Buligi Ing Bible Study nga Makadesisyon nga Mag-alagad kay Jehova

1-2. (a) Ham-an nagadaywang-isip ro mga Bible study nga mag-obra it desisyon nga mag-alagad kay Jehova? (b) Ano ro atong pagatalakayon sa rayang artikulo?

NAGDAYWANG-ISIP ka baea dati nga mangin sambilog sa mga Saksi ni Jehova? Posibleng nahadlok ka nga maakig kimo ing mga katrabaho, amigo, o pamilya. O basi naisip mo nga indi mo masunod ro mga ginapatuman kimo ni Jehova. Kon raya ing ginbatyag kato, maintindihan mo ro ginabatyag it mga Bible study ag kon ham-an nagadaywang-isip sanda nga mag-obra it desisyon nga mag-alagad kay Jehova.

² Sayod ni Jesus nga rayang mga bagay hay pwedeng magpugong sa isaea nga mag-alagad kay Jehova. (Mat. 13:​20-22) Pero padayon na nga ginbuligan ratong mga nagadaywang-isip nga magsunod kana. Ginpakita ni Jesus sa anang mga disipulo kato kon paalin buligan ratong mga nagadaywang-isip nga (1) masayran ro mga nagapugong sa andang pag-uswag, (2) mapadaeum ro andang pagpalangga kay Jehova, (3) ma-adjust ro andang mga prioridad, ag (4) maatubang ro andang mga kalisdanan. Paalin naton matuead ro paagi ni Jesus sa pagturo gamit ro libro nga Mangin Masadya sa Owa it Katapusan! para buligan ro atong Bible study nga magdesisyon nga mag-alagad kay Jehova?

BULIGI ING BIBLE STUDY NGA MASAYRAN RO MGA NAGAPUGONG SA ANANG PAG-USWAG

3. Ano ro posibleng nagpugong kay Nicodemo nga mangin disipulo ni Jesus?

³ Si Nicodemo hay sangka prominenteng lider it mga Judio, nga nag-atubang it kalisdanan para mangin disipulo ni Jesus. Mga an-um nga buean paeang kat nag-umpisa sa pagministeryo si Jesus, nangin kumbinsido si Nicodemo nga si Jesus ro Mesias. (Juan 3:​1, 2) Pero, patago nga nakipagkita si Nicodemo kay Jesus dahil “nahadlok [imaw] sa . . . mga Judio.” (Juan 7:13; 12:42) Posibleng naisip na nga abu ro maduea kana kon mangin disipulo imaw ni Jesus.a

4. Paalin ginbuligan ni Jesus si Nicodemo nga maintindihan kon ano ro gusto it Dyos nga obrahon na?

⁴ Sayod ni Nicodemo ro Kasugoan, pero kinahang-ean na it bulig agud maintindihan kon ano ro gusto ni Jehova nga obrahon na. Paalin imaw ginbuligan ni Jesus? Nagtao gid si Jesus it oras agud makipagkita kay Nicodemo maskin gabii eon. Ag klaro nga ginhambae ni Jesus kana kon ano ro dapat nang obrahon para mangin disipulo: maghinuesoe sa anang mga saea, magpabautismo sa tubi, ag magtuo sa Unga it Dyos.​—Juan 3:​5, 14-21.

5. Paalin naton mabuligan ro atong Bible study nga masayran kon ano ro mga nagapugong kana nga mag-uswag?

⁵ Maskin abu eon nga nasayran sa Biblia ro sangka Bible study, posibleng kinahang-ean na gihapon it bulig agud masayran kon ano ro mga nagapugong kana nga mag-uswag. Halimbawa, posibleng ro anang trabaho hay nagaubos it anang oras, o basi owa naila ro anang pamilya nga mangin Saksi ni Jehova imaw. Ngani pareho ni Jesus, magtao it oras para buligan ing Bible study. Pwede mo imaw sampiton nga magmeryenda o magpamasyar. Kon ginaobra nyo ra, posibleng indi imaw mahuya nga isugid kimo ro parti sa anang kabuhi ag masayran mo ro anang mga kalisdanan. Palig-una rayon imaw nga mag-obra it mga pagbag-o, buko’t para mapasadya ka, kundi para mapakita na ro anang pagpalangga kay Jehova.

6. Paalin mo mabuligan ing Bible study nga mangin maisog sa pag-aplikar it anang mga natun-an? (1 Corinto 16:13)

⁶ Kon ing Bible study hay kumbinsido nga buligan imaw ni Jehova nga obrahon kon ano ro tama, mangin maisog imaw sa pag-aplikar it anang mga natun-an. (Basaha ro 1 Corinto 16:13.) Ro imong papel bilang manogturo it Biblia hay pwedeng makumpara sa sangka titser. Sin-o ing paboritong titser kat nagaeskuyla ka pa? Posibleng raya ro titser nga nagtao kimo it kompyansa nga kaya mong obrahon ro sangka bagay. Pareho kara, ro mayad nga manogturo it Biblia hay owa eang nagaturo sa anang Bible study kon ano ro gusto it Dyos nga obrahon na, kundi ginapasalig na man imaw nga sa bulig ni Jehova, kaya nang mag-obra it mga pagbag-o sa anang kabuhi. Ano pa ro pwede natong obrahon para buligan ro atong Bible study?

BULIGI ING BIBLE STUDY NGA MAPADAEUM RO ANANG PAGPALANGGA KAY JEHOVA

7. Paalin ginbuligan ni Jesus ratong mga nagpamati kana nga magdaeum ro andang pagpalangga kay Jehova?

⁷ Sayod ni Jesus nga ro pagpalangga sa Dyos ro magapahueag sa anang mga disipulo nga iaplikar ro andang mga natun-an. Ginturo na pirme ro mga bagay nga makabulig sa anang mga disipulo nga magdaeum ro andang pagpalangga sa andang Ama sa eangit. Halimbawa, ginkumpara ni Jesus si Jehova sa sangka tatay nga nagatao it mayad nga mga bagay sa anang mga unga. (Mat. 7:​9-11) Ro pila sa mga nagapamati kay Jesus hay posibleng buko’t mapinalanggaon ro andang tatay. Imadyina ro andang ginbatyag kat ginsugid ni Jesus ro ilustrasyon parti sa sangka maeueoy-on nga tatay nga gin-abiabi ro anang unga nga nag-obra it maeain nga mga bagay. Ginbuligan sanda ni Jesus nga makita nga palangga gid sanda ni Jehova ag gusto nang buligan sanda.​—Luc. 15:​20-24.

8. Paalin mo mabuligan ing Bible study nga mapadaeum ro anang pagpalangga kay Jehova?

⁸ Mabuligan mo man ing Bible study nga mapadaeum ro anang pagpalangga kay Jehova paagi sa pagturo kana it manami nga mga ugali ni Jehova. Sa kada pagtuon ninyo, buligi imaw nga makita kon paalin naangot ro inyong ginatun-an sa pagpalangga ni Jehova. Kon ginatalakay nyo ro parti sa pangtubos, ipabahoe kon mauno gid imaw kapalangga ni Jehova. (Roma 5:8; 1 Juan 4:10) Kon maintindihan it ing Bible study nga palangga gid imaw ni Jehova, magapahueag ra kana nga mas palanggaon si Jehova.​—Gal. 2:20.

9. Ano ro nakabulig kay Michael nga mag-obra it mga pagbag-o para maalagad si Jehova?

⁹ Tan-awa ro halimbawa ni Michael, nga taga-Indonesia. Ginpabahoe imaw sa kamatuoran pero owa imaw nabautismuhan. Sa edad nga 18, nag-agto imaw sa ibang bansa para magtrabaho bilang drayber it truck. Ku ulihi, nagpakasae imaw pero gin-aywanan na man gihapon ro anang pamilya para padayon nga magtrabaho sa ibang bansa. Pero, ro anang asawa ag unga nga bayi hay nag-umpisa nga magpa-Bible study ag gin-aplikar ro andang natun-an. Kat namatay ro nanay ni Michael, nag-uli imaw para diparahon ro anang tatay ag nagpasugot man imaw nga magpa-Bible study. Kat gintalakay nanda ro seksyon nga “Tun-i Pa Gid” sa leksyon 27 sa libro nga Mangin Masadya sa Owa it Katapusan! na-touch gid si Michael. Kat naisip na kon mauno kasakit kay Jehova nga makita nga nagaantus ro Anang Unga, nagtangis si Michael. Nagapasaeamat gid imaw sa pangtubos ag nagpahueag ra kana nga mag-obra it mga pagbag-o ag magpabautismo.

BULIGI ING BIBLE STUDY NGA MA-ADJUST RO ANANG MGA PRIORIDAD

10. Paalin ginbuligan ni Jesus ro anang mga disipulo kato nga ma-adjust ro andang mga prioridad? (Lucas 5:​5-11) (Tan-awa man ro piktyur.)

¹⁰ Sayod it mga disipulo ni Jesus kato nga imaw ro ginpromisa nga Mesias, pero kinahang-ean nanda it bulig para mangin prioridad ro pagministeryo. Mga disipulo eon sanday Pedro ag Andres kat gin-imbitahan sanda ni Jesus nga magsunod kana ag mag-alagad it bilog panahon. (Mat. 4:​18, 19) Mga mangingisda sanda, ag kasosyo nanda sa andang manami nga negosyo sanday Santiago ag Juan. (Mar. 1:​16-20) Kat “gin-aywanan [nanday Pedro ag Andres] ro andang lambat” agud magsunod kay Jesus, posibleng ginsigurado man nanda nga matao gihapon ro mga kinahang-eanon it andang pamilya. Ano ro nagpahueag kanda nga ma-adjust ro andang mga prioridad? Ginasugid katon it Lucas nga nag-obra it milagro si Jesus ag nagpabakud ra sa andang pagsalig nga kaya ni Jehova nga itao ro andang mga kinahang-eanon.​—Basaha ro Lucas 5:​5-11.

11. Paalin naton magamit ro atong mga eksperyinsya para mapabakud ro pagtuo it atong Bible study?

¹¹ Indi kita makaobra it mga milagro pareho kay Jesus, pero pwede natong isugid ro mga eksperyinsya kon paalin ginbuligan ni Jehova ratong mga nagauna Kana sa andang kabuhi. Halimbawa, natandaan mo baea kon paalin ka ginbuligan ni Jehova kat nagaumpisa ka paeang sa pag-attend it mga miting? Basi nag-eaong ka sa ing amo ag gin-eksplikar kana kon ham-an indi ka eon maka-overtime kon makaapekto ra sa ing pag-attend it mga miting. Kon ginasugid mo ing eksperyinsya sa ing Bible study, isugid kana kon paalin nagbakud ing pagtuo kat nakita mo ro pagbulig ni Jehova dahil gin-una mo imaw sa ing kabuhi.

12. (a) Ham-an manami nga iba-ibang mga igmanghod ro atong kaibahan sa pag-Bible study? (b) Paalin mo magamit ro mga video para buligan ing Bible study nga unahon si Jehova? Magtao it halimbawa.

¹² Makabenepisyo man ing Bible study kon mabatian nanda ro eksperyinsya it ibang mga igmanghod kon paalin nanda gin-adjust ro andang mga prioridad para maalagad si Jehova. Ngani sampita ro iba-ibang mga igmanghod nga ibhan ka sa ing pag-Bible study. Pangabaya sanda nga isugid kon paalin nanda nasayran ro kamatuoran ag kon ano ro andang gin-obra para mangin prioridad ro pag-alagad kay Jehova. Dugang pa, tan-awa ninyo ku ing Bible study ro mga video sa “Tun-i Pa Gid” o sa “Sayura” nga seksyon it libro nga Mangin Masadya sa Owa it Katapusan! Halimbawa, kon ginatalakay ninyo ro leksyon 37, ag ginatan-aw ro video nga Itao ni Jehova ro Atong mga Kinahang-eanon, pwede mong ipabahoe ro mga prinsipyo nga makabulig kana para unahon si Jehova.

BULIGI ING BIBLE STUDY NGA MAATUBANG RO MGA KALISDANAN

13. Paalin ginhanda ni Jesus ro anang mga disipulo kato sa mga paghingabot nga andang maatubang?

¹³ Pauman-uman nga ginhambae ni Jesus sa anang mga disipulo kato nga makaatubang sanda it mga paghingabot halin sa iba, maskin sa andang mga pamilya. (Mat. 5:11; 10:​22, 36) Kat maeapit lang mamatay si Jesus, ginpaandaman na ro anang mga disipulo nga pwede man sandang patyon dahil nagaalagad sanda kay Jehova. (Mat. 24:9; Juan 15:20; 16:2) Ginpalig-on na sanda nga mangin mahinaeongon sa andang pagministeryo. Ginpahanumduman na sanda nga indi makipagbais sa mga nagakontra kanda ag mangin matinahuron agud padayon sanda nga makawali.

14. Paalin naton mabuligan ro atong Bible study nga mangin handa sa mga paghingabot? (2 Timoteo 3:12)

¹⁴ Mabuligan naton ro atong Bible study nga mangin handa sa mga paghingabot kon isugid naton kana ro mga pwedeng hambaeon o obrahon it anang mga katrabaho, amigo, o pamilya dahil nagatuon imaw it Biblia. (Basaha ro 2 Timoteo 3:12.) Posibleng intrimison imaw ku anang mga katrabaho dahil ginaaplikar na ro anang mga natun-an sa Biblia. O posibleng maakig kana ro pila sa anang pamilya dahil sa anang base sa Biblia nga mga pagpati. Kon isugid eagi naton sa atong Bible study ro mga paghingabot nga pwede nang maatubang, mangin mas handa imaw kon mag-abot eon ron.

15. Ano ro makabulig sa ing Bible study nga makaya ro paghingabot it anang pamilya?

¹⁵ Kon ginahingabot ing Bible study it anang pamilya, palig-una imaw nga isipon kon ham-an naakig sanda kana. Basi ginaisip nanda nga ginaloko eang imaw it mga Saksi, ag maeain sanda nga mga tawo. Maskin ro pila sa pamilya ni Jesus hay naakig man kana ag gin-isip nga nagkaumangon eon imaw. (Mar. 3:21; Juan 7:5) Tur-i ing Bible study nga mangin mapinasensyahon ag mangin mabuot sa iba, eabi eon gid sa anang myembro it pamilya.

16. Paalin naton mabuligan ro atong Bible study nga masugid ro anang mga pagpati sa mabuot nga paagi?

¹⁶ Maskin interesado ro anang pamilya nga masayran ro parti sa Biblia, mas mayad kon indi eagi pag-isugid it ing Bible study ro tanan nga impormasyon parti kara. Dahil basi malisdan ro anang pamilya nga intindihon ra, ag indi eon sanda magpangutana kana it uman. Ngani palig-una ing Bible study nga isugid ro anang mga pagpati sa simple nga paagi agud gustuhon pa it anang pamilya nga makipag-istorya kana. (Col. 4:6) Pwede nang isugid kanda nga agtunan ro jw.org. Makabulig ra kanda nga madugangan ro andang nasayran parti sa mga Saksi ni Jehova ag makapili kon ano eang nga impormasyon ro gusto nandang masayran.

17. Paalin mo masanay ing Bible study kon ano ro anang isabat sa saea nga mga pagpati it iba parti sa mga Saksi ni Jehova? (Tan-awa man ro piktyur.)

¹⁷ Pwede mong gamiton ro serye sa jw.org/hil nga “Mga Pirme Ginapamangkot Parte sa mga Saksi ni Jehova” para buligan ing Bible study nga mangin handa sa pagsabat sa mga posibleng ipangutana kana it anang pamilya o mga katrabaho. (2 Tim. 2:​24, 25) Sa katapusan it kada leksyon, rebyuha ro seksyon nga “Kon May Maghambae” sa libro nga Mangin Masadya sa Owa it Katapusan! Palig-una ing Bible study nga praktison kon paalin na ieksplikar sa iba ro anang pagpati. Kon kinahang-ean, magtao it mga suhistyon para mapauswag na ro anang sabat. Ro inyong pagpraktis hay makabulig kana nga maapinan ro anang pagtuo nga may kompyansa.

18. Paalin mo mapalig-on ing Bible study nga mag-preaching kaibahan it kongregasyon? (Mateo 10:27)

¹⁸ Ginsugo ni Jesus ro anang mga disipulo nga iwali ro mayad nga balita sa mga tawo. (Basaha ro Mateo 10:27.) Kon makaumpisa eon ing Bible study sa pag-preaching, matun-an na eagi nga magsalig kay Jehova. Paalin mo mabuligan ing Bible study nga mangin goal na ro pag-preaching? Kon may ginpahisayod sa inyong kongregasyon nga kampanya sa pag-preaching, buligi ing Bible study nga masayran kon ano ro kinahang-ean nang obrahon para mangin kwalipikado imaw nga mag-preaching. Isugid kana nga mas maeumo ro pag-preaching kon may kampanya. Pwede na man mangin goal ro pagtao it mga diskurso o mga demonstrasyon sa midweek meeting. Habang ginatinguhaan na nga mangin kwalipikado kara, matun-an na kon paalin maeksplikar it mayad ro anang mga pagpati.

IPAKITA NGA MAY PAGSALIG KA SA ING BIBLE STUDY

19. Paalin ginpakita ni Jesus nga may pagsalig imaw sa anang mga disipulo kato, ag paalin naton imaw matuead?

¹⁹ Bago nagsaka si Jesus sa eangit, ginhambae na sa anang mga disipulo kato nga makaibahan nanda imaw it uman. Owa nanda naintindihan nga ro ginatukoy ni Jesus hay ro pagsaka nanda sa eangit. Maskin pa owa naintindihan it mga disipulo ro tanan, sigurado si Jesus nga gusto nanda nga mapasadya si Jehova. (Juan 14:​1-5, 8) Sayod na nga kinahang-ean nanda it panahon nga maintindihan ro mga bagay, pareho sa andang eangitnon nga pag-eaum. (Juan 16:12) Pareho kay Jesus, mapakita man naton nga may pagsalig kita sa atong mga Bible study nga gusto nandang mapasadya si Jehova.

20. Paalin ginpakita it sangka sister sa Malawi nga may pagsalig imaw sa anang Bible study?

²⁰ May pagsalig kita sa atong Bible study nga gusto nang obrahon kon ano ro tama. Tan-awa ro halimbawa it sister nga si Chifundo, nga taga-Malawi. Nakaumpisa imaw it pag-Bible study gamit ro libro nga Mangin Masadya sa Owa it Katapusan! sa daeaga nga si Alinafe, nga sangka Katoliko. Pagkatapos nandang talakayon ro leksyon 14, ginpangutana ni Chifundo ro anang Bible study kon ano ro anang mahambae parti sa paggamit it mga imahen sa pagsimba. Nasubuan gid si Alinafe ag naghambae, “Personal ko mat-a ra nga desisyon!” Nag-isip si Chifundo nga basi mapundo eon imaw sa pag-Bible study. Pero padayon imaw nga nangin mapinasensyahon sa pag-Bible study kay Alinafe, ag nagaeaum imaw nga sa ulihi maintindihan na ra. Pagtaliwan it pilang buean, ginpangutana kana ni Chifundo ro pangutana sa leksyon 34: “Ano eon ing nabenepisyuhan kat nagtuon ka it Biblia ag nakilaea mo ro matuod nga Dyos nga si Jehova?” Ginsugid ni Chifundo ro nangin sabat ni Alinafe, “Abung manami nga mga punto ro anang ginsambit, sambilog kara hay owa nagaobra ro mga Saksi it mga bagay nga ginahambae it Biblia nga saea.” Owa magbuhay, ginpundo eon ni Alinafe ro paggamit it mga imahen ag nangin kwalipikado sa bautismo.

21. Paalin naton mabuligan ro atong Bible study nga makadesisyon nga mag-alagad kay Jehova?

²¹ Maskin pa si Jehova ro “nagapatubo,” may papel kita para buligan ro atong Bible study nga mag-uswag. (1 Cor. 3:7) Owa eang naton ginaturo kana kon ano ro gusto it Dyos nga obrahon na, kundi ginabuligan man naton imaw nga mapadaeum ro anang pagpalangga kay Jehova. Ginapalig-on man naton imaw nga ipakita ro anang pagpalangga paagi sa pag-adjust it anang mga prioridad. Ag ginatur-an naton imaw nga magsalig kay Jehova kon makaatubang it mga kalisdanan. Kon ginapakita naton nga may pagsalig kita sa atong Bible study nga gusto nang mapasadya si Jehova, mabuligan naton imaw nga magdesisyon nga mag-alagad kay Jehova.