Kon Paano Ginapakahuy-an it Buko’t Matuod nga Relihiyon ro Dyos

Ro Dyos hay gugma, pero ham-an it abu nga relihiyon ro nagaobra it maeain ag nagahambae nga ginarepresentar nanda ro Dyos? Ginapakita kara nga buko’t matuod ruyong mga relihiyon ag ginapakahuy-an nanda ro Dyos. Paano nanda ginapakahuy-an ro Dyos? Ano ro anang ginabatyag parti karon? Ag ano ro anang obrahon?

1. Paano ro mga ginaturo it buko’t matuod nga relihiyon nagapakahuya sa Dyos?

“Gintalikdan [ku buko’t matuod nga relihiyon] ro kamatuoran nahanungod sa Dyos ag ginabaylohan nanda it kapurilan.” (Roma 1:25) Halimbawa, owa nanda ginaturo sa andang mga myembro ro ngaean it Dyos. Pero, ginahambae it Biblia nga dapat gamiton ro ngaean it Dyos. (Roma 10:13, 14) Ginahambae it ibang lider it relihiyon nga kon may maeain nga matabo, pagbuot ron it Dyos. Pero buko’t matuod ron, indi gid mag-obra it maeain ro Dyos. (Basaha ro Santiago 1:13.) Tungod kara, abung tawo ro owa nagapalangga sa Dyos.

2. Paano ro mga ginaobra it buko’t matuod nga relihiyon nagapakahuya sa Dyos?

Owa ginatratar it mayad ku buko’t matuod nga relihiyon ro mga tawo. Ginahambae it Biblia nga ro “mga saea [ku buko’t matuod nga relihiyon] nagtangkas eon hasta sa eangit.” (Pahayag 18:5) Dinag-on eon nga nagaintra ro buko’t matuod nga relihiyon sa politika, nagasuporta sa inaway, ag nangin rason sa kamatayon it abung tawo. Gusto it ibang lider it mga relihiyon nga magmanggaranon, ngani nagapangayo sanda it kwarta sa andang mga myembro. Ginapakita karon nga bukon nanda it kilaea ro Dyos, ag owa sanda it karapatan nga irepresentar imaw.—Basaha ro 1 Juan 4:8.

3. Ano ro ginabatyag it Dyos sa buko’t matuod nga relihiyon?

Kon naakig ka sa mga ginaobra it buko’t matuod nga relihiyon, ano man baea ro ginabatyag ni Jehova? Palangga nana ro mga tawo, pero naakig imaw sa mga lider it relihiyon nga nagapakahuya kana ag nagaobra it buko’t mayad sa andang mga myembro. Nagpromisa imaw nga laglagon ro buko’t matuod nga relihiyon ag “indi eunggid raya makita it uman!” (Pahayag 18:21) Maeapit eon lang gid nga tapuson it Dyos ro buko’t matuod nga relihiyon.—Pahayag 18:8.

TUN-I PA GID

4. Owa ginabaton it Dyos ro tanan nga relihiyon

Abung tawo ro nagapati nga ro tanan nga relihiyon hay kapareho sa iba-ibang daean paagto sa Dyos. Pero matuod gid baea ron? Basaha ro Mateo 7:13, 14, ag talakaya rayon rayang pangutana:

• Ano ro ginahambae it Biblia sa daean paagto sa kabuhi?

Tan-awa ro VIDEO, ag talakaya rayon rayang pangutana.

VIDEO: Ginabaton Baea it Dyos ro Tanan nga Pagsimba?—Porsyon sa Video (3:22)

• Ginahambae baea it Biblia nga ro tanan nga relihiyon hay ginabaton it Dyos?

5. Owa ginapakita it buko’t matuod nga relihiyon ro pagpalangga it Dyos

Ginapakahuy-an it buko’t matuod nga relihiyon ro Dyos sa iba-ibang paagi. Ro sambilog nga paagi hay ro pagsuporta nanda sa inaway. May sangka halimbawa, tan-awa ro VIDEO. Talakaya rayon rayang mga pangutana.

VIDEO: Ro Pagsuporta it Simbahan sa Bilog Kalibutan nga Inaway II (2:22)

• Ano ro gin-obra it mga simbahan ku Bilog Kalibutan nga Inaway II?

• Ano ing ginabatyag sa andang gin-obra?

Basaha ro Juan 13:34, 35 ag 17:16. Talakaya rayon rayang mga pangutana:

• Ano ro nabatyagan ni Jehova sa pag-intra ku buko’t matuod nga relihiyon sa inaway?

• Ro buko’t matuod nga relihiyon ro nangin rason sa maeain nga mga bagay nga nagakatabo. Sa anong mga paagi nakita mo nga owa nanda ginapakita ro pagpalangga it Dyos?

6. Gusto it Dyos nga makaguwa ro mga tawo sa buko’t matuod nga relihiyon

Basaha ro Pahayag 18:4,a ag talakaya rayon rayang pangutana:

• Ano ing nabatyagan kat nasayran mo nga gustong buligan it Dyos ro mga tawo nga ginpataeang it buko’t matuod nga relihiyon?

7. Padayon nga magtuon parti sa matuod nga Dyos

Nagbag-o baea ing pagtan-aw sa Dyos tungod sa maeain nga ginaobra it buko’t matuod nga relihiyon? Imadyina ro sangka unga nga owa nagsunod sa ginaturo it anang tatay. Nag-eaas imaw sa andang baeay ag nag-obra it maeain nga mga bagay. Owa gid naila ro anang tatay sa anang gin-obra. Ham-an it buko’t tama nga basueon ro tatay sa mga maeain nga gin-obra it anang unga?

• Tama baea nga basueon si Jehova ag magpundo nga kilaeahon imaw tungod sa mga gin-obra it buko’t matuod nga relihiyon?

SUMARYO

Ginpakahuy-an it buko’t matuod nga relihiyon ro Dyos paagi sa andang saea nga mga ginaturo ag maeain nga mga ginaobra. Waskon it Dyos ro buko’t matuod nga relihiyon.

Review

• Ano ing nabatyagan sa ginturo ag gin-obra it buko’t matuod nga relihiyon?

• Ano ro ginabatyag ni Jehova sa buko’t matuod nga relihiyon?

• Ano ro obrahon it Dyos sa buko’t matuod nga relihiyon?

SAYURA

Sayura ro daywang paagi nga ginaobra it mga relihiyon nga owa nailaan it Dyos.

“Paeareho Baea ro Tanan nga Relihiyon? Tanan Baea hay Paagto sa Dyos?” (Artikulo sa website)

Ham-an gusto ni Jehova nga simbahon naton imaw kaibahan ro iba?

“Dapat Baea nga Mangin Myembro Kita it Organisado nga Relihiyon?” (Artikulo sa website)

Nagduda ro sangka pari sa anang relihiyon. Pero owa kana rato nakapapundo nga tun-an ro kamatuoran parti sa Dyos.

“Kon Ngaa Naghalin sa Simbahan ang Isa ka Pari” (Magmata!, Pebrero 2015)

Halin pa kato, ginpapati it mga relihiyon ro mga tawo nga ro Dyos hay maeayo ag mapintas. Sayura ro tatlo sa mga kapurilan nga andang ginturo.

“Ngaa Nabudlayan ang Iban nga Higugmaon ang Dios?” (Ang Lalantawan, Nobiembre 1, 2013)