Makabulig Katon ro Libro it Job Kon Nagaantus Kita

1-2. Ham-an mayad nga basahon naton ro libro it Job?

HABASA mo eon baea ro libro it Job? Maskin pa 3,500 nga dag-on eon ro nagtaliwan kat ginsueat ra, abung tawo ro nagahambae nga sambilog ra sa pinakamanami nga libro nga ginsueat. Ginadayaw gid nanda ro nagsueat kara dahil naggamit imaw it mga termino nga madali maintindihan, manami ro estilo it pagkasueat, ag makapahueag ro mensahe kara. Si Moises ro nagsueat it rayang libro, pero ro matuod nga Awtor kara hay si Jehova nga Dyos.​—2 Tim. 3:16.

² Ro libro it Job hay importante gid nga parte it Biblia. Ham-an? Dahil nagasugid ra parti sa mabahoe nga isyu nga ginaatubang it mga anghel ag mga tawo—ro pagpakabaeaan sa pangaean ni Jehova. Nagaturo man ra katon parti sa daeayawon nga mga ugali ni Jehova pareho it pagpalangga, kaaeam, katarungan, ag gahum. Halimbawa, sa libro it Job, gintukoy si Jehova bilang “ro Eabing Gamhanan” it 31 nga beses, mas abu ra maskin impunon pa ro tanan nga libro sa Biblia. Ginasabat man ku libro it Job ro importanteng mga pangutana sa kabuhi, sambilog kara ro pangutana nga: Ham-an ginapasugtan it Dyos ro pag-antus?

3. Ano ro atong matun-an sa libro it Job?

³ Makumpara naton ro pagbasa sa libro it Job sa pagsaka sa bukid. Kon una kita sa ibabaw it bukid, makita naton it mayad ro palibot. Kon basahon naton ro libro it Job, makita man naton it mayad kon ano ro pagtan-aw ni Jehova parti sa atong pag-antus. Matun-an naton kon paalin posibleng nakabulig sa mga Israelinhon ro istorya ni Job ag kon paalin ra makabulig katon makaron. Matun-an ta man kon paalin naton magamit ro libro it Job para buligan ro iba.

GINPASUGTAN IT DYOS NGA MAG-ANTUS SI JOB

4. Ham-an iba gid si Job sa mga Israelinhon sa Ehipto?

⁴ Si Job hay nagaestar sa Uz ku panahon nga nagaantus ro mga Israelinhon bilang mga ulipon sa Ehipto. Ro Uz hay posibleng maeapit sa may north it Arabia. Kat sa Ehipto ro mga Israelinhon, ginsimba it pila kanda ro mga diyos-diyos igto. Pero iba gid kanda si Job dahil matutom na nga ginsimba si Jehova. (Jos. 24:14; Eze. 20:8) Naghambae si Jehova parti kay Job: “Owa gid it pareho kana sa eugta.”a (Job 1:8) Manggaranon gid si Job ag ginarespeto gid imaw it mga tawo sa andang lugar. (Job 1:3) Naakig gid si Satanas nga makita rayang prominente ag maimpluwensya nga tawo nga nagaalagad it matutom kay Jehova!

5. Ham-an ginpasugtan ni Jehova nga mag-antus si Job? (Job 1:​20-22; 2:​9, 10)

⁵ Ginhambae ni Satanas nga kon mag-antus si Job, magapundo imaw sa pag-alagad kay Jehova. (Job 1:​7-11; 2:​2-5) Maskin palangga gid ni Jehova si Job, ginpasugtan Na si Satanas nga pamatud-an kon tama gid man ro anang mga ginhambae parti kay Job. (Job 1:​12-19; 2:​6-8) Ginpamuoe ni Satanas ro mga kasapatan ni Job, ginpamatay ro anang napueo nga unga, ag gintaw-an imaw it uyapos sa bilog nga eawas. Pero owa gid ra nakapapundo kay Job sa pag-alagad it matutom kay Jehova. (Basaha ro Job 1:​20-22; 2:​9, 10.) Ku ulihi, ginpamayad ni Jehova si Job, ginbalik ro anang reputasyon, ag gintaw-an it mas abu nga manggad ag napueo pa nga mga unga. Gintaw-an man ni Jehova si Job it maeawig nga kabuhi. Gindugangan na ra it 140 pa nga dag-on, ngani nakita na pa ro apo it anang mga apo. (Job 42:​10-13, 16) Paalin posibleng nakabulig sa mga Israelinhon ro istorya ni Job, ag paalin ra makabulig katon makaron?

6. Paalin posibleng nakabulig sa mga Israelinhon ro istorya ni Job? (Tan-awa man ro piktyur.)

⁶ Kon paalin ra posibleng nakabulig sa mga Israelinhon. Bukon gid it maeumo ro kabuhi it mga Israelinhon sa Ehipto. Halimbawa, sanday Josue ag Caleb hay mabuhay nga nangin ulipon igto. Rayon, kinahang-ean nandang mag-estar sa disyerto sa sueod it mga 40 nga dag-on dahil ro ibang mga Israelinhon hay owa nagsunod kay Jehova. Kon nasayran it mga Israelinhon ro parti sa mga kalisdanan ni Job ag sa mga pagpakamayad nga anang nabaton, siguradong nakabulig ra kanda pati man sa andang mga inunga nga maintindihan kon sin-o gid ro rason it pag-antus. Ag mas maintindihan man nanda kon ham-an ginapasugtan it Dyos ro pag-antus ag kon mauno kana kaimportante ro mga tawo nga nagpabilin nga matutom maskin may kalisdanan.

7-8. Paalin makabulig ro libro it Job sa ratong mga nagaantus? Magtao it halimbawa.

⁷ Kon paalin kita kara mabuligan. Makasueobo gid nga abung tawo makaron ro nadueaan it pagtuo sa Dyos dahil indi nanda maintindihan kon ham-an nagakatabo ro maeain nga mga bagay sa mayad nga mga tawo. Tan-awa ro halimbawa ni Hazelb nga taga-Rwanda. Kat bata pa imaw, nagapati imaw sa Dyos. Pero abung maeain nga mga bagay ro natabo kana. Nagdiborsyo ro anang mga ginikanan, ngani nag-asawa it uman ro anang nanay ag buko’t mayad ro pagtratar kay Hazel ku anang stepfather. Kat tin-edyer eon imaw, gin-rape imaw it sangka eaki. Ngani, nag-agto si Hazel sa andang simbahan para kunta mapaumpawan, pero owa na gid ra nabaton. Ku ulihi, nag-obra imaw it sueat para sa Dyos. Ginhambae na sa anang sueat: “Dyos ko, nagapangamuyo man ako kimo ag nagaobra man ako it mayad, pero ham-an ginapaantus mo ako? Indi eon ako magsimba kimo, ag obrahon ko lang ro makapasadya kang.” Makasueobo gid nga abung tawo makaron kapareho ni Hazel ro nagapati nga ro Dyos ro rason it andang pag-antus!

⁸ Pero, natun-an naton sa libro it Job nga buko’t Dyos ro rason it atong pag-antus kundi si Satanas ta! Natun-an man naton nga kon nagaantus ro mga tawo, indi dapat naton pag-isipon nga may gin-obra sanda nga saea. Ginahambae it Biblia nga ro maeain nga mga bagay hay pwedeng matabo maskin kanyo ag maskin anong oras. (Man. 9:11; Job 4:​1, 8) Ag natun-an man naton nga kon padayon kita nga nagaalagad it matutom kay Jehova maskin may mga kalisdanan, ginabuligan naton Imaw nga pamatud-an nga purilon si Satanas. (Job 2:3; Hulu. 27:11) Nagapasaeamat kita nga natun-an naton rayang mga bagay sa Biblia dahil nasayran naton makaron ro matuod nga rason kon ham-an nagaantus kita. Kat natun-an ni Hazel nga bukon it Dyos ro rason ku anang pag-antus, nagbag-o ro anang kabuhi. Naghambae imaw: “Nangamuyo ako it uman sa Dyos ag ginsugid kana kon ano gid ro akong ginabatyag. Kat ginhambae ko kay Jehova nga indi eon ako magsimba kana, owa man ako naila nga obrahon to. Nahambae ko malang to dahil owa ko pa imaw nakilaea it mayad. Pero makaron, sayod ko eon nga palangga ako ni Jehova, ag masadya gid ako.” Nagapasaeamat gid kita dahil sayod naton kon ham-an ginapasugtan it Dyos ro pag-antus! Talakayon ta makaron kon paalin makabulig katon ro halimbawa ni Job kon nagaatubang kita it mga kalisdanan.

KON PAALIN MAKABULIG KATON RO HALIMBAWA NI JOB NGA MAKATIIS

9. Ano ing mahambae sa sitwasyon ni Job habang nagapungko imaw sa abo? (Santiago 5:11)

⁹ Imadyina nga nagapungko si Job sa abo, puno it uyapos ro anang bilog nga eawas ag grabi ro anang pasakit. Ro anang panit hay nag-itom ag nagpaeang-eup-ak, ag kaniwang gid kana. Owa eon imaw it kusog, nagapungko lang imaw ag ginakaeot ro anang mga nina it basag nga kueon. Ag nagareklamo sa kasakit nga anang nabatyagan. Pero owa eang ginaisip ni Job nga magmayad imaw sa anang masakit kundi ginatiis na gid ra para ipakita ro anang katutom kay Jehova. (Basaha ro Santiago 5:11.) Ano ro nakabulig kay Job nga makatiis?

10. Mauno kaeapit ro relasyon ni Job kay Jehova? Ieksplikar.

¹⁰ Maeapit gid ro relasyon ni Job kay Jehova dahil ginasugid na kay Jehova kon ano ro anang ginabatyag. (Job 10:​1, 2; 16:20) Halimbawa, mabasa naton sa kapitulo 3 nga ginsugid ni Job ro kasubo nga anang ginbatyag dahil sa mga natabo kana. Gin-isip na nga si Jehova ro rason sa anang mga pag-antus. Ag pauman-uman nga ginhambae ku anang mga amigo nga ginapinahan imaw it Dyos dahil sa anang mga saea. Pero ginhambae mat-a ni Job nga imaw hay matutom. Ginapakita ku mga ginhambae ni Job nga may beses nga gin-isip na nga mas matarung imaw kaysa sa Dyos. (Job 10:​1-3; 32:​1, 2; 35:​1, 2) Pero, gin-aku na man nga dahil gusto nang pamatud-an nga matarung imaw, nakahambae imaw kon amat it “padasu-daso.” (Job 6:​3, 26) Mabasa man naton sa kapitulo 31 nga gusto ni Job nga hambaeon kana it Dyos nga bukon imaw it nagakabagay nga pinahan. (Job 31:35) Pero saea nga piliton na ro Dyos nga ihambae kana kon ham-an nagaantus imaw.

11. Ano ro gin-obra ni Jehova sa pagpangatarungan ni Job parti sa anang integridad?

¹¹ Naintindihan naton makaron kon ham-an nahambae to ni Job kay Jehova dahil may maeapit imaw nga relasyon Kana ag nagasalig gid nga patas ro paghusga kana ni Jehova. Kat ginsabat ni Jehova si Job halin sa buhawi, owa na ginsugid ro rason kon ham-an nagaantus si Job. Ag owa na man ginpinahan si Job sa pagsugid it anang ginabatyag o sa anang pagpangatarungan nga owa imaw it haobrang saea. Kundi, pareho it sangka mabuot nga ama, gintur-an imaw ni Jehova sa mapinalanggaon nga paagi. Ag ruyon gid ro pinakamayad nga obrahon para buligan si Job. Bilang resulta, mapainubuson nga ginbaton ni Job nga sangkiri eang ro anang nasayran, ag naghinuesoe imaw sa anang mga ginhambae nga buko’t mayad. (Job 31:6; 40:​4, 5; 42:​1-6) Paalin posibleng nakabulig ro halimbawa ni Job sa mga Israelinhon, ag paalin ra makabulig katon makaron?

12. Paalin posibleng nakabulig ro halimbawa ni Job sa mga Israelinhon?

¹² Kon paalin ra posibleng nakabulig sa mga Israelinhon. Posibleng nakatuon ro mga Israelinhon sa natabo kay Job. Tan-awa ro halimbawa ni Moises. Kinahang-ean na nga tiison ro mga kalisdanan, pagkadismaya, ag pag-euya it buot habang ginapangunahan na ro nasyon it Israel. Ro mga Israelinhon hay pirmeng gareklamo kay Jehova kon una sanda sa kalisdanan, pero si Moises hay gapangayo it bulig kay Jehova kon una imaw sa malisud nga mga sitwasyon. (Ex. 16:​6-8; Num. 11:​10-14; 14:​1-4, 11; 16:​41, 49; 17:5) Kinahang-ean man ni Moises nga magtiis kat gintadlong imaw ni Jehova. Halimbawa, kat maeapit lang magsueod ro mga Israelinhon sa Ginpromisa nga Eugta, naakig kanda si Moises ag nakahambae imaw it “padasu-daso.” Owa na hatao ro pagdayaw nga nagakadapat kay Jehova. (Sal. 106:​32, 33) Bilang resulta, owa imaw ginpasugtan ni Jehova nga makasueod sa Ginpromisa nga Eugta. (Deut. 32:​50-52) Maskin masakit ra para kay Moises, mapainubuson na nga ginbaton ro disiplina ni Jehova. Posibleng nakabulig ro halimbawa ni Job sa mga Israelinhon nga matiis ro mga kalisdanan nga andang naatubang kat una eon sanda sa Ginpromisa nga Eugta. Paagi sa pagpamaeandong kara, posibleng natun-an nanda nga isugid kay Jehova ro andang ginabatyag ag kon paalin nanda malikawan nga pakamatarungon ro andang sarili. Posibleng natun-an man nanda kon paalin batunon it mapainubuson ro disiplina kanda ni Jehova.

13. Paalin makabulig katon ro halimbawa ni Job nga makatiis? (Hebreo 10:36)

¹³ Kon paalin kita kara mabuligan. Bilang mga Cristyano, kinahang-ean man naton nga magtiis. (Basaha ro Hebreo 10:36.) Halimbawa, ro pila katon hay may ginatiis nga masakit sa pisikal o sa emosyonal, problema sa pamilya, namatayan it pinalangga, o iba pa nga mga seryosong problema. Ag kon amat, kinahang-ean man naton nga tiison ro masakit nga ginahambae ag ginaobra katon it iba. (Hulu. 12:18) Pero, ginaturo katon ku libro it Job nga pwede natong isugid kay Jehova ro atong mga ginabatyag, nga nagasalig nga pamatian na kita. (1 Juan 5:14) Indi imaw maakig katon kon makahambae kita kon amat it “padasu-daso” sa atong pangamuyo pareho sa haobra ni Job. Kundi, taw-an nana kita it kusog ag kaaeam nga kinahang-ean naton para makatiis. (2 Cron. 16:9; Sant. 1:5) Tadlungon man ni Jehova ro atong kaisipan kon kinahang-ean pareho sa gin-obra na kay Job. Ginaturo man katon ku libro it Job kon paalin mangin mapainubuson kon makabaton kita it eaygay o disiplina paagi sa Biblia, sa atong mga publikasyon, sa mga elder o hamtong nga mga amigo. (Heb. 12:​5-7) Nakabenepisyo si Job kat mapainubuson na nga ginbaton ro pagtadlong kana, ngani makabenepisyo man kita pareho kana kon pasugtan naton nga tadlungon kita ni Jehova. (2 Cor. 13:11) Raya ro importanteng mga leksyon nga matun-an naton sa libro it Job! Sayuron ta makaron kon paalin naton magamit ro libro it Job para buligan ro iba.

GAMITA RO LIBRO IT JOB PARA BULIGAN RO IBA

14. Ano ro sangka paagi nga magamit naton sa ministeryo para ieksplikar kon ham-an may pag-antus?

¹⁴ May nakaistorya ka baea sa ing pagministeryo nga nagpangutana kimo kon ham-an may pag-antus? Paalin mo ginsabat ro anang pangutana? Basi ginsugid mo kana ro ginahambae it Biblia parti sa natabo sa hardin it Eden. Posibleng nag-umpisa ka sa pag-eksplikar nga naghambae si Satanas it kapurilan sa unang mag-asawa nga sanday Adan ag Eba nga nagresulta ku andang pagrebelde sa Dyos. (Gen. 3:​1-6) Rayon, basi ginhambae mo nga dahil owa sanda nagtuman sa Dyos, ro mga tawo makaron hay nagaantus ag nagakamatay. (Roma 5:12) Pagkatapos, basi gin-eksplikar mo kana nga nagtao ro Dyos it panahon para ipakita sa tanan nga buko’t matuod ro ginhambae ni Satanas ag ginagamit man it Dyos ruyong panahon para masayran it mga tawo nga dueaon na ro tanan nga pag-antus ag pwede kitang mangin masadya sa owa’t katapusan. (Pah. 21:​3, 4) Manami ra nga paagi sa pagsabat sa ruyong pangutana, ag makatao ra it mayad nga resulta.

15. Paalin naton magamit ro libro it Job para buligan ro mga nagapangutana kon ham-an may pag-antus? (Tan-awa man ro piktyur.)

¹⁵ Ro sambilog pa nga paagi para maeksplikar naton sa mga tawo kon ham-an may pag-antus hay paagi sa pagsugid kanda parti kay Job. Pwede anay naton imaw nga komendahan sa anang pagpangutana. Rayon, pwede natong hambaeon kana ro parti kay Job nga sangka mabuot nga tawo, nga nagpangutana man parti sa anang pag-antus. Nagpati pa ngani si Job nga ro Dyos ro rason it anang pag-antus. (Job 7:​17-21) Basi makibot ing kaistorya nga kabuhay eot-a gali ra nga ginapangutana it mga tawo. Pwede mo rayon kanang hambaeon nga sa libro it Job, nasayran naton nga bukon it Dyos ro rason it pag-antus ni Job kundi si Satanas. Ginhambae ni Satanas nga ro mga tawo hay nagaalagad malang sa Dyos dahil sa andang mga nababaton, pero kon nagaantus sanda, mapundo man sanda sa pag-alagad sa Dyos. Pwede mo mang hambaeon kanda nga maskin bukon it Dyos ro rason it pag-antus ni Job, ginpasugtan na ra dahil nagasalig ro Dyos nga kayang pamatud-an it anang matutom nga mga alagad nga saea si Satanas. Pagkatapos, pwede mo pa gid nga hambaeon kana nga dahil nagpabilin nga matutom si Job, ginpakamayad imaw it Dyos. Ngani mapaumpawan naton ro iba paagi sa pagpasalig kanda nga owa naghalin kay Jehova ro pag-antus.

16. Magtao it halimbawa kon paalin makabulig ro libro it Job sa tawo nga nagaantus.

¹⁶ Tan-awa kon paalin nakabulig ro libro it Job kay Mario. Sang adlaw ku 2021, ro sangka sister hay naga-telephone witnessing. Ro una nang natawagan hay si Mario. Ginbasa na ro sangka teksto ag gin-eksplikar kana nga ro Dyos hay owa eang nagapamati sa atong mga pangamuyo kundi nagatao man imaw katon it manami nga paeaabuton ag pag-eaum. Kat ginpangutana na si Mario kon ano ro anang mahambae, naghambae si Mario nga nagaobra imaw it sueat para sa anang pamilya dahil gusto na eon magpakamatay. Ginhambae na, “Nagapati ako sa Dyos, pero pamatyag ko, owa imaw nagakabaeaka kakon.” Sa pangaywang tawag it sister, ginsugid na ro parti kay Job ag sa anang pag-antus. Nagdesisyon rayon si Mario nga kinahang-ean nang basahon ro bilog nga libro it Job. Ngani gin-send kana it sister ro link it Bag-ong Kalibutan nga Badbad sang Balaan nga Kasulatan. Ano ro resulta? Ginbaton ni Mario ro pagtuon ag excited imaw nga matun-an pa ro parti sa mapinalanggaon nga Dyos nga nagakabaeaka kana.

17. Ham-an nagapasaeamat ka kay Jehova nga gin-eakip na sa Biblia ro libro it Job? (Job 34:12)

¹⁷ Ro Biblia hay may ikasarang sa pagbulig sa mga tawo, pati man sa ratong mga nagaantus. (Heb. 4:12) Nagapasaeamat gid kita nga gin-eakip ni Jehova ro istorya ni Job sa Biblia! (Job 19:​23, 24) Ginapasalig kita ku libro it Job nga “sigurado gid nga indi mag-obra it maeain ro Dyos.” (Basaha ro Job 34:12.) Ginaturo man katon kara kon ham-an ginapasugtan it Dyos ro pag-antus ag kon paalin naton ra matiis. Ag makabulig ra katon nga paumpawan ro mga nagaantus. Sa masunod nga artikulo, talakayon naton kon paalin makabulig ro libro it Job kon nagatao kita it eaygay.