Ano ro Atong Obrahon Kon Makaatubang Kita it Inhustisya?

1-2. Ano ro ginaobra it kaeabanan nga tawo kon makaatubang sanda it inhustisya, ag ano ro posibleng ipangutana naton?

ABUNG tawo makaron ro nagaatubang it inhustisya dahil sa andang estado sa kabuhi, lahi, ginbahuean, itsura, ag iba pa. Nagaantus sanda dahil ro ginaisip eang it manggaranon nga mga negosyante o it mga opisyal it gubyerno hay kon paalin makakwarta. Raya ag ro iba pa nga inhustisya hay makaapekto katon tanan, direkta man o bukon.

² Owa kita nangawa nga abung tawo ro naakig sa nagakatabo nga mga inhustisya makaron. Gusto naton tanan nga trataron kita it patas ag mangin malinong ro atong kabuhi. Ro iba hay gustong solbaron ro mga problema nga nakikita nanda sa andang lugar. Nagaprotesta sanda kontra sa gubyerno ag owa nagasunod sa mga layi. Nagasuporta man sanda sa mga lider sa politika nga nagpromisa kanda nga solbaron ro andang mga problema. Pero bilang mga Cristyano, gintur-an kita nga mangin “bukon it ana kung kalibutan” ag maghueat nga dueaon ku Ginharian it Dyos ro tanan nga inhustisya. (Juan 17:16) Pero posible gihapon nga madismaya kita o maakig kon makita naton nga buko’t patas ro pagtratar sa iba. Posibleng ipangutana naton: ‘Ano ang pwedeng obrahon kon makaatubang ako o ro iba it inhustisya? May maobra baea ako sa nagakatabo nga inhustisya makaron?’ Para masabat rayang mga pangutana, talakayon naton kon ano ro ginabatyag ni Jehova ag ni Jesus sa inhustisya.

NAAKIG SI JEHOVA AG SI JESUS SA INHUSTISYA

3. Ham-an owa kita naila nga buko’t patas ro pagtratar katon o sa iba? (Isaias 5:7)

³ Ginahambae it Biblia kon ham-an owa kita naila nga buko’t patas ro pagtratar katon o sa iba. Ginasugid kara nga gintuga kita ni Jehova base sa anang larawan ag “palangga na ro pagkamatarung ag hustisya.” (Sal. 33:5; Gen. 1:26) Patas gid imaw pirme sa pagtratar sa iba, ag gusto na nga ruyon man ro atong obrahon! (Deut. 32:3, 4; Miq. 6:8; Zac. 7:9) Halimbawa, ku panahon ni propeta Isaias, nabatian ni Jehova ro “pagtangis it kalisud” ku mga Israelinhon dahil sa buko’t mayad nga pagtratar kanda it ibang mga Israelinhon. (Basaha ro Isaias 5:7.) Ginpinahan ni Jehova ratong mga owa nagasunod sa anang Kasugoan ag nagatratar it buko’t patas sa iba.​—Isa. 5:5, 13.

4. Ano ro nabatyagan ni Jesus kon ginatratar it buko’t mayad ro sangka tawo? (Tan-awa man ro piktyur.)

⁴ Pareho kay Jehova, palangga ni Jesus ro hustisya ag naakig imaw sa inhustisya. Sa ministeryo ni Jesus iya sa eugta, nakita na ro sangka eaki nga paralisado ro anang sambilog nga alima. Naeuoy gid kana si Jesus, ngani ginpamayad na ro alima it eaki. Pero naakig ro relihiyusong mga lider sa gin-obra ni Jesus. Ginhambae nanda nga owa ginatuman ni Jesus ro kasugoan parti sa Adlaw nga Inogpahuway, ag owa sanda nahakat nga nagmayad eon ratong eaki. Ano ro ginbatyag kara ni Jesus? “Nagkasubo gid imaw tungod ku katig-a it andang tagipusoon.”​—Mar. 3:1-6.

5. Ham-an indi dapat kita padayon nga maakig sa mga inhustisya nga nagakatabo?

⁵ Nasayran naton nga naakig si Jehova ag si Jesus sa inhustisya, ngani bukon man it saea nga makabatyag kara. (Efe. 4:26) Pero dapat natong kontrolon ro atong kaakig ag tandaan nga indi gid naton kayang dueaon ro inhustisya. Indi dapat kita padayon nga maakig dahil may maeain ra nga epekto sa atong emosyonal ag sa pisikal. (Sal. 37:1, 8; Sant. 1:20) Ngani ano dapat ro atong obrahon kon makaatubang kita o ro iba it inhustisya? May matun-an kita sa halimbawa ni Jesus.

KON ANO RO GIN-OBRA NI JESUS SA INHUSTISYA

6. Ano ro mga inhustisya nga nakita ni Jesus kat iya imaw sa eugta? (Tan-awa man ro piktyur.)

⁶ Kat iya si Jesus sa eugta, nakita na nga abung tawo ro nakaatubang it inhustisya. Nakita na mismo kon paalin ginpalisdan it relihiyusong mga lider ro mga tawo. (Mat. 23:2-4) Sayod na man kon mauno kaeain ro pagtratar it mga opisyal ku gubyerno it Roma sa mga tawo. Gusto gid it mga Judio nga makalaya sa paggahum it Roma. Ngani nag-obra ro pila kanda it mga grupo para makig-away sa mga Romano. Pero, owa gid nag-intra kara si Jesus o nagsuporta sa rayang mga grupo nga gustong bayluhan ro pagginubyerno. Kat nasayran na nga gusto it mga tawo nga obrahon imaw nga hari, nagpaeayo imaw kanda.​—Juan 6:15.

7-8. Ham-an owa gintinguhaan ni Jesus nga dueaon ro inhustisya kat iya imaw sa eugta? (Juan 18:36)

⁷ Kat iya si Jesus sa eugta, owa imaw nag-intra sa politika para tinguhaan nga dueaon ro inhustisya. Ham-an? Dahil sayod na nga ro mga tawo hay owa it karapatan o ikasarang nga gamhan ro andang sarili. (Sal. 146:3; Jer. 10:23) Indi man nanda kayang dueaon ro ginahalinan it inhustisya. Ginagamhan ni Satanas nga Yawa rayang kalibutan. Mapintas imaw, ag abung tawo ro nagatuead kana. (Juan 8:44; Efe. 2:2) Ag dahil sa pagkabuko’t perpekto, nakakaobra man kon amat maskin ro mabuot nga mga tawo it buko’t patas.​—Man. 7:20.

⁸ Sayod ni Jesus nga ro Ginharian it Dyos eang ro makaduea sa ginahalinan it tanan nga inhustisya. Dahil karon, gintao na ro anang oras ag kusog sa “pagwali ku Mayad nga Balita nahanungod sa Ginharian it Dyos.” (Luc. 8:1) Sa rayang paagi, ginpasalig na “ro mga nagahandum it katarungan” nga maeapit lang matapos ro korapsyon ag inhustisya. (Mat. 5:6; Luc. 18:7, 8) Pero matabo ra, buko’t paagi sa gubyerno it tawo kundi paagi eang sa Ginharian it Dyos, nga “bukon it sa rayang kalibutan.”​—Basaha ro Juan 18:36.

TUEARA SI JESUS KON NAGAATUBANG IT INHUSTISYA

9. Ham-an nagapati ka nga ro Ginharian it Dyos eang ro makaduea sa tanan nga inhustisya?

⁹ Makaron, mas abu nga inhustisya ro atong nakikita kaysa sa nakita ni Jesus kat iya imaw sa eugta. Pero si Satanas man gihapon ag ro maeain nga mga tawo ro padayon nga ginahalinan it inhustisya sa rayang “katapusan nga mga inadlaw.” (2 Tim. 3:1-5, 13, NWT; Pah. 12:12) Pareho kay Jesus, sayod naton nga ro Ginharian it Dyos eang ro makaduea ku ginahalinan it inhustisya. Ginasuportahan gid naton rayang Ginharian, ngani owa kita nagaintra sa mga protesta o nagasalig sa gubyerno it tawo nga kaya nandang dueaon ro inhustisya. Tan-awa ro eksperyinsya it sister nga si Stacy.a Bago na matun-an ro kamatuoran, pirme imaw nga nagaintra sa protesta kontra sa inhustisya. Pero ku ulihi, napaisip imaw kon makabulig gid man sa mga tawo ro anang ginaobra o makasolbar ra it problema. Naghambae si Stacy: “Kat una ako sa mga protesta, naisip ko kon tama gid man baea ang ginaapinan. Makaron nga ginasuportahan ko ro Ginharian it Dyos, sigurado gid ako nga tama ang ginaapinan. Sayod ko nga pagadueaon ni Jehova ro tanan nga pag-antus, ro sangka bagay nga indi ko gid maobra.”​—Sal. 72:1, 4.

10. Base sa Mateo 5:43-48, ham-an owa naton ginatinguhaan nga bayluhan ro mga layi ag pagginubyerno? (Tan-awa man ro piktyur.)

¹⁰ Abung tawo makaron ro nagaintra sa mga grupo nga nagatinguha nga bayluhan ro pagginubyerno. Pero abu kanda ro nangin maakigon, owa nagatuman sa mga layi, ag nagapanghalit sa iba. (Efe. 4:31) Ro brother nga si Jeffrey hay naghambae: “Naobserbahan ko nga kon magprotesta ro mga tawo, pwedeng gulpi eang sandang maakig, magpanamad ag magpanakaw rayon it mga gamit, ag mag-ilinaway.” Pero, ginatur-an kita ni Jesus nga palanggaon ro tanan nga tawo maskin ro mga nagakontra o nagahingabot katon. (Basaha ro Mateo 5:43-48.) Ag ginatinguhaan gid naton nga tuearon imaw.

11. Ham-an malisud kon amat nga tuearon si Jesus?

¹¹ Maskin pa sayod naton nga ro Ginharian it Dyos eang ro permanente nga makaduea it inhustisya, posible nga malisdan kita nga tuearon si Jesus kon buko’t patas ro pagtratar katon. Tan-awa ro natabo kay Janiya, nga nakaeksperyinsya it diskriminasyon. Ginhambae na: “Nasakitan gid ako sa ginahambae it mga tawo kakon, naakig man ako, ag gusto ko nga manabat sanda sa andang gin-obra kang. Naisip ko rayon nga mag-intra sa protesta it sangka grupo nga nagasuporta sa ibang lahi ag nakaagi it diskriminasyon. Naisip ko nga raya ro paagi para maduea ro ang kaakig.” Pero ku ulihi, narealisar ni Janiya nga kinahang-ean nang bag-uhon ro anang kaisipan. Naghambae imaw, “Imbes nga magsalig kay Jehova, nagpati ako sa mga ginhambae it mga tawo ag nagsalig kanda. Nagdesisyon ako nga punduhon ang pagpakig-iba sa rayang grupo.” Indi dapat naton pagpasugtan ro atong kaakig nga mangin rason para ikompromiso naton ro atong neutralidad sa politika ag sa mga isyu it kalibutan.​—Juan 15:19.

12. Ham-an dapat kitang maghaeong sa atong ginabasa, ginapamantaw, ag ginapamatian?

¹² Ano ro makabulig katon nga makontrol ro atong kaakig kon makaatubang kita o ro iba it inhustisya? Ro sangka bagay nga maobra naton hay ro paghaeong sa atong ginabasa, ginapamantaw, ag ginapamatian. Ro pila nga mga post sa social media hay nagapakita it inhustisya ag nagapang-engganyo sa mga tawo nga magprotesta sa gubyerno. Ro kaeabanan nga reporter it balita hay posibleng nagasugid eang it andang opinyon, ag owa nanda ginasugid ro insakto nga natabo. Maskin pa matuod ro sangka balita, makabulig baea katon ro padayon nga pagpukos kara? Ro matuod, kon abu nga oras ro atong ginatao sa rayang mga balita, posible nga mas mabaeaka kita, masubuan, ag maakig. (Hulu. 24:10) Ag ro mas malala pa, posibleng malipatan naton nga ro Ginharian it Dyos eang ro makaduea sa tanan nga inhustisya.

13. Paalin makabulig katon ro pagbasa it Biblia adlaw-adlaw kon makakita kita it inhustisya?

¹³ Ro pagbasa it adlaw-adlaw ag ro pagpamaeandong hay makabulig katon kon makakita kita it inhustisya. Nasubuan gid ro sister nga si Alia kat nakita na nga ro pila nga mga tawo sa andang lugar hay gintratar it buko’t mayad. Naakig imaw dahil ro mga nagaobra it maeain hay owa ginpinahan. Naghambae imaw: “Narealisar ko nga kon nagapati ako nga kayang solusyunan ni Jehova rayang mga problema, kinahang-ean ko nga bag-uhon ang kaisipan. Sa ruyong panahon, nabasahan ko ro Job 34:22-29. Ruyong mga bersikulo hay nagpadumdom kakon nga nakikita ni Jehova ro tanan. Imaw eang ro may perpekto nga hustisya, ag imaw eang ro makasolbar ku tanan nga problema it mga tawo.” Pero habang ginahueat naton ro pagduea ku Ginharian it Dyos sa atong mga problema, ano ro pwede natong obrahon makaron?

KON ANO RO PWEDE NATONG OBRAHON MAKARON

14. Ano ro pwede natong obrahon makaron? (Colosas 3:10, 11)

¹⁴ Indi naton makontrol ro ginaobra it ibang tawo nga buko’t mayad sa iba, pero pwede natong makontrol ro atong ginaobra. Sa gintalakay eon naton, matuead naton si Jesus paagi sa pagpakita it pagpalangga. Ngani ginatinguhaan naton nga mangin mabuot sa tanan maskin pa sa mga nagatratar katon it buko’t mayad. (Mat. 7:12; Roma 12:17) Masadya gid si Jehova kon ginatratar naton it mayad ag patas ro tanan nga tawo.​—Basaha ro Colosas 3:10, 11.

15. Paalin makabulig sa mga tawo ro pagsugid naton kanda it mga kamatuoran sa Biblia?

¹⁵ Ro pinakamayad nga paagi para mabuligan naton ro mga tawo hay ro pagsugid kanda it mga kamatuoran sa Biblia. Ham-an mahambae naton ron? Dahil ro “kaaeam parti kay Jehova” hay pwedeng magpabag-o sa maakigon ag bayolente nga tawo nga mangin mabuot ag mapinalanggaon. (Isa. 11:6, 7, 9) Bago natun-an it sangka eaki nga si Jemal ro kamatuoran, nag-intra imaw sa grupo it mga rebelde nga gustong bayluhan ro gubyerno sa andang nasyon dahil para kana hay buko’t mayad ro pagginubyerno kara. Naghambae imaw: “Indi mo mabag-o ro mga tawo paagi sa pagpakig-away kanda. Pero kon matun-an nanda ro kamatuoran sa Biblia, pwede sandang magbag-o, ag ruyon ro natabo kakon.” Ro mga natun-an ni Jemal hay nagpahueag kana nga indi eon mag-intra sa inaway. Ngani kon ginatur-an naton ro mga tawo it kamatuoran halin sa Biblia, mabuligan naton sanda nga indi eon mag-obra it mga bagay nga makahalit sa iba.

16. Ham-an gusto mo gid isugid sa mga tawo ro parti sa Ginharian it Dyos?

¹⁶ Pareho kay Jesus, gusto gid natong isugid sa mga tawo ro parti sa Ginharian it Dyos dahil raya eang ro makatao it permanente nga solusyon sa inhustisya. Makapalig-on gid rayang pag-eaum para sa mga nakaeksperyinsya it inhustisya. (Jer. 29:11) Si Stacy nga ginsambit kaina hay naghambae: “Dahil sayod ko nga pagadueaon it Dyos ro pag-antus, nakabulig ra kakon nga mangin kalmado kon buko’t mayad ro pagtratar kakon o sa iba. Ginagamit ni Jehova ro mga teksto sa Biblia para paumpawan kita.” Para masugid mo ro makaumpaw nga mensahe it Biblia, kinahang-ean nga mangin handa ka. Kon tun-an mo it mayad kon ano ro ginahambae it Biblia parti sa pag-antus, mangin mas kumbinsido ka sa rayang mga pagturo. Rayon, masugid mo sa ing kaeskuyla o katrabaho kon ham-an nagaantus kita ag kon ano ro obrahon ni Jehova para dueaon ra.b

17. Paalin kita ginabuligan ni Jehova nga makaya ro inhustisya makaron?

¹⁷ Sayod naton nga padayon kitang makaatubang it inhustisya habang si Satanas pa “ro nagagahum ku rayang kalibutan.” Pero, nagaeaum kita nga magamayad ro sitwasyon dahil nagpromisa si Jehova nga buligan na kita makaron ag dueaon na si Satanas ag ro tanan nga nagaobra it maeain. (Juan 12:31) Paagi sa Biblia, ginasugid katon ni Jehova kon ham-an abu nga mga inhustisya ag kon ano ro anang ginabatyag kon nagakalisud kita. (Sal. 34:17-19) Paagi sa anang Unga, ginaturo katon ni Jehova kon ano ro dapat natong obrahon kon makaatubang kita o ro iba it inhustisya, ag kon paalin permanente nga dueaon it anang Ginharian ro tanan nga inhustisya. (2 Ped. 3:13) Kabay nga padayon natong iwali ro mayad nga balita it Ginharian nga may kahugod, ag padayon nga eauman ro panahon nga may “hustisya ag pagkamatarung” sa bilog nga eugta.​—Isa. 9:7.