, pati ratong nagatao it himaya kana. (Mar. 8:38; 2 Tes. 1:​6-10) Pagkatapos it ulihing pagsueay sa katapusan it Sanglibo nga Dag-on nga Paghari ni Cristo, pakabaeaanon eon it dayon ni Jehova ro anang pangaean. (Pah. 20:​7-10) Sa ruyong panahon, “ro eugta hay mapuno it kaaeam parti sa himaya ni Jehova pareho it tubi nga nagatabon sa dagat.”​—Hab. 2:14.

16. Ano ing determinadong obrahon? (Tan-awa man ro piktyur.)

¹⁶ Kanami gid kon ro tanan nga tawo hay nagatao eon it himaya kay Jehova nga nagakadapat sa anang pangaean! Pero habang ginahueat naton nga matabo ron, pwede natong obrahon ro atong parte sa paghimaya sa atong Dyos sa tanan nga tsansa. Para pabahueon ro importansya kara, ginpili it Nagadumaea nga Grupo ro Salmo 96:8 bilang atong teksto sa dag-on nga 2025: “Itao kay Jehova ro himaya nga nagakadapat sa anang pangaean.”