Sin-o Si Jesu-cristo?

1, 2. (a) Mahambae mo baea nga kilaea mo gid ro sikat nga tawo tungod sayod mo ro anang ngaean? Ipaathag. (b) Ano ro ginapatihan it mga tawo parti kay Jesus?

ABUNG sikat nga tawo sa kalibutan. Basi kilaea mo ro ngaean it pila kanda. Pero bisan sayod mo ro anang ngaean, owa ra nagakahueogan nga kilaea mo gid imaw o hasayran mo ro tanan nga detalye ku anang kabuhi ag kon ano imaw nga klasi it tawo.

² Basi kilaea mo eon si Jesu-Cristo, bisan pa nagkabuhi imaw sa eugta 2,000 ka dag-on eon ro nagtaliwan. Pero kaeabanan nga tawo owa nakakilaea kon sin-o gid si Jesus. Ro iba nagahambae, mayad imaw nga tawo, hambae man it iba propeta, ag ro iba nagapati nga imaw ro Dyos. Ano kon kimo?​—Tan-awa ro Endnote 12.

3. Ham-an importante nga makilaea mo si Jehova ag si Jesu-Cristo?

³ Importante gid nga masayran mo ro kamatuoran parti kay Jesus. Ham-an? Ro Biblia nagahambae: “Ag makaraya ro kabuhi nga owa it katapusan, nga ro mga tawo magkilaea kimo, nga ikaw eamang ro matuod nga Dyos, ag si Jesu-Cristo nga imong ginpadaea.” (Juan 17:3) Huo, kon matun-an mo ro kamatuoran parti kay Jehova ag kay Jesus, makaestar ka sa paraisong eugta. (Juan 14:6) Makabulig man kimo ro pagtuon parti kay Jesus, tungod imaw ro pinakamayad nga halimbawa sa pagkabuhi ag kon paano magtratar sa iba. (Juan 13:34, 35) Sa Kapitulo 1, natun-an naton ro kamatuoran parti sa Dyos. Tun-an naton makaron ro ginaturo it Biblia parti kay Jesus.

NAKITA NAMON RO MESIAS!

4. Ano ro kahueogan it tinaga nga “Mesias” ag “Cristo”?

⁴ Dinag-on bago natawo si Jesus, si Jehova nagpromisa sa Biblia nga ipadaea na ro Mesias o Cristo. Ro tinaga nga “Mesias” naghalin sa Hebreo nga linggwahe, ag ro “Cristo” naghalin mat-a sa Griego. Rayang mga titulo nagakahueogan nga ginpili it Dyos ro Mesias ag taw-an imaw it espesyal nga posisyon. Matuman ro tanan nga promisa it Dyos paagi sa Mesias. Mabuligan ka man ni Jesus makaron. Pero, bago pa imaw natawo, abu ro nangutana, ‘Sin-o ro mangin Mesias?’

5. Nagpati baea ro mga disipulo ni Jesus nga imaw ro Mesias?

⁵ Owa nagduda ro mga disipulo ni Jesus nga imaw ro ginpromisa nga Mesias. (Juan 1:41) Halimbawa, si Simon Pedro nagsabat kay Jesus: “Ikaw ro Cristo.” (Mateo 16:16) Paano kita nakasigurado nga si Jesus rong Mesias?

6. Paano ginabuligan ni Jehova ro mga tawong mapainuboson nga makilaea ro Mesias?

⁶ Bago pa hatawo si Jesus, ro propeta it Dyos nagsueat it abu nga detalye nga makabulig sa mga tawo agud makilaea ro Mesias. Paano ra makabulig kimo? Halimbawa, ginpangabay ka nga sueangon ro sang ka tawo sa paradahan it bus nga bukon mo’t kilaea. Kon taw-an ka it detalye, makilaea mo imaw. Sa pareho man nga paagi, gingamit ni Jehova ro anang mga propeta agud isugid katon kon ano ro obrahon it Mesias ag kon ano ro matabo kana. Ro katumanan it rayang mga tagna makabulig sa mga tawong mapainuboson nga makilaea si Jesus bilang Mesias.

7. Ano ro daywang ka tagna nga nagapamatuod nga si Jesus ro Mesias?

⁷ Hara ro daywang ka tagna. Una, 700 ka dag-on bago natawo si Jesus, si Miqueas nagtagna nga ro Mesias matawo sa maisot nga banwa it Betlehem. (Miqueas 5:2) Ag idto gid si Jesus gin-unga! (Mateo 2:1, 3-9) Pangaywa, gintagna ni Daniel nga makilaea ro Mesias sa dag-on it 29 C.E. (Daniel 9:25) Daywa eang ra sa abu nga mga tagna nga nagapamatuod nga si Jesus ro ginpromisa nga Mesias.​—Tan-awa ro Endnote 13.

8, 9. Ano ro natabo kat ginbautismuhan si Jesus nga nagpamatuod nga imaw ro Mesias?

⁸ Ginklaro ni Jehova nga si Jesus ro Mesias. Ginpromisa it Dyos kay Juan nga Manogbautismo, nga magatao imaw it tanda agud makilaea na ro Mesias. Kat nag-agto si Jesus kay Juan agud magpabautismo sa Suba Jordan ku 29 C.E., hakita na raya nga tanda. Naghambae ro Biblia sa natabo: “Kat mabautisohan eon si Jesus, nagtakas imaw. Dayon nag-abri ro eangit ag nakita nana ro Espiritu it Dyos nga nagkunsad pareho it isaeang ka salampati ag naghapon sa ibabaw nana. Ag may limog halin sa eangit nga naghambae, ‘Raya ro hinigugma ko nga Unga, nga akon gid nahamut-an.’” (Mateo 3:16, 17) Kat hakita ag habatian ni Juan rayang tanda, hasayran na eon nga si Jesus ro Mesias. (Juan 1:32-34) Sa ratong adlaw, ginbubo ni Jehova kay Jesus ro anang espiritu ag nangin Mesias. Ginpili imaw it Dyos nga mangin Lider ag Hari.​—Isaias 55:4.

⁹ Ro mga tagna sa Biblia, mga ginhambae ni Jehova, ag ro tanda nga Anang gintao kat ginbautismuhan si Jesus nagpamatuod nga si Jesus ro Mesias. Pero siin maghalin si Jesus, ag ano imaw nga klasi it tawo? Tan-awon naton ro ginahambae it Biblia.

SIIN NAGHALIN SI JESUS?

10. Ano ro ginaturo it Biblia parti sa kabuhi ni Jesus bago imaw nag-agto sa eugta?

¹⁰ Ginaturo it Biblia nga nag-estar anay si Jesus sa eangit it mabuhay nga panahon bago imaw nag-agto sa eugta. Ginhambae ni Miqueas nga ro Mesias hay “halin pa kato.” (Miqueas 5:2) Abung beses nga ginhambae ni Jesus nga kato anay nag-estar imaw sa eangit bago natawo sa eugta. (Basaha ro Juan 3:13; 6:38, 62; 17:4, 5.) Bago imaw nag-agto sa eugta, may una imaw espesyal nga relasyon kay Jehova.

11. Ham-an hamili gid si Jesus kay Jehova?

¹¹ Si Jesus hamili gid kay Jehova. Ham-an? Tungod gintuga imaw it Dyos bago pa ro tanan nga mga butang. Ngani gintawag si Jesus nga “ro panganay nga Unga nga eabaw sa tanan nga tinuga.”a (Colosas 1:15) Hamili man si Jesus kay Jehova tungod imaw eamang ro direkta nga gintuga nana. Ngani gintawag imaw nga “bugtong nga Unga.” (Juan 3:16) Paagi kay Jesus gintuga ni Jehova ro tanan nga mga butang. (Colosas 1:16) Ag si Jesus eang ro gintawag nga “ro Bisaea,” tungod gingamit imaw ni Jehova nga magdaea it mensahi ag mga instruksyon sa mga anghel ag tawo.​—Juan 1:14.

12. Paano naton nasayran nga si Jesus ag ro Dyos hay buko’t sang ka persona?

¹² Ro ibang tawo nagapati nga si Jesus ag ro Dyos hay sang ka persona. Pero buko’t ruyon ro ginaturo it Biblia. Naghambae ro Biblia nga gintuga si Jesus, ngani may ginhalinan imaw. Pero si Jehova nga nagtuga it tanan nga butang, owa it ginhalinan. (Salmo 90:2) Bilang Unga it Dyos, owa gid nagsueod sa isip ni Jesus nga mangin Dyos. Klaro nga ginaturo it Biblia nga ro Ama hay mas eabaw kaysa anang Unga. (Basaha ro Juan 14:28; 1 Corinto 11:3.) Si Jehova ro “Dyos nga Makagagahum sa tanan.” (Genesis 17:1) Imaw ro pinakamataas ag eabing gamhanan nga persona sa uniberso.​—Tan-awa ro Endnote 14.

13. Ham-an ginhambae it Biblia si Jesus nga “larawan ku indi makita nga Dyos”?

¹³ Si Jehova ag ro anang Unga, si Jesus, nag-imaw it binilyon ka dag-on bago pa matuga ro kaeangitan ag eugta. Palangga gid nanda ro kada isaea! (Juan 3:35; 14:31) Gintuead ni Jesus ro ugali o kinaiya ku anang Ama ngani gintawag imaw it Biblia nga “larawan ku indi makita nga Dyos.”​—Colosas 1:15.

14. Paano ro hamili nga Unga ni Jehova natawo sa eugta?

¹⁴ Ro hamili nga Unga ni Jehova handa nga aywanan ro eangit ag matawo sa eugta. Paano ron nangin posible? Milagruso nga ginbutang ni Jehova ro kabuhi it anang Unga halin sa eangit paagto sa tiyan it daeaga nga si Maria. Ngani, gin-unga ni Maria ro himpit nga unga, ag ginpangaeanan nga Jesus.​—Lucas 1:30-35.

ANO NGA KLASI IT TAWO SI JESUS?

15. Paano mo makilaea it mayad si Jehova?

¹⁵ Abu ka it matun-an parti kay Jesus, sa anang kabuhi ag mga ugali paagi sa pagbasa ku libro it Biblia sa Mateo, Marcos, Lucas, ag Juan. Rayang mga libro ginatawag Mga Ebanghelyo. Tungod si Jesus kapareho it anang Ama, makabulig kimo ro imong nabasahan nga makilaea it mayad si Jehova. Ngani nahambae ni Jesus: “Ro nakakita kakon nakakita sa Ama.”​—Juan 14:9.

16. Ano ro ginturo ni Jesus? Siin naghalin ro anang mga ginturo?

¹⁶ Abu nga tawo ro nagtawag kay Jesus “Manogturo.” (Juan 1:38; 13:13) Isaea sa pinakaimportante nga ginturo ni Jesus hay parti sa “Mayad nga Balita nahanungod sa Ginharian.” Ano rayang Ginharian? Gubyerno ra it Dyos nga magagahum sa bilog nga eugta halin sa eangit ag magatao it pagpakamaayo sa mga tawo nga nagatuman sa Dyos. (Mateo 4:23) Tanan nga ginturo ni Jesus naghalin kay Jehova. Naghambae imaw: “Ro akong ginaturo owa naghalin kakon, kundi naghalin sa Dyos nga nagpadaea kakon.” (Juan 7:16) Sayod ni Jesus nga gusto ni Jehova nga makabati ro mga tawo ku mayad nga balita, nga magagahum ro Ginharian it Dyos sa bilog nga eugta.

17. Siin nagturo si Jesus? Ham-an mahugod imaw magturo sa mga tawo?

¹⁷ Siin nagturo si Jesus? Bisan siin nga may tawo. Nagturo imaw sa mga uma, syudad, baryo, tindahan, lugar it pagsimba, ag sa pamaeay. Owa imaw gahueat nga agtonan it mga tawo, kundi imaw ro gapaeapit kanda. (Marcos 6:56; Lucas 19:5, 6) Mahugod gid si Jesus, nagtao imaw it oras ag kusog sa pagturo sa mga tawo. Ham-an? Tungod nasayran na nga gusto it Dyos nga obrahon na rato ag pirme na ginasunod ro anang Ama. (Juan 8:28, 29) Nagwali man si Jesus tungod naeuoy imaw sa mga tawo. (Basaha ro Mateo 9:35, 36.) Hakita na nga owa nagaturo it kamatuoran ro mga lider it relihiyon parti sa Dyos ag sa anang Ginharian. Ngani gusto na gid buligan ro mga tawo nga makabati it mayad nga balita hasta sa makaya na.

18. Ano ro mga ugali ni Jesus nga nailaan mo gid?

¹⁸ Si Jesus mapinalanggaon ag nagakabaeaka sa mga tawo. Mabuot imaw ag madali paeapitan. Bisan ro mga unga naila kana mag-iba. (Marcos 10:13-16) Owa’t pinaeabi si Jesus. Naugot imaw sa korapsyon ag inhustisya. (Mateo 21:12, 13) Nagkabuhi imaw sa panahon nga sangkiri ro kinamatarong it mga bayi ag owa sanda ginataha. Pero ginatahod pirme ni Jesus ag ginataw-an it dignidad ro mga bayi. (Juan 4:9, 27) Mapainuboson man si Jesus. Halimbawa, isaea ka gabii ginhugasan na ro siki it anang mga apostoles, nga ginaobra eang it isaeang ka sueoguon.​—Juan 13:2-5, 12-17.

19. Ano ro halimbawa nga nagapakita nga sayod ni Jesus ro kinahang-eanon it mga tawo ag gusto na buligan sanda?

¹⁹ Sayod ni Jesus ro kinahang-eanon it mga tawo, ag gusto na sanda buligan. Matuod gid ra kat gingamit na ro gahum it Dyos sa milagro nga pagpamayad sa mga tawo. (Mateo 14:14) Halimbawa, ro eaki nga may aro nag-adto ag naghambae kay Jesus: “Kon gustohon mo, sarang mo ako mapamayad.” Naeuoy gid si Jesus sa kasakit ag pag-antus it rayang tawo, gusto na gid nga buligan imaw. Ngani gin-unat na ra alima, ginbuytan ro eaki, ag naghambae imaw: “Gusto ko! Magmayad ka!” Insigida naduea ro anang masakit. (Marcos 1:40-42) Maisip mo baea ro nabatyagan it rayang tawo?

MATUTOM IMAW PIRME SA ANANG AMA

20, 21. Paano nangin pinakamayad nga halimbawa si Jesus sa pagtuman sa Dyos?

²⁰ Si Jesus ro pinakamayad nga halimbawa sa pagtuman sa Dyos. Bisan ano ro matabo o ano pa ro obrahon it anang mga kaaway, matutom gihapon imaw sa anang Ama. Halimbawa, owa gid si Jesus nagpadaog sa mga tentasyon ni Satanas. (Mateo 4:1-11) Ro ibang pamilya ni Jesus owa gapati nga imaw ro Mesias ag hambae nanda nga “nagkaumangon imaw,” pero padayon man gihapon si Jesus sa pag-obra ku kabubot-on it Dyos. (Marcos 3:21) Kat ginpintasan imaw it anang mga kaaway, si Jesus nagpadayon nga matutom sa Dyos ag owa gid nagbaeos kanda.​—1 Pedro 2:21-23.

²¹ Bisan pa naagyan ni Jesus ro kapintas ag masakit nga kamatayon, padayon gihapon imaw nga matutom kay Jehova. (Basaha ro Filipos 2:8.) Isipa kon paano imaw nagbatas sa adlaw it anang kamatayon. Gin-aresto imaw, ginpabangdan it buko’t matuod nga mga saksi nga ginakontra na ro Dyos, gin-akusahan it maeain nga mga hukom, ginpahuy-an it mga tawo, ag ginbakoe it mga soldado sa usok it pag-antus. Kat himamatyon eon, nagsinggit imaw: “Tapos eon!” (Juan 19:30) Tatlong adlaw pagkatapos si Jesus namatay, ginbanhaw imaw ni Jehova ag gintaw-an it espiritu nga kabuhi. (1 Pedro 3:18) Pagtaliwan it pilang domingo, nagbalik si Jesus sa eangit, “naglingkod imaw sa tuo it Dyos,” ag naghueat nga obrahon imaw nga Hari.​—Hebreo 10:12, 13.

22. Ano ro tsansa naton makaron tungod nangin matutom si Jesus sa anang Ama?

²² Tungod nangin matinumanon si Jesus sa anang Ama, may tsansa eon kita makaron nga mabuhi it owa’t katapusan sa paraiso nga eugta, nga ruyon gid ro katuyoan ni Jehova. Sa masunod nga kapitulo, matun-an naton kon paano ro kamatayon ni Jesus nagpaposible katon nga mabuhi sa owa’t katapusan.