Daywang Bag-o nga Myembro it Nagadumaea nga Grupo

KU OKTUBRE 5, 2024, may espesyal nga pahisayod sa annual meeting: Sanday Brother Jody Jedele ag Jacob Rumph hay ginpili bilang mga myembro it Nagadumaea nga Grupo it mga Saksi ni Jehova. Matutom sandang nagaalagad kay Jehova sa sueod it maabu nga dag-on.

Si Brother Jedele hay gin-unga sa Missouri, U.S.A. ag ro anang mga ginikanan hay mga Saksi ni Jehova. Nagaestar sanda kon siin sangkiri eang ro mga Saksi. Dahil kara, abu ro anang nakilaea nga mga igmanghod halin sa iba-ibang lugar nga nag-agto para magbulig sa pag-preaching sa andang lugar. Ro andang pagpalangga ag paghiusa hay may mabahoe gid nga epekto kana. Nabautismuhan imaw ku Oktubre 15, 1983. Masadya gid imaw sa pagministeryo, ngani pagka-graduate na it high school, nag-regular pioneer imaw ku Septyembre 1989.

Kat bataon pa si Brother Jedele, nagbisita sanda sa Bethel kaibahan ro anang mga ginikanan ag ku anang manghod nga bayi. Nakapalig-on ra kanda nga magmanghod nga mangin goal ro pag-alagad sa Bethel ag pareho nanda ra nga naabot. Si Brother Jedele hay nag-umpisa sa pag-alagad sa Bethel it Wallkill ku Septyembre 1990. Ro una nanang asayment hay sa Cleaning Department ag rayon sa Medical Services.

Sa ruyong panahon, nagauswag ro mga kongregasyon nga nagahambae it Spanish, ngani kinahang-ean nanda it mga brother. Nag-attend si Brother Jedele sa sambilog sa rayang mga kongregasyon ag nagtuon it Spanish. Owa magbuhay, nakilaea na si Damaris, sangka sister nga payunir sa andang sirkito. Ku ulihi, nagpakasae sanda, ag magkaibahan nga nag-alagad sa Bethel.

Ku 2005, naghalin sanday Brother Jedele sa Bethel para diparahon ro anang nanay ag ro mga ginikanan ku anang asawa. Sa ruyong panahon, nag-alagad sanda bilang mga regular pioneer. Nangin instruktor si Brother Jedele sa Pioneer Service School, ag nag-alagad man imaw sa lokal nga Hospital Liaison Committee ag sa Regional Building Committee.

Ku 2013, naimbitahan it uman sanday Brother ag Sister Jedele sa Bethel para sa proyekto it konstruksyon sa Warwick. Umpisa kato, nag-alagad man sanda sa Patterson ag Wallkill. Gin-asayn si Brother Jedele sa Local Design/Construction Department ag sa Hospital Information Services. Ku Marso 2023, gin-asayn imaw bilang kabulig it Service Committee. Sa pagdumdom sa anang mga nangin asayment, naghambae imaw: “Kon makabaton ka it bag-ong mga asayment, makabatyag ka kon amat it kakueba. Pero raya ro panahon nga kinahang-ean mong magsalig kay Jehova dahil imaw ro magabulig kimo nga maobra ro maskin alin man nga asayment nga anang ginapaobra.”

Si Brother Rumph hay gin-unga sa California, U.S.A. Kat bata pa imaw, inactive ro anang nanay. Pero gintinguhaan gihapon ku anang nanay nga tur-an imaw it mga kamatuoran sa Biblia. Ag kada dag-on, nagabisita imaw sa anang lola nga Saksi. Ginbuligan imaw it anang lola nga mangin mas interesado sa kamatuoran, ag nagpa-Bible study imaw sa edad nga 13. Nabautismuhan imaw ku Septyembre 27, 1992. Makalilipay nga na-reactivate ro anang nanay ag nagpa-Bible study man ro anang tatay ag mga igmanghod, padayon sanda nga nag-uswag, ag nagpabautismo.

Kat bataon pa si Brother Rumph, nakita na kon mauno kasadya ro mga payunir. Ngani pagka-graduate na it high school, nagpayunir imaw ku Septyembre 1995. Ku 2000, nagsaylo imaw sa Ecuador para mag-alagad kon siin may mas mabahoe nga pagkinahang-ean. Nakilaea na igto si Inga, sangka payunir nga sister nga taga-Canada, ag ku ulihi nagpakasae sanda. Pagkatapos it andang kasae, nag-alagad sanda sa sangka banwa sa Ecuador kon siin sangkiri eang ro mga publisher. Makaron, rayang kongregasyon hay padayon nga nagauswag.

Ku ulihi, gin-asayn sanday Brother ag Sister Rumph bilang mga special pioneer ag rayon sa pangsirkito nga ueobrahon. Ku 2011, naimbitahan sanda nga mag-eskuyla sa pang-132 nga klase it Gilead. Pagkatapos it andang graduation, nag-alagad sanda sa iba-ibang bansa ag na-enjoy nanda ro iba-ibang klasi it pag-alagad pareho it pag-alagad sa Bethel, pagmisyonero, ag pangsirkito nga ueobrahon. Nagkapribilehiyo man si Brother Rumph nga mangin instruktor sa School for Kingdom Evangelizers.

Dahil sa COVID-19 nga pandemic, nagbalik sanday Brother ag Sister Rumph sa United States. Gin-imbitahan sanda sa Bethel it Wallkill, kon siin nakabaton it pagsanay si Brother Rumph sa Service Department. Ku ulihi, ginpabalik sanda sa branch it Ecuador ag gin-asayn si Brother Rumph nga mag-alagad sa Branch Committee. Ku 2023, ginsaylo sanda sa Warwick. Ku Enero 2024, gin-asayn si Brother Rumph bilang kabulig it Service Committee. Sa pagdumdom na kon siin nga mga lugar imaw nag-alagad, naghambae imaw, “Buko’t ro lugar ro nagapaespesyal sa sangka asayment kundi ro mga tawo nga imong nakaibahan.”

Ginaapresyar naton ro kahugod it rayang mga brother, ag ‘ginapadunggan naton ro mga tawo nga pareho kanda.’—Fil. 2:29, Ro Bag-o nga Kasugtanan, TAP.