LEKSYON 19
Matuod nga mga Cristyano Baea ro mga Saksi ni Jehova?
Bilang mga Saksi ni Jehova, nagapati kami nga matuod kami nga mga Cristyano. Ham-an? Sayura kon siin nabase ro among pagpati, ro among ngaean, ag kon paano namon ginapakita ro pagpalangga sa kada isaea.
1. Siin nabase ro mga pagpati it mga Saksi ni Jehova?
Ginhambae ni Jesus nga ro “bisaea [it Dyos] kamatuoran.” (Juan 17:17) Pareho ni Jesus, pirmeng ginabase it mga Saksi ni Jehova ro andang pagpati sa Bisaea it Dyos. Tan-awa ro among kasaysayan. Ku mga 1870, gintun-an it mayad ku sangka grupo it mga estudyante sa Biblia ro Bisaea it Dyos. Ginbase nanda iya ro andang pagpati maskin iba ra sa ginaturo it ibang relihiyon. Rayon, ginsugid nanda sa iba ro kamatuoran nga una sa Biblia.a
2. Ham-an ginatawag kami nga mga Saksi ni Jehova?
Ginatawag ni Jehova ro mga nagasimba kana nga anang mga saksi tungod ginasugid nanda ro kamatuoran parti kana. (Hebreo 11:4–12:1) Halimbawa, gintawag kato it Dyos ro anang katawhan: “Kamo ro akong mga saksi.” (Basaha ro Isaias 43:10.) Gintawag si Jesus nga “ro matutom nga saksi.” (Pahayag 1:5) Ngani, umpisa ku 1931, gintawag kami nga mga Saksi ni Jehova. Ginapabugae gid namon rayang ngaean.
3. Paano ginatuead it mga Saksi ni Jehova ro pagpalangga ni Jesus?
Palangga gid ni Jesus ro anang mga disipulo ag matsa pamilya eon nana sanda. (Basaha ro Marcos 3:35.) Pareho man sa mga Saksi ni Jehova, nahiusa sanda sa bilog nga kalibutan bilang pamilya. Ngani ro among pagtawag sa kada isaea hay brother ag sister. (Filemon 1, 2) Ginasunod man namon ro sugo nga: ‘Higugmaon ro mga isigka-tumoeuo.’ (1 Pedro 2:17) Ginapakita namon ra sa abu nga paagi, pareho sa pagbulig namon sa among mga igmanghod sa bilog nga kalibutan kon may kalisdanan.
TUN-I PA GID
Sayura ro kasaysayan it mga Saksi ni Jehova, ag tan-awa ro ebidensya nga kami hay matuod nga mga Cristyano.
Nabase sa Biblia ro mga pagpati it matuod nga mga Cristyano ag ginasugid nanda ra sa iba
4. Nabase sa Biblia ro among mga ginapatihan
Ginhula ni Jehova nga mas maintindihan pa gid naton ro kamatuoran sa Biblia. Basaha ro Daniel 12:4 ag footnote, ag talakaya rayon rayang pangutana:
Ano ro “magabugana” sa katawhan it Dyos habang padayon nanda nga ginatun-an ro Biblia?
Tan-awa kon paano gintun-an ni Charles Russell, kaibahan it sangka grupo ku estudyante it Biblia ro Bisaea it Dyos. Tan-awa ro VIDEO, ag talakaya rayon rayang pangutana.
Sa video, paano gintun-an ni Charles Russell ag ku anang mga kaibahan ro Biblia?
Sayod mo baea?
Kon amat, gina-adjust man namon ro among pagpati. Ham-an? Habang nagabutlak ro adlaw, amat-amat nga nagahayag ro palibot. Pareho karon, amat-amat man nga ginapaintindi ni Jehova ro kamatuoran sa Biblia. (Basaha ro Hulubaton 4:18.) Maskin owa nagabag-o ro Biblia, gina-adjust namon ro among pagpati habang nagaklaro pa gid ro among pag-intindi sa Biblia.
5. Nagakabuhi kami base sa among ngaean
Ham-an ginatawag kami nga mga Saksi ni Jehova? Tan-awa ro VIDEO, ag talakaya rayon rayang pangutana.
Ham-an bagay kami tawgon nga mga Saksi ni Jehova?
Ham-an mga tawo ro ginpili ni Jehova nga mangin saksi nana? Tungod sanda ro magahambae it mga kamatuoran parti sa matuod nga Dyos nga si Jehova. Abu abing kapurilan ro ginahambae parti kana. Tan-awa ro daywa kara.
Ginaturo it ibang mga relihiyon nga gusto it Dyos nga maggamit kita it mga imahen sa pagsimba kana. Pero basaha ro Levitico 26:1, ag talakaya rayon rayang mga pangutana:
Ano ro ginaturo it teksto parti karon? Ano ro ginabatyag ni Jehova kon nagagamit kita it mga imahen?
Ginaturo it ibang lider it relihiyon nga si Jesus hay Dyos. Pero basaha ro Juan 20:17, ag talakaya rayon rayang mga pangutana:
Ano ro ginaturo it teksto parti karon? Ro Dyos baea ag si Jesus hay sangka persona eang?
Ano ing nabatyagan makaron kat nasayran mo nga nagpadaea si Jehova it anang mga Saksi para ituro ro kamatuoran parti kana ag sa anang Unga?
6. Palangga namon ro kada isaea
Ginkompara it Biblia ro mga Cristyano sa iba-ibang parte it eawas. Basaha ro 1 Corinto 12:25, 26, ag talakaya rayon rayang mga pangutana:
Ano ro obrahon it matuod nga mga Cristyano kon nagaantus ro pareho nanda nga Cristyano?
Ano ing naobserbahan sa pagpalangga nga ginapakita it mga Saksi ni Jehova?
Kon may mga Saksi ni Jehova nga nagakinahang-ean it bulig sa ibang lugar, nagabulig rayon ro kapareho nanda nga Saksi sa bilog nga kalibutan. Agud makita ro sangka halimbawa, tan-awa ro VIDEO. Talakaya rayon rayang pangutana.
Sa video, paano ginpakita it mga Saksi ni Jehova nga palangga nanda ro kada isaea?
Ginapakita it matuod nga mga Cristyano ro pagpalangga sa mga nagakinahang-ean
KON MAY MAGHAMBAE: “Bag-o paeang nga relihiyon ro mga Saksi ni Jehova.”
Kan-o pa gintawag ni Jehova nga mga saksi ro nagasimba kana?
SUMARYO
Matuod nga mga Cristyano ro mga Saksi ni Jehova. Sangka pamilya kami nga nagasimba kay Jehova halin sa bilog nga kalibutan. Ginabase namon ro among pagpati sa Biblia ag ginasugid ro mga kamatuoran parti kay Jehova.
Review
Ham-an ginatawag kami nga mga Saksi ni Jehova?
Paano namon ginapakita nga palangga namon ro kada isaea?
Kon kimo, matuod nga mga Cristyano baea ro mga Saksi ni Jehova?
SAYURA
Sayura pa gid ro among kasaysayan.
Mga Saksi ni Jehova—Buhi nga Pagtuo, Bahin 1: Nahilway sa Kadulom (1:00:53)
Tan-awa ro sangka halimbawa kon paano ginpahayag it mga Saksi ni Jehova ro saea nga mga pagturo.
Sayura ro mga sabat sa ing mga pangutana parti sa mga Saksi ni Jehova.
“Mga Pirme Ginapamangkot Parte sa mga Saksi ni Jehova” (Pahina sa website)
Naakig gid si Stephen sa ibang lahi, ngani ginasakit na sanda. Sayura kon ano ro anang hakita sa mga Saksi ni Jehova nga nagpabag-o kana.
“Nag-eain Pa Gid ro Akong Kabuhi” (The Watchtower, July 1, 2015)
a Halin pa ku 1879, ginaimprenta eon it mga Saksi ni Jehova ro magasin nga, Ang Lalantawan agud isugid ro kamatuoran sa Biblia.