Матфейдиҥ сӱӱнчилӱ јары
8 Иисус кырдаҥ тӱжӱп келерде, оныҥ кийнинеҥ кӧп улус ээчий барды. 2 Ого југуш балулу* кижи јууктап келеле, бажырып: «Кайракан, сен кӱӱнзеп ле турган болзоҥ, мени јазып ийериҥ» — деп айтты. 3 Иисус колын чӧйип, ол кижиге тийип, айтты: «Эйе, кӱӱнзеп јадым. Јазыл!» Мынайып айдып ла ийерде, ол кижи јазыла берди. 4 Иисус ого айтты: «Калак, бу керегинде кемге де куучындаба. Барып, абыска кӧрӱнип, Моисейдиҥ јасагы аайынча тайылга экел. Абыстар сениҥ јазылып калганыҥды кӧрзин».
5 Ол Капернау́м дӧӧн кирип келерде, анда јӱс јуучылдыҥ башчызы ого базып келеле, јайнап сурады: 6 «Кайракан, мениҥ јалчым оорузынаҥ улам кыймыктанып болбой барган, ол тыҥ шыралап јат». 7 Иисус ого айтты: «Оны јазып ийерге келерим». 8 Јуучылдардыҥ башчызы айтты: «Кайракан, сен мениҥ айылыма канайып киретеҥ, мен неге де турбас кижи. Сен айдып ла ийзеҥ, ол јазыла берер. 9 Мен бойым јалчы кижи, оноҥ јалчыларым да бар. Бирӱзине айдып јадым: „Бар!“ — ол барып јат, ӧскӧзине: „Кел!“ — дезем, келип јат. Кулыма: „Мыны эт!“ — дезем, эдип јат». 10 Мыны угала, Иисус тыҥ кайкап, оныҥ кийнинеҥ јӱрген улуска айтты: «Чынын айдадым слерге: мындый бек бӱдӱмјилӱ кижини бӱдӱн Израильде кӧрбӧдим. 11 Је айдып јадым слерге, кӱнчыгыштаҥ ла кӱнбадыштаҥ кӧп улус келип, теҥеридеги Башкаруда Авраамла, Исаакла, Иаковло кожо бир столго отургылаар, 12 а теҥеридеги Башкаруныҥ уулдары караҥуйга ташталар. Анда ый-сыгыт ла тиш кыјырты болор». 13 Оноҥ Иисус јӱс јуучылдыҥ башчызына: «Бар, бӱдӱмјиҥ учун кайрал аларыҥ» — деди. Ол ло ӧйдӧ оныҥ јалчызы јазыла берген.
14 Иисус Пётр эшке келеле, оныҥ кайын энезиниҥ эди-каны изип, ооруп јатканын кӧрди. 15 Иисус оныҥ колына тийип ийерде, эди изибей барган. Оноҥ ол туруп, Иисуска курсак белетеп баштады. 16 Эҥир кире берерде, Иисуска ичинде кӧрмӧстӧрлӱ кӧп улус экелдилер. Иисус кӧрмӧстӧрди чыгара сӱрӱп, оору улустыҥ ончозын јаскан. 17 Анайып, Иса́йя судурчы ажыра айдылганы бӱдӱп калды: «Ол бистиҥ кыйын-шырабысты ла оору-јоболысты јоголтып салган».
18 Иисус айландыра кӧп улустыҥ турганын кӧрӧлӧ, бойыныҥ ӱренчиктериле кожо талайдыҥ ары јанына кечип, бардылар. 19 Анда ого јасакка ӱредип турган бир кижи базып келеле: «Ӱредӱчи, сен кайдаар да барзаҥ, сениле кожо барарым» — деди. 20 Је Иисус ого айтты: «Тӱлкӱлерде ичегени бар, куштарда уйазы бар, је кижи Уулында баш та салар јери јок». 21 Оныҥ ӱренчиктериниҥ бирӱзи: «Кайракан, мен озо баштап барып, адамныҥ сӧӧгин јууп салайын» — деерде, 22 Иисус ого: «Мениле кожо бар, божоп калгандарды божогон улус јуузын» — деп айтты.
23 Иисус ӱренчиктериле кемеге отурып алды. 24 Кенетийин талайда тыҥ јоткон башталып, кемеге суу кирип турды, је бу ӧйдӧ Иисус уйуктап јаткан болгон. 25 Ӱренчиктери оны ойгозып ийеле, айттылар: «Кайракан, болушсаҥ, чӧҥӱп барадырыс!» 26 Иисус олорго: «Не коркый бердеер? Кудайга бӱтпей бардаар ба?» — деди. Ол ӧрӧ туруп, јотконды токтодып ийерде, талай тымык боло берди. 27 Ӱренчиктери мыны кӧрӧлӧ, кайкажып айдыштылар: «Бу кандый кӱчтӱ кижи? Јотконды да, талайды да токунадып салды!»
28 Иисус талайдыҥ ӧскӧ јарадында турган, гадар улустыҥ јерине, једип келерде, ого удура божогон улустыҥ сӧӧгин јууйтан јердеҥ ичинде кӧрмӧстӧрлӱ эки кижи чыгып келген. Олор коркышту калју-казыр улус болгон, оныҥ учун ондогы јолло кем де јӱрбейтен. 29 Бу эки кижи кыйгырыжа берди: «Сеге бистеҥ не керек болды, Кудайдыҥ Уулы? Ӧй јеткелекте, бисти кыйнаарга келдиҥ бе?» 30 Олордоҥ ыраак эмес јерде бир јаан ӱӱр чочколор јӱрген. 31 Кӧрмӧстӧр јайнай бердилер: «Бисти сӱретен болзоҥ, туку кабыруда јӱрген чочколорго ий». 32 Иисус олорго: «Барыгар!» — деди. Бу тарый кӧрмӧстӧр улустаҥ чыгала, байагы јӱрген чочколорго кире берерде, бӱдӱн ӱӱр бийик јараттаҥ талайга калып, чӧҥӱп калды. 33 Ол чочколорды кабырган улус калага јӱгӱрип келеле, ончо кӧргӧн немезин, анайда ок ичинде кӧрмӧстӧрлӱ улусла не болгонын тӧкпӧй-чачпай куучындап бердилер. 34 Мыны угала, каланыҥ ончо улузы Иисуска удура чыкты. Иисусты кӧрӱп ийеле, оны олордыҥ јеринеҥ јӱрзин деп јайнай бердилер.