Pwede Magsadya Ro Inyong Pamilya

1, 2. Ano ro gusto ni Jehova para sa mga pamilya?

SI JEHOVA nga Dyos ro unang nagtukod it pag-asawa. Ro Biblia nagasugid katon nga imaw ro nag-obra sa una nga bayi ag “gindaea nana ra sa eaki.” Masadya gid si Adan ag hambae na: “Raya ro tue-an it akong mga tue-an ag unod it akong unod.” (Genesis 2:22, 23) Nagasugid ra katon nga gusto ni Jehova nga mangin masadya ro mag-asawa.

² Makapasubo, abu nga tawo ro owa nakaagi it kasadya sa andang pamilya. Pero abu ro prinsipyo sa Biblia nga makabulig sa mga myembro it pamilya agud magmadinaeag-on ag mangin masadya sanda.​—Lucas 11:28.

ANO RO GUSTO IT DYOS NGA OBRAHON IT MGA ASAWANG EAKI?

3, 4. (a) Paano dapat trataron it asawang eaki ro anang asawa? (b) Ham-an importante nga patawaron it mag-asawa ro kada isaea?

³ Naghambae ro Biblia nga ro mayad nga asawang eaki, dapat may pagpalangga ag pagrespeto sa anang asawa. Pangabay basaha ro Efeso 5:25-29. Dapat trataron it asawang eaki ro anang asawa nga may pagpalangga. Pirme na ra nga ginaproteksyonan, ginadipara, ag owa nagaobra it ikaeain ku anang asawa.

⁴ Pero ano ro obrahon it asawang eaki kon magkasaea ro anang asawa? Ginhambaean ro mga asawang eaki: Padayon nga “higugmaa ninyo ro inyong mga asawa ag indi ninyo sanda pagpintasan.” (Colosas 3:19) Mga asawang eaki, tandai nga nagakasaea man kamo. Kon gusto mo nga patawaron ka it Dyos, dapat patawaron mo ing asawa. (Mateo 6:12, 14, 15) Kon ro mag-asawa kinabubot-on nga magpatawad, mangin masadya ro andang pag-iba bilang mag-asawa.

5. Ham-an dapat tahuron it asawang eaki ro anang asawa?

⁵ Gusto ni Jehova nga tahuron it asawang eaki ro anang asawa. Dapat isipon pirme it asawang eaki ro kinahang-eanon ku anang asawa. Seryoso gid ra. Kon indi pagtrataron it mayad ku asawang eaki ro anang asawa, indi pagpamatian ni Jehova ro anang pangamuyo. (1 Pedro 3:7) Importante ro mga tawo kay Jehova tungod palangga nanda imaw. Owa imaw it pinilian eaki man o bayi.

6. Ano ro buot hambaeon nga “sambato” eon lang ro mag-asawa?

⁶ Naghambae si Jesus nga ro mag-asawa hay “bukon eon sanda it daywa, kundi sambato.” (Mateo 19:6) Tampad gid sanda ag owa nagaeuib sa kada isaea. (Hulubaton 5:15-21; Hebreo 13:4) Dapat man itao it mag-asawa ro sekswal nga kinahang-eanon it kada isaea. (1 Corinto 7:3-5) Dapat tandaan it asawang eaki nga “owa it tawo nga nagadumot sa anang kaugalingon nga eawas, kundi ana raya ginapakaon ag ginatatap.” Ngani dapat na palanggaon ro anang asawa. Eabi sa tanan, gusto it asawang bayi nga ro anang asawa mangin mabuot ag may pagpalangga kana.​—Efeso 5:29.

ANO RO GUSTO IT DYOS NGA OBRAHON IT MGA ASAWANG BAYI?

7. Ham-an nagakinahang-ean it ueo ro pamilya?

⁷ Ro kada pamilya nagakinahang-ean it ueo, nga magagiya agud mangin tingob sanda. Ro Biblia nagahambae sa 1 Corinto 11:3: “Si Cristo ro ueo it kada eaeaki, ro eaeaki ruyon ro ueo it anang asawa, ag ro Dyos imaw ro ueo ni Cristo.”

8. Paano mapakita it asawang bayi ro pagtahod sa anang asawa?

⁸ Ro mga asawang eaki nagakasaea man. Pero kon suportahan it asawang bayi ro desisyon it anang asawa ag kinabubot-on nga magtuman, ro bilog nga pamilya makabenepisyo. (1 Pedro 3:1-6) Ro Biblia naghambae: “Ro kada babayi dapat magtahod sa anang asawa.” (Efeso 5:33) Paano kon eain ro pagpati it imong asawang eaki? Dapat ka gihapon magtahod. Ro Biblia naghambae: “Kamo nga mga babayi dapat magpasakop sa inyong mga asawa, agud nga kon ro iba kanda owa nagatuo sa bisaea it Dyos, madaea ninyo sanda sa pagtuo paagi sa inyong pagginawi. Indi eon kinahang-ean nga maghambae pa kamo, ay makita nanda kon mauno ka putli ag kataeahuron ro inyong pagginawi.” Ro mayad nga paggawi it asawang bayi makabulig sa anang asawa nga maeubtan ag tahuron ro anang pagpati.

9. (a) Ano ro obrahon it asawang bayi kon owa sanda gakasugot it anang asawa? (b) Ano ro eaygay para sa asawang bayi sa Tito 2:4, 5?

⁹ Ano ro obrahon it asawang bayi kon owa sanda gakasugot it anang asawa? Dapat na hambaeon ro anang opinyon nga may pagtahod. Halimbawa, may ginhambae si Sara nga owa nailaan ni Abraham, pero naghambae kana si Jehova: “Pamatii imaw.” (Genesis 21:9-12) Taeagsa eang matabo nga ro Cristyanong asawang eaki magdesisyon kontra sa Biblia, ngani dapat magsuporta ro bayi. (Binuhatan 5:29; Efeso 5:24) Ro mayad nga asawang bayi gadipara sa anang pamilya. (Basaha ro Tito 2:4, 5.) Kon makita it anang asawa ag mga unga ro anang ginaobra para kanda, mas palanggaon ag tahuron imaw.​—Hulubaton 31:10, 28.

10. Ano ro ginahambae it Biblia parti sa pagbueag ag pagdibursiyo?

¹⁰ Kon amat ro mag-asawa madali magdesisyon nga magbueag o magdibursiyo. Pero ro Biblia naghambae: “Indi magbueag ro babayi sa anang asawa” ag “indi man pagbueagan ku eaeaki ro anang asawa.” (1 Corinto 7:10, 11) May mga grabi nga sitwasyon nga gabueag ro mag-asawa, pero seryoso gid ra nga desisyon. Pero ano ro pagdibursiyo? Ro Biblia nagaturo nga ro rason eamang sa pagdibursiyo it mag-asawa hay kon nakaobra sanda it sekswal nga imoralidad sa iba.​—Mateo 19:9.

ANO RO GUSTO IT DYOS NGA OBRAHON IT MGA GINIKANAN?

11. Ano gid ro kinahang-ean it mga unga?

¹¹ Mga ginikanan, magtao it abu nga oras sa inyong mga unga. Kinahang-ean nanda kamo, ag eabi sa tanan dapat tur-an sanda parti kay Jehova.​—Deuteronomio 6:4-9.

12. Ano ro dapat obrahon it mga ginikanan agud protektahan ro andang mga unga?

¹² Ro kalibutan ni Satanas nagaeain pa gid, ag may mga tawong gustong maghalit o mag-abuso sa sekswal sa atong mga unga. Ro ibang ginikanan nalisdan mag-istorya parti kara. Pero dapat nanda paandaman ro andang mga unga parti sa rayang mga tawo ag tur-an sanda nga magpaeayo. Mga ginikanan, protektahi ro inyong mga unga.a​—1 Pedro 5:8.

13. Paano matur-an it mga ginikanan ro andang mga unga?

¹³ Responsibilidad it mga ginikanan nga tur-an ro mga unga it insakto nga pamatasan. Paano mo matur-an ing unga? Kinahang-ean nanda ro imong pagturo, pero indi ka dapat mangin mapintas ag masingkae. (Jeremias 30:11) Ngani indi ka magdisiplina kon akig. Owa ka naila nga ro imong paghambae pareho ku “buno it espada” ag makasakit kanda. (Hulubaton 12:18) Tur-i ing mga unga kon ham-an dapat sanda magtuman.​—Efeso 6:4; Hebreo 12:9-11; tan-awa ro Endnote 30.

ANO RO GUSTO IT DYOS NGA OBRAHON IT MGA UNGA?

14, 15. Ham-an dapat magtuman ro mga unga sa andang ginikanan?

¹⁴ Ginatuman gid pirme ni Jesus ro anang Ama, maskin malisud. (Lucas 22:42; Juan 8:28, 29) Gusto man ni Jehova nga tumanon it mga unga ro andang ginikanan.​—Efeso 6:1-3.

¹⁵ Mga unga, maskin malisud tumanon ro imong ginikanan, tandai nga kon magtuman kamo, masadyahan gid si Jehova ag ro imong ginikanan.b​—Hulubaton 1:8; 6:20; 23:22-25.

16. (a) Paano ginatentar ni Satanas ro mga unga nga mag-obra it maeain? (b) Ham-an importante magpili it mga amigo nga palangga si Jehova?

¹⁶ Pwede gamiton it Yawa ro imong mga amigo o mga kaedad agud paobrahon ka it maeain. Sayod na nga malisud gid ra kontrahon. Halimbawa, ro unga ni Jacob nga si Dina may mga amiga nga owa gapalangga kay Jehova. Nagtao ra it halit kana ag sa anang pamilya. (Genesis 34:1, 2) Kon ro imong mga amigo owa nagapalangga kay Jehova, pwede ka nanda paobrahon it owa nailaan ni Jehova nga makatao it kasakit kimo, sa imong pamilya ag sa Dyos. (Hulubaton 17:21, 25) Ngani importante gid nga magpili it mga amigo nga nagapalangga kay Jehova.​—1 Corinto 15:33.

PWEDE MAGSADYA RO INYONG PAMILYA

17. Ano ro responsibilidad it kada myembro it pamilya?

¹⁷ Kon ro myembro it pamilya magtuman sa mga sugo it Dyos, malikawan nanda ro mga problema. Ngani kon ikaw asawang eaki, palanggaa ing asawa ag tratara it mayad. Kon ikaw man asawang bayi, magtahod ag magpasakop sa ing asawa ag tueara ro halimbawa it asawang bayi nga ginhambae sa Hulubaton 31:10-31. Kon ikaw ginikanan, tur-i ing mga unga nga palanggaon ro Dyos. (Hulubaton 22:6) Kon ikaw tatay, dumaeahi ing pamilya “it mayad.” (1 Timoteo 3:4, 5; 5:8) Ag mga unga, tumana ro inyong mga ginikanan. (Colosas 3:20) Tandai nga ro kada myembro it pamilya nagakasaea man, ngani magpaubos ag mangayo it patawad sa kada isaea. Huo, ro Biblia may mga giya ni Jehova para sa myembro it pamilya.