Padayon nga Magkabuhi Paagi sa Pagtuo

1. Ham-an nasadyahan si Pablo kat ginpamaeandungan na ro anang kabuhi dati?

SAYOD ni apostol Pablo nga madali lang imaw patyon, pero kat ginpamaeandungan na ro anang kabuhi dati, nakabatyag imaw it kasadya. Naghambae imaw: “Natapos ko eon ro daeaganon, ag nahaunongan ko ro pagtuo.” (2 Tim. 4:​6-8) Tama gid ro nangin desisyon ni Pablo nga gamiton ro anang kabuhi sa pag-alagad kay Jehova, ag sigurado gid imaw nga nasadyahan kara si Jehova. Gusto man naton mag-obra it mayad nga mga desisyon ag mapasadya si Jehova. Paalin naton ra maobra?

2. Ano ro buot hambaeon nga ro sangka tawo hay nagakabuhi paagi sa pagtuo?

² Naghambae si Pablo parti kana ag sa iba pang matutom nga mga Cristyano: “Nagakabuhi kita makaron paagi sa pagtuo, ag bukon it paagi sa atong makita.” (2 Cor. 5:7) Ano ro buot hambaeon ni Pablo? Kon ro sangka tawo hay nagakabuhi paagi sa anang makita, nagaobra imaw it mga desisyon nga base eang sa kon ano ro anang makita, mabatian, ag mabatyagan. Pero, kon ro sangka tawo hay nagakabuhi paagi sa pagtuo, nagaobra imaw it mga desisyon nga base sa kon ano ro makapasadya kay Jehova. Sigurado imaw nga kon sundon na ro paggiya ni Jehova paagi sa Biblia, makabenepisyo imaw makaron ag taw-an imaw ni Jehova it mas abu pa nga pagpakamayad sa paeaabuton.​—Sal. 119:66; Heb. 11:6.

3. Ano ro mga benepisyo kon nagakabuhi kita paagi sa pagtuo? (2 Corinto 4:18)

³ Tanan kita hay nagaobra it mga desisyon nga kon amat hay ginabase eang naton sa kon ano ro atong makita, mabatian, ag mabatyagan. Pero, kon raya eang ro atong basehan kon nagaobra kita it importanteng mga desisyon, posibleng magkaproblema kita. Ham-an? Dahil kon amat pwede kita karang madaya. Maskin indi man ra matabo, pero kon nagakabuhi kita base eang sa atong makita, posibleng makaobra kita it mga bagay nga owa nailaan ni Jehova. (Man. 11:9; Mat. 24:​37-39) Pero kon nagakabuhi kita paagi sa pagtuo, makaobra kita it mga desisyon nga “nahamut-an ku Ginuo.” (Efe. 5:10) Ro pagsunod sa paggiya it Dyos hay makatao katon it katawhay sa isip ag matuod nga kasadya. (Sal. 16:​8, 9; Isa. 48:​17, 18) Ag kon padayon kita nga nagakabuhi paagi sa pagtuo, mabuhi kita sa owa’t katapusan.​—Basaha ro 2 Corinto 4:18.

4. Paalin masayran it sangka tawo kon nagakabuhi imaw paagi sa pagtuo o paagi sa anang makita?

⁴ Paalin naton masayran nga nagakabuhi kita paagi sa pagtuo o paagi sa atong makita? Dapat natong pangutan-on ro atong sarili: Siin nabase ro ang mga desisyon? Ginabase ko eang baea ra sa mga bagay nga akong makita? O ginabase ko ra sa kon ano ro paggiya ni Jehova? Pagatalakayon ta kon paalin kita padayon nga magkabuhi paagi sa pagtuo sa rayang tatlong ka sitwasyon: kon nagapili it trabaho, kon nagapili it mapangasawa, ag kon makabaton it instruksyon halin sa atong organisasyon. Sa kada sitwasyon, pagatalakayon naton ro mga bagay nga dapat natong isipon para makaobra it mayad nga mga desisyon.

KON NAGAPILI IT TRABAHO

5. Ano ro dapat natong isipon kon nagapili it trabaho?

⁵ Gusto gid naton tanan nga maitao ro atong mga kinahang-eanon ag ku atong pamilya. (Man. 7:12; 1 Tim. 5:8) Ro ibang trabaho hay mas mataas ro sweldo, nga kayang maitao it sangka empleyado ro kinahang-eanon it anang pamilya ag makatipon pa. Ro iba mat-a nga trabaho hay insakto eang ro sweldo, nga makasuporta eang sa pangunang kinahang-eanon it anang pamilya. Kon nagapili kita it trabaho, ginaisip naton kon pila ro mangin sweldo. Pero kon raya eang ro atong ginaisip, nagapakita ra nga nagakabuhi kita base eang sa atong makita.

6. Paalin naton mapakita nga nagakabuhi kita paagi sa pagtuo kon nagapili it trabaho? (Hebreo 13:5)

⁶ Kon nagakabuhi kita paagi sa pagtuo, ginaisip man naton kon paalin ro trabaho hay pwedeng makaapekto sa atong pagpakig-amigo kay Jehova. Pangutan-on naton ro atong sarili: ‘Raya baea nga trabaho hay basi may ipaobra kang nga owa nailaan ni Jehova?’ (Hulu. 6:​16-19) ‘Maapektuhan baea kara ro akong pag-alagad kay Jehova ag mapaeayo ako sa ang pamilya it mahaba nga panahon?’ (Fil. 1:10) Kon huo ing sabat sa rayang mga pangutana, mas mayad nga indi mo lang ra pagbatunon, maskin pa malisud gausoy it trabaho. Dahil kon ginapakita naton nga nagakabuhi kita paagi sa pagtuo, makaobra kita it mga desisyon nga nagapakita it atong pagsalig kay Jehova nga itao na ro atong mga kinahang-eanon.​—Mat. 6:33; basaha ro Hebreo 13:5.

7-8. Paalin ginpakita it sangka brother nga si Javier nga nagakabuhi imaw paagi sa pagtuo? (Tan-awa man ro piktyur.)

⁷ Nasayran it sangka brother nga si Javier,a nga taga-South America, kon mauno kaimportante nga magkabuhi paagi sa pagtuo. Naghambae imaw: “Nag-apply ako it trabaho nga ro sweldo hay doble kaysa sa ang dating trabaho ag manami gid kunta ra.” Pero gusto man ni Javier nga magpayunir. Naghambae pa imaw: “Nakaiskedyul ako nga interbyuhon it manager. Pero bago karon, nagpangayo ako it bulig kay Jehova dahil sigurado ako nga sayod na kon ano ro pinakamayad para kakon. Gusto ko rayang trabaho ag mataas man ro sweldo, pero owa ako naila nga raya ro magpugong kakon nga maabot ang espiritwal nga mga goal.”

⁸ Ginhambae ni Javier: “Habang gina-interbyu, ginhambaean ako it manager nga kinahang-ean ko pirmeng mag-overtime. Matinahuron ko nga ginhambae kana nga indi ko ra maobra dahil maapektuhan kara ro akong pagsimba.” Ngani, owa ginbaton ni Javier rayang trabaho. Pagtaliwan it daywang domingo, nagpayunir imaw. Ag sa ruyon man mismo nga dag-on, nakakita imaw it part-time nga trabaho. Naghambae imaw: “Ginpamatian ni Jehova ro ang mga pangamuyo, ag ginbuligan na ako nga makakita it trabaho nga makapayunir gihapon. Nasadyahan gid ang nga may trabaho eon ako nga indi makaapekto sa ang pag-alagad kay Jehova ag sa ang mga igmanghod.”

9. Ano ing matun-an sa eksperyinsya ni Trésor?

⁹ Paalin kon narealisar naton nga ro atong trabaho makaron hay owa nagapakita nga nagakabuhi kita paagi sa pagtuo? Tan-awa ro eksperyinsya ni Trésor nga taga-Congo. Ginhambae na: “Kanami gid ang bag-ong trabaho. Nagasweldo ako it triple kaysa sa dati kong trabaho ag ginatahod gid nanda ako.” Pero, indi maka-attend pirme si Trésor it mga miting dahil sa anang pag-overtime. Gina-pressure man imaw it anang mga katrabaho nga indi pag-isugid ro buko’t mayad nandang mga ginaobra. Gusto ni Trésor nga mag-resign, pero nabaeaka imaw nga madueaan it trabaho. Ano ro nakabulig kana? Naghambae imaw: “Ro Habacuc 3:​17-19 hay nakabulig kakon nga maintindihan nga maskin madueaan ako it trabaho, indi ako pagpabay-an ni Jehova. Ngani nag-resign ako.” Ku ulihi nahambae na: “Abu nga mga boss ro nagaisip nga kon may mataas nga sweldo ro sangka tawo, kaya nang isakripisyo ro anang pamilya ag ro anang pagsimba. Masadya ako nga naprotektahan ko ang relasyon kay Jehova ag sa ang pamilya. Pagtaliwan it sang dag-on, ginbuligan ako ni Jehova nga makakita it manami nga trabaho nga may sweldo nga kayang itao ro kinahang-eanon ku ang pamilya, ag may mas abu akong panahon sa pag-alagad kana. Kon unahon naton si Jehova, posibleng may mga panahon nga magakalisud kita sa pinansyal, pero indi na gid kita pagpabay-an.” Kon magsalig kita sa paggiya ni Jehova ag sa anang mga promisa, padayon kita nga magakabuhi paagi sa pagtuo ag ana gid kita nga pakamayron.

KON NAGAPILI IT MAPANGASAWA

10. Paalin naton mapakita nga nagakabuhi kita paagi sa atong makita kon nagapili it mapangasawa?

¹⁰ Regalo halin kay Jehova ro pag-asawa, ag normal eang nga gusto natong mag-asawa. Kon ro sangka sister hay nagapili it mangin asawa, posibleng obserbahan na ro personalidad it sangka brother, anang itsura, reputasyon, kon paalin imaw mag-budget it kwarta, kon ginaobra na ro anang mga responsibilidad sa pamilya, ag kon ginapasadya na imaw.b Raya tanan hay importante. Pero, kon raya eang ro anang ginatan-aw, posibleng nagakabuhi imaw paagi sa anang makita.

11. Paalin naton mapakita nga nagakabuhi kita paagi sa pagtuo kon nagapili it mapangasawa? (1 Corinto 7:39)

¹¹ Proud gid si Jehova kon ginasunod it mga sister ag brother ro anang pahanumdom kon nagapili it mapangasawa! Halimbawa, ginaaplikar gid nanda ro pahanumdom it Biblia nga maghueat hasta nga eagpas eon sanda “sa pagkabataon” bago mag-asawa. (1 Cor. 7:​36, NWT) Ginasigurado man nanda nga ro andang mangin asawa hay may mga ugali nga ginahambae ni Jehova nga mangin mayad nga asawang eaki o asawang bayi. (Hulu. 31:​10-13, 26-28; Efe. 5:33; 1 Tim. 5:8) Kon may nagapangasawa kanda nga buko’t Saksi, owa nanda ra ginabaton. Kundi, ginasunod nanda ro pahanumdom nga “mag-asawa . . . it isaeang ka tumoeuo,” nga mabasa sa 1 Corinto 7:39. (Basaha.) Padayon sandang nagakabuhi paagi sa pagtuo dahil sayod nanda nga itao gid pirme ni Jehova ro andang emosyonal nga kinahang-eanon.​—Sal. 55:22.

12. Ano ing matun-an sa halimbawa ni Rosa?

¹² Tan-awon ta ro eksperyinsya ni Rosa, nga sangka payunir sa Colombia. Dahil sa anang trabaho, pirme nang nakakaistorya ro buko’t Saksi nga eaki nga nagapakita kana it interes. Naila man kana si Rosa. Naghambae imaw: “Matsa mabuot man imaw nga eaki, owa it bisyo, ag ginabuligan na ro mga tawo sa andang lugar. Mabuot man imaw kakon. Ag una kana ro mga ugali nga gusto ko sa sangka asawa pero bukon imaw it Saksi.” Naghambae pa si Rosa: “Nalisdan akong balibaran imaw dahil naila man kunta ako kana. Sa ruyong panahon, nakabatyag ako it kasubo ag gusto ko eon mag-asawa, pero owa pa ako’t makitang brother nga Saksi nga nailaan ko.” Pero, owa eang nagpukos si Rosa sa anang nakita. Ginpamaeandungan na kon ano ro pwedeng mangin epekto sa anang relasyon kay Jehova kon magdesisyon imaw nga makipagrelasyon sa ratong buko’t Saksi nga eaki. Ngani, ginputoe na ro tanan nandang komunikasyon ag padayon nga nangin masako sa pag-alagad kay Jehova. Owa magbuhay, naimbitahan imaw nga mag-eskuyla sa School for Kingdom Evangelizers, ag nagaalagad eon imaw makaron bilang special pioneer. Naghambae si Rosa: “Gintaw-an ako ni Jehova it abu nga pagpakamayad nga nagpasadya gid kakon.” Buko’t maeumo nga magkabuhi paagi sa pagtuo, eabi eon kon gusto mo gid ro sangka bagay. Pero kon magpagiya kita kay Jehova, sulit gid ra.

KON MAKABATON IT INSTRUKSYON HALIN SA ATONG ORGANISASYON

13. Ano ro posibleng mangin reaksyon naton kon makabaton kita it instruksyon halin sa atong organisasyon?

¹³ Nakakabaton kita pirme it mga instruksyon—halin sa atong mga elder, manogdipara it sirkito, branch office, o sa Nagadumaea nga Grupo—para giyahan kita sa atong pag-alagad kay Jehova. Pero ano abi kon makabaton kita it instruksyon nga indi naton maintindihan? Basi magduda kita nga rayang instruksyon hay buko’t mayad para katon. Ag basi magpukos man kita sa buko’t perpektong mga brother nga nagtao it rayang instruksyon.

14. Ano ro makabulig katon nga magkabuhi paagi sa pagtuo kon makabaton it instruksyon halin sa atong organisasyon? (Hebreo 13:17)

¹⁴ Kon nagakabuhi kita paagi sa pagtuo, nagasalig kita nga si Jehova ro nagagiya sa anang organisasyon ag sayod na kon ano ro atong mga sitwasyon. Ngani, ginasunod eagi naton ra ag owa nagareklamo. (Basaha ro Hebreo 13:17.) Sayod naton nga ro atong pagkamatinumanon hay makabulig sa paghiusa it atong kongregasyon. (Efe. 4:​2, 3) Nagasalig kita nga maskin buko’t perpekto ro mga brother nga nagapanguna katon, pakamayron ni Jehova ro atong pagkamatinumanon. (1 Sam. 15:22) Ag nagasalig man kita nga kon kinahang-ean bag-uhon ro instruksyon, ayuson gid ra ni Jehova sa tama nga panahon.​—Miq. 7:7.

15-16. Ano ro nakabulig sa sangka brother nga magkabuhi paagi sa pagtuo maskin may mga pagduda imaw sa anang nabaton nga instruksyon? (Tan-awa man ro piktyur.)

¹⁵ Tan-awa ro sangka eksperyinsya nga nagapakita it benepisyo kon nagakabuhi kita paagi sa pagtuo. Sa Peru, ro kaeabanan nga ginagamit nga linggwahe hay Spanish. Pero abu man nga tagbaeay ro nagahambae it lokal nga mga linggwahe. Sambilog kara hay ro Quechua. Mga dinag-on eon nga nakasanayan it mga igmanghod nga mag-usoy it pareho nanda nga nagahambae it Quechua sa andang teritoryo. Pero, para masunod ro ginapatuman it gubyerno, may gin-obra sandang mga pagbag-o sa paagi it pag-usoy sa mga nagahambae it Quechua. (Roma 13:1) Dahil kara, gin-isip it iba nga basi makapalisud eang ra sa pagkobre it andang teritoryo. Dahil ginsunod it mga igmanghod ro mga instruksyon nga andang nabaton, ginpakamayad ni Jehova ro andang pagtinguha nga makita ro abung mga tawo nga nagahambae it Quechua.

¹⁶ Si Kevin, nga sangka elder sa kongregasyon nga nagahambae it Quechua hay sambilog sa mga nagkabaeaka. Naghambae imaw: “Napaisip ako, ‘Paalin eon namon makita makaron ro mga tawo nga nagahambae it Quechua?’” Ano ro gin-obra ni Kevin? Naghambae pa imaw: “Nadumdoman ko ro Hulubaton 3:5 ag ro parti kay Moises. Nagtao si Jehova it instruksyon kana nga matsa bukon it praktikal. Ginhambaean na si Moises nga imaw ro magapanguna sa mga Israelinhon paguwa it Ehipto ag nakaabot sanda sa Dagat nga Puea, kon siin matsa indi eon sanda kapaeagyo sa mga taga-Ehipto nga nagaeagas kanda. Pero, nagtuman gihapon si Moises ag ginpakamayad ni Jehova ro anang pagkamatinumanon sa matsa indi mapatihan nga paagi.” (Ex. 14:​1, 2, 9-11, 21, 22) Handa si Kevin nga mag-adjust sa anang pagministeryo. Ano ro resulta? Naghambae imaw: “Nagdayaw gid ako kon paalin kami ginpakamayad ni Jehova. Dati sa among pagministeryo, nauubos eang ro among oras sa pagtinikang ag kon amat, sambilog o daywa eang ro among nakikita nga nagahambae it Quechua. Makaron, nagapukos lang kami sa mga teritoryo nga abu ro nagahambae it rayang linggwahe. Bilang resulta, mas abu ro among naistorya, mga return visit, ag mga Bible study. Ag nag-abu man ro naga-attend sa among mga miting.” Ngani, kon nagakabuhi kita paagi sa pagtuo, pakamayron kita pirme ni Jehova.

17. Ano ing natun-an sa rayang artikulo?

¹⁷ Gintalakay naton ro tatlong importanteng sitwasyon kon paalin naton mapakita nga nagakabuhi kita paagi sa pagtuo. Pero dapat padayon naton rang ipakita sa tanan nga parte it atong kabuhi, pareho sa pagpili it kalingawan ag kon nagaobra it mga desisyon parti sa pag-eskuyla o sa pagpabahoe it unga. Ano man nga mga desisyon ro atong obrahon, dapat owa eang ra nabase sa kon ano ro atong makita, kundi sa aton man nga relasyon kay Jehova, sa anang paggiya, ag sa anang promisa nga indi na kita pagpabay-an. Kon obrahon naton ra, magakabuhi o “magatikang kita sa pangaean ni Jehova nga atong Dyos sa owa it katapusan.”​—Miq. 4:5.