1925​—Pagtaliwan it Sang Gatos nga Dag-on

RO GINAPAABOT NGA OWA MATABO

Ku 1925, abung mga Estudyante sa Biblia ro nag-eaum nga mangin Paraiso eon ro bilog nga eugta. Ham-an? Si Brother Albert Schroeder, nga nag-alagad ku ulihi bilang myembro it Nagadumaea nga Grupo hay naghambae: “Nagapati kita kato nga magaagto eon sa eangit ro mga pinili, ag pagabanhawon ro mga matutom pareho nanday Abraham ag David ag pagadumaeahan nanda ro eugta.” Pero kat owa ron natabo sa ruyong dag-on, nadismaya gid ro pila sa atong mga igmanghod.​—Hulu. 13:12.

Maskin pa naeuyahan ro mga Estudyante sa Biblia, ro kaeabanan kanda hay nagpabilin nga masako sa pagwali nga ueobrahon. Ag narealisar nanda nga ro pagpanaksi parti kay Jehova ro pinakaimportante nga ueobrahon. Tan-awon naton kon paalin nanda gingamit ro radyo para mawalihan ro abu nga tawo.

NAG-USWAG RO RADIO BROADCASTING

Ku 1924, abu nga tawo ro nagpamati sa istasyon it radyo nga WBBR. Ngani ku 1925, ro mga Estudyante sa Biblia hay nagpatindog it sambilog pa nga istasyon it radyo kon siin maeapit eon ra sa Chicago, Illinois. Ro bag-ong istasyon hay gintawag nga WORD. Ro radio engineer nga si Ralph Leffler, nga nagbulig sa pagpatindog it rayang istasyon hay naghambae, “Sa panahon it tig-eaeamig, abung tawo sa maeayo nga mga lugar ro nagapamati sa rayang istasyon kada gabii.” Halimbawa, ro sangka pamilya nga nagaestar sa syudad it Pilot Station sa Alaska hay nakapamati sa pinakauna nga mga pag-broadcast maskin pa sobra sa 5,000 nga kilometro ro andang kaeayuon. Pagkatapos nandang mapamatian ro pag-broadcast, nagpadaea sanda it sueat para pasaeamatan ro mga nagatrabaho sa istasyon dahil nakabenepisyo sanda sa rayang makapalig-on nga espiritwal nga programa.

Ro Disyembre 1, 1925 nga The Watch Tower hay nagsugid kon ham-an abu nga tawo sa maeayo nga mga lugar ro nakapamati sa rayang istasyon it radyo. Naghambae ra: “Ro WORD hay sambilog sa mga super-station sa United States. Klaro ra nga mabatian it mga tawo sa bilog nga United States, sa Cuba, ag hasta sa pinakamaeayo nga parte it northern Alaska. Abung tawo nga owa pa nakabati it kamatuoran ro nangin interesado pagkatapos makapamati sa rayang istasyon.”

Sa ruyong panahon, nagatinguha man ro mga Estudyante sa Biblia nga iwali ro mayad nga balita sa Canada paagi sa paggamit it radyo. Ku 1924, ro istasyon nga CHUC hay ginpatindog sa Saskatoon, Saskatchewan. Sambilog ra sa pinakauna nga istasyon it radyo sa Canada nga gin-gamit it relihiyon. Ku 1925, kinahang-ean nanda nga mag-usoy it mas mabahoe nga lugar para sa rayang istasyon. Ngani ginbakae it Watch Tower Society rayang istasyon ag ginhalin ro broadcasting studio sa Regent Building, sangka luma nga teatro sa Saskatoon nga ginbakae ag gin-renovate nanda para kara.

Paagi sa rayang istasyon, abung tawo nga nagaestar sa maisot nga mga banwa sa Saskatchewan ro nakabati it mayad nga balita sa pinakaunang beses. Halimbawa, si Mrs. Graham nga nagaestar sa maeayo nga banwa hay nagsueat para magpangayo it base sa Biblia nga literatura pagkatapos nang mapamatian ro sangka broadcast. Si Brother George Naish hay naghambae, “Ginapakita sa anang sueat nga gusto na gid nga magtuon eagi, ngani ginpadaehan namon imaw it bilog nga set it libro nga Studies in the Scriptures.” Owa magbuhay, ginasugid eon ni Mrs. Graham sa iba ro anang mga natun-an hasta sa maeayo nga mga lugar.

GINKLARO RO ATONG MGA PAGPATI

Mabasa sa Marso 1, 1925 nga isyu it The Watch Tower ro importante nga artikulo nga may tema nga “Birth of the Nation.” Ham-an importante gid rayang artikulo? Mabuhay eon nga nasayran it mga Estudyante sa Biblia nga si Satanas hay may organisasyon, eakip kara ro mga demonyo pati man ro buko’t matuod nga relihiyon, gubyerno, ag komersyo. Pero paagi sa rayang artikulo, ginbuligan it “masaligan ag maaeam nga sueoguon” ro mga igmanghod nga maintindihan nga may organisasyon man si Jehova, ag kontra ra kay Satanas ag sa anang organisasyon. (Mat. 24:45) Dugang pa, gin-eksplikar man ku sueoguon nga natukod ro Ginharian it Dyos ku 1914 ag sa raya mang dag-on, “nag-umpisa ro inaway sa eangit.” Bilang resulta, gintabog si Satanas ag ro anang mga demonyo sa eangit ag ginhueog iya sa eugta.​—Pah. 12:7-9.

Ro iba hay nalisdan sa pagbaton it rayang bag-o nga pag-eubot. Ngani naghambae man rayang artikulo: “Kon may una nga manogbasa it Watch Tower nga owa nagasugot sa rayang bag-ong pag-eubot, kinahang-ean nanda nga mangin mapinasensyahon ag magsalig kay Jehova habang padayon sanda nga nagaalagad kana it matutom.”

Pero ginsugid ni Tom Eyre nga taga-Britain, nga sangka colporteur (kilaea makaron bilang payunir) kon ano ro ginbatyag it kaeabanan nga Estudyante sa Biblia parti sa ruyong artikulo: “Masadya gid ro mga igmanghod sa rayang pagklaro sa Pahayag 12. Kat narealisar namon nga gintukod eon sa eangit ro Ginharian, excited gid kami nga isugid rayang mayad nga balita sa iba. Nagbulig ra kamon nga mangin mahugod pa gid sa pagwali ag makita ro mayad nga mga bagay nga pagaobrahon ni Jehova sa paeaabuton.”

PAGPANAKSI PARTI KAY JEHOVA

Makaron, haeos pirmeng ginasugid it mga Saksi ni Jehova ro parti sa Isaias 43:10: “‘Kamo ro akong mga saksi,’ hambae ni Jehova, ‘Huo, ro akong alagad nga ginpili ko.’” Pero bago pa ro 1925, owa haeos ginasambit rayang teksto sa atong mga publikasyon. Pero may una nga pagbag-o. Ku 1925, gintalakay sa The Watch Tower ro Isaias 43:10 ag 12 sa 11 nga mga isyu it rayang magasin!

Sa katapusan it Agusto 1925, nagtipon ro mga Estudyante sa Biblia sa sangka kunbensyon sa Indianapolis, Indiana. Si Joseph F. Rutherford hay nagsueat it sangka mensahe nga makita sa naimprenta nga programa it kunbensyon para i-welcome ro mga delegado. Nagahambae ra: “Nag-agto kita sa rayang kunbensyon para magbaton . . . it kusog halin sa Ginuo agud kon magbalik eon kita, may bag-o kitang kusog sa pagwali nga ueobrahon bilang anang mga saksi.” Sa sueod it waeong adlaw nga kunbensyon, napalig-on ro mga nag-attend nga magpanaksi parti kay Jehova sa tanan nga tsansa.

Ku Agusto 29, adlaw nga Sabado, nagtao si Brother Rutherford it makapalig-on nga diskurso nga may tema nga “A Call to Action.” Sa anang diskurso, ginpabahoe na kon ham-an importante ro pagwali nga ueobrahon: “Naghambae si Jehova sa anang katawhan . . . : ‘Kamo ro akong mga saksi . . . ag ako ro Dyos.’ Rayon ginsugo na sanda nga may kapagsik: ‘Magbutang kamo it paeatandaan para sa mga katawhan.’ Ro mga tawo eang nga ginabuligan ni Jehova paagi sa anang baeaan nga espiritu ro makapanaksi parti kana dahil sanda ro anang katawhan.”​—Isa. 43:12; 62:10.

Pagkatapos it diskurso ni Brother Rutherford, ginbasa na ro sangka dokumento nga may titulo nga “Message of Hope” ag nanamian kara ro manogpaeamati. Nagasugid ra nga ro Ginharian it Dyos eang ro makatao katon it matuod nga pag-eaum para mabaton naton ro “kalinong, kabuganaan, mayad nga pang-eawas, kabuhi, kalayaan ag kasadya nga owa’t katapusan.” Gin-translate ra ku ulihi sa abu nga mga linggwahe ag gin-imprenta bilang tract. Mga 40 milyon nga kopya kara ro ginpanupod.

Pagtaliwan it pilang dag-on, owa gihapon ginbayluhan it mga Estudyante sa Biblia ro pagtawag kanda bilang mga Saksi ni Jehova. Pero, amat-amat eon nanda nga naintindihan kon mauno kaimportante nga mangin representante ni Jehova.

PAGBALIK IT UMAN SA MGA INTERESADO

Habang nagaabu ro mga Estudyante sa Biblia sa bilog nga kalibutan, ginpalig-on sanda it organisasyon nga euwas sa pagpanupod it mga literatura, dapat man nandang tinguhaan nga balikan ro mga interesado. Pagkatapos it kampanya ku pagpanupod it tract nga Message of Hope, ro Bulletina hay nagtao it instruksyon: “Baliki ninyo ro mga tawo nga nakabaton it kopya ku Message of Hope nga tract.”

Ro Enero 1925 nga isyu it Bulletin hay nagsugid ku eksperyinsya it sangka Estudyante sa Biblia sa Plano, Texas: “Nakibot gid kami kat nakita namon nga mas mayad ro resulta it pagwali sa mga teritoryo nga ginbalikan namon it uman kaysa sa mga lugar nga bag-o paeang namon naagtunan. Ro sangka maisot nga banwa sa among teritoryo hay limang beses namon nga napreachingan sa sueod it pueong dag-on. . . . Pero ku raya eang, nagbalik igto it uman si Sister Hendrix ag si nanay, ag mas abu nga libro ro andang napanupod kaysa dati.”

Ro sangka colporteur nga taga-Panama hay nagsueat: “Abung buko’t interesado kato ro nagpamati eon kakon kat ginbalikan ko sanda it uman sa pangaywa o pangatlong beses. Sa nagtaliwan nga dag-on, mas nagpukos ako sa pagbalik it uman sa mga nabisitahan ko eon ag abu gid ang manami nga eksperyinsya kara.”

PAGPUKOS SA PAEAABUTON

Bago matapos ro dag-on nga 1925, ginsueatan ni Brother Rutherford ro mga payunir parti sa pag-uswag it pagwali nga ueobrahon sa ruyong dag-on ag kon ano pa gid ro andang pagaobrahon. Naghambae imaw: “Sa rayang dag-on, nangin pribilehiyo ninyo nga buligan ro mga nagakasubo. Rayang ueobrahon hay nagtao kinyo it kasadya . . . Sa rayang masunod nga dag-on, mangin abu ro inyong oportunidad sa pagpanaksi parti sa Dyos ag sa anang ginharian, ag para ipakita kon sin-o ro anang matuod nga mga manogsimba. . . . Padayon naton nga dayawon it magkaibahan ro atong Dyos ag Hari.”

Sa pagtapos it 1925, nag-obra it plano ro mga igmanghod nga dugangan ro mga pasilidad sa Brooklyn. Sa dag-on nga 1926, gin-umpisahan nanda ro pinakamabahoe nga proyekto sa konstruksyon nga owa pa gid maobra it organisasyon kato.