Mga Pangutana Halin sa mga Manogbasa
Hin-uno matapos ro pagwali it mayad nga balita?
Naghambae si Jesus: “Rayang Mayad nga Balita nahanungod sa Ginharian iwali sa bilog nga kalibutan, bilang saksi sa tanan nga nasyon, ag dayon magaabot ro katapusan.” (Mat. 24:14) Ro Griego nga termino nga gin-translate nga “katapusan” sa rayang bersikulo, pati man sa bersikulo 6 ag 13 hay teʹlos. Nagatukoy ra sa katapusan it kalibutan ni Satanas nga matabo sa Armagedon. (Pah. 16:14, 16) Ngani, magapadayon kita sa pagwali it mayad nga balita hasta nga mag-abot ruyong katapusan. Raya hay pagbag-o sa dati natong pag-eubot.
Dati, ro pag-eubot naton hay magapundo kita sa pagwali it mayad nga balita kon mag-umpisa eon ro mabahoe nga kasakitan, kon siin sa rayang panahon, salakayon ro Bantug nga Babilonia. (Pah. 17:3, 5, 15, 16) Nagapati kita dati nga kon mag-umpisa eon ra, indi eon pagtaw-an ni Jehova it tsansa ro iba nga makabati it mayad nga balita dahil mapundo eon kita sa pagwali. (Isa. 61:2) Nagapati man kita nga ro mga makaeuwas sa mabahoe nga kasakitan hay napamatud-an eon nga matutom sanda kay Jehova bago pa mag-umpisa ruyong hitabo. Ginkumpara naton sanda sa mga Judio nga nakaeuwas sa pagkawasak it Jerusalem ku 607 B.C.E. Ginmarkahan sanda para sa kaeuwasan dahil ginsimba nanda si Jehova ag ginkaugtan ro maeain. (Eze. 5:11; 9:4) Pero rayang pagkumpara hay owa nagasinanto sa ginhambae ni Jesus sa Mateo 24:14, nga nagapakita nga ro mga tawo hay may tsansa pa nga makabaton it mayad nga balita ag magbag-o bago mag-umpisa ro katapusan sa Armagedon.
Dahil mas naintindihan eon naton ro kahueogan it Mateo 24:14, kinahang-ean man natong i-adjust ro atong pag-eubot sa Pahayag 16:21 parti sa daeagko nga mga yelo. Ginapakita it dugang nga pag-usisa nga nagasinanto rayang daywang ka teksto. Paalin? Ro sabat hay nagadepende sa kon paalin batunon it mga tawo ro mensahe it Ginharian. Nagsueat si apostol Pablo nga para sa ratong “mga ginaeuwas,” ro mensahe it mayad nga balita hay pareho sa “mahumot nga pahumot nga nagatao kanda it kabuhi.” Pero para sa mga kaaway it Dyos, maeain ra nga balita nga ro “hugom hay matsa ana it nagakaeunot nga patay nga eawas.” (2 Cor. 2:15, 16, Ro Bag-o nga Kasugtanan, TAP) Naakig gid sanda sa mensahe it Ginharian dahil ginabulgar kara nga ro kalibutan nga palangga nanda hay maeain, ginagamhan ni Satanas, ag maeapit lang dueaon it dayon.—Juan 7:7; 1 Juan 2:17; 5:19.
Dumdoma man nga ro simboliko nga daeagko nga mga yelo nga ginsambit sa Pahayag 16:21 hay mangin “grabi gid ka makahaealit.” Ginapakita kara nga sa panahon it mabahoe nga kasakitan, ro pagwali nga ueobrahon hay mangin mas mabahoe ro epekto sa mga tawo dahil makilaea ro pangaean ni Jehova sa paagi owa pa gid natabo dati. (Eze. 39:7) Sa ruyong panahon, pagkatapos waskon ro Bantug nga Babilonia, may una baea nga magabaton pa sa mensahe nga matsa pahumot ra para kanda? Posible nga may una. Dahil posibleng madumdoman nanda o marealisar nga mabuhay eon nga ginawali it mga Saksi ni Jehova ro pagkawasak it Bantug nga Babilonia, ag nakikita nanda nga nagakatuman eon ra.
Pareho ra sa natabo kato sa Ehipto pagkatapos it Napueo nga Kaeaeat-an. Kat ginpadapat ni Jehova ro ‘paghukom sa tanan nga dyos it Ehipto,’ nagsunod sa anang katawhan ro “mabahoe nga grupo” it mga buko’t Israelinhon. (Ex. 12:12, 37, 38) Rayang mga buko’t Israelinhon hay posibleng nag-apin kay Jehova kat nakita nanda nga natuman ro mga paandam ni Moises parti sa Napueo nga Kaeaeat-an.
Ro maskin sin-o nga magaapin kay Jehova pagkatapos it pagkawasak it Bantug nga Babilonia hay may tsansa nga magsuporta sa mga igmanghod it Cristo nga iya pa sa eugta. (Mat. 25:34-36, 40) Pero, ruyong tsansa nga mahukman sanda bilang karnero hay matapos bago mag-umpisa ro Armagedon, kon mabaton eon it nabilin nga mga pinili ro andang premyo sa eangit.
Rayang bag-o nga pag-eubot hay klaro nga nagapakita it mabahoe nga pagpalangga ag kaeuoy ni Jehova. Huo, “owa imaw it gusto nga ro bisan sambato kinyo maduea, kundi gusto nana nga magbueag kamo sa inyong mga saea.”—2 Ped. 3:9.