Bulig Para sa Gin-abuso nga mga Bayi

Raya ro rason kon ham-an may artikulo sa jw.org/hil nga “Seguridad sang mga Babayi—Ang Ginasiling sang Biblia.” Pwede mong ma-download ro PDF nga bersyon sa link nga makita sa katapusan it ruyong artikulo. Pwede mo rayon ra nga i-print ag piluon sa ap-at nga parte agud mangin tract. Ro sister nga si Stacy, nga taga-United States hay naghambae: “Nag-print ako it abung kopya, rayon nag-agto kami it sangka sister sa lugar nga daeangpan it mga bayi nga gin-abuso, nga sakop it teritoryo ku among kongregasyon.”

Ro empleyado it daeangpan hay nagpangayo pa it dugang nga mga kopya para ipanao sa mga nagaestar igto. Ngani, nagdaea sanda it 40 pa nga kopya ku rayang mga tract ag 30 bilog nga jw.org contact card. Ku ulihi, gusto it nagadumaea it daeangpan nga ipakita ku mga sister sa mga nagaestar igto kon paalin magtuon sa Biblia.

Si Stacy ag ro daywa pang ka sister hay nag-agto sa sambilog pa gid nga daeangpan kon siin nakatao sanda it limang kopya ku tract ag abu pa ro gustong magpangayo kara. Ro sambilog sa mga empleyado kara hay naghambae: “Rayang tract hay makabulig sa mga bayi iya, ag kinahang-ean namon ra.” Kat nagbalik ro mga sister, ginpakita nanda kon paalin magtuon sa Biblia ag abu sa mga bayi ro nagpamati kara. Ag ro daywa kanda hay naghambae nga gusto nandang mag-attend sa masunod nga weekend meeting sa Kingdom Hall.

Naghambae si Stacy: “Nagdayaw gid kami kon mauno sanda kasadya kat nabaton nanda rayang manami nga artikulo. Kat gin-print ag ginpilo namon ra, nangin manami ra nga paagi para masugid ro parti sa Ginharian it Dyos sa rayang mga bayi nga gin-abuso. Na-touch gid kami sa andang reaksyon, ag excited gid kami nga makita kon paalin pakamayron ni Jehova ro among mga pagtinguha para padayon namon nga masugid ro mayad nga balita sa rayang mga bayi.”