Indi Pagkalipati nga Ipangamuyo Man ro Iba

1. Paalin naton nasayran nga importante kay Jehova ro atong mga pangamuyo?

RO PANGAMUYO hay sangka manami gid nga regalo. Isipa ra: Gintaw-an ni Jehova it espisipiko nga mga asayment ro mga anghel. (Sal. 91:11) Gintaw-an na man it importante nga mga asayment ro anang Unga. (Mat. 28:18) Pero, gin-asayn na baea sa iba ro pagpamati sa atong mga pangamuyo? Owa, raya ro bagay nga gusto nang imaw eang gid ro magaobra. Si Jehova ro “Manogpamati it pangamuyo,” ngani imaw mismo ro nagapamati sa atong mga pangamuyo.​—Sal. 65:2.

2. Paalin nangin mayad nga halimbawa si apostol Pablo parti sa pagpangamuyo para sa iba?

² Masugid naton kay Jehova ro tanan natong ginakabaeak-an, pero kinahang-ean man natong ipangamuyo ro iba. Gin-obra ron ni apostol Pablo. Halimbawa, ginsueatan na ro kongregasyon it Efeso: “Ginadumdom ko kamo sa akong mga pangamuyo.” (Efe. 1:16) Espisipiko man nga ginpangamuyo ni Pablo ro mga igmanghod. Halimbawa, ginhambae na kay Timoteo: “Nagapasaeamat ako sa Dyos, . . . samtang ginadumdom ku ikaw pirme sa akong mga pangamuyo sa adlaw ag gabii.” (2 Tim. 1:3) May mga ginakabaeak-an man si Pablo nga kinahang-ean nang ipangamuyo. (2 Cor. 11:23; 12:7, 8) Pero, nagtao gihapon imaw it oras para ipangamuyo man ro iba.

3. Ham-an posibleng malipatan naton nga ipangamuyo ro iba?

³ Kon amat, posibleng malipatan naton nga ipangamuyo ro iba. Ham-an? Ginsugid it sister nga si Sabrinaa ro sambilog nga rason. Naghambae imaw: “Masako gid ro kabuhi sa rayang sistema. Ngani, posibleng magpukos eang kita sa atong mga problema ag ruyon eang gid ro atong ipangamuyo.” Nagakatabo man baea kimo ra kon amat? Kon huo, makabulig kimo rayang artikulo. Mabuligan ka kara nga masayran (1) kon ham-an importante nga ipangamuyo man ro iba ag (2) kon ano ro mga suhistyon kon paalin mo ra maobra.

HAM-AN KINAHANG-EAN NATONG IPANGAMUYO RO IBA?

4-5. Ham-an mahambae naton nga may “mabahoe nga gahum” ro atong pangamuyo para sa iba? (Santiago 5:16)

⁴ Ro atong pangamuyo para sa iba hay “may mabahoe nga gahum.” (Basaha ro Santiago 5:16.) May epekto gid man baea sa sitwasyon it iba ro atong pangamuyo para kanda? Huo, may una. Sayod ni Jesus nga sa indi magbuhay, ipanghiwaea imaw ni apostol Pedro, ngani ginhambae na kana: “Nagpangamuyo ako para kimo Simon, nga ro imong pagtuo indi maduea.” (Luc. 22:32) Sayod man ni Pablo nga ro pangamuyo hay makabulig sa sitwasyon it iba. Kat ginpriso imaw sa Roma maskin owa imaw it saea, nagsueat imaw kay Filemon: “Nagaeaum ako nga ro Dyos magapamati sa inyong mga pangamuyo ag ana akong ipabalik kinyo.” (Filem. 22) Ag ruyon gid ro natabo. Ginpalaya si Pablo sa prisuhan ag nakawali imaw it uman.

⁵ Syempre, owa ra nagakahueogan nga pwede natong piliton si Jehova nga obrahon ro atong ginpangamuyo. Nakikita ni Jehova ro pagkabaeaka it anang mga alagad sa iba, ag may mga panahon nga ginasabat na ro andang mga pangamuyo. Dahil nasayran naton ron, makabulig ron katon nga ipangamuyo kay Jehova ro parti sa sangka sitwasyon ag magsalig nga imaw lang ro magasolusyon kara sa pinakamayad nga paagi.​—Sal. 37:5; tan-awa ro 2 Corinto 1:11.

6. Ano ro epekto katon it atong pagpangamuyo para sa iba? (1 Pedro 3:8)

⁶ Ro pagpangamuyo para sa iba hay makabulig katon nga “mangin maeueuy-on.” (Basaha ro 1 Pedro 3:8, Ro Bag-o nga Kasugtanan, TAP.) Nakikita it maeueoy-on nga tawo ro pag-antus it iba ag gusto na nga buligan sanda. (Mar. 1:40, 41) Ro elder nga si Michael hay naghambae: “Kon ginapangamuyo ko ro parti sa mga kinahang-eanon it iba, mas naintindihan ko ro mga kalisdanan nga andang ginaatubang ag dahil kara, mas nagadaeum ro akong pagpalangga kanda. Pamatyag ko nangin mas maeapit ako kanda maskin owa nanda ra nasayran.” Ro elder nga si Richard hay nagsugid it sambilog pa nga epekto it pagpangamuyo para sa iba. Naghambae imaw: “Kon ginapangamuyo naton ro iba, mas gustuhon naton nga buligan sanda.” Naghambae pa imaw: “Kon ginabuligan naton sa praktikal nga paagi ro tawo nga atong ginpangamuyo, matsa kita mismo ro nagsabat sa atong pangamuyo para kana.”

7. Paalin ro pagpangamuyo para sa iba makabulig katon nga indi eang magpukos sa atong mga problema? (Filipos 2:3, 4) (Tan-awa man ro piktyur.)

⁷ Ro pagpangamuyo para sa iba hay makabulig katon nga indi eang magpukos sa atong mga problema. (Basaha ro Filipos 2:3, 4.) Ro kada isaea katon hay may ginaatubang nga mga problema dahil nagakabuhi kita sa kalibutan nga ginagamhan ni Satanas. (1 Juan 5:19; Pah. 12:12) Kon pirme natong ginapangamuyo ro iba, ginadumdom naton nga “ro [atong] mga isigka-tumoeuo sa bilog nga kalibutan nagaantus it makaruyon man nga mga pag-antus.” (1 Ped. 5:9) Ro sangka payunir nga si Katherine hay naghambae: “Ro pagpangamuyo para sa iba hay nagapadumdom kang nga sanda man hay nagaatubang it mga kalisdanan. Nakabulig ra kakon nga indi eang magpukos sa akong mga problema.”

KINAHANG-EAN NANDA RO ATONG MGA PANGAMUYO

8. Sin-o ro pwede natong ieakip sa atong mga pangamuyo?

⁸ Sin-o ro pwede natong ieakip sa atong mga pangamuyo? Pwede natong ipangamuyo ro mga igmanghod, pareho it mga nagamasakit, mga bataon nga ginaintrimis ag gina-pressure sa eskuylahan, o ro mga magueang nga nagaatubang it iba-ibang kalisdanan. Abu sa atong mga igmanghod ro ginahingabot it andang pamilya o it gubyerno. (Mat. 10:18, 36; Binu. 12:5) Ro iba mat-a hay kinahang-ean nga aywan ro andang baeay ag magsaylo sa ibang lugar dahil sa inaway sa politika. Ro iba pa gid hay apektado it mga kalamidad. Bukon man naton it personal nga kilaea rayang mga igmanghod pero kon ginapangamuyo naton sanda, ginapakita naton nga ginatuman naton ro sugo ni Jesus nga “maghigugmaanan.”​—Juan 13:34.

9. Ham-an dapat natong ipangamuyo ro mga nagapanguna sa organisasyon ni Jehova pati man ro andang asawa?

⁹ Pwede man natong ipangamuyo ro mga nagapanguna sa organisasyon ni Jehova. Naeakip kara ro Nagadumaea nga Grupo ag ro andang mga kabulig, mga Branch Committee, mga overseer sa mga branch office, mga manogdipara it sirkito, mga elder, ag mga ministeryal nga alagad. Rayang mga brother hay may mga problema man habang ginaobra nanda ro andang mga responsibilidad para buligan kita. (2 Cor. 12:15) Halimbawa, si Mark nga sangka manogdipara it sirkito hay naghambae: “Ro sambilog sa ang ginakabaeak-an hay ro mapaeayo sa ang magueang eon nga mga ginikanan. Pareho sandang may masakit. Maskin ginadipara man sanda ku akong magueang nga bayi ag ku anang asawa, nasubuan gihapon ako nga indi ko sanda madipara it personal.” Nakasayod man kita o owa sa mga ginakabaeak-an it rayang mahugod nga mga brother, indi naton dapat kalipatan nga ieakip sanda sa atong mga pangamuyo. (1 Tes. 5:12, 13) Ipangamuyo man naton ro asawa it rayang mga brother dahil mainunongon nanda nga ginasuportahan ro andang asawa para padayon nandang maobra ro andang mga asayment.

10-11. Ginapamatian baea ni Jehova ro atong mga pangamuyo maskin owa kita it espisipikong mga igmanghod nga ginsambit? Ieksplikar.

¹⁰ Sa gintalakay eon naton, ginapangamuyo naton ro mga igmanghod. Halimbawa, maskin owa kita it espisipikong mga igmanghod nga ginsambit, pwede natong ipangabay kay Jehova nga buligan ratong mga una sa prisuhan o paumpawan ro mga igmanghod nga namatayan it pinalangga. Ro sangka elder nga si Donald hay naghambae, “Abu kitang mga igmanghod nga nagaatubang it mga kalisdanan ngani kon amat, nagapangamuyo kami it pangkabilugan agud maeakip eon kara ro mga igmanghod nga nagaantus.”

¹¹ Ginapamatian baea ra ni Jehova? Huo! Dahil owa man kita kasayod ku insaktong kinahang-ean it atong mga igmanghod. Ngani mayad gid kon magpangamuyo kita it pangkabilugan para kanda. (Juan 17:20; Efe. 6:18) Rayang mga pangamuyo hay pamatuod nga ‘ginahigugma naton ro atong mga isigka-tumoeuo.’—1 Ped. 2:17.

KON NAGAPANGAMUYO PARA SA SANGKA IGMANGHOD

12. Paalin ro pag-obserbar sa iba makabulig katon para mangin mas espisipiko ro atong mga pangamuyo?

¹² Mag-obserbar. Euwas pa sa pagpangamuyo it pangkabilugan para sa mga igmanghod, dapat man natong ipangamuyo ro espisipiko nga mga igmanghod. May una baea sa inyong kongregasyon nga nagaatubang it malala nga masakit? O sangka bataon nga naeuyahan it buot dahil gina-pressure imaw it anang mga klasmeyt nga mag-obra it maeain? O single parent nga nalisdan sa “pagturo ag pagdisiplina” sa anang unga? (Efe. 6:4) Paagi sa pag-obserbar, mas mapadaeum mo ing pagpalangga ag empatiya sa iba nga magapahueag kimo nga ipangamuyo sanda.b—Roma 12:15.

13. Paalin naton mapangamuyo ro mga igmanghod nga bukon naton it personal nga kilaea?

¹³ Sambita ro andang pangaean sa pangamuyo. Mapangamuyo naton ro mga igmanghod maskin bukon naton sanda it personal nga kilaea. Halimbawa, isipa ro mga igmanghod naton nga napriso sa Crimea, Eritrea, Russia, ag Singapore. Makita mo sa jw.org ro mga pangaean it mga igmanghod nga napriso.c Ro manogdipara it sirkito nga si Brian hay naghambae: “Nakabulig kakon ro pagsueat ku pangaean it napriso nga igmanghod ag ro pagbasa kara it mabaskog nga matandaan ro anang pangaean ag maeakip imaw sa ang pangamuyo.”

14-15. Paalin kita mangin espisipiko sa atong mga pangabay?

¹⁴ Mangin espisipiko sa atong mga pangabay. Si Michael nga ginsambit kaina hay naghambae: “Habang ginabasa ko sa jw.org ro parti sa napriso nga mga igmanghod, ginaimadyin ko kon alin ang batyagon kon ako ro sa andang sitwasyon. Sigurado nga mabaeaka gid ako sa ang asawa, ag gusto ko nga madipara imaw it mayad. Ngani nakabulig ra kakon nga mangin espisipiko sa ang mga pangamuyo para sa napriso nga mga igmanghod nga may asawa.”​—Heb. 13:3.

¹⁵ Kon imadyinon naton ro kabuhi it atong mga igmanghod nga napriso, makabulig ra katon nga makaisip it iba pang mga bagay nga pwede natong ipangamuyo para kanda. Halimbawa, pwede natong ipangamuyo nga mangin mayad ro pagtratar it mga gwardya kanda ag pasugtan sanda it mga opisyal it gubyerno nga makasimba kay Jehova sa prisuhan. (1 Tim. 2:1, 2) Pwede man natong ipangamuyo nga mapalig-on ro mga kakongregasyon it napriso nga mga igmanghod paagi sa andang ginapakita nga katutom o maobserbahan it mga buko’t Saksi ro andang manami nga paggawi ag mapahueag sanda nga magpamati sa atong mensahe. (1 Ped. 2:12) Ag pwedeng makara man ro atong obrahon kon nagapangamuyo para sa mga igmanghod nga nagaatubang it iba pang kalisdanan. Paagi sa pag-obserbar, pagsambit it andang pangaean sa pangamuyo, ag pagiging espisipiko sa atong mga pangabay, mapakita naton nga ‘ginapatubo naton ro atong gugma sa kada isaea.’—1 Tes. 3:12.

MANGIN MAUGDANG SA ATONG MGA PANGAMUYO

16. Paalin kita mangin maugdang sa atong mga pangamuyo? (Mateo 6:8)

¹⁶ Natun-an naton nga ro atong mga pangamuyo hay may epekto sa sitwasyon it iba. Pero, kinahang-ean natong mangin maugdang. Kon nagapangamuyo kita, owa kita nagasugid kay Jehova it mga bagay nga owa pa nana nasayran o nagapahanumdom kana kon paalin na solusyunan ro sangka sitwasyon. Sayod eon ni Jehova ro mga kinahang-eanon it anang mga alagad bago pa nanda o naton ra masayran. (Basaha ro Mateo 6:8.) Pero, ham-an kinahang-ean pa natong ipangamuyo ro iba? Dugang pa sa mga rason nga ginsambit kaina, nagapakita ra nga nagakabaeaka kita sa iba. Ginapahueag kita it atong pagpalangga nga ipangamuyo naton ro kada isaea. Ag masadya si Jehova nga makita nga ginatuead ku anang mga alagad ro anang pagpalangga.

17-18. Sa ano makumpara ro atong mga pangamuyo para sa atong mga igmanghod?

¹⁷ Maskin ro atong mga pangamuyo hay matsa owa man it epekto sa sitwasyon it atong mga igmanghod, pagpakita gihapon ra it atong pagpalangga para kanda, ag naapresyar gid ra ni Jehova. Makumpara naton ra sa sangka pamilya nga may daywang ka maisot nga unga—sangka eaki ag sangka bayi. Ro unga nga eaki hay nagamasakit. Naghinyo ro unga nga bayi sa anang tatay: “Tay, buligi si manong. Nagamasakit imaw!” May gin-obra eon man ro anang tatay para magmayad ro anang unga nga eaki. Palangga na ra ag ginadipara it mayad. Pero, masadya gid ro tatay nga makita kon paalin magkabaeaka ro anang unga nga bayi sa anang igmanghod nga nagahinyo pa nga buligan na imaw.

¹⁸ Pareho karon, ginapalig-on kita ni Jehova nga magkabaeaka kita sa kada isaea ag ipangamuyo naton ro kada isaea. Kon obrahon naton ra, ginapakita naton nga owa eang kita nagapukos sa atong sarili ag palangga gid naton ro atong mga igmanghod, ag nasadyahan gid kara si Jehova. (2 Tes. 1:3; Heb. 6:10) Sa gintalakay eon naton, makabulig sa atong mga igmanghod ro atong mga pangamuyo. Ngani, indi naton pagkalipatan nga ipangamuyo ro kada isaea.