Tueara ro Pagkamapainubuson ni Jehova

1. Ham-an nagadayaw ka gid sa pagkamapainubuson ni Jehova?

KON maobserbahan mo ro mga lider it gubyerno makaron, mahambae mo baea nga mapainubuson sanda? Posibleng mahambae mo nga bukon. Pero, si Jehova nga eabing gamhanan hay mapainubuson. (Sal. 113:​5-8) Owa gid it makatupong sa anang pagkamapainubuson, ag owa gid imaw nagapabugae. Sa rayang artikulo, pagatalakayon naton ro ap-at nga aspekto it manami nga mga ugali ni Jehova ag kon paalin ginapakita it kada sambilog kara ro anang pagkamapainubuson. Talakayon man naton kon paalin gintuead ni Jesus ro pagkamapainubuson ku anang Ama. Paagi sa pagtuon kara, mabuligan kita nga mangin mas maeapit kay Jehova ag matuead ro anang pagkamapainubuson.

MADALING PAEAPITAN SI JEHOVA

2. Ano ro ginasugid it Salmo 62:8 parti kay Jehova? (Tan-awa man ro piktyur.)

² Malisud paeapitan ro mga tawo nga bugaeon. Ginatratar nanda it buko’t mayad ro iba, ngani nagadaywang-isip ro mga tawo nga magpaeapit kanda o ginalikawan lang sanda. Pero iba gid kanda si Jehova! Dahil mapainubuson gid ro atong Ama sa eangit, ginaimbitahan na kita nga magpaeapit kana sa pangamuyo ag isugid ro tanan natong ginaisip ag ginabatyag. (Basaha ro Salmo 62:8.) Pareho sa mapinalanggaon nga ama nga handang magpamati sa mga ginakabaeak-an ku anang mga unga, handa man si Jehova nga magpamati sa mga pangamuyo ku anang mga alagad. Ro matuod, abu sa rayang mga pangamuyo ro anang ginpasueat sa Biblia. Ginapakita kara nga madaling paeapitan si Jehova. (Jos. 10:​12-14; 1 Sam. 1:​10-18) Pero basi nalisdan ka kon amat nga mangamuyo kay Jehova dahil sa ing haobrang mga saea.

3. Ham-an makasigurado ka nga gusto ni Jehova nga magpaeapit ka kana pirme sa pangamuyo?

³ Makapaeapit kita kay Jehova sa pangamuyo maskin pamatyag naton hay owa kita nagakabagay sa anang pagpalangga. Ham-an nahambae naton ra? Sa parabola ni Jesus parti sa naduea nga unga, ginkumpara na si Jehova sa mapinalanggaon nga tatay nga may unga nga nakaobra it abung saea ag nagbatyag nga indi imaw pagbatunon ku anang pamilya maskin naghinuesoe eon imaw. Pero ano ro gin-obra ku anang tatay kat nagbalik imaw? Ginhambae ni Jesus nga kat nakita ku tatay ro anang unga, “dumaeagan imaw ag ginhakos ro anang unga ag ginharuan.” (Luc. 15:​17-20) Si Jehova hay pareho sa ruyong tatay. Ngani kon nasubuan kita dahil sa kabaeaka o sa saea nga atong haobra, ginasugid naton ra kana paagi sa pangamuyo ag ginapamatian na gid kita. (Pan. 3:​19, 20) Naeuoy gid imaw katon ag pareho sa tatay nga nagdaeagan paagto sa anang unga, ginapasalig na man katon nga palangga na kita ag gusto na kitang paumpawan. (Isa. 57:15) Paalin ra ginaobra ni Jehova makaron? Ginagamit na ro mga elder, ro atong pamilya ag mga amigo nga nagapalangga man kana para paumpawan kita. (Sant. 5:​14, 15) Ginaobra gid ra ni Jehova dahil gusto na nga mangin maeapit kita kana.

4. Ham-an madaling paeapitan si Jesus it mga tawo?

⁴ Paalin gintuead ni Jesus ro anang Ama? Mapainubuson si Jesus pareho ku anang Ama. Ngani kat iya imaw sa eugta, madali imaw paeapitan it mga tawo. Owa sanda nahadlok nga magpangutana kana. (Mar. 4:​10, 11) Ag kon si Jesus ro magpangutana kanda, ginasugid nanda kon ano gid ro andang ginabatyag. (Mat. 16:​13-16) Dugang pa, kon nakaobra sanda it saea, owa sanda nahadlok nga basi maakig kanda si Jesus dahil sayod nanda nga imaw hay mabuot, maeueoy-on, ag mapinasensyahon. (Mat. 17:​24-27) Hatuead gid ni Jesus ro anang Ama, ngani mas nakilaea ku anang mga sumoeunod si Jehova. (Juan 14:9) Nasayran nanda nga si Jehova hay mapainubuson ag madaling paeapitan buko’t pareho sa andang relihiyusong mga lider nga mapintas, bugaeon, ag malisud paeapitan.

5. Paalin ro pagkamapainubuson makabulig katon nga mangin mas madaling paeapitan?

⁵ Paalin naton matuead si Jehova? Kon tinguhaan naton nga mangin mapainubuson, mangin mas madali kitang paeapitan. Ro pagkamapainubuson hay makabulig katon nga malikawan ro mga ugali nga owa nailaan it iba pareho it pagkamahikawon, pagkabugaeon, ag buko’t mapinatawaron. Ag makabulig ra katon nga mapakita ro mga ugali nga makapaeapit katon sa iba pareho it kabuot, pagkamapinasensyahon, ag pagkamapinatawaron. (Col. 3:​12-14) Ro mga elder ro dapat gid magtinguha nga mangin mas madaling paeapitan. Para maobra ra, kinahang-ean nandang makig-iba sa mga igmanghod. Ngani kon posible, tinguhaan nanda nga maka-attend it personal sa mga miting, imbes nga sa videoconference eang. Ag kon posible pa gid, naga-preaching sanda kaibahan sa mga igmanghod. Habang mas nakikilaea it mga igmanghod ro mga elder, mangin mas madali para kanda nga magpaeapit sa mga elder kon kinahang-ean nanda it bulig.

MAKATARUNGAN SI JEHOVA

6-7. Magtao it halimbawa nga nagapakita nga handa si Jehova nga pamatian ro mga pangabay it anang mga alagad.

⁶ Ro bugaeon nga mga tawo hay nagaisip nga sayod nanda ro pinakamayad ag owa sanda naila nga bag-uhon ro andang desisyon. Pero bukon gid it makaruyon si Jehova maskin sayod na ro pinakamayad para katon. Dahil mapainubuson imaw, ginapamatian na ro suhistyon it iba ag ginabag-o ro anang desisyon para kanda. Tan-awa ro halimbawa it magueang nga bayi ni Moises nga si Miriam. Nagreklamo sanda ni Aaron kontra kay Moises, nga representante ni Jehova. Ginpakita kara ni Miriam nga owa na ginarespeto si Jehova. Bilang resulta, naakig gid kana si Jehova ag gintaw-an imaw it ketong. Pero kat nagpakit-euoy si Aaron kay Moises nga pamayron ni Jehova si Miriam, ano ro gin-obra ni Jehova? Ginpamatian na ro pangabay ni Moises maskin pa nakadesisyon eon imaw. Dahil mapainubuson si Jehova, ginpamayad na si Miriam.​—Num. 12:​1-15.

⁷ Makita man naton ro pagkamapainubuson ni Jehova kat ginpamatian na si Haring Ezequias. Ginsugo ni Jehova si propeta Isaias nga isugid sa hari nga mamatay imaw. Nagtangis si Ezequias habang nagapakit-euoy kay Jehova nga pamayron imaw. Ginpamatian gid ni Jehova ro anang pangamuyo ag ginhambae kana nga magakabuhi pa imaw it 15 nga dag-on. (2 Hari 20:​1, 5, 6) May kaeuoy gid si Jehova sa mga tawo ag mapainubuson imaw, ngani ginapamatian na gid sanda.

8. Ano ro mga halimbawa nga nagapakita nga makatarungan si Jesus? (Marcos 3:​1-6)

⁸ Paalin gintuead ni Jesus ro anang Ama? Kat iya si Jesus sa eugta, owa imaw nagdaywang-isip nga mag-obra it mayad sa iba kon posible. Halimbawa, ginpamayad na ro mga tawo sa Adlaw nga Inogpahuway maskin pa abu ro nagakontra kara. (Basaha ro Marcos 3:​1-6.) Makaron, padayon nga ginapakita ni Jesus nga makatarungan imaw bilang ueo it kongregasyon. Halimbawa, kon may nakaobra it seryosong saea sa kongregasyon, mapinasensyahon imaw kana ag ginataw-an na imaw it tsansa nga maghinuesoe.​—Pah. 2:​2-5.

9. Paalin naton mapaeambo ag mapakita ro pagiging makatarungan? (Tan-awa man ro piktyur.)

⁹ Paalin naton matuead si Jehova? Dapat natong tun-an ro kaisipan ni Jehova ag kon paalin na ginapakita ro pagiging makatarungan. (Sant. 3:17) Ro mga ginikanan nga ginatuead si Jehova hay owa nagapaabot it sobra sa kon ano ro makayang obrahon it andang mga unga. Ro mayad nga halimbawa kara hay si Jacob, nga mabasa sa Genesis 33:​12-14. Dapat mang likawan it mapainubuson ag makatarungan nga mga ginikanan nga ikumpara ro andang unga sa iba. Ro mga elder hay dapat man mangin makatarungan. Ro sangka paagi nga mapakita nanda ra hay paagi sa pagsuporta sa nangin desisyon it kaeabanan nga mga elder kon owa man it may naeapas nga prinsipyo sa Biblia. (1 Tim. 3:​2, 3) Ag tanan kita hay dapat magtinguha nga maintindihan kon ano ro ginaisip ag ginabatyag it iba maskin pa iba ra sa atong opinyon. (Roma 14:1) Huo, tanan kita sa kongregasyon hay dapat magtinguha nga “ipakita ro [atong] kabuot [o, pagiging makatarungan] sa tanan nga mga tawo.”​—Fil. 4:5.

MAPINASENSYAHON SI JEHOVA

10. Sa anong mga sitwasyon nagpakita si Jehova it pagkamapinasensyahon?

¹⁰ Posibleng napansin mo nga owa naila maghueat ro bugaeon nga mga tawo. Bukon gid sanda it mapinasensyahon. Pero iba gid kanda si Jehova. Owa gid it may makatupong sa anang pagkamapinasensyahon! Halimbawa, ku panahon ni Noe, ginhambae na nga magahueat imaw it 120 nga dag-on bago na dueaon ro maeain nga mga tawo. (Gen. 6:3) Ngani may panahon pa si Noe nga pabahueon ro anang mga unga ag magpatindog it arka kaibahan ro anang pamilya. Ku ulihi, mapinasensyahon nga namati si Jehova kay Abraham kat ginpangutana na ro parti sa pagwasak sa Sodoma ag Gomorra. Ro bugaeon nga tawo hay posibleng maghambae nga, ‘Owa ka’t karapatan nga pangutan-on ako!’ Pero dahil mapainubuson si Jehova, nangin mapinasensyahon imaw kay Abraham.​—Gen. 18:​20-33.

11. Base sa 2 Pedro 3:​9, ham-an nagapakita si Jehova it pagkamapinasensyahon sa atong panahon makaron?

¹¹ Nagapakita man si Jehova it pagkamapinasensyahon sa atong panahon makaron. Nagahueat imaw sa anang ginpili nga panahon para tapuson rayang maeain nga sistema. Ham-an mapinasensyahon imaw? Dahil ‘owa imaw it gusto nga ro bisan sambato katon hay maduea, kundi gusto nana nga magbueag kita sa atong mga saea.’ (Basaha ro 2 Pedro 3:9.) Isipa ra: Dahil mapinasensyahon si Jehova, minilyon nga mga tawo ro nangin amigo na. Ag nagaeaum kita nga abu pa ro mangin amigo nana. Pero, may limitasyon ro anang pagkamapinasensyahon. Palangga na ro mga tawo, pero owa na sanda ginapasugtan nga magpinagusto eang. Indi na pagpasugtan nga magpadayon ro kaeainan.​—Hab. 2:3.

12. Paalin ginatuead ni Jesus ro pagkamapinasensyahon ni Jehova?

¹² Paalin gintuead ni Jesus ro anang Ama? Sa sueod it linibo nga dag-on, hatuead ni Jesus ro pagkamapinasensyahon ni Jehova. Nakita na kon paalin ginsamaran ni Satanas ro reputasyon ni Jehova ag ku matutom nga mga tawo. (Gen. 3:​4, 5; Job 1:11; Pah. 12:10) Nakita na man ro pag-antus it mga tawo. Imadyina kon mauno nana kagusto nga ‘waskon ro mga inubrahan ku Yawa’! (1 Juan 3:8) Ano ro nakabulig kay Jesus nga maghueat it mapinasensyahon hasta nga hambaeon kana ni Jehova nga pwede na eon dueaon ro mga inubrahan ku Yawa? Ro sambilog nga rason hay dahil mapainubuson si Jesus. Sayod na nga si Jehova eang ro magadesisyon kon hin-uno na ra tapuson.​—Binu. 1:7.

13. Paalin ag ham-an nangin mapinasensyahon si Jesus sa anang mga apostoles?

¹³ Kat iya si Jesus sa eugta, nangin mapinasensyahon man imaw sa anang mga apostoles. Halimbawa, kat pauman-uman nga nagbinais ro mga apostoles kon sin-o kanda ro pinakaeabaw, owa gid nag-isip si Jesus nga indi eon sanda magbag-o. Kundi, padayon imaw nga nangin mapinasensyahon. (Luc. 9:46; 22:​24-27) Nagasalig imaw nga matun-an man nanda nga mangin mas mapainubuson. May mga panahon baea nga naoobra mo gihapon ro pareho nga saea? Kon huo, sigurado nga nagapasaeamat ka gid dahil may mapainubuson ag mapinasensyahon kita nga Hari.

14. Ano ro makabulig katon nga mangin mas mapinasensyahon?

¹⁴ Paalin naton matuead si Jehova? Kon tun-an naton ro “huna-hona [o, kaisipan] ni Cristo” mas matuead naton ro kaisipan ni Jehova. (1 Cor. 2:16) Ano ro makabulig katon nga masayran ro kaisipan ni Cristo? Ro sambilog sa pinakaimportante nga paagi hay ro pagbasa it regular parti sa kabuhi ni Jesus sa Biblia. Kinahang-ean rayon natong pamaeandungan ro ginasugid kara parti sa kaisipan ni Jesus. Ag kinahang-ean man natong mangamuyo kay Jehova nga buligan kita nga matuead ro pagkamapainubuson ag pagkamapinasensyahon ni Jesus. Habang mas ginatun-an naton ro kaisipan ni Jesus, mas matuead naton si Jehova kon mangin mapinasensyahon kita sa iba ag sa atong sarili.​—Mat. 18:​26-30, 35.

GINAPADUNGGAN NI JEHOVA RO MGA MAPAINUBUSON

15. Magtao it pilang halimbawa nga ginpadunggan ni Jehova ro mapainubuson nga mga tawo. (Salmo 138:6)

¹⁵ Basaha ro Salmo 138:6. Sangka pribilehiyo gid para sa mapainubuson nga mga tawo nga mapadunggan it Soberano sa bilog nga uniberso! Tan-awa ro pilang halimbawa it mga tawo nga ginpakanaba it iba pero ginpadunggan ni Jehova sa sueod it ginatos nga dag-on. Ro pila kanda hay bukon naton it kilaea, pero gin-eakip sanda sa Biblia. Ginpasueat ni Jehova kay Moises ro parti kay Debora, nga matutom nga sueoguon it pamilya nanday Isaac ag Jacob sa sueod it mga 125 nga dag-on! Maskin sangkiri eang ro atong nasayran parti sa rayang bayi, ginsigurado ni Jehova nga masueat ro parti kana para ipakita nga palangga na gid imaw. (Gen. 24:59; 35:​8, ftn.) Pagtaliwan it ginatos nga dag-on, ginpili ni Jehova ro bataon nga si David nga manogbantay it karnero para mangin hari it Israel. (2 Sam. 22:​1, 36) Owa magbuhay pagkatapos nga gin-unga si Jesus, nagpadaea ro Dyos it anghel sa mapainubuson nga mga manogbantay it karnero ag gintaw-an sanda it pribilehiyo nga unang makasayod nga gin-unga ro Mesias sa Betlehem. (Luc. 2:​8-11) Ag kat gindaea nanday Jose ag Maria si Jesus sa templo, gintaw-an ni Jehova it pribilehiyo ro daywang ka magueang nga sanday Simeon ag Ana nga makita ro Anang Unga. (Luc. 2:​25-30, 36-38) Huo, “maskin mataas si Jehova, nakikita na ro mapainubuson”!

16. Paalin gintuead ni Jesus ro paagi it pagtratar ku anang Ama sa iba?

¹⁶ Paalin gintuead ni Jesus ro anang Ama? Pareho ku anang Ama, ginpadunggan ni Jesus ro mga tawo nga ginpakanaba it iba. Gintur-an na parti sa Ginharian it Dyos ro ‘ordinaryo nga mga tawo ag owa it tinun-an.’ (Binu. 4:13; Mat. 11:25) Ginpamayad na man ro mga may masakit ag gin-obra na ra sa paagi nga mabatyagan nanda ro pagpalangga ag pagrespeto. (Luc. 5:13) Ku gabii bago mamatay si Jesus, ginhugasan na ro mga siki it anang mga apostoles, nga ueobrahon it sangka sueoguon. (Juan 13:5) Ag bago imaw nagbalik sa eangit, gintaw-an na it pribilehiyo ro tanan nanang sumoeunod ag pati man kita nga obrahon ro pinakaimportante nga ueobrahon—ro pagbulig sa iba nga mabaton ro kabuhi nga owa’t katapusan.​—Mat. 28:​19, 20.

17. Paalin naton mapadunggan ro iba? (Tan-awa man ro piktyur.)

¹⁷ Paalin naton matuead si Jehova? Mapadunggan naton ro mga tawo kon ginasugid naton kanda ro mayad nga balita maskin alin man ro andang estado sa kabuhi, lahi, o tinun-an. Ag mapadunggan man naton ro atong mga igmanghod kon ginatan-aw naton sanda nga mas mataas kaysa katon, maskin alin man ro atong ikasarang o pribilehiyo sa kongregasyon. (Fil. 2:3) Masadya si Jehova kon “manguna” kita sa pagpakita it pagpadungog sa kada isaea sa rayang paagi ag sa iba pa.​—Roma 12:​10, NWT; Sof. 3:12.

18. Ham-an gusto mong tuearon ro pagkamapainubuson ni Jehova?

¹⁸ Kon tinguhaan natong tuearon ro pagkamapainubuson ni Jehova, mangin mas madali kitang paeapitan, mangin mas makatarungan, ag mangin mas mapinasensyahon. Ag mapadunggan naton ro iba pareho sa ginaobra ni Jehova. Kabay nga ro atong mga pagtinguha nga mangin mas maeapit sa atong mapainubuson nga Dyos hay makabulig katon nga mangin mas espesyal sa anang panan-aw!—Isa. 43:4.