Ro Biblia​—Libro Nga Halin Sa Dyos

1, 2. Ham-an manami gid nga regalo ro Biblia halin sa Dyos?

ANO ing mabatyagan kon taw-an ka it regalo ku imong amigo? Nasadyahan ka nga hadumdoman ka nana ag gusto mo gid nga buksan eagi ra. Pasaeamatan mo gid imaw.

² Ro Biblia hay regalo halin sa Dyos. Nagatao ra katon it impormasyon nga indi naton makita bisan siin. Halimbawa, nagasugid ra katon nga gintuga it Dyos ro kaeangitan, eugta, ag ro una nga eaki ag bayi. Nagatao ra it mga prinsipyo nga makabulig sa atong mga problema. Sa Biblia, matun-an naton kon paano tumanon it Dyos ro anang katuyoan nga obrahon nga manami nga lugar ro eugta. Ro Biblia hay manami gid nga regalo!

3. Ano ro masayran mo sa pagtuon mo it Biblia?

³ Sa pagtuon mo it Biblia, masayran mo nga gusto ka it Dyos mangin amigo. Sa dugang mo nga pagtuon, mas kapin ka pa gid nga magaeapit kana.

4. Ham-an nagadayaw ka sa Biblia?

⁴ Gin-translate ro Biblia sa sobra 2,600 ka linggwahe, ag binilyon nga kopya ro gin-imprenta. Sobra 90 porsiento ku mga tawo sa bilog nga kalibutan ro nakabasa it Biblia sa andang linggwahe. Ag kada sang domingo, sobra sang milyon ka tawo ro nagabaton it Biblia! Huo, owa gid it iba nga libro kapareho it Biblia.

5. Paano naton mahambae nga “ginbugna it Dyos” ro Biblia?

⁵ Ro Biblia “ginbugna it Dyos.” (Basaha ro 2 Timoteo 3:16.) Ro iba nagaisip, ‘Ro Biblia ginsueat it mga tawo, ngani paano raya naghalin sa Dyos?’ Nagasabat ro Biblia: “Kundi ro mga tawo gintuytoyan ku baeaan nga espiritu.” (2 Pedro 1:21) Pareho ra sa isaeang ka negosyante nga nagpaobra it sueat sa anang secretary. Sin-o ro tag-ana it sueat? Ana ra ku negosyante, bukon it sa secretary. Sa kapareho man nga paagi, ro Awtor it Biblia hay ro Dyos, bukon it mga tawo nga nagsueat kara. Gintuytoyan sanda it Dyos nga isueat ro anang painu-ino. Ro Biblia hay “bisaea it Dyos.”​—1 Tesalonica 2:13; tan-awa ro Endnote 2.

INSAKTO GID RO BIBLIA

6, 7. Ham-an mahambae naton nga ro Biblia nagakaeasugot?

⁶ Ginsueat ro Biblia sa sueod it 1,600 ka dag-on. Ro manunueat hay nagkabuhi sa nagkaeain-eain nga panahon. Ro iba may tinun-an ag ro iba owa. Halimbawa, ro sambilog hay doktor. Ro iba hay nagapanguma, nagapangisda, nagabantay it karnero, mga propeta, mga hukom, ag mga hari. Bisan pa eain-eain ro manogsueat, tanan nga parte it Biblia hay nagkaeasugot. Ngani, nagakaeasugot ro kada kapitulo sa kada isaea.a

⁷ Ro una nga mga kapitulo it Biblia nagasugid kon paano nag-umpisa ro problema sa kalibutan, ag ro ulihi nga mga kapitulo nagasugid man kon paano sulbaron it Dyos ro tanan nga problema paagi sa pag-obra sa eugta nga paraiso. Ro Biblia nagasugid it linibo ka dag-on nga kasaysayan ku mga tawo ag nagapakita nga pirme gid ginatuman it Dyos ro anang katuyoan.

8. Magtao it halimbawa nga ro Biblia insakto gid pag-abot sa syensya.

⁸ Ro Biblia owa ginsueat agud magturo it syensya o gaeamiton sa eskuylahan, pero nagasugid ra it insakto nga impormasyon parti sa syensya. Ruyon gid ro atong maeauman sa libro nga halin sa Dyos. Halimbawa, sa libro it Levitico, may gintao ro Dyos nga mga instruksyon sa mga Israelita kon paano mapunggan ro mga baeatian nga mag-eapta. Ginsueat ra bago pa hasayran ku mga tawo kon paano ro bacteria ag mga virus ginahalinan it baeatian. Ro Biblia nagaturo man nga ro eugta nabitin sa owa. (Job 26:7) Ag kaeabanan nga tawo nagapati kato nga ro eugta hay matapan, pero ginhambae it Biblia nga bilog ra.​—Isaias 40:22.

9. Ano ro mahambae mo sa pagkatampad ku mga nagsueat it Biblia?

⁹ Kon ro Biblia nagasugid parti sa kasaysayan, insakto gid ra pirme. Abu nga libro it kasaysayan ro buko’t insakto tungod ro mga nagsueat hay owa nagsugid it matuod. Halimbawa, owa nanda ginsueat ro pagkapirdi sa inaway ku andang nasyon. Pero, ro mga nagsueat it Biblia hay tampad maskin hapirdi ro Israel kato. Ginsueat man nanda ro andang mga saea. Halimbawa, sa libro it Numeros, ginhambae ni Moises ro anang mabug-at nga saea ag dapat imaw disiplinahon it Dyos. (Numeros 20:2-12) Ro pagkatampad ku mga nagsueat it Biblia hay pamatuod gid nga naghalin ra sa Dyos. Ngani, makasalig gid kita sa Biblia.

RO BIBLIA ABU IT MANAMI NGA EAYGAY

10. Ham-an ro eaygay it Biblia makabulig katon makaron?

¹⁰ Ro Biblia “ginbugna it Dyos ag mapinuslanon sa pagturo it kamatuoran, sa pagbawae it saea, sa pagtadlong it tiko nga daean.” (2 Timoteo 3:16) Huo, ro eaygay it Biblia makabulig gid katon makaron. Si Jehova ro nagtuga katon, ngani sayod na ro atong ginabatyag ag ginapainu-ino. Mas kilaea na kita kaysa atong kaugalingon, ag gusto na nga mangin masadya kita. Hasayran na kon ano ro mayad ag maeain para katon.

11, 12. (a) Ano ro manami nga eaygay ro gintao ni Jesus sa Mateo 5 hasta’t 7? (b) Ano pa ro ginaturo katon it Biblia?

¹¹ Sa Mateo kapitulo 5 hasta’t 7, mabasa naton ro manami nga eaygay ni Jesus kon paano mangin masadya, paano makighusay sa iba, paano mangamuyo, ag paano tamdon ro kwarta. Bisan pa raya nga eaygay gintao 2,000 ka dag-on eon ro nagtaliwan, pero epektibo ag makabulig gihapon makaron.

¹² Sa Biblia, ginaturo man katon ni Jehova ro mga prinsipyo nga makabulig kon paano mangin masadya ro pamilya, mayad nga manog-obra, ag may paghidait sa iba. Ro mga prinsipyo sa Biblia hay pirme gid makabulig katon, bisan sin-o man kita, siin kita nagaestar, o ano man ro atong problema.​—Basaha ro Isaias 48:17; tan-awa ro Endnote 3.

MAKASALIG KA SA TAGNA IT BIBLIA

13. Ano ro ginhambae ni Isaias nga matabo sa syudad it Babilonia?

¹³ Abu eon nga mga tagna sa Biblia ro nagkaeatuman. Halimbawa, gintagna ni Isaias nga maguba ro Babilonia. (Isaias 13:19) Insakto na nga gindetalye kon paano napirdi ro syudad. Ginaprotektahan ra it daeagku nga pwertahan ag suba. Abanse nga ginhambae ni Isaias nga maganabaw ro suba ag maaywanan nga bukas ro pwertahan. Ro mga magasalakay hay makasueod sa syudad nga owa it pag-inaway. Gintagna man ni Isaias ro ngaean it magapirdi sa Babilonia nga si Ciro.​—Basaha ro Isaias 44:27–45:2; tan-awa ro Endnote 4.

14, 15. Paano natuman ro tagna ni Isaias?

¹⁴ Mga 200 ka dag-on pagkatapos ginsueat ro tagna, ro mga soldado nag-abot agud salakayon ro Babilonia. Sin-o ro andang komander? Ginhambae sa tagna nga si Ciro, nga hari it Persia. Tanan hay nakaplastar para sa katumanan it tagna.

¹⁵ Kat gabii nga ginsalakay ro Babilonia, may una sanda nga kapyestahan. Kumpyansa sanda tungod may andang malig-on nga pader ag suba. Sa liwan ku syudad, si Ciro ag ro anang mga soldado hay nagkutkot agud pataeangon ro tubi sa suba. Ro tubi hay nagnabaw ngani ro mga soldado it Persia nakatabok. Pero paalin sanda nakasueod sa Babilonia? Ginhambae sa tagna, nga ro pwertahan haaywanan nga bukas, ngani nakasueod ro mga soldado nga owa it pag-inaway.

16. (a) Ano ro gintagna ni Isaias nga matabo sa Babilonia? (b) Paano naton nasayran nga natuman ro tagna ni Isaias?

¹⁶ Gintagna ni Isaias nga indi pag-estaran it uman ro Babilonia. Nagsueat imaw: “Indi eon imaw pag-estaran sa owa’t katapusan.” (Isaias 13:20) Natabo baea ron? Sa lugar nga nahamtangan it Babilonia, mga 80 kilometros sa bagatnan ku Baghdad, Iraq, makita ro kagueob-an. Bisan makaron, owa gid it nagaestar una. Ginsilhig ni Jehova ro Babilonia “it silhig ku kalaglagan.”​—Isaias 14:22, 23.b

17. Ham-an masaligan naton ro tanan nga promisa it Dyos?

¹⁷ Abu ro mga nagkaeatuman nga mga tagna sa Biblia, ngani makasalig kita sa ginasugid kara parti sa paeaabuton. Masaligan gid naton ro promisa ni Jehova nga pagaobrahon na nga paraiso ro eugta. (Basaha ro Numeros 23:19.) Huo, makaeaum kita sa “kabuhi nga owa it katapusan. Ro Dyos nga owa nagapuril, nagtug-an katon ku rayang kabuhi.”​—Tito 1:2.c

RO BIBLIA MAKAPABAG-O IT IMONG KABUHI

18. Ano ro ginsueat ni Pablo parti sa “bisaea it Dyos”?

¹⁸ Natun-an naton nga owa’t libro nga kapareho it Biblia. Nagahisanto gid ra, kon parti sa syensya o kasaysayan, insakto gid ra pirme. Makatao ra katon it manami nga eaygay ag abu ro tagna nga nagkaeatuman eon. Pero mas kapin pa gid ro maobra it Biblia. Si apostol Pablo nagsueat: “Ro bisaea it Dyos buhi ag gamhanan.” Ano ro buot hambaeon kara?​—Basaha ro Hebreo 4:12.

19, 20. (a) Ham-an mabuligan ka it Biblia nga makilaea ro imong kaugalingon? (b) Paano mo mapakita nga ginapasaeamatan mo gid ro Biblia?

¹⁹ Ro Biblia makapabag-o it imong kabuhi. Makabulig ra kimo nga makilaea pa gid ro imong kaugalingon. Mausisa mo gid it mayad ro intensyon ku imong tagipusoon ag ginapainu-ino. Halimbawa, maisip naton nga palangga naton ro Dyos. Pero, agud mapamatud-an ron, kinahang-ean naton sundon kon ano ro ginaturo it Biblia.

²⁰ Ro Biblia libro nga naghalin gid sa Dyos. Gusto na nga basahon mo gid ra, tun-an, ag apresyahon. Pasaeamati rayang regalo ag tun-i it padayon. Matun-an mo ro katuyoan it Dyos para sa mga tawo. Sa masunod nga kapitulo, matun-an pa gid naton rayang katuyoan.