Owa Gid Kita Nagaisaeahanon!

1-2. (a) Ham-an masigurado naton nga owa gid kita nagaisaeahanon kon nagaatubang it mga kalisdanan? (b) Ano ro atong pagatalakayon sa rayang artikulo?

KON nagaatubang kita it mga kalisdanan, posibleng mabatyagan naton nga matsa nagaisaeahanon kita sa tunga it eawod nga nakasakay sa baroto habang nagabagyo. Pero, owa kita nagaisaeahanon. Nakikita it atong mapinalanggaon nga Ama sa eangit ro atong mga kalisdanan ag nagpromisa man imaw nga buligan na kita nga makaya ra. Ginpasalig ni Jehova ro anang mga matutom nga alagad: “Buligan ko ikaw.”​—Isa. 41:10.

² Pagatalakayon sa rayang artikulo kon paalin kita ginabuligan ni Jehova paagi sa (1) paggiya katon, (2) pagtao it atong mga kinahang-eanon, (3) pagprotekta, ag (4) pagpaumpaw katon. Ginapasalig kita ni Jehova nga maskin alin man nga mga kalisdanan ro atong maatubang, indi na gid kita pagkalipatan. Ag indi na man kita pag-aywanan. Ngani owa gid kita nagaisaeahanon.

GINAGIYAHAN KITA NI JEHOVA

3-4. Paalin kita ginagiyahan ni Jehova? (Salmo 48:14)

³ Basaha ro Salmo 48:14. Sayod ni Jehova nga indi naton magiyahan ro atong sarili, ngani kinahang-ean naton imaw para maggiya katon. Paalin na ginagiyahan makaron ro mga matutom nga nagasimba kana? Ro sambilog kara hay paagi sa Biblia. (Sal. 119:105) Ginagamit ni Jehova ro Biblia agud makaobra kita it mayad nga mga desisyon ag mapaeambo ro mga ugali nga makatao katon it matuod nga kasadya makaron ag kabuhi nga owa’t katapusan sa paeaabuton.a Halimbawa, ginatur-an na kita nga patawaron ro iba ag indi magdumot kanda, mangin honest sa tanan natong ginaobra, ag sinsero nga palanggaon ro iba. (Sal. 37:8; Heb. 13:18; 1 Ped. 1:22) Kon ipakita naton rayang mga ugali, mangin mayad kita nga mga ginikanan, asawa, ag amigo.

⁴ Dugang pa, ginpasueat man ni Jehova sa anang Bisaea ro matuod nga istorya it mga tawo nga nakaagi it mga kalisdanan ag may baeatyagon man nga pareho katon. (1 Cor. 10:13; Sant. 5:17) Kon basahon naton ra ag iaplikar ro mga leksyon nga atong natun-an, makabenepisyo kita sa daywang ka paagi. Una, marealisar naton nga owa kita nagaisaeahanon—nakaatubang man ro iba it pareho nga mga sitwasyon ag nakaya nanda ra sa bulig ni Jehova. (1 Ped. 5:9) Ag pangaywa, masayran naton kon paalin makaya ro mga kalisdanan ag makapabilin nga masadya.​—Roma 15:4.

5. Sin-o ro mga ginagamit ni Jehova para giyahan kita?

⁵ Ginagamit man ni Jehova ro mga igmanghod para giyahan kita.b Halimbawa, ro mga manogdipara it sirkito hay regular nga nagabisita sa atong mga kongregasyon para palig-unon kita. Ro andang mga diskurso hay nagapabakud it atong pagtuo ag nagabulig katon nga padayon nga maghiusa. (Binu. 15:40–16:5) Ro mga elder sa kongregasyon hay nagatinguha man it mayad para buligan ro kada isaea katon nga padayon nga mangin maeapit kay Jehova. (1 Ped. 5:​2, 3) Ginatur-an it mga ginikanan ro andang mga unga nga palanggaon si Jehova, mag-obra it mayad nga mga desisyon, ag mangin mayad ro andang paggawi. (Hulu. 22:6) Ag ginabuligan it hamtong nga mga Cristyanong bayi ro bataon nga mga sister paagi sa andang mayad nga halimbawa, pagtao it praktikal nga pahanumdom, ag pagpalig-on.​—Tito 2:​3-5.

6. Ano ro dapat natong obrahon para makabenepisyo sa paggiya ni Jehova?

⁶ Gintaw-an kita ni Jehova it mga giya nga kinahang-ean naton para makaobra it mayad nga mga desisyon ag mangin masadya ro atong kabuhi. Pero, ano ro dapat natong obrahon para makabenepisyo sa paggiya ni Jehova? Ro Hulubaton 3:​5, 6 hay nagahambae: “Magsalig kay Jehova sa ing bilog nga tagipusuon, ag indi magsalig sa ing sariling pag-eubot.” Kon obrahon naton ra, “tadlungon na ro [atong] aeagyan.” Nagakahueogan ra nga buligan na kita nga malikawan ro abung problema ag mangin masadya. Nagapasaeamat gid kita kay Jehova nga ginataw-an na ro kada isaea katon it mapinalanggaon nga pahanumdom!—Sal. 32:8.

GINATAO NI JEHOVA RO ATONG MGA KINAHANG-EANON

7. Ano ro pila nga mga paagi nga ginatao ni Jehova ro atong mga kinahang-eanon? (Filipos 4:19)

⁷ Basaha ro Filipos 4:19. Euwas nga ginagiyahan kita ni Jehova, ginapakamayad na man ro atong mga pagtinguha para may aton nga pagkaon, eambong, ag ieistaran. (Mat. 6:33; 2 Tes. 3:12) Normal eang nga mabaeaka sa atong pisikal nga mga kinahang-eanon, pero ginapalig-on kita ni Jehova nga indi magkabaeaka it sobra sa rayang mga bagay. (Mat. 6:25) Ham-an? Dahil indi gid kita pagpabay-an it atong Ama sa panahon nga nagakinahang-ean kita. (Mat. 6:8; Heb. 13:5) Makasalig gid kita kana sa anang ginhambae nga itao na ro atong mga kinahang-eanon.

8. Ano ro gin-obra ni Jehova para kay David?

⁸ Tan-awa kon paalin ginbuligan ni Jehova si David. Sa panahon nga nagpinaeagyo si David, gintaw-an imaw ni Jehova ag ro anang mga tawuhan it andang mga kinahang-eanon para mabuhi. Kat ginpamaeandungan ni David kon paalin imaw gindipara ni Jehova sa ruyong malisud nga mga panahon, nahambae na: “Bata ako dati ag makaron hay magueang eon, pero owa pa ako nakakita it matarung nga ginpabay-an, o ro anang mga unga hay nagapangayo-ngayo it tinapay.” (Sal. 37:25) Pareho kay David, posibleng nakita mo man nga ginatao ni Jehova ing mga kinahang-eanon o ku imong mga igmanghod sa panahon it kalisdanan.

9. Paalin ginatao ni Jehova ro mga kinahang-eanon it anang mga alagad makaron kon may kalamidad? (Tan-awa man ro piktyur.)

⁹ Ginatao man ni Jehova ro mga kinahang-eanon it anang mga alagad kon may kalamidad. Halimbawa, kat may tiggueotom sa Jerusalem ku unang siglo, nagpadaea ro mga Cristyano halin sa iba-ibang lugar it mga bulig sa mga igmanghod nga nagakinahang-ean. (Binu. 11:​27-30; Roma 15:​25, 26) Ginapakita man makaron it mga alagad it Dyos ruyong kaalwan. Kon may kalamidad, ginapahueag ni Jehova ro anang mga alagad para magtao it mga kinahang-eanon pareho it pagkaon, tubi, eambong, ag bueong sa mga igmanghod nga naapektuhan. May mga grupo nga gin-asayn sa pag-ayos it nasamad nga mga baeay ag Kingdom Hall. Ag alisto man ro mga alagad ni Jehova sa pagtao it emosyonal ag espiritwal nga bulig sa mga nadueaan it mga pagkabutang o namatayan it pinalangga.c

10-11. Ano ing matun-an sa eksperyinsya ni Borys?

¹⁰ Maalwan man si Jehova sa mga owa pa nagaalagad kana. Ginatuead naton si Jehova ag nagausoy man it mga paagi para mangin mabuot sa mga owa nagaalagad kana. (Gal. 6:10) Kon obrahon naton ra, posibleng mabuligan naton sanda nga mas makilaea kita ag si Jehova. Tan-awa ro eksperyinsya ni Borys, nga taga-Ukraine nga sangka prinsipal sa eskuylahan. Maskin bukon it Saksi ni Jehova si Borys, mabuot gid imaw sa anang mga estudyante nga Saksi ag ginarespeto na ro andang mga pagpati. Dahil sa gera, nagdesisyon si Borys nga aywan ro anang ginaestaran para maghalin sa mas safe nga lugar, ag ginbuligan imaw it atong mga igmanghod. Owa magbuhay, nag-attend si Borys sa Memoryal ku Kamatayon it Cristo. Naghambae si Borys parti sa anang naeksperyinsyahan: “Mabuot gid kakon ro mga Saksi ag gindipara nanda ako it mayad. Nagapasaeamat gid ako sa mga Saksi ni Jehova.”

¹¹ Matuead man naton ro atong maeueoy-on nga Ama sa eangit kon pakitaan naton it pagpalangga ro mga nagakinahang-ean, Saksi man sanda o bukon. (Luc. 6:​31, 36) Nagaeaum kita nga ro atong mga pagtinguha nga palanggaon ro mga tawo hay magapahueag kanda nga mangin mga disipulo it Cristo. (1 Ped. 2:12) Pero, mag-alagad man sanda kay Jehova o indi, masadya gihapon kita dahil mas masadya ro nagatao kaysa sa nagabaton.​—Binu. 20:35.

GINAPROTEKTAHAN KITA NI JEHOVA

12. Ano ro promisa ni Jehova sa anang mga alagad bilang grupo? (Salmo 91:​1, 2, 14)

¹² Basaha ro Salmo 91:​1, 2, 14. Makaron, nagapromisa si Jehova nga protektahan na kita sa maskin alin nga pwedeng makasamad sa atong relasyon kana. Indi na gid pagpasugtan si Satanas nga papunduhon kita sa matuod nga pagsimba. (Juan 17:15) Ag kon mag-abot eon ro “mabahoe nga paghingabot” o kasakitan, makasalig gid kita nga tumanon ni Jehova ro anang promisa nga protektahan na ro anang mga alagad, bukon eang sa espiritwal kundi pati man sa pisikal.​—Pah. 7:​9, 14.

13. Paalin kita ginaprotektahan ni Jehova bilang indibidwal?

¹³ Paalin kita ginaprotektahan ni Jehova bilang indibidwal? Paagi sa Biblia, ginabuligan kita ni Jehova nga masayran kon ano ro tama ag saea. (Heb. 5:14) Kon magkabuhi kita base sa mga prinsipyo nga makita sa Bisaea it Dyos, maprotektahan naton ro atong sarili sa espiritwal ag pisikal nga mga peligro. (Sal. 91:4) Dugang pa, ginaprotektahan man kita ni Jehova paagi sa kongregasyon. (Isa. 32:​1, 2) Kon nagaiba kita sa mga igmanghod nga nagapalangga kay Jehova ag nagatuman kana, mapalig-on kita ag malikawan naton ro maeain nga mga impluwensya.​—Hulu. 13:20.

14. (a) Ham-an ginapasugtan it Dyos nga makaeksperyinsya kita it mga kalisdanan? (b) Ano ro ginapasalig katon it Salmo 9:10? (Tan-awa man ro footnote.)

¹⁴ May mga panahon kato nga ginprotektahan ni Jehova ro anang mga alagad sa pisikal nga mga peligro. Pero, owa na ra ginaobra pirme. Ginaturo it Biblia nga pwedeng matabo maskin kanyo ro owa ginapaabot nga mga problema. (Man. 9:11) Dugang pa, ginpasugtan ni Jehova nga maagyan it anang mga alagad ro paghingabot ag maskin ro kamatayon para mapamatud-an nga purilon si Satanas. (Job 2:​4-6; Mat. 23:34) Natabo ra sa mga alagad ni Jehova kato ag pwede man rang matabo katon makaron. Maskin pa indi pagdueaon ni Jehova ro atong mga kalisdanan makaron, makasalig kita nga indi na gid pag-aywanan ro mga nagapalangga kana.d—Sal. 9:10.

GINAPAUMPAWAN KITA NI JEHOVA

15. Paalin kita ginapaumpawan ni Jehova paagi sa pangamuyo, sa Biblia, ag sa atong mga igmanghod? (2 Corinto 1:​3, 4)

¹⁵ Basaha ro 2 Corinto 1:​3, 4. Kon amat, nagaeksperyinsya kita it kasubo, kabaeaka, o kalisdanan. Posibleng nagaatubang ka makaron it malisud nga sitwasyon nga nagapabatyag kimo nga nagaisaeahanon ka. May nakaintindi baea sa ing ginabatyag? Huo, si Jehova. Owa na eang nabatyagan ro atong kasakit kundi “ginabuligan nana kita sa tanan naton nga mga kalisdanan.” Paalin? Kon sinsero kita nga mangamuyo kay Jehova, itao na katon “ro paghidait it Dyos nga indi matungkad ku paghangop it tawo.” (Fil. 4:​6, 7) Mapaumpawan man kita kon basahon naton sa Biblia ro mga ginahambae ni Jehova para katon. Dikara ginasugid ni Jehova kon mauno na kita kapalangga, kon paalin kita mangin maaeam, ag kon ano nga pag-eaum ro itao na katon. Ag nagapaumpaw man katon ro atong Cristyanong mga miting kon siin mabatyagan naton ro pagpalangga it atong mga igmanghod ag mabatian ro mga pagpalig-on nga base sa Biblia.

16. Ano ing matun-an sa eksperyinsya nanday Nathan ag Priscilla?

¹⁶ Tan-awon ta sa eksperyinsya nanday Nathan ag Priscilla, nga taga-United States kon paalin nagatao it paumpaw ag pagpalig-on si Jehova paagi sa Biblia. Mga pilang dag-on ro nagtaliwan, nagdesisyon sanda nga magsaylo sa lugar nga may mas mabahoe nga pagkinahang-ean it mga manogwali. Naghambae si Nathan, “Nagsalig kami kay Jehova nga pakamayron na ro among mga pagtinguha.” Pero, kat igto eon sanda sa andang bag-ong asayment, nakaatubang sanda it owa ginapaabot nga problema sa pang-eawas ag pinansyal. Naghambae pa si Nathan, “Napaisip ako kon ham-an owa kami ginpakamayad ni Jehova. Basi may haobra ta ako nga saea.” Pero ku ulihi, narealisar nanday Nathan ag Priscilla nga owa man gali sanda ginpabay-an it Dyos sa mga panahon nga nagakinahang-ean sanda. Naghambae pa gid si Nathan, “Sa ratong malisud nga mga panahon, ro Biblia hay nangin pareho it mayad nga amigo nga nagapalig-on ag nagatao it giya kamon. Ngani imbes nga magpukos sa mga problema, nagpukos kami sa kon paalin kami ginbuligan ni Jehova nga matiis ro mga kalisdanan ag nakabulig ra kamon nga mangin handa sa alin man nga mga kalisdanan nga among maatubang.”

17. Paalin nakabaton it paumpaw ro sister nga si Helga? (Tan-awa man ro piktyur.)

¹⁷ Nagatao man it paumpaw katon si Jehova paagi sa mga igmanghod. Tan-awon ta ro eksperyinsya ni Helga, nga taga-Hungary. Sa sueod it mga dinag-on, naeksperyinsyahan na ro iba-ibang mga problema nga nagtao kana it kabaeaka ag nagpabatyag nga owa imaw it pueos. Pero kon balikan na ro mga natabo, narealisar na nga ginagamit ni Jehova ro mga igmanghod sa kongregasyon para paumpawan imaw. Ginsueat na: “Pirme akong ginabuligan ni Jehova kon makita na nga nalisdan eon ako sa ang trabaho, sa pagdipara sa ang nagamasakit nga unga, ag sa iba pang mga problema. Sa nagtaliwan nga 30 nga dag-on, owa gid it adlaw nga owa gintuman ni Jehova ro anang promisa nga paumpawan na ako. Pirme na akong ginapabakud paagi sa pagpalig-on it iba. Pirme akong nakakabaton it mga text message, sueat, o komendasyon sa panahon nga kinahang-ean ko gid.”

18. Paalin naton mapaumpawan ro iba?

¹⁸ May pribilehiyo kita nga tuearon ro atong Dyos paagi sa pagpaumpaw sa iba. Paalin naton ra maobra? Pwede naton sandang pamatian it mapinasensyahon, maghambae kanda it makapaumpaw, ag buligan sanda sa praktikal nga mga paagi. (Hulu. 3:27) Ginatinguhaan naton nga paumpawan ro tanan nga nagakalisud, pati man ro mga owa pa nagaalagad kay Jehova. Kon may nagaeksperyinsya it kasubo, pagmasakit, o kabaeaka, aton sanda nga ginabisita, ginapamatian, ag ginasugiran it makapalig-on nga mga teksto sa Biblia. Kon ginatuead naton si Jehova, ro “Dyos nga ginahalinan it tanan nga bulig” o paumpaw, owa eang naton ginabuligan ro atong mga isigka-tumoeuo nga matiis ro mga kalisdanan, kundi posibleng mabuligan man naton ratong mga owa pa nagaalagad sa Dyos nga makilaea imaw.​—Mat. 5:16.

BULIGAN KITA PIRME NI JEHOVA

19. Ano ro obrahon ni Jehova para katon, ag paalin naton imaw matuead?

¹⁹ Nagakabaeaka gid si Jehova sa tanan nga nagapalangga kana. Indi na kita pag-aywanan kon nagakalisud kita. Pareho it mapinalanggaon nga ginikanan nga ginadipara ro anang unga, ginadipara man ni Jehova ro anang matutom nga mga alagad. Ginagiyahan na kita, ginatao ro atong mga kinahang-eanon, ginaprotektahan, ag ginapaumpawan. Ginatuead naton ro atong mapinalanggaon nga Ama sa eangit kon ginabuligan ag ginapalig-on naton ro iba kon nagakalisud sanda. Maskin makaeksperyinsya kita it mga kalisdanan ag kasubo, makasalig kita nga buligan gid kita pirme ni Jehova. Nagpromisa imaw katon: “Indi mahadlok, dahil kaibahan mo ako.” (Isa. 41:10) Rayang promisa hay nagatao katon it kompyansa nga kon kaibahan naton si Jehova, owa gid kita nagaisaeahanon!