Abu ro nagpundo sa relihiyuso nanda nga ginaobra tungod owa sanda nakabaton it eugpay ag bulig kara. Ham-an dapat ka mag-agto sa miting it mga Saksi ni Jehova? Ag ano ro imong mataeopangdan kara?

Makabatyag it kalipay kaibahan ku mga tawo nga may pagpalangga ag kabaeaka. Ku unang siglo, gin-grupo ro mga Cristiano nga gintawag kongregasyon, may una sanda mga miting sa pagsimba sa Dyos, pagtuon sa Kasueatan, ag pagpabakod sa kada isaea. (Hebreo 10:24, 25) Tungod sa andang pagpalangga, nakabatyag sanda nga kaibahan gid nanda ro andang matuod nga mga amigo—mga igmanghod sa espiritwal. (2 Tesalonica 1:3; 3 Juan 14) Hasta makaron, ginatuead man namon ruyong paagi, ag nakabatyag kami it pareho man nga kasadya.

Masayran mo kung paano i-aplikar ro prinsipyo sa Biblia. Ku tyempo it Biblia, ro mga eaki, bayi, ag mga unga hay nagti-eipon. Naggamit it Biblia ro kwalipikado nga manogturo agud i-aplikar ro mga prinsipyo sa atong kabuhi. (Deuteronomio 31:12; Nehemias 8:8) Tanan makapartisipar sa pagtuon ag pagkanta, mapabatyag man nanda ro andang pag-eaum bilang Cristiano.—Hebreo 10:23.

Mapabakod ro imong pagtuo sa Dyos. Ginhambae ni Pablo sa isaea ka kongregasyon kato: “mabahoe gid ro akong handum sa pagpakigkita kinyo, . . . nga kita magbueoligan para sa ikabaskog it kada isaea paagi sa atong pagtuo sa Dyos.” (Roma 1:11, 12) Sa miting, pirme kami gatipon kaibahan it among mga igmanghod agud mapabakod ro among pagtuo ag maaplikar ro prinsipyo it Biblia.

Ginakangay ka namon nga mag-agto sa among masunod nga miting. Masadya kami nga abi-abihon ka! Owa raya it bayad.

• Siin nabase ro pamaagi it among miting sa kongregasyon?

• Paano makatao kamon it kamaeayran ro pag-agto sa Cristianong miting?

Bisan mabudlay ro daean sa taeon o maeain ro tyempo, padayon gihapon kami nga nagaagto sa among Cristianong miting. Bisan nakabatyag it kalisod ag kagaoy sa obra, ham-an it padayon gihapon nagapakig-iba ro mga Saksi ni Jehova sa andang masigkatumoeuo?

Makabulig raya nga mangin mayad kami nga tawo. Nagsueat si Pablo para sa mga kongregasyon: “Magkabaeaka kita sa kada isaea.” (Hebreo 10:24) Ginapalig-on kami it apostol nga magpakita it kabaeaka sa kada isaea. Kon makilaea namon ro mga Cristianong pamilya, masayran namon kon paano nanda hatakuran ro kabudlay ag problema nga pareho man sa amon naagyan ngani makabulig man rato kamon.

May una kami mabakod nga pag-amigohan. Sa among miting, bukon eang kami it magkakilaea kundi maeueot man kami nga mag-amigo. Kon amat, gatipon man kami agud magkasadya. Ano ro epekto it ruyong pagpakig-iba? May una kami pag-apresyar ag mabakod nga pagpalangga sa kada isaea. Ngani, kung makaagi it mga problema ro among mga amigo handa kami sa pagbulig kanda tungod ruyon sa maeueot nga pag-amigohan. (Hulubaton 17:17) Nagatipon kami bilang kongregasyon, nga nagapakita it “pagkabaeaka sa kada isaea.”—1 Corinto 12:25, 26.

Ginapalig-on ka namon nga magpili it mga amigo nga nagaobra it mayad sa panueok it Dyos. Makita mo ron sa mga Saksi ni Jehova. Indi pagpasugti nga may magpapundo kimo sa pagpakig-iba kamon.

• Ano ro kamaeayran nga mabaton namon sa pagpakig-iba sa amon mga miting?

• Hin-uno mo gusto mag-agto sa among miting ag makilaea kami?

Ro mga Cristiano kato hay nagakanta, gapangamuyo, gatuon ag gabasa it Kasueatan—ag owa raya it mga ritwal. (1 Corinto 14:26) Makaruyon man ro ginaobra sa among mga miting.

Instruksyon nga nabase sa Biblia ag praktikal. Kon Sabado ag Domingo, may una 30 ka minutos nga pamulongpulong sa Biblia nagaturo kon paano ro Kasueatan makaapektar sa aton kabuhi ag sa nagakaeatabo makaron. Tanan kami ginapalig-on nga sundan ro pagbasa it amon nga Biblia. Sundan dayon it sang oras nga pagtuon sa “Ang Lalantawan”, ro tanan hay pwede makapartisipar sa pagtuon it artikulo sa tueon-an nga edisyon it Ang Lalantawan. Makabulig ra agud maaplikar sa among kabuhi ro eaygay it Biblia. Raya nga gaeamiton hay ginagamit man sa pagtuon sa sobra 110,000 ka kongregasyon sa bilog nga kalibutan.

Ginabuligan kami agud mahanas ro among pagturo. Mag-euwas sa Sabado o Domingo may una pa kami isaea ka miting ruyon hay may tatlo ka parte nga programa ro Ang Aton Cristianong Pagkabuhi kag Pagministeryo, nabase ron sa kada buean nga Workbook ro Pagkabuhi ag Pagministeryo nga Miting. Ro una, Mga Bahandi sa Pulong sang Dios, magabulig agud mangin pamilyar kami sa pila ka parte it Biblia nga abanse nga ginbasa it kongregasyon. Pangaywa, Mangin Epektibo sa Ministeryo, may una ra demonstrasyon nga makabulig kon paano ipaathag ro Biblia sa iba. May una manog-eaygay agud mahanas ro atong pagbasa ag pagturo. (1 Timoteo 4:13) Ro ulihi nga parte, Pagkabuhi bilang Cristiano, gabulig ra kon paano maaplikar ro mga prinsipyo it Biblia sa kada adlaw nga pagkabuhi. May una nga pangutana ag sabat nga pagtuon agud maeubtan gid namon ro Biblia.

Kon makaatend ikaw sa among mga miting, manamian ka gid sa ginaturo it Biblia nga imo mabaton.—Isaias 54:13.

• Ano ro imong mabatian sa miting it mga Saksi ni Jehova?

• Siin sa amon mga miting ro gusto mo agtonan?

Nakita mo baea sa litrato kon paano magpang-eambong ro mga Saksi ni Jehova kon naga-adto sa mga miting? Ham-an it importante kamon nga mangin presentable ro among pang-eambong?

Para ipakita ro pagrespito sa amon Dyos. Owa gatan-aw ro Dyos kon mauno ro atong itsura. (1 Samuel 16:7) Pero kon nagatipon kita sa pagsimba kana, gusto gid naton nga magpakita it pagrespito kana ag sa aton masigkatumoeuo. Kon mag-atubang ka sa hari o presidente, kinahang-ean nga presentable ro imong pang-eambong tungod may pagrespito ka kanda. Makaruyon man kami kung mag-agto sa amon mga miting. Gusto gid namon magpakita it pagrespito sa among “Hari nga owa-it-katapusan”, si Jehova nga Dyos ag sa amon lugar it pagsimba.—1 Timoteo 1:17.

Para ipakita ro mayad nga pamatasan nga amon natun-an. Nagpalig-on ro Biblia sa mga Cristiano nga mangin “maugdang ag may malinong nga panghuna-hona”. (1 Timoteo 2:9, 10) Ro isaeang ka tawo nga “maugdang” hay owa nagasuksok it eambong nga gapakita-kita, gapangtintar o gapukaw it baeatyagon it isaea. Kon ro isaea hay may una “malinong nga panghuna-hona” makalikaw imaw sa klase it eambong nga maeaw-ay tan-awon. Bisan pa may makaraya nga prinsipyo, ikaw man gihapon ro gapili it eambong nga isuksok mo. Ro amon presentable nga pang-eambong “nagapanami sa panudlo it atong Manog-euwas ag “nagahimaya sa atong Dyos”. (Tito 2:10, NW; 1 Pedro 2:12) Makita it iba ro among presentable nga pang-eambong agud simbahon si Jehova.

Bisan owa ka it pormal nga eambong pwede kaman gihapon makaagto sa Kingdom Hall. Indi man kinahang-ean nga magsuksok ka it maeahaeon nga eambong, ro importante presentable, malimpyo ag nagakabagay.

• Ham-an it importante nga mangin presentable ro amon pang-eambong kon nagasimba sa Dyos?

• Ano ro prinsipyo nga amon ginasunod sa pag-eambong ag pamustura?

Kon nagatuon ka kaibahan it mga Saksi ni Jehova sa Biblia, abanse mo nga ginahandaan ro inyong pagatun-an. Pwede mo man raya obrahon bago ka mag-agto sa mga miting. Mabahoe ro imong mabenepisyohan kon obrahon mo ra it regular.

Sayura kon san-o ag siin ka matuon. Siin ka nga lugar makakonsentrar it pagtuon? Pwede man sa agahon bago umpisahan ro imong obra o sa gabii kon tueog eon ro imong mga unga? Bisan indi ka makatuon it mabuhay, magsiparar it oras nga pwede ka magtuon ag indi pagpasugti nga may magtub-eag kimo. Mag-usoy it malinong nga lugar, ag boe-a o paeonga ro mga pwede makaistorbo kapareho it radyo, tv, ag cellphone. Magpangamuyo anay bago ka magtuon, magabulig ra agud maduea sa imong painu-ino ro mga kabaeaka sa kabuhi ag makakonsentrar sa pagtuon ku Bisaea it Dyos.—(Filipos 4:6, 7).

Kuriti ro imong ginatun-an, ag maghanda it sabat. Sayura anay ro pinakapunto it imong ginatun-an. Tan-awa ro titulo it artikulo o kapitulo, ag analisaha kon paano ro mga subtitulo may kaeabtanan sa bilog nga tupiko, ag tan-awa ro mga litrato ag ro mga repaso nga pangutana para madiin ro pinakapunto. Basaha ro kada parapo, ag usuya ro sabat sa pangutana. Tan-awa ag basaha ro mga teksto ag analisaha kon paano raya nagabulig sa ginatun-an. (Binuhatan 17:11) Kon masabat mo ro pangutana, kuriti ro mga tinaga sa parapo nga makabulig kimo agud madumduman mo ro imong sabat. Sa miting, pwede ka makasabat kon gusto mo paagi sa imong ginhanda nga komento.

Paagi sa pag-usisa it nagkaeain-eain nga punto nga pagatun-an sa miting kada Domingo, nagadugang ro imong “taeaguan it manggad”sa kaaeam it Biblia.—Mateo 13:51, 52, NW.

• Ano ro imong paagi nga obrahon agud maghanda sa mga miting?

• Paano ka maghanda it komento sa miting?

Halin pa kato, gusto ni Jehova nga magtipon ro kada pamilya agud mapabakod ro andang relasyon sa kada isaea. (Deuteronomio 6:6, 7) Kada Domingo, nagatao gid it oras ro mga Saksi ni Jehova para sa andang pampamilya nga pagsimba. Nagapili sanda it malinong nga lugar agud istoryahan ro espiritwal nanda nga mga kinahang-eanon. Bisan sambilog ka eang, pwede mo tun-an ro gusto mo nga tupiko sa Biblia.

Magabulig nga mangin maeapit kay Jehova. “Magpaeapit kamo sa Dyos, ag ro Dyos magapaeapit kinyo.” (Santiago 4:8) Kon matun-an naton sa Biblia ro personalidad ag mga gin-obra ni Jehova maga-eapit pagid kita kana. Sa pampamilya nga pagsimba, ro isaea ka paagi hay ro pagbasa it mabaskog sa Biblia, pwede man nga sundon ro bahin nga naiskedyul sa Miting para sa Pagkabuhi ag Pagministeryo. Ro kada isaea hay may hueay sa pagbasa it pila ka parte it Biblia, ag istoryahan nanda ro andang natun-an.

Magabulig nga mangin maeapit ro kada miembro it pamilya. Kon tun-an it mag-asawa, ginikanan, ag mga unga ro Biblia hay magabakod pagid ro andang relasyon sa kada isaea. Kinahang-ean nga masadya ag malinong raya nga oras it pagtuon. Ro mga ginikanan pwede makapili it praktikal nga tupiko nga pagatun-an depende sa edad it andang mga unga, pwede man gamiton ro Ang Lalantawan ag Magmata! o halin sa Website nga jw.org. Kon may problema ro imo nga unga sa eskuylahan pwede imaw istoryahon agud mabuligan imaw nga atubangon ra. Pwede nyo tan-awon ro JW Broadcasting (tv.jw.org) pagkatapos dueongan nga tun-an. Makapraktis man kamo it kanta nga kantahon sa mga miting ag manami kon may una man nga meryenda pagkatapos it pampamilya nga pagsimba.

Espesyal ra nga oras kada Domingo sa pagsimba kay Jehova bilang pamilya, makabulig ra agud masadyahan ro tanan sa pagtuon ku Bisaea it Dyos. Pakamaayuhon gid ni Jehova ro inyo nga pagpangabudlay.—Salmo 1:1-3.

• Ham-an ginataw-an gid namon it oras ro pampamilya nga pagsimba?

• Ano ro obrahon it mga ginikanan agud magsadya ro andang pagtuon bilang pamilya?

Ham-an masadya gid rayang mga tawo? Nagaagto sanda sa among asembliya. Pareho ku hauna nga mga sumueonod it Dyos ginsugo sanda nga magtipon tatlong beses sa kada dag-on, ngani nagatipon kami sa mabahoe nga grupo. (Deuteronomio 16:16) Kada dag-on, may amon man tatlo nga pagtilipon: may daywang ka tig-sang adlaw nga pangsirkito nga asembliya ag tatlong adlaw nga pangrehiyon nga kunbensyon. Ano ro among mabenepisyohan sa rayang pagtilipon?

Nagabakod ro among Cristianong pag-iligmanghod. Ro mga Israelita hay nagkasadya man sa pagdayaw kay Jehova sa pagtipon sa “mabahoe nga grupo,” masadya kami sa pagsimba kana sa espesyal nga mga pagtilipon nga magkaeaibahan. (Salmo 26:12; 111:1) Sa rayang mga pagtilipon, makilaea ag makaibahan namon ro mga Saksi halin sa maeayo nga mga lugar ag kongregasyon. Kon tru-adlaw, magkaibahan kami nga nagakaon sa rayang lugar it ginatiponan ngani mas eabi gid nga kasadya ro amon nga nabatyagan kaibahan it among mga igmanghod. (Binuhatan 2:42) Mabatyagan gid namon igto ro pagpalangga nga nagahiusa kamon bilang bilog kalibutan nga pag-iligmanghod.—1 Pedro 2:17.

Nagabulig kamon ra nga mag-uswag sa espiritwal. Ro mga Israelita man hay nakabenepisyo tungod anda nga “naeubtan ro mensahe” Kasueatan nga ginpaathag kanda. (Nehemias 8:8, 12) Gina-apresyar gid namon ro mga pagturo halin sa Biblia nga aton nabaton sa aton mga asembliya. Ro kada tema sa programa hay base sa Kasueatan. Ro makapabakod nga pamulongpulong, demonstrasyon, ag mga simposium makabulig kon paano maaplikar ro kabubut-on it Dyos sa atong kabuhi. Napalig-on kami sa amon mga nabatian nga mga eksperiensya it ratong mga nakaeampuwas sa mga kalisud sa pagkabuhi bilang Cristiano. Sa pangrehiyon nga mga kunbensyon, ro mga de-kustyum nga drama hay nagatao it praktikal nga mga leksyon. Sa kada asembliya may una nagadedikar it andang kabuhi sa Dyos paagi sa bawtismo.

• Ham-an masadya ro mga asembliya?

• Ano ro imong mabenepisyohan sa pag-agto sa mga asembliya?

Bago namatay si Jesus, naghambae imaw: “Ag rayang Mayad nga Balita nahanungod sa Ginharian iwali sa bilog nga kalibutan, bilang saksi sa tanan nga nasyon, ag dayon magaabot ro katapusan.” (Mateo 24:14) Paano natuman ro bilog kalibutan nga pagwali? Sa pagsunod it pagsueondan nga ginturo ni Jesus kat iya imaw sa eugta.—Lucas 8:1.

Gatinguha kami nga maagtunan ro mga tawo sa andang baeay. Ginhanas ni Jesus ro anang mga disipulo sa pagwali sa kada pamaeay. (Mateo 10:11-13; Binuhatan 5:42; 20:20) Ku unang siglo nga mga ebanghelyo, gintaw-an sanda it kaugalingon nga mga teritoryo kung siin sanda gawali. (Mateo 10:5, 6; 2 Corinto 10:13) Pareho man makaron, ro aton nga pagwali hay naorganisa, ag ro kada kongregasyon hay may andang mga teritoryo nga ginawalihan. Nagabulig ra nga maobra namon ro ginsugo ni Jesus nga “walihan ro mga tawo ag magpanaksi it maid-id.”—Binuhatan 10:42, NW.

Gatinguha gid kami nga maistorya ro mga tawo bisan siin. Nagtao man si Jesus it mayad nga pagsueondan sa pagwali sa mga tawo sa pampubliko nga lugar, kapareho sa mga baybayon o banwa. (Marcos 4:1; Juan 4:5-15) Ginaistorya man namon ro mga tawo parti sa Biblia bisan sa daean, sa lugar it negosyo, plasa, ag sa telepono. Ginapanaksihan man namon ro amon mga kaeapit-baeay, kaibahan sa obra, kaeskuyla, ag amon mga paryente sa kombenyente nga oras. Tanan raya nga pagpangabudlay nangin posible sa minilyon nga mga tawo sa bilog nga kalibutan agud makabati it mayad nga balita parti sa kaeuwasan.—Salmo 96:2.

Indi baea nga mayad man nga isugid mo sa iba ro mayad nga balita parti sa Ginharian it Dyos ag sa pagaobrahon nana sa paeaabuton? Indi pagtagua rayang mensahe. Isugid eagi ra!

• Ano ro “mayad nga balita” nga dapat isugid?

• Paano tuearon it mga Saksi ni Jehova ro paagi it pagwali ni Jesus?

Ro termino nga “payunir” nagapatuhoy sa mga tawo nga nagaagto sa iba nga lugar agud umpisan ro isaea ka hilikuton nga pagatuearon man it iba. Si Jesus payunir man tungod ginpadaea imaw iya sa eugta agud umpisahan ro nagaeuwas-kabuhi nga ministeryo ag mabuligan ro iba nga maeuwas. (Mateo 20:28) Sa makaron, ginatuead man it mga sumueonod ni Jesus nga ‘maghimo it mga disipulo.’ (Mateo 28:19, 20) Ro iba nagsueod bilang payunir.

Ro payunir hay bug-os panahon nga manogwali. Tanan nga mga Saksi ni Jehova hay nagawali it mayad nga balita. Ginpasimple ku iba ro andang kabuhi agud makasueod bilang regular pioneer, nga nagabuoe it 70 ka oras kada buean sa pagwali nga hilikuton. Para maobra ra ginbuhinan nanda ro andang trabaho ag nag-usoy it sideline. May una man iba nga ginpili agud mangin special pioneer nga nagawali kung siin ro mas nagakinahang-ean nga nagabuoe it 130 oras o sobra pa kada buean. Ro mga payunir hay kontento sa andang pagkabuhi ag nagasalig kay Jehova nga itao nana ro andang kinahang-eanon sa adlaw-adlaw. (Mateo 6:31-33; 1 Timoteo 6:6-8) Sa mga indi makaabot ku oras it mga payunir pwede man sanda makasueod bilang auxiliary pioneer nga may ginaabot nga oras sa pagwali nga 30 o 50 ka oras kada buean.

Ro payunir hay ginapahueag it andang pagpalangga sa Dyos ag sa mga tawo. Kapareho ni Jesus, nakita man naton ro makaeueo-oy nga kahimtangan it mga tawo nga kueang sa espiritwal. (Marcos 6:34) May una kita natun-an nga makabulig kanda nga may mayad nga pag-eaum sa paeaabuton. Ro pagpalangga sa atong mga isigkatawo ro nagapahueag sa payunir nga itao ro andang kusog ag oras nga isugid sa iba ro mayad nga balita. (Mateo 22:39; 1 Tesalonica 2:8) Tungod kara, magabakod ro andang pagtuo, magaeapit pagid sa Dyos, ag makabatyag it matuod nga kasadya.—Binuhatan 20:35.

• Ano ro payunir?

• Ano ro nagpahueag sa iba nga magpayunir?

Kato pa kilaea eon ro mga Saksi ni Jehova sa andang teokratiko nga pagtuon. Para gid raya sa mga nagawali it Ginharian nga ueobrahon agud hanason sanda ag ‘mahimo ro tanan nanda nga katungdanan’ sa pagministeryo.—2 Timoteo 4:5.

Pioneer Service School. Kon makasang dag-on eon ro mga payunir sa andang pribelihiyo pwede eon sanda maka-eskuyla sa rayang an-um nga adlaw nga pagtuon sa mga Kingdom Hall. Gabulig ra sa mga payunir nga magaeapit gid kay Jehova, nga mas epektibo sa tanan nga klase it pagministeryo, ag magpadayon nga masaligan sa rayang ueobrahon.

School for Kingdom Evangelizers. Rayang daywang buean nga paghanas para sa eksperyinsyado nga mga payunir nga handa aywanan ro andang mga pagkabutang ag magbulig kung siin may nagakinahang-ean. Nagahambae sanda, “Iya ako! Ipadaea ako!” sa pagtuead sa pinakabantog nga Ebanghelisador iya sa eugta, si Jesu-Cristo. (Isaias 6:8, NW; Juan 7:29) Sa pagsaylo nanda sa iba nga lugar kinahang-ean nanda nga pasimplehon ro anda nga kabuhi. Ro kultura , klima, ag pagkaon hay eain gid sa andang hasanayan. Kinahang-ean nanda magtuon it bag-o nga linggwahe. Para raya sa mga mag-asawa ag owa’t asawa nga mga igmanghod nga nagaedad it 23 asta 65. Makabulig rayang eskuylahan nga mapa-uswag ro espiritwal nga ugali ag abilidad agud magamit sanda ni Jehova ag ku anang organisasyon.

Watchtower Bible School of Gilead. Ro Hebreo nga termino nga “Gilead” nagakahueogan it “Tinumpok nga Saksi.” Ku 1943, nag-umpisa ro Gilead ag may una sobra 8,000 ka nagtapos it pagtuon, ag ginpadaea sanda bilang mga misyonero nga nagapanaksi “hasta sa pinakapunta it eugta.” (Binuhatan 13:47, NW) Halimbawa, ro hauna nga nagtapos hay ginpadaea sa Peru, kung siin owa pa it kongregasyon kato. Makaron may una eon sobra 1,000. Sa Japan mat-a, kat pag-abot it mga misyonero, owa pa sa napueo ro mga Saksi sa andang lugar. Pero makaron may una eon sobra 200,000. Ro limang buean nga paghanas sa Gilead hay may una maid-id nga pagtuon sa Biblia. Ratong mga espesyal payunir, misyonero, una sa sanga taeatapan, o mga nagatatap sa sirkito sanda ro ginahanas it mayad agud mapabakod ag mapauswag ro hilikuton sa bilog nga kalibutan.

• Ano ro katuyuan it Pioneer Service School?

• Para kanyo raya nga School for Kingdom Evangelizers?